Aholiga koʻrsatilayotgan tibbiy yordam sifatini yanada oshirish, tibbiyot tashkilotlarini chuqur nazariy bilim va amaliy koʻnikmalarga ega yuqori malakali mutaxassislar bilan taʼminlash, shuningdek respublika sogʻliqni saqlash tizimini isloh qilishning ustuvor yoʻnalishlari bilan bogʻliq holda yoʻnalishlar va mutaxassisliklar boʻyicha muayyan mutaxassislarga boʻlgan real ehtiyojdan kelib chiqib, oliy tibbiyot taʼlim muassasalariga qabul kvotalarini tizimli asosda belgilash ishlarini takomillashtirish maqsadida Vazirlar Mahkamasi qaror qiladi:

1. Quyidagilar tibbiyot kadrlarini tayyorlash va malakasini oshirishning amaldagi tizimini yanada takomillashtirishning asosiy yoʻnalishlari etib belgilansin:

Oʻzbekiston Respublikasi Sogʻliqni saqlash vazirligi tizimi tibbiyot tashkilotlari shifokorlarini egallab turgan lavozimiga muvofiqligi yuzasidan muntazam attestatsiyadan oʻtkazish tizimini shakllantirish;

aholi, ayniqsa, qishloq aholisining malakali tibbiy yordamga boʻlgan ehtiyojini toʻliq qanoatlantiradigan shart-sharoitlar yaratish, shifokorlarni ixtisoslashuv yoʻnalishlari boʻyicha uzluksiz professional rivojlantirish jarayonini joriy qilish imkonini beradigan muhitni yaratish;

Oʻzbekiston Respublikasi sogʻliqni saqlash tizimining yoʻnalishlar va mutaxassisliklar boʻyicha real ehtiyojiga muvofiq oliy tibbiyot taʼlim muassasalariga qabul kvotalarini belgilash tartibini yanada takomillashtirish.

2. Quyidagilar:

Oʻzbekiston Respublikasi Sogʻliqni saqlash vazirligi tizimi tibbiyot tashkilotlari shifokorlarini egallab turgan lavozimiga muvofiqligi yuzasidan muntazam attestatsiyadan oʻtkazish tartibi toʻgʻrisidagi nizom 1-ilovaga* muvofiq;

Oʻzbekiston Respublikasi Oliy tibbiyot muassasalariga qabul kvotasini belgilash tartibi toʻgʻrisidagi nizom 2-ilovaga* muvofiq tasdiqlansin.

3. Shunday tartib oʻrnatilsinki, unga koʻra:

Oʻzbekiston Respublikasi Sogʻliqni saqlash vazirligi tizimi tibbiyot tashkilotlarida faoliyat yuritayotgan shifokorlarni egallab turgan lavozimiga muvofiqligi yuzasidan attestatsiyadan oʻtkazish (keyingi oʻrinlarda shifokorlarni attestatsiyadan oʻtkazish deb ataladi) majburiy boʻlib, besh yilda bir marta oʻtkaziladi;

shifokorlar attestatsiyadan Oʻzbekiston Respublikasi Sogʻliqni saqlash vazirligi tomonidan tashkil etiladigan shifokorlarni muntazam attestatsiyadan oʻtkazish boʻyicha attestatsiya komissiyalari (keyingi oʻrinda attestatsiya komissiyasi deb ataladi) tomonidan oʻtkaziladi;

tegishli mutaxassislik boʻyicha belgilangan tartibda berilgan, amaldagi malaka toifasiga ega boʻlgan shifokorlar attestatsiyadan oʻtkazilmaydi.

4. Quyidagilar attestatsiya komissiyalarining asosiy vazifalari etib belgilansin:

shifokorlarni shifokorlik mutaxassisliklarining tegishli yoʻnalishlari boʻyicha muntazam attestatsiyadan oʻtkazish, shu jumladan ularning professional tayyorgarligi va malakasini baholash;

Oʻzbekiston Respublikasi Sogʻliqni saqlash vazirligi tizimi tibbiyot tashkilotlarining kadrlar tarkibini tegishli yoʻnalishlar boʻyicha mutaxassislar bilan mustahkamlashga doir takliflar kiritish;

shifokorlarning tegishli yoʻnalishlar va mutaxassisliklar boʻyicha malakasi va professional darajasini muntazam oshirish tizimini yaratishga oid takliflar ishlab chiqish.

5. Belgilansinki, Oʻzbekiston Respublikasi Prezidentining “Respublika oliy taʼlim muassasalariga oʻqishga qabul qilish parametrlarini shakllantirish mexanizmini yanada takomillashtirish chora-tadbirlari toʻgʻrisida” 2015-yil 23-iyundagi PQ-2360-son qaroriga muvofiq yoʻnalishlar, mutaxassisliklar boʻyicha oliy tibbiy maʼlumotga ega kadrlarga boʻlgan ehtiyoj oliy tibbiyot taʼlim muassasalariga yoʻnalishlar va mutaxassisliklar boʻyicha qabul qilishning keyinchalik bitiruvchilarni ishga joylashtirish bilan bogʻliq holdagi balans hisob-kitoblaridan kelib chiqqan holda belgilanadi.

6.Oʻzbekiston Respublikasi Sogʻliqni saqlash vazirligi:

Iqtisodiy taraqqiyot va kambagʻallikni qisqartirish vazirligi, Oliy va oʻrta maxsus taʼlim vazirligi bilan birgalikda tibbiyot kadrlari bilan taʼminlanganlik va istiqbolda ularga boʻlgan real ehtiyojni har yili baholash asosida oliy tibbiyot taʼlim muassasalariga bakalavriat yoʻnalishlari va magistratura mutaxassisliklari boʻyicha qabul kvotalarini belgilashga doir takliflar ishlab chiqilishini;

Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari bilan birgalikda aniq yoʻnalishlar boʻyicha mutaxassislarga boʻlgan real ehtiyojdan kelib chiqib, oliy tibbiyot taʼlim muassasalariga qabul kvotalarini belgilashga doir takliflarni oʻz vaqtida shakllantirish chora-tadbirlari amalga oshirilishini taʼminlasin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari A.I. Ikramov va B.Y. Xodiyev zimmasiga yuklansin.