“Giyohvandlik vositalari va psixotrop moddalar toʻgʻrisida”gi Oʻzbekiston Respublikasi Qonunini amalga oshirish maqsadida Vazirlar Mahkamasi qaror qiladi:

1. Giyohvandlik vositalari, psixotrop moddalar va prekursorlarning muomalada boʻlishi bilan bogʻliq faoliyatni litsenziyalash toʻgʻrisidagi Nizom 1-ilovaga muvofiq tasdiqlansin.

Giyohvandlik vositalari, psixotrop moddalar va prekursorlarning muomalada boʻlishi bilan bogʻliq faoliyatni litsenziyalash toʻgʻrisidagi Nizom 2001-yil 1-fevraldan boshlab amalga kiritilsin.

2. Quyidagilar:

giyohvandlik vositalari, psixotrop moddalar va prekursorlarning muomalada boʻlishi bilan bogʻliq faoliyatni (tarkibida giyohvandlik moddasi boʻlgan oʻsimliklarni oʻstirishdan tashqari) litsenziyalash boʻyicha Oʻzbekiston Respublikasi Sogʻliqni saqlash vazirligi;

tarkibida giyohvandlik moddasi boʻlgan oʻsimliklarni oʻstirish bilan bogʻliq faoliyatni litsenziyalash boʻyicha Oʻzbekiston Respublikasi Ichki ishlar vazirligi maxsus vakolatli organlar etib belgilansin.

3. Belgilansinki:

giyohvandlik vositalari, psixotrop moddalar va prekursorlarning muomalada boʻlishi bilan bogʻliq faoliyat bilan shugʻullanish huquqini beruvchi litsenziya Oʻzbekiston Respublikasi Giyohvandlik moddalarini nazorat qilish Davlat komissiyasi bilan kelishilgan holda yuqorida koʻrsatib oʻtilgan vakolatli organlar tomonidan tashkil etiladigan litsenziya komissiyalarining qarorlari asosida beriladi;

giyohvandlik vositalari va psixotrop moddalarning muomalada boʻlishi bilan bogʻliq faoliyat ilgari berilgan litsenziyalarga muvofiq faqat 2001-yil 1-iyulgacha amalga oshirilishi mumkin.

4. Belgilansinki, prekursorlarni olib kirish, olib chiqish va tranzit qilish 2001-yil 1-martdan boshlab faqat Oʻzbekiston Respublikasi Sogʻliqni saqlash vazirligi tomonidan beriladigan litsenziyalar asosida amalga oshiriladi.

5. Oʻzbekiston Respublikasi Sogʻliqni saqlash vazirligi, Ichki ishlar vazirligi:

bir hafta muddatda Oʻzbekiston Respublikasi Giyohvandlik moddalarini nazorat qilish Davlat komissiyasi bilan kelishgan holda Giyohvandlik vositalari, psixotrop moddalar va prekursorlarning muomalada boʻlishi, shuningdek tarkibida giyohvandlik moddasi boʻlgan oʻsimliklarni oʻstirish bilan bogʻliq faoliyat bilan shugʻullanish huquqiga litsenziya berish toʻgʻrisidagi masalalarni koʻrib chiqish boʻyicha litsenziya komissiyalarining shaxsiy tarkibini va ular toʻgʻrisidagi nizomni tasdiqlasinlar;

2001-yil 1-iyulgacha mazkur qaror talablariga muvofiq Giyohvandlik vositalari, psixotrop moddalar va prekursorlarning muomalada boʻlishi, shuningdek tarkibida giyohvandlik moddasi boʻlgan oʻsimliklarni oʻstirish bilan bogʻliq faoliyat bilan shugʻullanish huquqi uchun yuridik shaxslarga litsenziyalar qayta roʻyxatdan oʻtkazilishi va berilishini taʼminlasinlar.

7. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T.Sultonov zimmasiga yuklansin.

1. Mazkur Nizom “Giyohvandlik vositalari, psixotrop moddalar toʻgʻrisida”, “Faoliyatning ayrim turlarini litsenziyalash toʻgʻrisida”, “Dorivor vositalar va farmatsevtika faoliyati toʻgʻrisida”, “Fuqarolarning sogʻligʻini muhofaza qilish toʻgʻrisida”gi Oʻzbekiston Respublikasi qonunlariga muvofiq ishlab chiqilgan va giyohvandlik vositalari, psixotrop moddalar va prekursorlarning muomalada boʻlishi bilan bogʻliq faoliyat bilan shugʻullanish uchun litsenziyalar berish tartibini belgilaydi.

2. Quyidagilar:

giyohvandlik vositalari, psixotrop moddalar va prekursorlarning muomalada boʻlishi bilan bogʻliq faoliyat, tarkibida giyohvandlik moddasi boʻlgan oʻsimliklar oʻstirish bundan istisno, bilan shugʻullanish huquqini beruvchi litsenziya Oʻzbekiston Respublikasi Sogʻliqni saqlash vazirligi (keyingi oʻrinlarda matnda litsenziyalovchi organ deb ataladi) tomonidan;

tarkibida giyohvandlik moddasi boʻlgan oʻsimliklar oʻstirish bilan bogʻliq faoliyat bilan shugʻullanish huquqini beruvchi litsenziya Oʻzbekiston Respublikasi Ichki ishlar vazirligi (keyingi oʻrinlarda matnda litsenziyalovchi organ deb ataladi) tomonidan beriladi.

Litsenziya Oʻzbekiston Respublikasi Giyohvandlik moddalarini nazorat qilish Davlat komissiyasi bilan kelishilgan holda litsenziyalovchi organ tomonidan tashkil etiladigan litsenziya komissiyasining qarori asosida beriladi. Litsenziya komissiyasi tarkibiga milliy axborot-tahlil markazining vakili majburiy tartibda kiritiladi.

Litsenziya komissiyasi toʻgʻrisidagi nizom, uning huquq va majburiyatlari Oʻzbekiston Respublikasi Giyohvandlik moddalarini nazorat qilish Davlat komissiyasi bilan kelishgan holda litsenziyalovchi organ tomonidan tasdiqlanadi.

3. Giyohvandlik vositalari, psixotrop moddalar va prekursorlarning muomalada boʻlishi bilan bogʻliq faoliyat bilan shugʻullanish huquqini beruvchi litsenziya “Davlat belgisi” korxonasida suv qogʻoz belgilari qoʻyilgan holda tayyorlangan maxsus blankada rasmiylashtiriladi. Litsenziyalar blankalari qatʼiy hisobda turadigan hujjat hisoblanadi, hisobga olish seriyasiga, tartib raqamiga, qalbakilashtirishdan himoya qilinganlik darajasiga ega boʻladi va maxsus namuna boʻyicha tayyorlanadi.

4. Giyohvandlik vositalari, psixotrop moddalar va prekursorlarning muomalada boʻlishi bilan bogʻliq faoliyat faqat yuridik shaxslar tomonidan amalga oshiriladi va quyidagilarni oʻz ichiga oladi:

giyohvandlik vositalari, psixotrop moddalar va prekursorlarni saqlash;

giyohvandlik vositalari, psixotrop moddalar va prekursorlarni sotish (berish, taqsimlash);

giyohvandlik vositalari, psixotrop moddalar va prekursorlarni tashish;

yangi giyohvandlik vositalari va psixotrop moddalarni ishlab chiqish;

giyohvandlik vositalari, psixotrop moddalar va prekursorlarni ishlab chiqarish (tayyorlash);

giyohvandlik vositalari, psixotrop moddalar va prekursorlardan ishlab chiqarish ehtiyojlari uchun, shu jumladan tibbiyot va veterinariyada foydalanish;

giyohvandlik vositalari, psixotrop moddalar va prekursorlardan ilmiy va oʻquv maqsadlarida foydalanish;

giyohvandlik vositalari, psixotrop moddalar va prekursorlarni yoʻq qilish;

giyohvandlik moddalariga ega boʻlgan oʻsimliklarni oʻstirish.

Giyohvandlik vositalari, psixotrop moddalar va prekursorlardan ichki ishlar, Milliy xavfsizlik xizmati va bojxona organlarining ekspertiza va tezkor-qidiruv faoliyatida foydalanish litsenziyasiz amalga oshiriladi.

5. Giyohvandlik vositalari, psixotrop moddalar va prekursorlarning muomalada boʻlishi bilan bogʻliq bir necha xil faoliyatni amalga oshirish huquqiga litsenziya berilganda litsenziyada ushbu faoliyatning har qaysi turi aniq koʻrsatilishi kerak.

6. Litsenziya egasi yuridik shaxs qayta tashkil etilganda, uning nomi va joylashgan oʻrni (pochta manzili) oʻzgargan taqdirda litsenziya egasi yoki uning huquqiy vorisi qayta roʻyxatdan oʻtgandan keyin bir hafta muddatda litsenziyalovchi organga, koʻrsatilgan maʼlumotlarni tasdiqlovchi tegishli hujjatlarni ilova qilgan holda, litsenziyani qayta rasmiylashtirish toʻgʻrisida ariza berishi shart.

Hujjatlar litsenziyalovchi organga litsenziya egasi tomonidan bevosita yoxud pochta aloqasi vositalari orqali, ularning topshirilgani toʻgʻrisida bildirishnoma olgan holda, yetkazib beriladi.

Litsenziya qayta rasmiylashtirilgunga qadar litsenziat unda koʻrsatilgan faoliyatni amalga oshirishga haqli emas.

Litsenziyani qayta rasmiylashtirishda litsenziyalovchi organ litsenziyalar reyestriga tegishli oʻzgartirishlar kiritadi. Litsenziyani qayta rasmiylashtirish litsenziyani qayta rasmiylashtirish toʻgʻrisidagi tegishli hujjatlar ilova qilingan ariza litsenziyalovchi organ tomonidan olingan kundan boshlab besh kun mobaynida amalga oshiriladi.

7. Giyohvandlik vositalari, psixotrop moddalar va prekursorlarning muomalada boʻlishi bilan bogʻliq faoliyat bilan shugʻullanish huquqini beruvchi litsenziya 5 yil muddatga beriladi. Litsenziya 5 yildan kam muddatga faqat litsenziya oluvchining arizasiga binoan berilishi mumkin. Litsenziyalarni yoki ular boʻyicha huquqlarni boshqa shaxslarga berish taqiqlanadi.

8. Litsenziyaning amal qilish muddati tugagach u litsenziya egasining arizasiga binoan uzaytirilishi mumkin. Litsenziyaning amal qilish muddatini uzaytirish toʻgʻrisidagi ariza litsenziyalovchi organga litsenziyaning amal qilish muddati tugashidan kechi bilan 2 oy oldin berilishi kerak. Litsenziyaning amal qilish muddatini uzaytirish litsenziya olish uchun nazarda tutilgan tartibda litsenziya komissiyasi tomonidan amalga oshiriladi.

9. Hujjatlarni taqdim etish va litsenziyalarni berish ilova qilinayotgan sxema boʻyicha amalga oshiriladi.

10. Litsenziya olish uchun litsenziyalovchi organga quyidagi hujjatlar taqdim etiladi:

litsenziya berish toʻgʻrisidagi ariza, unda quyidagilar koʻrsatiladi: yuridik shaxsning nomi va tashkiliy-huquqiy shakli, uning joylashgan oʻrni (pochta manzili), bank muassasasining nomi va bank muassasasidagi hisob-kitob varaqasining tartib raqami; litsenziyalanayotgan faoliyatning yuridik shaxs tomonidan amalga oshirilishi moʻljallanayotgan turi va faoliyatning koʻrsatilgan turi amalga oshiriladigan muddat;

yuridik shaxsning roʻyxatdan oʻtkazilganligi toʻgʻrisidagi guvohnomaning notarial tasdiqlangan nusxasi;

litsenziya berish toʻgʻrisidagi arizani koʻrib chiqish uchun yigʻim toʻlanganini tasdiqlovchi hujjat;

ichki ishlar hududiy organining binoning giyohvandlik vositalari, psixotrop moddalar va prekursorlarni saqlash boʻyicha texnik talablarga muvofiqligi toʻgʻrisidagi xulosasi;

ichki ishlar hududiy organining giyohvandlik vositalari, psixotrop moddalar va prekursorlarni tashishga ruxsatnomasi (giyohvandlik vositalari, psixotrop moddalar va prekursorlarni tashish va tranzit tarzida tashish bilan bogʻliq faoliyatni amalga oshirishda);

sanitariya-epidemiologiya stansiyasining binolarning yoki shart-sharoitlarning litsenziyalash maqsadi va vazifalariga muvofiqligi toʻgʻrisidagi xulosasi;

Davlat tabiatni muhofaza qilish qoʻmitasi hududiy organining xulosasi (prekursorlar ishlab chiqarish bilan bogʻliq faoliyat amalga oshirilganda);

binolardan foydalanishning qonuniyligini tasdiqlovchi hujjatlar (dalolatnomaning, ijaraga olish shartnomasi va shu kabilarning notarial tasdiqlangan nusxalari);

er uchastkalaridan foydalanishning qonuniyligini tasdiqlovchi hujjatlar, shuningdek Sogʻliqni saqlash vazirligining xulosasi (giyohvandlik moddalariga ega boʻlgan oʻsimliklarni oʻstirish bilan bogʻliq faoliyatni amalga oshirishda);

Oʻzbekiston Respublikasi Sogʻliqni saqlash vazirligi Dori-darmonlar va tibbiyot texnikasi sifatini nazorat qilish bosh boshqarmasining giyohvandlik vositalari, psixotrop moddalarni ishlab chiqarish sharoitlarining belgilangan standartlarga muvofiqligi toʻgʻrisidagi xulosasi (giyohvandlik vositalari, psixotrop moddalar ishlab chiqarish bilan bogʻliq faoliyatni amalga oshirishda);

Oʻzbekiston Respublikasi Qishloq va suv xoʻjaligi vazirligi Veterinariya davlat bosh boshqarmasining xulosasi (giyohvandlik vositalari, psixotrop moddalar va prekursorlardan veterinariyada foydalanilganda);

giyohvandlik vositalari, psixotrop moddalarning muomalada boʻlishi (saqlash, berish, sotish, tayyorlash, foydalanish, yoʻq qilish) sohasidagi masʼul xodim uchun oliy farmatsevtika maʼlumoti toʻgʻrisidagi diplomning notarial tasdiqlangan nusxasi hamda uni lavozimga tayinlash toʻgʻrisidagi buyruq nusxasi;

muassasada surunkali ruhiy kasalliklar, giyohvandlik, zaharvandlik, alkogolizmga duchor boʻlgan dispanser hisobida turuvchi xodimlarning, shuningdek qasddan qilingan jinoyat uchun sud hukmini oʻtamagan yoki sudlanganligi olib tashlanmagan xodimlarning yoʻqligi toʻgʻrisidagi, tegishli tibbiyot muassasalari va mahalliy huquqni muhofaza qilish organlari maʼlumotnomalari albatta ilova qilingan holdagi maʼlumotlar.

Litsenziya olishga talabgordan ushbu Nizomda nazarda tutilmagan hujjatlarni taqdim etishni talab qilishga yoʻl qoʻyilmaydi.

Litsenziya olish uchun talabgor tomonidan taqdim etilgan barcha hujjatlar litsenziyalovchi organ tomonidan roʻyxat boʻyicha qabul qilinadi va roʻyxatdan oʻtkaziladi.

11. Litsenziyalovchi organ litsenziya olishga talabgorning arizasi barcha zarur hujjatlar bilan olingan kundan boshlab oʻttiz kundan oshmagan muddatda litsenziya komissiyasi qarori asosida litsenziya berish yoki bermaslik toʻgʻrisida qaror qabul qiladi. Litsenziyalovchi organ litsenziya talabgorini qabul qilingan qaror toʻgʻrisida tegishli qaror qabul qilingandan keyin uch kun mobaynida xabardor qiladi.

12. Oʻzbekiston Respublikasi Vazirlar Mahkamasi huzuridagi Giyohvandlik moddalarini nazorat qilish milliy axborot-tahlil markazi litsenziyalovchi organlar soʻrovlariga binoan ularga uch kun muddatda, giyohvandlik vositalari, psixotrop moddalar va prekursorlarning qonuniy va noqonuniy muomalada boʻlishiga doir oʻzida mavjud boʻlgan maʼlumotlar banki asosida litsenziya talabgorlari toʻgʻrisida axborot taqdim etadi.

13. Litsenziya berish toʻgʻrisidagi qaror qabul qilinganligi haqidagi bildirishnoma yozma shaklda, bank hisob raqami rekvizitlarini va davlat bojini toʻlash muddati koʻrsatilgan holda, litsenziya talabgorlariga joʻnatiladi (topshiriladi).

Litsenziya berish rad etilganligi toʻgʻrisidagi bildirishnoma yozma shaklda, rad etish sabablari va litsenziya talabgori mazkur sabablarni bartaraf etib hujjatlarni qayta koʻrib chiqish uchun taqdim etishi mumkin boʻlgan muddat koʻrsatilgan holda litsenziya talabgoriga joʻnatiladi (topshiriladi).

Litsenziya talabgori litsenziya komissiyasi qayd qilgan kamchiliklarni bartaraf etib hujjatlarni qayta koʻrib chiqish uchun taqdim etishi mumkin boʻlgan muddat talabgor qaytarilgan hujjatlarni olgan kundan boshlab 3 oydan oshmasligi kerak. Bunda litsenziyalovchi organ tomonidan hujjatlarni qayta koʻrib chiqish litsenziya talabgorining arizasi barcha zarur hujjatlar bilan olingan kundan boshlab koʻpi bilan oʻn kun mobaynida amalga oshiriladi. Litsenziya talabgorining arizasini qayta koʻrib chiqish uchun yigʻim undirilmaydi. Litsenziya berishni rad etish toʻgʻrisida xabarnomada koʻrsatib oʻtilgan muddat tugagandan soʻng berilgan ariza yangidan berilgan ariza hisoblanadi.

14. Quyidagilar litsenziya berishni rad etish uchun asos boʻladi:

yuridik shaxs tomonidan zarur darajada rasmiylashtirilmagan hujjatlar taqdim etilganligi;

giyohvandlik vositalari, psixotrop moddalar va prekursorlarning muomalada boʻlishi bilan bogʻliq faoliyatning xavfsizligini taʼminlash uchun sharoitlar yoʻqligi;

surunkali ruhiy kasalliklar, giyohvandlik, zaharvandlik, alkogolizm tufayli dispanser hisobida turuvchi va xizmat vazifasi taqozosiga koʻra giyohvandlik vositalari, psixotrop moddalar bilan ishlashga aloqador xodimlar mavjudligi;

qasddan sodir etgan jinoyati uchun sud hukmini oʻtamagan yoki sudlanganligi olib tashlanmagan va xizmat vazifasi taqozosiga koʻra giyohvandlik vositalari va psixotrop moddalar bilan ishlashga aloqador xodimlar mavjudligi;

litsenziya olishga talabgor tomonidan taqdim etilgan hujjatlarda ishonchsiz yoki chalkash maʼlumotlar mavjudligi;

litsenziya olishga talabgorning litsenziya talablari va shartlariga muvofiq kelmasligi.

Boshqa asoslar boʻyicha, shu jumladan litsenziya berish maqsadga muvofiq emas degan bahonalar boʻyicha litsenziya berishni rad etishga yoʻl qoʻyilmaydi.

Litsenziya olishga talabgor litsenziya komissiyasining litsenziya berishni rad etish, shuningdek litsenziyalovchi organ mansabdor shaxsining harakati (harakatsizligi) ustidan qonunda belgilangan tartibda arz qilishga haqlidir.

15. Giyohvandlik vositalari, psixotrop moddalar va prekursorlarning muomalada boʻlishi bilan bogʻliq faoliyat kengaytirilgan hollarda yuridik shaxs qoʻshimcha ruxsatnoma olish uchun litsenziyalovchi organga yozma holda murojaat qilishi shart, bunda unga mazkur Nizomning 10-bandida koʻrsatib oʻtilgan hujjatlar hamda ilgari berilgan litsenziyaning asli ilova qilinadi.

Litsenziyalovchi organ taqdim etilgan hujjatlarni koʻrib chiqish amaldagisining oʻrniga giyohvandlik vositalari, psixotrop moddalar va prekursorlarning muomalada boʻlishi bilan bogʻliq faoliyat turlari roʻyxati koʻrsatilgan yangi litsenziya beradi, bu haqda litsenziya bitimi oʻzgarganligi toʻgʻrisida protokol tuziladi va litsenziyalar reyestriga tegishli maʼlumot kiritib qoʻyiladi.

16. Litsenziya bitimi litsenziyalovchi organ hamda litsenziatning oʻzaro huquqlari va majburiyatlarini belgilovchi hujjat hisoblanadi va quyidagilarni oʻz ichiga oladi:

bitimni tasdiqlagan shaxslarning familiyasi, ismi, otasining ismi, lavozimi;

tomonlarning rekvizitlari;

giyohvandlik vositalari, psixotrop moddalar va prekursorlarning muomalada boʻlishi bilan bogʻliq faoliyatni amalga oshirish uchun litsenziya berilayotgan faoliyat aniq turining nomi;

litsenziatga qoʻyiladigan litsenziya talablari va shartlari;

litsenziyaning amal qilish muddati;

koʻrsatib oʻtilgan tur boʻyicha giyohvandlik vositalari, psixotrop moddalar va prekursorlarning muomalada boʻlishi bilan bogʻliq faoliyat amalga oshiriladigan manzil;

litsenziya bitimi talablari va shartlarini buzganlik uchun tomonlarning javobgarligi;

litsenziya bitimi talablari va shartlari litsenziat tomonidan bajarilishini litsenziyalovchi organ tomonidan nazorat qilish tartibi;

boshqa muhim shartlar.

Litsenziya bitimi ikki nusxada bir nusxasi litsenziat uchun va bir nusxasi litsenziyalovchi organ uchun tuziladi.

17. Litsenziya litsenziya olishga talabgor tomonidan davlat boji toʻlanganligini tasdiqlovchi hujjat taqdim etilganda va litsenziya bitimi imzolangandan soʻng beriladi.

18. Giyohvandlik vositalari, psixotrop moddalar va prekursorlarning muomalada boʻlishi bilan bogʻliq faoliyat amalga oshirilganda litsenziat quyidagilarga majburdir:

qonun hujjatlariga rioya qilish;

maxsus bilimlar va tegishli malakaga ega boʻlish;

litsenziyalanadigan aniq faoliyat turini amalga oshirishning maxsus shartlarini, shu jumladan tegishli moddiy-texnika bazasidan, asbob-uskunalardan, boshqa xil texnik vositalardan foydalanish sharoitlarini yaratish.

19. Litsenziat quyidagilarni amalga oshiradi:

Oʻzbekiston Respublikasi tomonidan qabul qilingan xalqaro majburiyatlarni hisobga olgan holda “Giyohvandlik vositalari, psixotrop moddalar toʻgʻrisida”gi Oʻzbekiston Respublikasi Qonuniga va BMTning tegishli konvensiyalarida nazarda tutilgan talablarga muvofiq giyohvandlik vositalari, psixotrop moddalar va prekursorlarni olib kelish, olib ketish va tranzit qilish;

Oʻzbekiston Respublikasi Sogʻliqni saqlash vazirligi bilan kelishilgan ishlab chiqarishning texnologiya reglamentlariga koʻra belgilangan kvotalar doirasida RD Oʻz-19-01-96 (Dorivor vositalar ishlab chiqarishni va ularning sifatini nazorat qilishni tashkil etish qoidalari) talablariga muvofiq giyohvandlik vositalari, psixotrop moddalar ishlab chiqarish;

litsenziyada va litsenziya bitimida koʻrsatilganga muvofiq, shuningdek litsenziya bitimida koʻrsatilgan manzil boʻyicha faoliyat koʻrsatish;

giyohvandlik vositalari, psixotrop moddalar va prekursorlarni saqlash va ularning xavfsizligini taʼminlash;

Oʻzbekiston Respublikasi Sogʻliqni saqlash vazirligida belgilangan tartibda roʻyxatdan oʻtkazilgan va vakolatli organ tomonidan berilgan ularning sifatini tasdiqlovchi hujjatga ega boʻlgan giyohvandlik vositalari, psixotrop moddalarni sotish.

20. Litsenziat tomonidan litsenziya talablari va shartlariga rioya etilishini nazorat qilish qonun hujjatlari bilan belgilangan tartibda litsenziyalovchi organ tomonidan amalga oshiriladi.

Litsenziya talablari va shartlariga rioya etilishini nazorat qilishni amalga oshirishda litsenziyalovchi organ oʻz vakolati doirasida quyidagi huquqlarga ega:

litsenziat tomonidan litsenziya talablari va shartlariga rioya qilinishini belgilangan tartibda rejali tekshiruvlardan oʻtkazish;

litsenziat tomonidan litsenziya talablari va shartlari buzilganligini tasdiqlovchi hollar mavjud boʻlgan taqdirda litsenziatning bu talab va shartlarga rioya qilishi yuzasidan belgilangan tartibda rejadan tashqari tekshiruvlar oʻtkazish;

litsenziya talablari va shartlariga rioya qilinishi ustidan tekshiruvlar oʻtkazilayotganda paydo boʻladigan masalalar boʻyicha zarur maʼlumotlarni litsenziatdan soʻrash va olish;

tekshirishlar natijalari asosida litsenziat tomonidan litsenziya shartlari va talablarining aniq buzilishlarini koʻrsatgan holda dalolatnomalar (maʼlumotnomalar) tuzish;

litsenziatni aniqlangan buzilishlarni bartaraf etishga majbur qiluvchi qarorlar chiqarish, bunday buzilishlarni bartaraf etish muddatlarini belgilash;

litsenziyaning amal qilishini toʻxtatib turish yoxud toʻxtatish.

21. Litsenziyaning amal qilishi quyidagi hollarda toʻxtatib turiladi:

litsenziya egasi tomonidan litsenziya bitimida nazarda tutilgan litsenziya talablari va shartlari buzilishlari aniqlanganda;

litsenziya egasi tomonidan litsenziyalovchi organning uni aniqlangan buzilishlarni bartaraf etishga majbur qiluvchi qarori bajarilmaganda;

litsenziya qayta rasmiylashtirilayotgan muddatda yuridik shaxs oʻzgarganda.

Litsenziyalovchi organ litsenziyaning amal qilishini toʻxtatib turishga olib kelgan holatlarni litsenziat tomonidan bartaraf etish muddatini belgilashi shart. Koʻrsatib oʻtilgan muddat olti oydan oshib ketishi mumkin emas.

Litsenziyaning amal qilishini toʻxtatib turishga olib kelgan holatlar litsenziya egasi tomonidan bartaraf etilgan taqdirda litsenziyalovchi organ koʻrsatib oʻtilgan holatlar bartaraf etilganligi toʻgʻrisida tasdiqnoma olingan kundan boshlab oʻn kun muddatda uning litsenziyasi amal qilishini tiklash toʻgʻrisida qaror qabul qilishi shart.

22. Litsenziyaning amal qilishi quyidagi hollarda toʻxtatiladi:

litsenziat litsenziyaning amal qilishini toʻxtatish toʻgʻrisida murojaat qilganda;

yuridik shaxs tugatilganda tugatilgan vaqtdan boshlab yoki qayta tashkil etish natijasida uning faoliyati toʻxtatilganda qayta tashkil etilgan vaqtdan boshlab, uni oʻzgartirish bundan mustasnodir;

litsenziat tomonidan litsenziya bitimida nazarda tutilgan litsenziya talablari va shartlari muntazam ravishda yoki bir marta qoʻpol buzilganda;

litsenziyalovchi organ belgilagan muddatda litsenziyaning amal qilishi toʻxtatib qoʻyilishiga olib kelgan holatlar litsenziat tomonidan bartaraf etilmaganda;

litsenziyalovchi organning litsenziya berish toʻgʻrisidagi qarorining noqonuniy ekanligi aniqlanganda;

litsenziyaning amal qilish muddati toʻxtatilganda.

Litsenziyaning amal qilishi, shuningdek sud qarori bilan ham toʻxtatilishi mumkin.

Litsenziyaning amal qilishi toʻxtatish toʻgʻrisida qaror qabul qilingan sanadan boshlab toʻxtatiladi.

23. Litsenziyalovchi organ tomonidan litsenziya quyidagi hollarda bekor qilinadi:

agar litsenziyaga talabgor litsenziya berish toʻgʻrisida qaror qabul qilinganligi haqida bildirishnoma yuborilgan (topshirilgan) vaqtdan boshlab uch oy mobaynida litsenziyalovchi organga litsenziyani berish uchun davlat boji toʻlanganligini tasdiqlovchi hujjatni taqdim etmagan yoxud litsenziya bitimini imzolamagan boʻlsa;

litsenziya egasi litsenziyani bekor qilish toʻgʻrisida ariza bilan murojaat qilganda;

litsenziyaning qalbaki hujjatlardan foydalangan holda olinganligi holati aniqlanganda.

Litsenziya shuningdek sud qarori bilan ham bekor qilinishi mumkin.

Bekor qilish toʻgʻrisidagi qaror litsenziya berilgan sanadan boshlab kuchga kiradi.

24. Litsenziyaga talabgorning arizasini koʻrib chiqish uchun quyidagi miqdorlarda yigʻim undiriladi:

litsenziya berish yoki uning amal qilish muddatini uzaytirish toʻgʻrisidagi masala boʻyicha eng kam ish haqining besh baravari miqdorida;

litsenziyani qayta rasmiylashtirish toʻgʻrisidagi masala boʻyicha eng kam ish haqining ikki yarim baravari miqdorida.

25. Litsenziyalarga talabgorning arizasini koʻrib chiqish uchun yigʻimdan tushgan pul mablagʻlari litsenziyalovchi organning hisob raqamiga oʻtkaziladi.

26. Litsenziyaga talabgor bergan arizasidan voz kechgan taqdirda toʻlangan yigʻim qaytarilmaydi.

27. Giyohvandlik vositalari, psixotrop moddalar va prekursorlarning muomalada boʻlishi bilan bogʻliq faoliyatga litsenziya berish uchun davlat boji eng kam ish haqining besh baravari miqdorida belgilanadi.

28. Davlat boji respublika budjetiga oʻtkaziladi.

29. Litsenziyalovchi organ giyohvandlik vositalari, psixotrop moddalar va prekursorlarning muomalada boʻlishi bilan bogʻliq faoliyatning har bir turiga litsenziyalar reyestrini alohida yuritadi.

Litsenziyalarning reyestrining har birida quyidagilar koʻrsatilishi kerak:

litsenziatlar toʻgʻrisidagi asosiy maʼlumotlar;

litsenziyalarning berilgan sanasi va tartib raqami;

litsenziyalarning amal qilish muddati;

litsenziyalarni qayta rasmiylashtirish asosi va sanasi, amal qilish muddatini uzaytirish, toʻxtatib turish va tiklash;

litsenziyalarning amal qilishini toʻxtatib qoʻyishning asosi va sanasi;

litsenziyalarni bekor qilish asosi va sanasi;

mazkur Nizomda belgilangan boshqa maʼlumotlar.

Giyohvandlik vositalari, psixotrop moddalar va prekursorlarning muomalada boʻlishi bilan bogʻliq faoliyatga litsenziyalar reyestridagi mavjud maʼlumotlar pul toʻlash asosida, faqat litsenziya komissiyasining ruxsatnomasi bilan beriladi.

Davlat hokimiyati va boshqaruv organlariga litsenziya reyestridagi maʼlumotlar bepul beriladi.

30. Litsenziya reyestridan maʼlumotlar eng kam ish haqining yarmi miqdorida litsenziyalovchi organning hisob raqamiga oʻtkazilgan yigʻim toʻlanganligi haqidagi toʻlov hujjati taqdim etilgandan soʻng aniq litsenziya oluvchi toʻgʻrisida koʻchirmalar holida beriladi.

31. Faoliyat litsenziyada koʻrsatilgan muddatdan oldin toʻxtatilgan taqdirda berilgan litsenziya litsenziat tomonidan litsenziya komissiyasiga qaytariladi. Qolgan muddat uchun toʻlangan summa qaytarilmaydi.

32. Litsenziya komissiyasining qarori va harakati ustidan Oʻzbekiston Respublikasining qonun hujjatlarida belgilangan tartibda shikoyat qilinishi mumkin.