O‘zbekiston Respublikasi Prezidentining “Keksalarni e’zozlash yili” Davlat dasturi to‘g‘risida” 2015-yil 18-fevraldagi PQ-2302-son qarorini ijro etish yuzasidan Vazirlar Mahkamasi qaror qiladi:

1. O‘zbekiston Respublikasi Moliya vazirligi huzuridagi budjetdan tashqari Pensiya jamg‘armasi tomonidan pensiya va ijtimoiy nafaqalar oladigan 2,7 milliondan ortiq pensionyerlar va 237 ming fuqarolar bo‘yicha yagona ma’lumotlar bazasini ifodalaydigan, uning vositasida pensiyalar va ijtimoiy nafaqalarni tayinlash, hisob-kitob qilish, qayta hisob-kitob qilish, shuningdek har oyda tayinlash jarayonlarini avtomatlashtirish ta’minlanadigan avtomatlashtirilgan axborot tizimi — “Pensiya” dasturiy majmui joriy etilganligi ma’lumot uchun qabul qilinsin.

2. O‘zbekiston Respublikasi Moliya vazirligining “Pensiya” dasturiy majmui negizida uni yanada takomillashtirish va funksional kengaytirish yo‘li bilan keksa kishilar uchun pensiyalar va ijtimoiy nafaqalarni tayinlashning eng qulay tizimini nazarda tutuvchi, ma’lumotnomalar va tasdiqlovchi hujjatlarni qog‘oz shaklida olishni istisno etuvchi, shuningdek pensiyalar va nafaqalar to‘lashga mablag‘larni o‘z vaqtida moliyalashtirishni ta’minlaydigan O‘zbekiston Respublikasi Moliya vazirligi huzuridagi budjetdan tashqari Pensiya jamg‘armasi pensiya ta’minotining yagona idoralararo integratsiyalashtirilgan axborot tizimini (keyingi o‘rinlarda “Nafaqa” yagona axborot tizimi deb ataladi) tashkil etish to‘g‘risidagi taklifiga rozilik berilsin.

3. 2015 — 2017-yillarda O‘zbekiston Respublikasi Moliya vazirligi huzuridagi budjetdan tashqari Pensiya jamg‘armasi pensiya ta’minotining yagona idoralararo integratsiyalashtirilgan axborot tizimini joriy etish reja-jadvali ilovaga* muvofiq tasdiqlansin.

4. Vazirliklar va idoralar tasdiqlangan 2015 — 2017-yillarda O‘zbekiston Respublikasi Moliya vazirligi huzuridagi budjetdan tashqari Pensiya jamg‘armasi pensiya ta’minotining yagona idoralararo integratsiyalashtirilgan axborot tizimini joriy etish reja-jadvali to‘liq, o‘z vaqtida va sifatli amalga oshirilishini tashkil etsinlar.

5. O‘zbekiston Respublikasi Moliya vazirligi huzuridagi budjetdan tashqari Pensiya jamg‘armasi “Nafaqa” yagona axborot tizimini joriy etish tugallangandan keyin 2018-yil mobaynida “Nafaqa” yagona axborot tizimi faoliyat ko‘rsatishini yanada qo‘llab-quvvatlash uchun zarur bo‘lgan server asbob-uskunalarini xarid qilish bo‘yicha qonun hujjatlarida belgilangan tartibda tender savdolari o‘tkazsin.

6. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari R.S. Azimov zimmasiga yuklansin.