Oʻzbekiston Respublikasi Hukumati va Kipr Respublikasi Hukumati, bundan keyingi oʻrinlarda “Tomonlar” deb ataluvchilar,

xalqaro jinoyatchilik davlatlarning rivojlanishi va xavfsizligiga jiddiy tahdid solayotganini anglagan holda,

jinoyatchilikka, ayniqsa uning uyushgan shakllariga qarshi kurashdagi hamkorlikni chuqurlashtirish va rivojlantirishning muhimligini eʼtiborga olib,

tenglik, hamjihatlik va oʻzaro yordam prinsiplariga amal qilgan holda,

quyidagilar toʻgʻrisida kelishib oldilar:

1. Tomonlar oʻzlarining milliy qonunchiligi va ushbu Bitim qoidalariga muvofiq oʻz vakolatli organlari orqali jinoyatchilikka, ayniqsa uning uyushgan shakllariga qarshi kurashda hamkorlik qiladilar.

2. Tomonlar ushbu Bitim kuchga kirgandan soʻng bir oy muddat ichida ushbu Bitimni amalga oshirish uchun masʼul boʻlgan oʻz vakolatli organlarining roʻyxatlari bilan, ularning vakolatlari, manzillari va boshqa zarur maʼlumotlarni koʻrsatgan holda almashadilar. Tomonlar vakolatli organlarga taalluqli barcha yuz berishi mumkin boʻlgan oʻzgarishlar toʻgʻrisida diplomatik kanallar orqali bir-birini darhol xabardor qiladilar.

3. Tomonlarning vakolatli organlari ushbu Bitimni amalga oshirish chogʻida bir-biri bilan bevosita hamkorlik qiladilar.

4. Ushbu Bitim jinoiy ishlar va ekstraditsiya boʻyicha huquqiy yordam koʻrsatish masalalariga daxl qilmaydi.

1. Tomonlar quyidagi jinoyatlarga qarshi kurashda hamkorlik qiladilar:

a) terrorizm;

b) shaxsning hayoti va sogʻligʻiga qarshi jinoyatlar;

c) odam savdosi;

d) giyohvandlik vositalari va psixotrop moddalarning noqonuniy aylanishi;

e) oʻqotar qurollar, oʻq-dorilar, portlovchi moddalar, yadroviy va radioaktiv materiallar va boshqa hamma uchun xavfli moddalar, shuningdek ikki xil maqsadda qoʻllaniladigan predmetlar va texnologiyalarning noqonuniy aylanishi;

f) jinoiy faoliyatdan olingan daromadlarni legallashtirish;

g) pul belgilari, qimmatli qogʻozlar va shaxsni tasdiqlovchi hujjatlarni qalbakilashtirish, shuningdek ulardan noqonuniy foydalanish;

h) fohishalikni ekspluatatsiya qilish va voyaga yetmaganlarning jinsiy erkinligiga qarshi jinoyatlar;

i) noqonuniy migratsiya;

j) bojxona qonunchiligini buzish;

k) madaniy va tarixiy ahamiyatga ega boʻlgan obyektlar yoki sanʼat asarlarining kontrabandasi;

l) avtotransport vositalarini oʻgʻirlash va ular bilan noqonuniy operatsiyalar;

m) moliyaviy jinoyatlar;

n) axborot texnologiyalari sohasidagi jinoyatlar.

2. Tomonlar, shuningdek:

a) yuqori mansabdor shaxslar;

b) havo va temir yoʻl transporti;

c) yoʻl harakati;

d) aloqa tizimi xavfsizligini taʼminlash masalalarida hamkorlik qiladilar.

3. Tomonlar, shuningdek prekursorlarni ishlab chiqarish, tarqatish va foydalanish ustidan nazorat sohasida hamkorlik qiladilar.

1. Tomonlar quyidagi shakllarda hamkorlikni amalga oshiradilar:

a) jinoyatlarni ochish va oldini olishga, shuningdek ushbu Bitimning 2-moddasiga muvofiq boshqa masalalarni hal qilishga yordam berishi mumkin boʻlgan axborotlarni almashish;

b) shaxslar, tashkilotlar, muassasalar va firmalar faoliyatini oʻrganish, tegishli maʼlumotlar boʻyicha shaxslar, predmetlar va hujjatlarni tekshirish yoʻli bilan ushbu Bitimning 2-moddasida nazarda tutilgan jinoyatlarni ochishda yordam koʻrsatish;

c) uyushgan jinoiy guruhlar faoliyatiga barham berishga qaratilgan qoʻshma tadbirlarni amalga oshirish;

d) shaxslar va murdalar identifikatsiyasi;

e) giyohvandlik vositalari va psixotrop moddalar yetkazib berilayotgan shaxslarni, shuningdek noqonuniy aylanishga jalb qilingan har qanday boshqa shaxslarni qamoqqa olish uchun giyohvandlik vositalari va psixotrop moddalarni nazorat ostida yetkazib berishda hamkorlik qilish, bunda zarur maʼlumotlar maqbul muddatlarda taqdim etiladi;

f) stajirovkalar, maslahatlashuvlar va seminarlar oʻtkazish yoʻli bilan ish tajribasini almashish;

g) jinoyatchilikka qarshi kurash, prekursorlar ustidan nazorat qilish masalalari boʻyicha qonun hujjatlari, ularni qoʻllash toʻgʻrisidagi axborotlar, boshqa maʼlumotlar, shu jumladan xavfsizlikni taʼminlash hamda giyohvandlik vositalari va psixotrop moddalarning noqonuniy aylanishini nazorat qilish masalalari yuzasidan maʼlumotlar bilan almashish.

h) yordam koʻrsatish toʻgʻrisidagi soʻrovlarni bajarish;

2. Hamkorlikning koʻlami va aniq shakllari Tomonlarning ehtiyojlari va sharoitlarini, shuningdek muhim ahamiyatga ega boʻlgan boshqa holatlarni hisobga olgan holda vakolatli organlarning oʻzaro kelishuvi boʻyicha belgilanishi mumkin.

1. Ushbu Bitimning 3-moddasi 1-bandining (a) kichik bandida nazarda tutilgan axborot almashinuvi quyidagi jinoyatlarga taalluqli boʻladi:

a) bir Tomon davlati hududida guruhlar tomonidan tayyorlanayotgan yoki sodir etilgan jinoyatlar, agar bunday guruhlar tarkibiga boshqa Tomon davlatining fuqarolari kirgan boʻlsa yoki bunday jinoyatlar ushbu Tomonning manfaatlariga boshqacha tarzda daxl qilsa;

b) giyohvandlik vositalari va psixotrop moddalarning noqonuniy aylanishiga taalluqli boʻlgan jinoyatlar, agar ular bir Tomondan boshqa Tomonga, shu jumladan tranzit tarzda uchinchi mamlakatlar orqali kelib tushayotgan boʻlsa, shuningdek bir Tomon hududida giyohvandlik vositalari va psixotrop moddalarni noqonuniy tayyorlash yoki sotishga boshqa Tomon fuqarolari jalb qilinganda;

c) jinoiy faoliyatdan olingan daromadlarni legallashtirishdan iborat jinoyatlar, bir Tomon davlatining hududi yoki muassasalari ushbu maqsadlar uchun boshqa Tomon davlatining fuqarolari tomonidan foydalanilganda.

2. Tomonlar ular tarafidan aniqlangan prekursorlarni noqonuniy yetkazib berish, tashish yoki foydalanish hollari, bunday turdagi faoliyatni aniqlash va unga barham berish boʻyicha qabul qilinayotgan choralar toʻgʻrisidagi oʻzaro ahamiyatga molik boʻlgan axborot bilan almashadilar.

Tomonlar quyidagilar toʻgʻrisida axborot almashadilar:

a) uyushgan guruhlar tomonidan jinoyatlarni sodir etish usullari, ularning tarkibi, tuzilishi, faoliyat sohasi va jinoiy aloqalari;

b) giyohvandlik vositalari va psixotrop moddalarni yashirish usullari va ularni topish metodlari, ularni yashirincha boshqa joyga koʻchirish marshrutlari va kanallari, noqonuniy aylanishga kelib tushadigan giyohvandlik vositalari va psixotrop moddalarning yangi turlari, ularning xususiyatlari va tayyorlash texnologiyalari;

c) terrorchilik guruhlarining tuzilishi va tarkibi, ularning faoliyat usullari, ular tomonidan foydalaniladigan texnik vositalar, tayyorlanayotgan va sodir etilgan terrorchilik harakatlari va ularga aloqador shaxslar, agar bunday faoliyat boshqa Tomon davlatining manfaatlariga daxl qilsa;

d) jinoiy faoliyatdan olingan daromadlarni legallashtirish usullari, shunday turdagi faoliyatga aloqadorlikda gumon qilinayotgan tashkilotlar, muassasalar va firmalar;

e) Tomonlardan biri davlatining ushbu Bitimning 2-moddasida koʻrsatib oʻtilgan jinoyatlarni sodir etishda gumon qilinayotgan va boshqa Tomon davlatining hududida doimiy ravishda yashaydigan yoki vaqtincha turgan fuqarolari;

f) bir Tomon davlati qonunlarining boshqa Tomon davlati fuqarolari tarafidan buzilishi.

1. Ushbu Bitim doirasidagi hamkorlik vakolatli organlarning yozma soʻrovlari asosida amalga oshiriladi. Ushbu Bitimda boshqacha tartib nazarda tutilmagan boʻlsa, soʻrov har bir Tomonning vakolatli va/yoki vakil qilingan mansabdor shaxslari tomonidan imzolanishi lozim.

2. Vakolatli organlar soʻrovlarni bir-biriga bevosita yoki diplomatik kanallar boʻyicha va/yoki Xalqaro jinoyat politsiyasi tashkiloti (Interpol) orqali yuborishlari mumkin. Soʻrovlar, shuningdek elektron aloqa vositalari yordamida ham yuborilishi mumkin.

3. Soʻrovga uning ijrosini yengillashtirish uchun moʻljallangan hujjatlar, ularning nusxalari yoki hujjatlardan koʻchirmalar, fotosuratlar, audio, video va boshqa materiallar ilova qilinishi mumkin.

4. Yordam koʻrsatish toʻgʻrisidagi soʻrov soʻralayotgan Tomon davlatining qonunchiligiga va soʻrovda aytib oʻtilgan tartiblarga muvofiq, ular ushbu davlat qonunchiligiga zid boʻlmagan taqdirda bajariladi. Agar soʻrovda koʻrsatilgan harakatlarni amalga oshirish soʻrovni qabul qilgan organning vakolatiga kirmasa, u soʻrovni oʻz davlatining tegishli organiga topshiradi va bu haqda soʻrayotgan Tomonni xabardor qiladi.

5. Soʻrovlar ularda koʻrsatilgan muddatlarda bajariladi. Zarurat tugilganda Tomonlarning vakolatli organlari soʻrovning bajarilishini yengillashtiruvchi qoʻshimcha maʼlumotlarni soʻrab olishga haqli. Agar soʻrovni bajarish soʻralayotgan Tomon davlatida amalga oshirilayotgan jinoiy tergovga yoki boshqa ishni yuritishga toʻsqinlik qilsa, uni bajarish soʻrayotgan Tomonni xabardor qilish bilan keyinga surilishi mumkin.

6. Vakolatli organlar tergovga zarar yetkazmagan holda, bunday harakatlar ushbu Bitimda nazarda tutilganda yoki bu boshqa Tomon uchun ahamiyatli deb hisoblashga asoslar boʻlganda, oʻz tashabbuslari bilan oldindan soʻrovsiz ushbu Bitim doirasida tegishli maʼlumotlarni yuborishlari mumkin.

1. Agar soʻrovni bajarish inson huquqlarining buzilishiga sabab boʻlishi, davlatning milliy suvereniteti va milliy xavfsizligiga zarar yetkazishi mumkin boʻlsa yoki soʻralayotgan Tomon davlati milliy qonunchiligiga zid boʻlsa, uni bajarish butunlay yoki qisman rad etilishi mumkin.

2. Soʻrovni bajarish rad etilgan taqdirda soʻralayotgan vakolatli organ bu haqda rad etish sabablarini koʻrsatgan holda yozma ravishda soʻrayotgan vakolatli organni xabardor qiladi.

1. Tomonlar jinoyatchilikka qarshi kurash, shuningdek prekursorlarni ishlab chiqarish, tarqatish va foydalanishni nazorat qilish maqsadida fan va texnika sohasidagi tadqiqot dasturlarini amalga oshirishda oʻzaro hamkorlik qiladilar. Ushbu maqsadda ular zarur hollarda hamkorlikni rivojlantirish va oʻzaro ahamiyatga ega boʻlgan masalalarni muhokama qilish uchun xalqaro konferensiyalar va seminarlarda ishtirok etadilar.

2. Tomonlar, shuningdek vakolatli organlar uchun kadrlar tayyorlash, ushbu Bitim maqsadlariga erishish uchun bir-biriga moddiy-texnik va boshqa yordam koʻrsatish sohasidagi alohida kelishuvlarga muvofiq oʻzaro manfaatdorlik asosida hamkorlik qiladilar.

1. Tomonlar huquqbuzarlarni, xususan voyaga yetmaganlarni reabilitatsiya va ijtimoiy adaptatsiya qilish boʻyicha dasturlarda ishtirok etish orqali giyohvandlik vositalari va psixotrop moddalarni isteʼmol qilishni kamaytirish maqsadida jinoyatchilikning oldini olishda hamkorlik qiladilar. Ushbu maqsadlarda Tomonlar jazoni ijro etish muassasalari tajribalari bilan almashadilar va mahkumlar sharoitlarini yaxshilashda hamkorlik qiladilar hamda jazoni oʻtab boʻlgan shaxslar uchun reabilitatsiya markazlari faoliyatida ishtirok etadilar.

2. Tomonlar jinoyatchilikning oldini olish va uning ortishiga imkon beruvchi sharoitlarni bartaraf qilish maqsadida oʻzlarining davlat va jamoat muassasalari oʻrtasida hamkorlikni yoʻlga qoʻyishni qoʻllab quvvatlaydilar.

1. Tomonlar oʻz vakolatli organlari bir-birlaridan oladigan axborot yopiq xususiyatga ega boʻlsa yoki axborot yuborayotgan Tomon uning oshkor etilishini lozim topmasa, ushbu axborotning maxfiyligini taʼminlashlari toʻgʻrisida kelishib oldilar. Mazkur qoida Tomonlar bir-birlaridan oladigan texnik vositalar, jihozlar va materiallarga ham daxldor boʻlishi mumkin.

2. Uchinchi tomonga yoki ushbu Bitimga koʻra vakolatli organ hisoblanmagan boshqa milliy organga ushbu Bitim doirasida olingan maxfiy axborot, texnik vositalar, jihozlar va materiallarni berish zarur boʻlganda ularni taqdim etgan vakolatli organning oldindan yozma roziligi talab etiladi.

Hamkorlik doirasida taqdim etilgan shaxsga oid maʼlumotlar himoyasini taʼminlashda har bir Tomon oʻz milliy qonunchiligini qoʻllaydi va quyidagi shartlarga rozilik bildiradi:

a) qabul qiluvchi Tomon shaxsga oid maʼlumotlardan faqat koʻrsatilgan maqsadlarda va yuborayotgan Tomon belgilagan shartlar asosida foydalanishi mumkin;

b) maʼlumotni taqdim etgan Tomonning soʻrovi boʻyicha qabul qiluvchi Tomon unga olingan maʼlumotlardan foydalanganligi va erishilgan natijalar boʻyicha axborot yuboradi;

v) shaxsga oid maʼlumotlar faqat Tomonlarning ushbu Bitimga muvofiq vakil qilib belgilangan vakolatli organlariga yuborilishi mumkin;

g) shaxsga oid maʼlumotlarni uchinchi tomonga berish uchun ularni taqdim etgan Tomoning oldindan yozma roziligi talab etiladi;

d) Tomonlar ushbu Bitim doirasida olingan shaxsga oid maʼlumotlarni ruxsatsiz olish, foydalanish, oʻzgartirish, yoʻq qilish, tarqatish va nashr qilishdan tegishli ravishda himoya qilinishini taʼminlaydilar.

1. Tomonlar tijorat asosida tashuvchilar tomonidan xalqaro yoʻlovchi va yuk tashishlarda ishlatilayotgan transport vositalaridan ushbu Bitimning 2-moddasida koʻrsatib oʻtilgan jinoyatlarni sodir etish uchun foydalanilmasligini taʼminlash maqsadida kerakli choralarni koʻradilar. Bunday choralar tijorat asosida tashuvchilar bilan maxsus kelishuvlarni oʻz ichiga olishi mumkin.

2. Tomonlar tijorat asosida tashuvchilarga ularning transport vositalaridan jinoyat sodir etish uchun foydalanilishini bartaraf qilish maqsadida zarur ehtiyot choralari koʻrish majburiyatini yuklaydilar.

3. Tomonlar transport vositalari va yuklarning ruxsatsiz olinishiga yoʻl qoʻymaslik va tegishli xavfsizlik choralarini koʻrish maqsadida chegaradan oʻtish joylarida va boshqa bojxona nazorati zonalarida tijorat tashuvchilar bilan tegishli organlar oʻrtasida hamkorlikni taʼminlaydilar.

1. Tomonlar ular oʻz majburiyatlarini bajarishi uchun zarur boʻlgan darajada ushbu Bitimni bajarish boʻyicha mustaqil xarajat qiladilar.

2. Zaruriyat tugʻilganda Tomonlar ushbu Bitimdan kelib chiqadigan harakatlarni amalga oshirish uchun birgalikda xarajat qiladilar va bu har bir alohida holatda oʻzaro kelishuvlar asosida rasmiylashtiriladi. Tomonlarning birgalikdagi xarajatlar boʻyicha majburiyatlari ushbu kelishuvlar bilan tartibga solinadi.

3. Tomonlar zarur hollarda ushbu Bitimning 2-moddasida koʻrsatib oʻtilgan jinoyatlarga barham berish boʻyicha aniq masalalarni hal qilish uchun zarur boʻlgan jihozlari va materiallar bilan begʻaraz yordam koʻrsatishlari mumkin.

Ushbu Bitim doirasidagi hamkorlikni amalga oshirishda ingliz tilidan foydalaniladi.

1. Zaruriyat tugʻilganda, Tomonlar ushbu Bitim doirasidagi hamkorlikni muvofiqlashtirish maqsadida, u kuchga kirgandan soʻng Tomonlar tarafidan tayinlangan aʼzolardan iborat Qoʻshma komissiyani tuzishlari mumkin.

2. Qoʻshma komissiya oʻzaro ahamiyatga ega boʻlgan masalalarni koʻrib chiqish va tegishli qarorlarni qabul qilish uchun zarur boʻlgan vaqtda navbati bilan Oʻzbekiston Respublikasida va Kipr Respublikasida yigʻilib turadi.

3. Tomonlar ular tarafidan Qoʻshma komissiyada ishtirok etish uchun tayinlangan shaxslarning ismlari va ular bilan aloqa qilish uchun maʼlumotlar haqida diplomatik kanallar orqali bir-birini xabardor qiladilar.

4. Ushbu Bitimni amalga oshirish maqsadida Tomonlardan har biri oʻzining markaziy vakolatli organlaridagi oʻzgarishlar toʻgʻrisida boshqa Tomonni diplomatik kanallar orqali xabardor qiladi.

Ushbu Bitimni talqin qilish yoki koʻllash bilan bogʻliq har qanday nizolar Tomonlar oʻrtasida maslahatlashuvlar va muzokaralar yoʻli bilan hal etiladi.

Ushbu Bitim Tomonlarning, ular ishtirokchisi boʻlgan boshqa xalqaro shartnomalar boʻyicha majburiyatlariga daxl qilmaydi.

1. Tomonlarning oʻzaro kelishuvi boʻyicha, ushbu Bitimga uning ajralmas qismi hisoblanadigan protokollar bilan rasmiylashtiriladigan oʻzgartish va qoʻshimchalar kiritilishi mumkin. Mazkur oʻzgartishlar ushbu Bitimning 19-moddasiga muvofiq kuchga kiradi.

2. Tomonlar yoki ularning vakolatli organlari ushbu Bitimning alohida qoidalarini amalga oshirish maqsadida qoʻshimcha bitimlar va protokollar tuzishlari mumkin.

1. Ushbu Bitim Tomonlarning uning kuchga kirishi uchun zarur boʻlgan davlat ichki protseduralarining bajarilganligi toʻgʻrisidagi oxirgi xabarnoma olingan sanadan soʻng 30 kun oʻtgach kuchga kiradi.

2. Ushbu Bitim nomaʼlum muddatga tuziladi va Tomonlardan biri oʻzining ushbu Bitimning amal qilishini toʻxtatish maqsadi toʻgʻrisida diplomatik kanallar orqali xabar bermaguncha amal qilishda davom etadi. Bu holda Bitimning amal qilishi boshqa Tomon denonsatsiya toʻgʻrisidagi bunday xabarnomani olgan kundan keyin olti oy oʻtgach toʻxtatiladi.

Oʻzlarining tegishli Hukumatlari tomonidan bunga vakolat berilgan Tomonlarning vakillari shunga guvohlik berib va tasdiqlab, ushbu Bitimni imzoladilar.

2012-yil 5-aprelda Toshkent shahrida har biri oʻzbek, grek va ingliz tillarida boʻlgan ikki asl nusxada tuzildi, bunda barcha matnlar bir xil kuchga ega. Ushbu Bitim qoidalarini talqin qilishda kelishmovchiliklar yuzaga kelganda ingliz tilidagi matn ustuvor hisoblanadi.