Oʻzbekiston Respublikasi Hukumati bilan Pokiston Islom Respublikasi Hukumati (bundan buyon alohida “Tomon” va birgalikda “Tomonlar” deb ataluvchilar),

veterinariya sohasidagi hamkorlikni chuqurlashtirish istagiga tayanib,

hayvonlar orasida yuqumli kasalliklar tarqalishining oldini olish va oʻz davlatlari hududlarini epizootiyalardan birgalikda saqlash maqsadida,

quyidagilar toʻgʻrisida kelishib oldilar:

1. Tomonlarning Markaziy veterinariya organi Tomonlarning mazkur Bitimni amalga oshirish boʻyicha faoliyatni muvofiqlashtiruvchi vakolatli organi hisoblanadi.

2. Tomonlar yuqumli agentlar tashuvchisi boʻlishi mumkin boʻlgan tirik hayvonlar, hayvonlarni koʻpaytirish materiallari, hayvon mahsulotlari, ozuqalari va predmetlarini olib kirish, olib chiqish va tranzit qilish vaqtida oʻz hududlarini epizootiyalardan saqlash uchun oʻzaro hamkorlik qiladilar.

1. Tomonlar Hayvonlar sogʻligʻini himoya etish xalqaro tashkilotining (OYEI) “A” roʻyxati boʻyicha kasalliklarning paydo boʻlishi toʻgʻrisida, nosogʻlom hududlar, obyektlar, zararlangan hayvonlarning turlari va soni, kasallikning shakli va kechishi, infeksiya tarqalishining taxmin qilinayotgan yoʻllari, kasallik qoʻzgʻatuvchining turi, shuningdek kasallikni cheklash hamda yoʻqotish boʻyicha choralar qabul qilinishi toʻgʻrisida bir-birlarini xabardor qiladilar.

2. Tomonlar zooantroponoz kasalliklarning paydo boʻlishi, hayvonlarda yoki hayvon mahsulotlarida inson va jonivorlar sogʻligʻi uchun xavfli boʻlgan biologik va kimyoviy xususiyatga ega boʻlgan moddalarning hamda mexanik aralashmalarning mavjudligi toʻgʻrisida bir-birlariga maʼlumot beradilar.

3. Tomonlar, zarur boʻlganda, xalqaro veterinariya-sanitariya qoidalarining barcha talablariga rioya etgan holda hayvonlarda paydo boʻlgan kasalliklarni diagnostika qilish yuzasidan bir-birlariga yordam koʻrsatadilar.

Mazkur shartnomaning qoidalari quyidagilarga nisbatan qoʻllanadi:

1. Barcha turdagi jonivorlar (shu jumladan, qushlar, moʻynali hayvonlar, laboratoriya, hayvonot bogʻi hayvonlari, uy va yovvoyi hayvonlar, dengiz hayvonlari, asalarilar, baliqlar va boshqa gidrobiontlar, embrionlar, zigotlar, tuxumhujayralar, hayvonlar spermalari, inkubatsiya uchun tuxumlar va urugʻlantirilgan uvildiriqlar).

2. Hayvon mahsulotlari — goʻsht va goʻsht mahsulotlari, sut va sut mahsulotlari, baliqlar , tuxumlar, asalarichilik mahsulotlari;

3. Hayvonlar xomashyolari — teri, jun, moʻyna, momiq, pat, endokrin va ichak xomashyosi, kon, suyaklar va boshqa xomashyo turlari;

4. Jonivorlar uchun ozuqalar;

5. Veterinariya preparatlari, biologik materiallar va hayvonlardan olinadigan kolleksiya buyumlari.

Tomonlar jonivorlarning yuqumli va parazitar kasalliklari profilaktikasi va ularga qarshi kurash boʻyicha tegishli davlatda mavjud boʻlgan yoʻriqnomalar va dasturlarni qoʻllash shartlari va usullari toʻgʻrisida bir-birlarini xabardor qiladilar.

Tomonlar hayvonlar, hayvon mahsulotlari va xomashyosi, hayvonlar uchun ozuqalar, veterinariya preparatlari, biologik materiallar va hayvonlardan olinadigan kolleksiya buyumlarini olib kirish, olib chiqish va tranzit qilish chogʻida veterinariya-sanitariya talablari toʻgʻrisidagi maʼlumotlarni, shuningdek zaharli mahsulotlar, radioaktiv va boshqa moddalar keltirib chiqargan yuqumli boʻlmagan va katta iqtisodiy zarar keltirishi mumkin boʻlgan kasalliklarning paydo boʻlishi chogʻida koʻriladigan choralar toʻgʻrisidagi maʼlumotlarni almashadilar.

Tomonlar:

1. Veterinariya faoliyati bilan bogʻliq normativ-huquqiy hujjatlarni va sohaga oid matbuotda eʼlon qilingan materiallarni almashadilar.

2. Har ikki Tomon mutaxassislarini ishtirok etishga jalb qilish maqsadida veterinariya sohasidagi rejalashtirilayotgan maxsus uchrashuvlar va kengashlar toʻgʻrisida bir-birlarini xabardor qiladilar.

3. Veterinariya faoliyatini rivojlantirish va yanada takomillashtirish maqsadida, shuningdek veterinar shifokorlarning kasbiy mahoratini oshirish maqsadida mutaxassislar, tajriba va bilimlarni almashish yoʻli bilan veterinariya fani, taʼlimi veterinariya xizmatini amaliy tashkil etish sohasida hamkorlik qiladilar.

1. Mazkur Bitimning 4 va 5-moddalarida koʻrsatilgan hujjatlarni almashish boʻyicha xarajatlar ularni joʻnatayotgan Tomonning hisobidan qoplanadi.

2. Mutaxassislarni almashish har ikki Tomonning vakolatli organlari oʻrtasidagi oʻzaro kelishuv boʻyicha amalga oshiriladi. Bunday holatlarda transport xarajatlari ularni joʻnatayotgan Tomon hisobidan qoplanadi. Qabul qiluvchi Tomon kundalik xarajatlar va mehmonxonada turish xarajatlarini, xuddi shuningdek, avvaldan kelishilgan dasturga muvofiq mamlakat boʻylab safar qilish bilan bogʻliq xarajatlarni toʻlaydi.

Mazkur Bitim doirasidagi hamkorlikni amalga oshirish chogʻida Tomonlar tarafidan OYEIning Yerda yashovchi hayvonlarning xalqaro sanitariya kodeksi talablari asosida berilgan va kelishilgan hamda rus va ingliz tillarida rasmiylashtiriladigan veterinariya sertifikatlari haqiqiy hisoblanadi.

Chegarani kesib oʻtish chogʻidagi veterinariya koʻrigi vaqtida olib kirilayotgan tovarlar yoki jonli hayvonlar, hayvon mahsulotlari, xomashyosi va ozuqalar ortilgan alohida transport vositasi sanitariya va gigiyena jihatidan veterinariya sertifikati talablariga javob bermasligi aniqlangan holda yoki tovarlarni tashiyotgan transport vositasi transportda tashish boʻyicha veterinariya talablariga javob bermasa, import qiluvchi mamlakatning vakolatli organlari eksport qiluvchi mamlakatning vakolatli organlarini xabardor qiladi va Tomonlar davlatlarining milliy qonunchiligiga muvofiq oʻz davlati hududini hayvonlar orasida yuqumli va parazitar kasalliklarning hamda odamlar orasida antropozoonozlarning tarqalishidan himoya qilish boʻyicha choralar koʻradi.

Tomonlardan birining davlati hududida OYEIning “A” roʻyxatida koʻrsatilgan kasalliklar paydo boʻlganda, ushbu Tomonning vakolatli organlari boshqa Tomonning vakolatli organlarini darhol xabardor qilishlari va mazkur Bitimning 3-moddasida koʻrsatib oʻtilgan yuklarning olib chiqilishini toʻxtatishlari lozim.

Bunday olib chiqishning oʻrnatilgan tartibi xalqaro tartib-qoidalarga muvofiq tiklanadi.

Tomonlar oʻrtasidagi kelishuv boʻyicha mazkur Bitimning qoidalari boshqa maʼlum boʻlgan va maʼlum boʻlmagan kasalliklarga nisbatan qoʻllanishi mumkin. Har bir holatda mazkur Bitimning ajralmas qismi hisoblanadigan qoʻshimcha bayonnoma rasmiylashtiriladi.

Tomonlar oʻzaro ahamiyatga ega boʻlgan masalalar boʻyicha kelishilgan siyosat yuritish maqsadida xalqaro tashkilotlar doirasida maslahatlashuvlar va muzokaralar olib boradilar.

Mazkur Bitim Tomonlarning ular ishtirokchisi boʻlgan boshqa xalqaro shartnomalardan kelib chiquvchi huquq va majburiyatlariga daxl qilmaydi.

Mazkur Bitimni talqin qilish yoki qoʻllash munosabati bilan kelib chiquvchi nizolar Tomonlar oʻrtasida maslahatlashuvlar va muzokaralar oʻtkazish yoʻli bilan hal etiladi.

Tomonlarning oʻzaro kelishuvi boʻyicha mazkur Bitimga uning ajralmas qismi hisoblanadigan va Bitimning 15-moddasida nazarda tutilgan tartibda kuchga kiruvchi alohida bayonnomalar bilan rasmiylashtiriladigan oʻzgartish va qoʻshimchalar kiritilishi mumkin.

Mazkur Bitim Tomonlar tarafidan uning kuchga kirishi uchun zarur boʻlgan davlat ichki protseduralarining bajarilgani toʻgʻrisidagi soʻnggi yozma xabarnoma diplomatik kanallar orqali olingan kundan boshlab 30 (oʻttiz)inchi kuni kuchga kiradi.

Mazkur Bitim 5 (besh) yillik muddatga tuziladi. Uning amal qilishi, agar Tomonlardan biri oʻzining mazkur Bitimning amal qilishini toʻxtatish maqsadi toʻgʻrisida tegishli muddat tugashidan kamida olti oy oldin boshqa Tomonni yozma shaklda diplomatik kanallar orqali xabardor qilmasa, kelgusi besh yillik muddatlarga avtomatik tarzda uzaytirilaveradi.

2011-yil 24-martda Toshkent shahrida har biri oʻzbek va ingliz tillarida boʻlgan ikki asl nusxada tuzildi, bunda barcha matnlar bir xil kuchga ega. Mazkur Bitim qoidalarini talqin etishda ixtiloflar yuzaga kelganda ingliz tilidagi matn ustuvor hisoblanadi.