Oliy o‘quv yurtlari faoliyatini tashkil etishni yanada takomillashtirish, qishloq xo‘jaligida bozor islohotlarini chuqurlashtirishga doir zamonaviy talablarga muvofiq qishloq va suv xo‘jaligi uchun yuqori malakali kadrlar tayyorlashni maqbullashtirish maqsadida Vazirlar Mahkamasi qaror qiladi:

1. Qishloq va suv xo‘jaligi uchun yuqori va malakali kadrlar tayyorlashni maqbullashtirish yuzasidan takliflar ishlab chiqish bo‘yicha ilovaga muvofiq tarkibda maxsus komissiya tuzilsin.

2. Maxsus komissiya o‘z ishlarida quyidagi muammolarni hal etish zarurligidan kelib chiqsin:

birinchidan, respublikada tarmoqlar va ishlab chiqarishlar kompleksi sifatida qishloq xo‘jaligida yerlarning, eng avvalo, sug‘oriladigan yerlarning unumdorligini saqlashdan tortib mahsulotlarni yetishtirish va dastlabki qayta ishlash, saqlash va sotishgacha bo‘lgan o‘zaro bog‘liqlik va yaxlitlik yo‘qotilgan, bu borada ularni jahon yutuqlari darajasida qishloq xo‘jaligi ekinlarini o‘stirishning zamonaviy texnologiyalari va usullariga yo‘naltirish ayniqsa muhimdir;

ikkinchidan, O‘zbekiston bugungi kunda jahon bozorida mehnat taqsimotining to‘la huquqli subyektlaridan biri bo‘lib qolayotganligi tufayli qishloq xo‘jaligi va uning tarmoqlarini ixtisoslashtirish masalasi hal etilishi zarur bo‘lgan g‘oyat muhim muammolardan biridir. Eng avvalo, yetishtirilayotgan mahsulotlarning raqobatbardoshliligini ta’minlash hamda respublikaning jahonda qishloq xo‘jaligi mahsulotlari ishlab chiqarishda munosib o‘rin egallashi zaruriyati ustuvor vazifa hisoblanadi. Bunda O‘zbekistonning geografik jihatdan joylashishi, uning tabiiy-iqtisodiy xususiyatlari, yerlar unumdorligining holati g‘oyat muhimdir. Suv resurslari bilan ta’minlash, ulardan oqilona va samarali foydalanish, yerlarning meliorativ holatini yaxshilash bizning sharoitlarimiz uchun eng muhim va hal qiluvchi omillar hisoblanadi;

uchinchidan, bugungi kunda qishloq xo‘jaligini rivojlantirish, birinchi navbatda, yerlar unumdorligini ta’minlash, seleksiya, urug‘chilik, ilg‘or texnologiya va agrotexnikani joriy etgan holda ekinlarni o‘stirish bilan bog‘liq masalalar bilan qishloq xo‘jaligi yo‘nalishidagi bir nechta oliy o‘quv yurtlari, shu jumladan Toshkent davlat agrar universiteti va uning Qoraqalpog‘iston Respublikasidagi filiali, Andijon va Samarqand qishloq xo‘jaligi institutlari shug‘ullanmoqda. Vazifalar kompleksini, shu jumladan qishloq xo‘jaligini mexanizatsiyalash bilan bog‘liq vazifalarni hal etish bilan mamlakatning ixtisoslashgan qishloq xo‘jaligi oliy o‘quv yurtlari shug‘ullanishi lozimligi qonuniy holdir;

to‘rtinchidan, mahsulotlarning 95 foizdan ko‘prog‘i sug‘oriladigan yerlardan olinadigan O‘zbekiston sharoitlari uchun hamda ekologiya va yerlarning holati yomonlashib borayotganligini hisobga olgan holda ilmiy izlanishlarni va amaliy tadqiqotlarni chuqurlashtirish va shu asosda, birinchi navbatda, irrigatsiya va yerlarni melioratsiyalash kabi ixtisoslashgan hayotiy muhim yo‘nalishlar bo‘yicha yuqori malakali kadrlarni tayyorlashni tashkil etish katta ahamiyat kasb etadi, bunda qishloq xo‘jaligining kelajagi ko‘p jihatdan ushbu muammolarning hal etilishiga bog‘liqligi nazarda tutilishi kerak. Ularga quyidagilar kiradi:

a) suv resurslarining taqchilligi tobora ortib borayotgan, davlatlararo suv oqimlarini boshqarishda muammolar mavjud bo‘lgan sharoitlarda suv xo‘jaligi asosiy fondlarining zamonaviylashtirilishi;

b) yer-suv resurslaridan oqilona foydalanish, suv oqimlarini to‘plash va tartibga solish, yerlarning sho‘rlanishi va botqoqlanishini bartaraf etish, gidrotexnika inshootlarining ishonchliligi va xavfsizligini ta’minlash, suvni taqsimlash, uning sarflanishini hisobga olishning avtomatlashtirilgan tizimlarini joriy etish, atrof muhitni muhofaza qilish masalalarini hal etilishi;

v) suv resurslari cheklangan sharoitda fermer xo‘jaliklari sonining jadal o‘sishi suvdan oqilona va tejamli foydalanishni talab qilishi;

g) respublikada foydalanish uchun ilmiy va innovatsion yondashuvni hamda ularni zamonaviylashtirish uchun yuqori malakali kadrlarni talab qiladigan ko‘plab gidrotexnika inshootlari, suv omborlari, sug‘orish va drenaj muhandislik tizimlariga ega bo‘lgan murakkab va qudratli irrigatsiya tizimlarining faoliyat ko‘rsatishi;

d) yerlarning qoniqarsiz meliorativ holatining, kollektorlar, mavjud yopiq va vertikal drenaj tarmoqlari texnik holatining sug‘oriladigan yerlar unumdorligiga salbiy ta’sirining oldini olish zaruriyati.

3. O‘zbekiston Respublikasi Qishloq va suv xo‘jaligi vazirligining Toshkent irrigatsiya va qishloq xo‘jaligini mexanizatsiyalash muhandislari instituti negizida Toshkent irrigatsiya va melioratsiya institutini tashkil etish to‘g‘risidagi taklifi ma’qullansin.

Maxsus komissiya 2004-yil 1-iyungacha bo‘lgan muddatda Toshkent irrigatsiya va qishloq xo‘jaligini mexanizatsiyalash muhandislari institutini Toshkent irrigatsiya va melioratsiya institutiga aylantirish chora-tadbirlari kompleksini amalga oshirsin. Mazkur ishni amalga oshirishda:

Toshkent irrigatsiya va qishloq xo‘jaligini mexanizatsiyalash muhandislari institutining mutaxassislar tayyorlashda tutgan o‘rni va roliga, ularning qishloq xo‘jaligi yetakchi tarmoqlari — melioratsiya va suv xo‘jaligidagi faoliyatiga xolisona baho berilsin;

institutdagi ta’lim yo‘nalishlari va kadrlar tayyorlashning ixtisoslashuvi o‘rganilsin, ularning irrigatsiya va melioratsiya sohasidagi zamonaviy talablarga va dolzarb vazifalarga nechog‘lik muvofiqligi tahlil qilinsin;

ushbu qarorning 2-bandida bayon qilingan asosiy yo‘nalishlari va vazifalariga javob beradigan institutning fakultetlar yo‘nalishi va o‘quv bazasining mazmunini, kafedralarning ixtisoslashuvini belgilash bo‘yicha aniq chora-tadbirlar ko‘rilsin;

institutning ilmiy izlanishlari va amaliy tadqiqotlarini quyidagi ustuvor yo‘nalishlarga — suv resurslari sifatini yaxshilash, ulardan foydalanishni maqbullashtirish va ularni tejashga, tuproq unumdorligini oshirish uchun yerlarni sug‘orishning ilg‘or metodlarini ishlab chiqishga va keng qo‘llanishga, gidrotexnika inshootlarining ishonchliligini va foydalanish uchun xavfsizligini ta’minlashga qaratish chora-tadbirlari amalga oshirilsin.

4. Maxsus komissiya, O‘zbekiston Respublikasi Oliy va o‘rta maxsus ta’lim vazirligi hamda Qishloq va suv xo‘jaligi vazirligi:

Toshkent davlat agrar universiteti, Andijon va Samarqand qishloq xo‘jaligi institutlari tuzilmasini va o‘quv-moddiy hamda metodik bazasi yo‘nalishini, shuningdek ularga Toshkent irrigatsiya va qishloq xo‘jaligini mexanizatsiyalash muhandislari institutidan tegishli mutaxassisliklar olib berilishini hisobga olgan holda tayyorlanadigan kadrlar mutaxassisliklari ixtisoslashuvini qayta ko‘rib chiqsinlar;

O‘zbekiston Respublikasi Iqtisodiyot vazirligi, Mehnat va aholini ijtimoiy muhofaza qilish vazirligi, Qoraqalpog‘iston Respublikasi Vazirlar Kengashi va viloyatlar hokimliklari bilan birgalikda, tegishli ixtisosdagi mutaxassislarga bo‘lgan ehtiyojni hisobga olgan holda, 2004/2005 o‘quv yili va keyingi o‘quv yillari uchun Toshkent irrigatsiya va melioratsiya institutiga qabul qilish kvotalari bo‘yicha belgilangan tartibda Vazirlar Mahkamasiga takliflar kiritsinlar;

Toshkent irrigatsiya va melioratsiya instituti bilan birgalikda 2004/2005 o‘quv yili boshlangungacha respublika ta’lim standartlariga muvofiq Toshkent irrigatsiya va melioratsiya institutining tegishli ta’lim yo‘nalishlari va mutaxassisliklari bo‘yicha o‘quv rejalari va dasturlarini ishlab chiqsinlar va tasdiqlasinlar.

5. Mazkur qarorning bajarilishini nazorat qilish O‘zbekiston Respublikasining Bosh vaziri Sh.M. Mirziyoyev zimmasiga yuklansin.