Iqtisodiy islohotlarni chuqurlashtirish dasturiga muvofiq respublikada qishloq xo‘jaligini zamonaviy yuqori unumli texnika bilan jihozlash chora-tadbirlari rejali amalga oshirilmoqda.

Mashina-traktor parklariga 1550 ta kuchli “Magnum” haydov traktorlari pluglar bilan birgalikda va 800 dan ortiq “Keys” g‘alla o‘rish kombaynlari yetkazib berildi. “O‘zKeysmash” qo‘shma korxonasida gorizontal shpindelli paxta terish mashinalarini, Toshkent traktor zavodida esa Amerikaning “Kamminz” firmasi dvigateli o‘rnatilgan paxtachilik va universal haydov traktorlarini ishlab chiqarish o‘zlashtirildi.

Shu bilan birga o‘tkazilgan tekshirishlar ko‘plab mashina-traktor parklarida va qishloq xo‘jaligi korxonalarida qimmatbaho import texnikadan samarali foydalanish ta’minlanmayotganligini ko‘rsatmoqda, texnika xizmati ko‘rsatish davriyligi va undan foydalanish qoidalari buzilmoqda, servis punktlari va tuzatish bazasi tarmog‘i sekin rivojlanmoqda, traktorlarga tirkaladigan mashinalar to‘plamini tayyorlash masalalari hal etilmagan. Maxsus moylar va sifatli dizel yoqilg‘isi yetkazib berishda uzilishlarga yo‘l qo‘yilmoqda, bu traktorlarning bekor turib qolishiga va muddatidan oldin eskirishiga olib kelmoqda. Ko‘pincha yangi murakkab texnika malakasi past va yetarli ish tajribasiga ega bo‘lmagan mexanizatorlarga berilmoqda.

Qoraqalpog‘iston Respublikasi Vazirlar Kengashi va viloyatlar hokimliklari, “O‘zqishloqxo‘jalikta’minottuzatish” davlat-kooperativ qo‘mitasi, O‘zbekiston Respublikasi Qishloq va suv xo‘jaligi vazirligi import mashinalardan foydalanish, ularga texnik xizmat ko‘rsatish va ularni saqlashning holati ustidan davlat nazoratini tashkil etish, mashina-traktor parklari uchun zarur normativ va texnik hujjatlarni davlat tilida nashr etish, yangi texnikada ishlash uchun mutaxassislar va operatorlar tayyorlash masalalari bilan o‘z faoliyatlarida shug‘ullanmayaptilar.

Murakkab import texnikadan samarali foydalanishni ta’minlash, uning uchun zarur servis va tuzatish bazasi tashkil etish maqsadida Vazirlar Mahkamasi qaror qiladi:

1. “O‘zqishloqxo‘jalikta’minottuzatish” davlat-kooperativ qo‘mitasi (Yusupov), O‘zbekiston Respublikasi Qishloq va suv xo‘jaligi vazirligi (Bobojonov), Qoraqalpog‘iston Respublikasi Vazirlar Kengashi va viloyatlar hokimliklarining qimmatbaho import texnikadan, ayniqsa “Magnum” haydov traktorlaridan samarali foydalanishni tashkil etish bo‘yicha ishlari qoniqarsiz deb hisoblansin.

“O‘zqishloqxo‘jalikta’minottuzatish” davlat-kooperativ qo‘mitasi, “Agromashservis” Qoraqalpog‘iston va viloyatlar birlashmalari, mashina-traktor parklari, O‘zbekiston Respublikasi Qishloq va suv xo‘jaligi vazirligining “O‘zdavtexnazorat” inspeksiyasi rahbarlari import mashina va mexanizmlardan tejab va yuqori unumli foydalanishni tashkil etish, ulardan foydalanish va ularning holati uchun shaxsan javob berishlari to‘g‘risida ogohlantirilsin.

2. “O‘zqishloqxo‘jalikta’minottuzatish” davlat-kooperativ qo‘mitasi, O‘zbekiston Respublikasi Qishloq va suv xo‘jaligi vazirligi, Qoraqalpog‘iston Respublikasi Vazirlar Kengashi va viloyatlar hokimliklari import texnikaning uzoq ishlashi va ish qobiliyatini saqlab qolish maqsadida:

15 kun muddatda “Magnum” haydov agregatlari, “Keys” firmasining g‘alla va sholi o‘rish kombaynlari va gorizontal shpindelli paxta terish mashinalari ishlashi uchun dalalarni tayyorlash bo‘yicha agrotexnika talablarini ishlab chiqsinlar va barcha xo‘jaliklarga yetkazsinlar, ularning so‘zsiz bajarilishini ta’minlasinlar;

1999-2000-yillarda har bir mashina-traktor parkida import texnikaga texnik xizmat ko‘rsatish punktlari tashkil etsinlar. Har bir traktor va mashinaga xizmat ko‘rsatish jadvalini ishlab chiqilsin va unga qat’iy rioya qilinsin;

Toshkent tajriba tuzatish-mexanika zavodini “Kamminz” firmasining normativ-texnik hujjatlari talablariga qat’iy muvofiq holda “Kamminz” dvigatellarini tuzatishga ixtisoslashtirish bo‘yicha zarur chora-tadbirlarni amalga oshirsinlar;

“Magnum” traktorlariga normativ-texnik hujjatlarsiz tayyorlangan qishloq xo‘jaligi asbob-uskunalari va moslamalari ulanishini taqiqlasinlar;

maxsus tayyorgarlikdan o‘tmagan shaxslar import mashina va mexanizmlarda ishlashga qo‘yilmasin. Bir oy muddatda 1999-2000-yillar davrida import texnika operatorlari, unga servis xizmati ko‘rsatish va uni tuzatish bo‘yicha mutaxassislar tayyorlash va ularni qayta tayyorlashning birgalikdagi kompleks dasturini ishlab chiqsinlar va tasdiqlasinlar.

3. “O‘zbekneftgaz” va “O‘zbekneftmahsulot” kompaniyalari:

“O‘zqishloqxo‘jalikta’minottuzatish” davlat-kooperativ qo‘mitasi bilan birgalikda zarur yonilg‘i-moylash materiallari ishlab chiqarish va ular bilan import texnikani ta’minlash dasturini bir oy muddatda ishlab chiqsinlar hamda uni Vazirlar Mahkamasiga tasdiqlash uchun taqdim etsinlar;

mashina-traktor parklari va xo‘jaliklarga yonilg‘i-moylash materiallari, shu jumladan import mashinalari uchun dizel yoqilg‘isini 1999-yildan boshlab 1-ilovaga* muvofiq hajmda ustun darajada Buxoro neftni qayta ishlash zavodidan yetkazib bersinlar;

motor, gidravlik va transmissiya moylarining yetishmayotgan miqdori ular respublikada ishlab chiqarilgunga qadar import bo‘yicha xarid qilinishini ta’minlasinlar.

Jahon standartlari talablariga javob beruvchi yuqori sifatli yonilg‘i-moylash materiallari ishlab chiqarish maqsadida Farg‘ona neftni qayta ishlash zavodi rekonstruksiya qilinayotganligi va 2000-yilda foydalanishga topshirilishi ma’lumot uchun qabul qilinsin.

4. “O‘zqishloqxo‘jalikmash-xolding” kompaniyasi, “O‘zqishloqxo‘jalikta’minottuzatish” davlat-kooperativ qo‘mitasi, O‘zbekiston Respublikasi Qishloq va suv xo‘jaligi vazirligi, “Magnum” haydov traktorlari va SX-100 va MX-135 universal shudgorlash traktorlarining ish bilan ta’minlanganligini oshirish maqsadida:

ushbu traktorlarga 2-ilovaga* muvofiq qishloq xo‘jaligi mashinalari to‘plamini ishlab chiqishni va ishlab chiqarishni o‘zlashtirishni ta’minlasinlar;

respublikaning sanoat korxonalarida xorijiy firmalarning texnik hujjatlariga muvofiq import traktorlar va mashinalarga ehtiyot qismlar tayyorlanishini tashkil etsinlar.

5. Tajriba-konstruktorlik va amaliy ishlarni jadallashtirish maqsadida “O‘zqishloqxo‘jalikmash-xolding” kompaniyasi, “O‘zqishloqxo‘jalikta’minottuzatish” davlat-kooperativ qo‘mitasi korxonalariga ishlab chiqarilayotgan mahsulot (ishlar, xizmatlar)ga narxlarni belgilashda ilmiy-tadqiqot va tajriba konstruktorlik ishlarini mablag‘ bilan ta’minlashga xarajatlarni nazarda tutishga ruxsat berilsin, ular sotilgan mahsulot tannarxining bir foizi miqdorida xolding kompaniyasini barqarorlashtirish va rivojlantirish fondiga va Qo‘mitaning yangi texnikani joriy etish fondiga o‘tkazilsin.

6. O‘zbekiston Respublikasi Qishloq va suv xo‘jaligi vazirligi hamda “O‘zdavtexnazorat” inspeksiyasi:

“Keys” firmasi va boshqa xorijiy firmalarning traktorlariga va o‘rim-yig‘im mashinalariga texnik hujjatlar o‘z vaqtida rasmiylashtirilishini ta’minlasinlar;

ushbu mashinalardan foydalanish, tuzatish, saqlash va ularga texnik xizmat ko‘rsatish qoidalariga rioya qilinishi, ularning malakali mexanizatorlar (operatorlar) bilan ta’minlanishi ustidan muntazam nazorat o‘rnatsinlar;

import texnikaga jinoyatkorona-ehtiyotsizlik bilan munosabatda bo‘lishning har bir fakti bo‘yicha materiallarni aybdorlarni javobgarlikka tortish uchun prokuratura organlariga bersinlar;

O‘zbekiston Respublikasi Ichki ishlar vazirligi Prokuratura organlari bilan birgalikda import texnikadan foydalanishning holati ustidan nazoratni kuchaytirsin, bunday mashinalardan foydalanishni tashkil etishda mas’uliyatsizlik va xo‘jasizlikka yo‘l qo‘yayotgan rahbarlarga nisbatan jinoiy javobgarlikka tortishgacha bo‘lgan qat’iy ta’sir ko‘rsatish chora-tadbirlarini ko‘rsin.

7. “O‘zqishloqxo‘jalikta’minottuzatish” davlat-kooperativ qo‘mitasi O‘zbekiston Respublikasi Qishloq va suv xo‘jaligi vazirligi, Moliya vazirligi hamda banklar bilan birgalikda hosilni yig‘ishtirish mavsumigacha g‘alla o‘rish va sholi o‘rish kombaynlarini import bo‘yicha keltirish masalalarini bir oy muddatda xorijiy firmalar bilan ishlab chiqsin hamda Vazirlar Mahkamasiga takliflar kiritsin.

8. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari B. Olimjonov zimmasiga yuklansin.