Konserva va vino-aroq sanoati korxonalarining ishlab chiqarish quvvatlaridan yanada toʻla va samarali foydalanish, meva-sabzavot ekinlari va uzum hosildorligini oshirish hisobiga oʻz xom ashyo bazasini mustahkamlash, shuningdek “Oʻzmevasabzavotuzumsanoat-xolding” xolding kompaniyasining oʻz tarkibiga kiruvchi korxonalarni boshqarishdagi rolini oshirish maqsadida Vazirlar Mahkamasi qaror qiladi:

1. “Oʻzmevasabzavotuzumsanoat-xolding” xolding kompaniyasi Oʻzbekiston Respublikasi Qishloq va suv xoʻjaligi vazirligi, Qoraqalpogʻiston Respublikasi Vazirlar Kengashi va viloyatlar hokimliklari bilan birgalikda kompaniyaning meva-sabzavot va uzumchilik xoʻjaliklariga tegishli ekin maydonlarida paxta, boshoqli don ekinlari va ixtisosni belgilamaydigan boshqa ekinlarni bosqichma-bosqich qisqartirish jadvallarini ikki hafta muddatda ishlab chiqsin.

“Oʻzvinosanoat-xolding” xolding kompaniyasiga koʻrsatib oʻtilgan jadvallarni hisobga olgan holda kompaniya xoʻjaliklari yerlarida meva-sabzavot, kartoshka va uzum ekishni mustaqil ravishda prognozlashtirish huquqi berilsin.

2. Oʻzbekiston Respublikasi Davlat mulki qoʻmitasi, “Oʻzmevasabzavotuzumsanoat-xolding” xolding kompaniyasi va hududiy “Mevasabzavot” birlashmalarining kompaniya hamda hududiy birlashmalar tarkibiga kiruvchi vino-aroq va spirt sanoati aksiyadorlik jamiyatlari ustav jamgʻarmasini davlatga tegishli mol-mulkni kapitallashtirish, budjet oldidagi qarzlar tarkibini oʻzgartirish, shuningdek boshqa manbalar hisobiga aksiyalar davlat ulushini 1 va 1a-ilovalarga* muvofiq nazorat paketigacha yetkazish yoʻli bilan koʻpaytirish toʻgʻrisidagi taklifi qabul qilinsin.

3. Tijorat banklariga har yili sabzavot, meva va uzum yetishtirishga ixtisoslashtirilgan qishloq xoʻjaligi korxonalariga avans berish uchun, shuningdek tayyorlash mavsumi davrida ular bilan hisob-kitob qilish va moddiy-texnika resurslari sotib olish uchun “Oʻzvinosanoat-xolding” xolding kompaniyasiga, yil davomida qaytarish sharti bilan, kredit ajratish tavsiya etilsin.

4. Barqaror moliyalashtirishni hamda “Oʻzmevasabzavotuzumsanoat-xolding” xolding kompaniyasi korxonalarining qishloq xoʻjaligi tovar ishlab chiqaruvchilari bilan oʻz vaqtida hisob-kitob qilishini taʼminlash uchun qishloq xoʻjaligi korxonalarining 1,2 mlrd. soʻmlik meva-sabzavot mahsulotlarini yetishtirish yuzasidan xarajatlariga ularga “Oʻzbekneftgaz” kompaniyasi, “Oʻzkimyosanoat” uyushmasi, Energetika va elektrlashtirish vazirligi va qishloq xoʻjaligiga xizmat koʻrsatuvchi boshqa idoralar korxonalarining mahsulot (xizmatlar) tarzidagi tovar krediti bilan avans berishga ruxsat etilsin, bu korxonalarning budjetga vaqtida toʻlanmagan qarzlari tarkibi tegishli ravishda oʻzgartirilsin.

Oʻzbekiston Respublikasi Moliya vazirligi bu korxonalarning tarkibi oʻzgartiriladigan budjetga vaqtida toʻlanmagan qarzlarini Moliya vazirligining “Oʻzmevasabzavotuzumsanoat-xolding” xolding kompaniyasiga 2 yil muddatga krediti sifatida rasmiylashtirsin.

5. Oʻzbekiston Respublikasi Moliya vazirligi “Oʻzmevasabzavotuzumsanoat-xolding” xolding kompaniyasi hamda xizmat koʻrsatuvchi tijorat banklari bilan birgalikda xolding kompaniyasi korxonalarining oʻz aylanma mablagʻlarini toʻldirish va uzumchilikni rivojlantirish masalasini ikki oy muddatda koʻrib chiqsin va hal qilsin.

Oʻz aylanma mablagʻlarini toʻldirish manbalaridan biri sifatida 2000-yilda alkogolli mahsulotlarga aksiz soligʻini oshirish masalasi koʻrib chiqilsin.

6. “Oʻzqishloqxoʻjaliktaʼminottuzatish” davlat-kooperativ qoʻmitasi “Oʻzmevasabzavotuzumsanoat-xolding” xolding kompaniyasi bilan birgalikda xolding kompaniyasi xoʻjaliklariga sabzavot, kartoshka, meva va uzum yetishtirishda ekin qator oralarida agrotexnika tadbirlarini oʻtkazish uchun mashina-traktor parklari tomonidan shartnomaviy asosda xizmatlar koʻrsatishga doir tadbirlarni ikki hafta muddatda ishlab chiqsin va tasdiqlasin.

7. “Oʻzvinosanoat-xolding” xolding kompaniyasi tarkibiga kiruvchi meva, sabzavot va uzum yetishtirishga ixtisoslashtirilgan qishloq xoʻjaligi korxonalari narxlarni shakllantirish va moddiy-texnika resurslari, kimyoviy dorilar, mineral oʻgʻitlar va yonilgʻi-moylash materiallari bilan taʼminlash shartlari boʻyicha paxtachilik xoʻjaliklari va gʻalla ekuvchi xoʻjaliklarga tenglashtirilsin.

8. Oʻzbekiston Respublikasi Qishloq va suv xoʻjaligi vazirligi, “Oʻzvinosanoat-xolding” xolding kompaniyasi, Qoraqalpogʻiston Respublikasi Vazirlar Kengashi va viloyatlar hokimliklari vinochilik sanoatini yanada rivojlantirish va eksportga moʻljallangan mahsulotlar ishlab chiqarishni koʻpaytirish uchun qishloq xoʻjaligini uzumning oʻta qimmatli navlari bilan taʼminlash maqsadida meva koʻchatlari yetishtiruvchi xoʻjaliklar faoliyatini takomillashtirish chora-tadbirlarini koʻrsinlar.

10. Hududiy “Mevasabzavot” birlashmalari raislarini, rais oʻrinbosarlarini va bosh buxgalterlarini attestatsiyadan oʻtkazish boʻyicha 2-ilovaga* muvofiq maxsus idoralararo komissiya tuzilsin.

Hududiy “Mevasabzavot” birlashmalari rahbar xodimlari va mutaxassislarini attestatsiyadan oʻtkazish boʻyicha komissiya:

Attestatsiyadan oʻtkazish tartibi toʻgʻrisidagi Nizomni oʻn kun muddatda ishlab chiqsin va tasdiqlasin;

hududiy “Mevasabzavot” birlashmalari rahbarlari va mutaxassislarini ikki oy muddatda attestatsiyadan oʻtkazsin.

12. Vazirlar Mahkamasining “Respublika meva-sabzavot xoʻjaligida monopoliyadan chiqarish va ixtisoslashtirishni chuqurlashtirish chora-tadbirlari toʻgʻrisida” 1997-yil 18-iyuldagi 363-son qaroriga 6-7-ilovalarning spirt va alkogolli mahsulotlar ishlab chiqaruvchi aksiyadorlik jamiyatlaridagi aksiyalar paketlari ulushlarini oʻzgartirishga oid qismiga mazkur qarorga 1 va 1a-ilovalarga muvofiq oʻzgartirishlar kiritilsin.

13. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari M.Z. Usmonov zimmasiga yuklansin.