Oʻzbekiston Respublikasi Prezidentining “Oʻzbekiston Respublikasida sogʻliqni saqlash tizimini isloh qilish davlat dasturi toʻgʻrisida” 1998-yil 10-noyabrdagi PF-2107-son Farmonini va Oʻzbekiston Respublikasi Vazirlar Mahkamasining “Xalqaro tiklanish va taraqqiyot banki bilan hamkorlik qilish dasturini amalga oshirishga oid chora-tadbirlar toʻgʻrisida” 1997-yil 2-oktabrdagi 462-son, “Xalqaro tiklanish va taraqqiyot banki beradigan qarz doirasida sogʻliqni saqlashning boshlangʻich boʻgʻinini isloh qilish loyihasini amalga oshirishni jadallashtirish chora-tadbirlari toʻgʻrisida” 1998-yil 1-iyundagi 236-son qarorlarini bajarish yuzasidan Vazirlar Mahkamasi qaror qiladi:

1. 1999-yil 10-martdan boshlab Fargʻona viloyatining Beshariq, Quva va Yozyovon tumanlarida qishloq vrachlik punktlarini, qishloq vrachlik ambulatoriyalari va feldsher-akusherlik punktlari komplekslarini (keyingi oʻrinlarda — birinchi tibbiy sanitariya yordami — BTSYO muassasalari deb ataladi) moliyalashtirishning yangi mexanizmini joriy qilish boʻyicha eksperiment oʻtkazilsin, bunda ularga sarflanadigan xarajatlar ularga biriktirilgan bir kishi hisobidan kelib chiqib, mablagʻ bilan taʼminlanishi nazarda tutilsin.

BTSYO muassasalariga yuridik shaxs maqomli xoʻjalik mustaqilligi berilsin.

2. Fargʻona viloyati hokimligi koʻrsatilgan tumanlarning BTSYO muassasalarini mablagʻ bilan taʼminlashni 1999-yil 1-yanvardagi holatiga koʻra viloyat sogʻliqni saqlash boshqarmasiga bersin. Viloyat sogʻliqni saqlash xarajatlari tarkibida eksperiment asosida ishlashga oʻtkaziladigan BTSYO muassasalari xarajatlari ulushi 1998-yil darajasida saqlab qolinsin.

3. Belgilab qoʻyilsinki, tibbiyot tarmogʻini tarkibiy qayta tashkil etish, davolash-profilaktika ishlarining tejamliroq usullarini oʻzlashtirish va boshqa tadbirlar hisobiga viloyat sogʻliqni saqlash tizimida tejalgan mablagʻlar olib qoʻyilmaydi va birinchi navbatda eksperiment oʻtkaziladigan tumanlardagi BTSYO muassasalarini rivojlantirishga, shuningdek viloyat davolash muassasalarining moddiy-texnika bazasini mustahkamlashga yoʻnaltiriladi.

4. BTSYO muassasalarini mablagʻ bilan taʼminlash toʻgʻrisidagi Vaqtinchalik nizom ilovaga muvofiq tasdiqlansin.

5. BTSYO muassasalarini bir kishi hisobidan kelib chiqib mablagʻ bilan taʼminlashga oʻtkazish boʻyicha eksperiment olib borishda AQSHning Xalqaro rivojlanish agentligining Fargʻona viloyatining koʻrsatilgan tumanlariga begʻaraz texnik yordam sifatida ajratilgan 800 ming AQSH dollari miqdoridagi mablagʻlaridan ham foydalanilishi maʼlumot uchun qabul qilinsin.

6. Oʻzbekiston Respublikasi Sogʻliqni saqlash vazirligi:

BTSYO muassasalari uchun vrachlar va boshqaruv xodimlarini, shuningdek xarajatlarni bir kishi hisobiga mablagʻ bilan taʼminlash sharoitlarida davolash va moliyaviy ishlarni tashkil etish boʻyicha viloyat va tumanlar sogʻliqni saqlash tizimi rahbarlarini tayyorlashni taʼminlasin;

1999-yil 10-martgacha — BTSYO muassasalari uchun davlat tomonidan kafolatlangan tibbiy-sanitariya xizmatlarining asosiy turlari paketini ishlab chiqsin;

1999-yil 1-iyulgacha — BTSYO muassasalari uchun tibbiy-sanitariya xizmatlarining sifatini va samaradorligini yaxshilash tizimini va mezonlarini ishlab chiqsin;

Fargʻona viloyati BTSYO muassasalaridagi eksperiment natijalari boʻyicha 1999-yilning birinchi yarmida Oʻzbekiston Respublikasi Moliya vazirligi, Sirdaryo va Navoiy viloyatlari hokimliklari bilan birgalikda ushbu viloyatlarning BTSYO muassasalarini bir kishi hisobidan kelib chiqib mablagʻ bilan taʼminlashga oʻtkazish boʻyicha eksperiment oʻtkazishni koʻrib chiqsin va bu haqda qaror qabul qilsin;

eksperiment natijalarini umumlashtirsin va 1999-yil 15-dekabrgacha Oʻzbekiston Respublikasi Moliya vazirligi bilan birgalikda respublikaning boshqa boshlangʻich tibbiy-sanitariya yordami muassasalarida mablagʻ bilan taʼminlashning yangi mexanizmini joriy qilish yuzasidan takliflar kiritsin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari H.S. Karomatov zimmasiga yuklansin.

1. Ushbu Nizomda eksperiment oʻtkazishga kiritilgan Fargʻona viloyatining Beshariq, Quva va Yozyovon tumanlari boshlangʻich tibbiy-sanitariya yordami (BTSYO) muassasalarini moliyalashtirish shartlari va tartibi belgilanadi.

2. Eksperimentning maqsadi — qishloq aholisiga yanada malakali tibbiy yordam koʻrsatish uchun Oʻzbekiston Respublikasi qishloq sogʻliqni saqlash tizimida boshlangʻich tibbiy-sanitariya yordami boʻgʻinini kuchaytirishdan iboratdir.

3. Eksperiment shartlariga koʻra BTSYO muassasalari oʻrtacha biriktirilgan har bir kishi normativi boʻyicha mablagʻ bilan taʼminlashga oʻtkaziladi.

Viloyat boʻyicha har bir kishi hisobiga mablagʻ bilan taʼminlash normativi quyidagi formula boʻyicha aniqlanadi:

JMN=SSB: Aholi x%XU,

bunda: JMN — jon boshiga mablagʻ bilan taʼminlash normativi, SSB — hisobot yilida viloyat sogʻliqni saqlash sohasining budjeti, Aholi – hisobot yilidagi viloyat aholisining soni, %XU — BTSYO muassasalari xarajatlarining tumanlar budjetidagi hisobot davri darajasidagi oʻrtacha ulushi.

4. Har bir BTSYO muassasasining budjeti viloyat boʻyicha jon boshiga oʻrtacha normativning tegishli muassasaga biriktirilgan aholi soniga koʻpaytirilganiga teng (3-band).

5. BTSYO muassasalarining funksional xizmatlari kengayishiga qarab viloyat sogʻliqni saqlash tizimining ichki zaxiralari hisobiga bazaviy normativni oshirishga yoʻl qoʻyiladi.

6. Biriktiriladigan kishilar soni dastavval mavjud uchastkalar boʻyicha belgilanadi. Eksperimentning keyingi bosqichlarida kishilarni erkin biriktirish mumkin. Eksperiment oʻtkaziladigan tumanlarning aholisi erkin biriktirish davrida maʼlum bir BTSYO muassasasini tanlaydi va keyingi yilda dastlabki yordam hamda maslahatlashishga, tashhis qoʻyishga va kasalxonada yotishga yoʻllanma olish uchun unda roʻyxatdan oʻtadilar.

7. Biriktirilgan har bir kishi hisobidan belgilangan BTSYO muassasasining xarajatlar smetasi dastlabki davolash-profilaktika yordami koʻrsatishning joriy xarajatlarini moliyalashtirishni taʼminlashga qaratilgandir. Kapital qoʻyilmalar har bir kishiga belgilangan xarajatlar doirasidan tashqari mablagʻ bilan taʼminlanadi.

8. BTSYO muassasalari viloyat sogʻliqni saqlash boshqarmasi tomonidan mablagʻ bilan taʼminlanadi. BTSYO muassasalarini moliyalashtirish uchun mablagʻlar, tumanlar hokimlarining roziligi bilan viloyat sogʻliqni saqlash boshqarmasiga kelib tushadi hamda aholi soniga, jinsi, balogʻat yoshi tarkibiga va aholining zichligiga muvofiq tumanlar boʻyicha qayta taqsimlanadi.

9. Boshlangʻich tibbiy-sanitariya yordamini mablagʻ bilan taʼminlash uchun xarajatlar smetasi belgilangan tartibda tasdiqlanadi.

10. Boshlangʻich tibbiy-sanitariya yordami muassasalarini saqlash xarajatlarini mablagʻ bilan har oyda yillik budjetning 1/12 qismi miqdorida amalga oshiriladi. Har oylik mablagʻ koʻchirish biriktirilgan aholining joriy sonini hisobga olgan holda oʻzgartiriladi. BTSYO muassasalari har oyda viloyat sogʻliqni saqlash boshqarmasini vafot etganlar, roʻyxatdan oʻchganlar va yangi biriktirilgan aholi sonini hisobga olib, xizmat koʻrsatadigan xodimlar haqida xabardor qilib turadi.

11. Yil yakuni boʻyicha tejalgan mablagʻlar BTSYO muassasasi ixtiyorida qoladi va muassasaning moddiy-texnika bazasini mustahkamlashga, shuningdek, viloyat sogʻliqni saqlash boshqarmasi bilan kelishgan holda uning xodimlarini moddiy ragʻbatlantirishga yoʻnaltiriladi.

12. Har bir kishi hisobiga mablagʻ bilan taʼminlash mijozlarni yoʻnaltirishning yagona tizimi majburiy ravishda joriy qilinishini va turli darajadagi tibbiyot muassasalari oʻrtasida oʻzaro shartnomaviy munosabatlar oʻrnatilishini taqozo etadi.

13. BTSYO muassasalari ishining sifatini nazorat qilish tumanlar hokimliklari bilan birgalikda viloyat sogʻliqni saqlash boshqarmasiga yuklatiladi. Sifat tibbiy yordamning hammaga barobarligi va oʻz vaqtida koʻrsatilishi, uning zamonaviy klinik protokollarga va sanitariya-gigiyena standartlariga muvofiqligi, mijozlarning xizmat koʻrsatish darajasi va davolanish natijalaridan qoniqqanligi koʻrsatkichlari boʻyicha baholanadi.