“Sog‘lom avlod” davlat dasturini amalga oshirishda “Sog‘lom avlod uchun” hukumatga qarashli bo‘lmagan xalqaro xayriya jamg‘armasining faol qatnashishi uchun shart-sharoitlar yaratish, Jamg‘arma funksiyalari kengayganligini hisobga olgan holda uning moddiy va ma’naviy bazasini mustahkamlash maqsadida Vazirlar Mahkamasi qaror qiladi:

1. Quyidagilar “Sog‘lom avlod uchun” hukumatga qarashli bo‘lmagan xalqaro xayriya jamg‘armasining muhim vazifalari deb hisoblansin:

“Sog‘lom avlod” davlat dasturi bajarilishini ta’minlash uchun zarur mablag‘lar va resurslarni safarbar qilish, jamoatchilikni, korxonalar va tashkilotlar rahbarlarini unga faol jalb qilish;

“Sog‘lom avlod” davlat dasturining maqsadlari va mazmunini, ona va bola sog‘ligini mustahkamlashni, sog‘lom avlodni shakllantirish va tarbiyalashda oilaning rolini kuchaytirishni aholi o‘rtasida keng targ‘ib qilishni tashkil etish;

xorijiy va mamlakatimiz homiylarining muruvvat xayriya yordami mablag‘larini jalb qilish va to‘plash ishlarini faol olib borish;

jamoat va nodavlat tuzilmalarining sog‘lom avlodni shakllantirishga qaratilgan, ona va bola sog‘ligini muhofaza qilish bilan bog‘liq vazifalarni hal etishga doir sa’y-harakatlarini muvofiqlashtirish;

aholining ehtiyojmand qatlamlariga, eng avvalo ko‘p bolali oilalarga, kamqonlik kasalligiga duchor bo‘lgan ayollarga, nogiron bolalarga hamda bolalar, mehribonlik uylari va internatlarda tarbiyalanayotgan bolalarga muruvvat yordami ko‘rsatish;

ona va bola sog‘ligini muhofaza qilish, sog‘lom avlodni tarbiyalash ishida xalqaro hamkorlikni rivojlantirish va chuqurlashtirish.

2. “Sog‘lom avlod uchun” hukumatga qarashli bo‘lmagan xalqaro xayriya jamg‘armasining tuzilmasiga va uning Vasiylik kengashi tarkibiga 1 va 2-ilovalarga* muvofiq rozilik berilsin.

Vasiylik kengashiga:

Jamg‘armaning moddiy-texnika va moliyaviy negizi mustahkamlanishida, “Sog‘lom avlod” davlat dasturini amalga oshirish bo‘yicha Jamg‘armaga yuklangan funksiyalar ro‘yobga chiqarilishida unga har tomonlama ko‘maklashish;

Jamg‘arma tomonidan safarbar qilinayotgan mablag‘lardan maqsadli foydalanilishi ustidan qat’iy nazorat qilinishini ta’minlash, Jamg‘arma boshqaruvi raisi va uning tuzilmalarining jamg‘arma mablag‘laridan foydalanish to‘g‘risidagi hisobotlarini har chorakda eshitish tavsiya qilinsin.

3. Quyidagilar:

“Sog‘lom avlod uchun” jamg‘armasi markaziy apparati va uning mintaqaviy filiallari tuzilmasi 3 va 4-ilovalarga muvofiq;

“Sog‘lom avlod uchun” hukumatga qarashli bo‘lmagan xalqaro xayriya jamg‘armasi to‘g‘risidagi nizom 5-ilovaga muvofiq ma’qullansin.

Jamg‘arma boshqaruvi raisi maqomiga ko‘ra Sog‘liqni saqlash vazirining o‘rinbosariga, jamg‘arma mintaqaviy filiallari rahbarlari esa — sog‘liqni saqlash mintaqaviy organlari rahbarlari o‘rinbosarlariga tenglashtirilsin.

“Sog‘lom avlod uchun” hukumatga qarashli bo‘lmagan xalqaro xayriya jamg‘armasiga Jamg‘arma huzurida Aholining tibbiy madaniyatini oshirish bo‘yicha maslahat kengashi tashkil etish, uning tarkibiga amaliyotchi mutaxassislar, tibbiyot o‘quv yurtlarining olimlari va o‘qituvchilarini kiritish tavsiya qilinsin.

Belgilansinki, Jamg‘arma apparati va uning mintaqaviy filiallari sarf-xarajatlari Jamg‘armaning o‘z mablag‘lari hisobiga qoplanadi.

4. “Sog‘lom avlod uchun” jamg‘armasining asosiy pul mablag‘lari:

Jamg‘arma qatnashchilarining pul badallari;

budjetdan tashqari jamg‘armalarning mablag‘lari hamda ham O‘zbekiston Respublikasi rezidentlari, ham O‘zbekiston Respublikasi norezidentlari bo‘lgan yuridik va jismoniy shaxslarning, shuningdek xalqaro tashkilotlarning homiylik mablag‘lari;

Jamg‘arma faoliyatidan olingan daromadlar, shuningdek, Jamg‘arma oldiga qo‘yilgan vazifalarni hal etish maqsadida u tomonidan ta’sis etilgan korxonalar va tashkilotlarning daromadlari;

qonun hujjatlari bilan taqiqlanmagan boshqa tushumlar hisobiga shakllantirilishi ma’lumot uchun qabul qilinsin.

5. O‘zbekiston Respublikasi Moliya vazirligi manfaatdor vazirliklar, idoralar va jamoat tashkilotlari bilan birgalikda:

2000-yil I choragi yakunlaridan boshlab har chorakda “Sog‘lom avlod uchun” hukumatga qarashli bo‘lmagan xalqaro xayriya jamg‘armasiga budjetdan tashqari jamg‘armalar hisobiga qo‘shimcha mablag‘lar yo‘naltirilishini nazarda tutsin, ushbu mablag‘lar “Sog‘lom avlod” davlat dasturini amalga oshirishga maqsadli yo‘naltirilsin;

ikki hafta muddatda Jamg‘armaning ko‘rsatib o‘tilgan qo‘shimcha mablag‘larini shakllantirish va ulardan foydalanish tartibini ishlab chiqsin va tasdiqlasin.

6. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari:

“Sog‘lom avlod uchun” jamg‘armasini u ustav vazifalarini hal etishida doimiy ravishda samarali qo‘llab-quvvatlasinlar;

bir oy muddatda Jamg‘armaning mintaqaviy filiallarini moslashtirilgan binolarda joylashtirish, ularni filiallar o‘z funksiyalarini bajarishi uchun mebel hamda zarur texnika va aloqa vositalari bilan jihozlash chora-tadbirlarini ko‘rsinlar.

7. Mahalliy o‘zini o‘zi boshqarish organlariga, “Mahalla” va “Kamolot” jamg‘armalariga, “Oila” markaziga, xotin-qizlar qo‘mitalariga hamda boshqa jamoat tashkilotlari va jamg‘armalarga “Sog‘lom avlod” davlat dasturining amalga oshirilishini ta’minlashda “Sog‘lom avlod uchun” hukumatga qarashli bo‘lmagan xalqaro xayriya jamg‘armasi bilan faol o‘zaro hamkorlik qilish tavsiya qilinsin.

8. Vazirlar Mahkamasining 1993-yil 3-iyundagi 268-son qarorining 1—3, 9-bandlari va Vazirlar Mahkamasining 1993-yil 28-oktabrdagi 524-son qarorining 7-bandi o‘z kuchini yo‘qotgan deb hisoblansin.

9. O‘zbekiston Respublikasi Adliya vazirligi manfaatdor vazirliklar va idoralar bilan birgalikda ikki hafta muddatda Vazirlar Mahkamasiga qonun hujjatlariga o‘zgartirish va qo‘shimchalar kiritish, idoraviy me’yoriy hujjatlarni mazkur qarorga muvofiqlashtirish to‘g‘risida taklif kiritsin.

10. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari H.S. Karomatov zimmasiga yuklansin.

Izoh: mintaqaviy filiallarga yuklangan funksiyalarni Toshkent shahri bo‘yicha Jamg‘arma markaziy apparati bajaradi.

1. “Sog‘lom avlod uchun” hukumatga qarashli bo‘lmagan xalqaro xayriya jamg‘armasi (keyingi o‘rinlarda “Jamg‘arma” deb ataladi) O‘zbekiston Respublikasi Prezidentining 1993-yil 23-apreldagi PF-596-son Farmoni va Vazirlar Mahkamasining 1993-yil 3-iyundagi 268-son va 2000-yil 4-martdagi 74-son qarorlari bilan tashkil etilgan.

2. Jamg‘arma hukumatga qarashli bo‘lmagan xalqaro xayriya jamoat tashkiloti sifatida davlat ro‘yxatiga olingan vaqtdan boshlab yuridik shaxs huquqiga ega bo‘ladi. Xo‘jalik mustaqilligi asosida faoliyat ko‘rsatadi, o‘z mol-mulkiga, mustaqil balansga, banklarda hisob raqamlariga, shu jumladan xorijiy valyutadagi hisob raqamlariga ega bo‘ladi. Mulkiy va mulkiy bo‘lmagan huquqlarga o‘z nomidan ega bo‘ladi, tegishli majburiyatlarni bajaradi.

3. Jamg‘arma o‘z faoliyatini O‘zbekiston Respublikasi Konstitutsiyasiga, O‘zbekiston Respublikasi qonunlariga, O‘zbekiston Respublikasi Prezidentining farmonlariga, Vazirlar Mahkamasining qarorlari va farmoyishlariga, mazkur Ustavga va Jamg‘arma Ustaviga muvofiq amalga oshiradi.

4. Jamg‘arma istalgan shaklda ulush qo‘shish uchun O‘zbekiston Respublikasi rezidentlari va norezidentlari bo‘lgan yuridik va jismoniy shaxslar, xalqaro tashkilotlar uchun ochiqdir.

5. Jamg‘armaning faoliyati xayriya tusidadir. Uning mablag‘lari, ularning tushish manbalaridan qat’i nazar, ustavda ko‘rsatilgan vazifalar va maqsadlarga erishish uchun sarflanadi.

6. Jamg‘armaning yuridik manzili: O‘zbekiston Respublikasi, Toshkent shahri, Oxunboboyev ko‘chasi, 15-uy.

7. 2000-yil O‘zbekiston Respublikasida “Sog‘lom avlod yili” deb e’lon qilinganligi munosabati bilan “Sog‘lom avlod” davlat dasturi amalga oshirilishida faol qatnashish, sog‘lom avlodni tarbiyalashga qaratilgan kompleks chora-tadbirlarni amalga oshirish, yuksak insoniy qadriyatlarga asoslangan hayotiy nuqtai nazarga ega bo‘lgan ma’naviy boy, axloqiy yetuk aql-zakovatli, yuqori bilimli jismonan sog‘lom, uyg‘un rivojlangan shaxsni kamol toptirish, onalik va bolalikni muhofaza qilish Jamg‘arma faoliyatining maqsadi hisoblanadi.

8. Quyidagilar Jamg‘armaning asosiy vazifalari hisoblanadi:

“Sog‘lom avlod” davlat dasturi bajarilishini ta’minlash uchun zarur mablag‘lar va resurslarni safarbar qilish, jamoatchilikni, korxonalar va tashkilotlar rahbarlarini unga faol jalb qilish;

“Sog‘lom avlod” davlat dasturining maqsadlari va mazmunini, ona va bola sog‘ligini mustahkamlashni, sog‘lom avlodni shakllantirish va tarbiyalashda oilaning rolini kuchaytirishni aholi o‘rtasida keng targ‘ib qilishni tashkil etish;

xorijiy va mamlakatimiz homiylarining muruvvat xayriya yordami mablag‘larini jalb qilish va to‘plash ishlarini faol olib borish;

jamoat va nodavlat tuzilmalarining sog‘lom avlodni shakllantirishga qaratilgan, ona va bola sog‘ligini muhofaza qilish bilan bog‘liq vazifalarni hal etishga doir sa’y-harakatlarini muvofiqlashtirish;

respublikaning butun hududida aholini sog‘lom avlod tug‘ish, tarbiyalash va onalik va bolalikni muhofaza qilish masalalari bo‘yicha yalpi o‘qitish tizimini tashkil etishga, aholining tibbiy madaniyatini oshirishga qaratilgan kompleks ijtimoiy va tashviqot-targ‘ibot dasturlarini tashkil etish, ishlab chiqish va amalga oshirish yo‘li bilan ijtimoiy ongda to‘laqonli, uyg‘un rivojlangan va sog‘lom avlod tug‘ilishi va tarbiyalanishi uchun yuksak javobgarlik psixologiyasi shakllantirilishiga ko‘maklashish;

aholining ehtiyojmand qatlamlariga, eng avvalo ko‘p bolali oilalarga, kamqonlik kasalligiga duchor bo‘lgan ayollarga, nogiron bolalarga hamda bolalar, mehribonlik uylari va internatlarda tarbiyalanayotgan bolalarga muruvvat yordami ko‘rsatish;

tug‘ishga yordam beruvchi va bolalar muassasalarining moddiy-texnika bazasini mustahkamlashga, ularni ixtisoslashtirilgan asbob-uskunalar bilan jihozlashga, yalpi samarali davolash vositalari bilan ta’minlashga ko‘maklashish;

bolalarning sog‘ligini mustahkamlash, bilim olishlari va ularni tarbiyalash uchun shart-sharoitlarni yaxshilash chora-tadbirlarini amalga oshirish;

“Mehribonlik” uylarida, maktab-internatlarda va ixtisoslashtirilgan maktablarda tarbiyalanayotgan bolalarga yordam ko‘rsatish;

onalik va bolalikni muhofaza qilish, sog‘lom avlodni tarbiyalash ishida xalqaro hamkorlikni rivojlantirish va chuqurlashtirish.

9. Qayd etib o‘tilgan vazifalarga erishish uchun Jamg‘arma quyidagi yo‘nalishlar bo‘yicha faoliyat ko‘rsatadi:

tibbiyot, ovqatlanish, ekologiya sohalarida hamda onalik va bolalikning hayotiy ehtiyojlarini qondirish bo‘yicha boshqa yo‘nalishlar sohasida yangi texnologiyalar, texnika va asbob-uskunalar joriy etilishini tashkil etish;

ona va bola hayot faoliyatining huquqiy, axloqiy-etik, ijtimoiy-ruhiy shart-sharoitlarini takomillashtirishga ko‘maklashish;

respublikada bolalar oziq-ovqatini yaxshilash, uning sanoat yo‘li bilan ishlab chiqarilishini ko‘paytirish;

tug‘ruqxona komplekslariga, qishloq vrachlik punktlariga, bolalar uylariga, ayollar maslahatxonalariga va onalik bilan bog‘liq bo‘lgan boshqa muassasalarga vasiylik va g‘amxo‘rlik qilishni amalga oshirish;

aholining tibbiy madaniyatini oshirish uchun Jamg‘arma huzurida Maslahat kengashi faoliyatini tashkil etish;

Jamg‘armaning yuridik shaxs maqomiga ega bo‘lgan filiallarini tashkil etish;

onalik va bolalikni muhofaza qilishning eng dolzarb muammolarini hal etish uchun Jamg‘arma huzurida ixtisoslashtirilgan korxonalar va tashkilotlar tashkil etish.

10. Jamg‘arma qayd etib o‘tilgan vazifalarni va faoliyat yo‘nalishlarini ta’minlash uchun O‘zbekiston Respublikasi qonun hujjatlariga muvofiq quyidagi huquqlarga ega bo‘ladi:

o‘z vakolati doirasida yuridik va jismoniy shaxslar bilan huquqiy aktlarni mustaqil amalga oshirish;

keng tushuntirish ishlari yordamida O‘zbekiston Respublikasi fuqarolari va xorijiy fuqarolarning, jamoat tashkilotlarining, banklarning, korxonalar va firmalarning ham pul mablag‘lari ko‘rinishida, ham adabiyot va san’at asarlari, ilmiy va loyiha ishlanmalari, mashinalar, asbob-uskunalar, inshootlar va boshqa moddiy boyliklar ko‘rinishidagi ko‘ngilli ulushlarini jalb etish;

davlat tashkilotlari bilan hamda boshqa tashkilotlar, korxonalar, muassasalar va firmalar bilan birgalikda o‘z loyiha va dasturlarini amalga oshirish;

milliy va erkin almashtiriladigan valyutada kreditlar olish, o‘z nomidan shartnomalar va kontraktlar tuzish, mulkiy huquqlarga ega bo‘lish, sudda da’vogar va javobgar bo‘lish;

Ustavda ko‘rsatilgan o‘z vazifalarini bajarish uchun ishlab chiqarish, ilmiy va boshqa korxonalar, tashkilotlar va firmalar, shu jumladan xorijiy sheriklar bilan birgalikda, vaqtinchalik tarkibiy bo‘linmalar tashkil etish;

innovatsiya loyihalarini ishlab chiqish va joriy etish;

yuridik va jismoniy shaxslarga injiniring, maslahat, axborot xizmatlari va xizmatlarning boshqa turlarini ko‘rsatish;

noshirlik, axborot, madaniy-ma’rifiy faoliyatni amalga oshirish;

ko‘rgazmalar, savdo-sotiq yarmarkalari, tovarlar, mahsulotlar (ishlar, xizmatlar), san’at asarlari kim oshdi savdolari, telemarafonlar, konsertlar va boshqa tomosha tadbirlari o‘tkazish;

lotereyalar chiqarish;

Jamg‘arma maqsadlari va vazifalariga muvofiq tanlovlar o‘tkazish hamda mukofotlar ta’sis etish;

o‘z maqsadlari va vazifalariga muvofiq tashqi iqtisodiy faoliyatni amalga oshirish, qonun hujjatlarida belgilangan tartibda milliy va xorijiy valyutalarda bank hisob raqamlariga ega bo‘lish;

Jamg‘arma maqsadlarini ta’minlash uchun tibbiyot asbob-uskunalari va anjomlari, dori-darmonlar, bolalar ovqati va boshqa mahsulotlarni ishlab chiqarishni mablag‘ bilan ta’minlash;

belgilangan tartibda xalqaro jamoat tashkilotlariga va ixtisoslashtirilgan tashkilotlarga kirish, shuningdek amaliy aloqalarga kirishish.

11. Jamg‘arma:

“Sog‘lom avlod” davlat dasturini amalga oshirishda faol qatnashishi;

Jamg‘arma tomonidan safarbar qilinayotgan moliyaviy mablag‘lardan qat’iy maqsadga muvofiq foydalanilishini ta’minlashi;

o‘ziga qarashli korxonalar va tashkilotlarning faoliyati hamda o‘tkazilayotgan barcha tadbirlar ustidan maqsadga qaratilgan rahbarlikni va muntazam nazoratni ta’minlashi shart.

12. Davlat, jamoat, ilmiy va ijodiy tashkilotlar, birjalar, fuqarolarning o‘zini o‘zi boshqarish organlari, banklar, aksiyadorlik jamiyatlari va uyushmalar, shu jumladan xorijiy, xalqaro tashkilotlar, shuningdek Jamg‘armaning asosiy vazifalarini ro‘yobga chiqarishda ixtiyoriy asosda qatnashuvchi boshqa jismoniy shaxslar (rezidentlar va norezidentlar) Jamg‘armaning qatnashchilari hisoblanadilar.

13. Jamg‘arma boshqaruvining yuqori organi Jamg‘arma qatnashchilarining konferensiyasi hisoblanadi. Konferensiya Jamg‘arma Ustaviga muvofiq faoliyatning asosiy yo‘nalishlarini belgilaydi.

Konferensiyada Jamg‘arma boshqaruvi, boshqaruv raisi, taftish komissiyasi saylanadi, Jamg‘armaning ijrochi direktori tasdiqlanadi.

14. Jamg‘arma Ustavda ko‘rsatilgan o‘z faoliyatini amalga oshirishiga har tomonlama ko‘maklashish, uning moddiy-texnika va moliyaviy bazasini mustahkamlash, shuningdek Jamg‘arma tomonidan safarbar etiladigan mablag‘lardan samarali foydalanish ustidan nazoratni amalga oshirish uchun Vasiylik kengashi tashkil etiladi.

Vasiylik kengashi yilning har choragida Jamg‘arma boshqaruvi raisining Jamg‘arma mablag‘laridan foydalanilishi to‘g‘risidagi hisobotini eshitishi va tasdiqlashi shart.

15. Nazorat-taftish komissiyasi Jamg‘arma mablag‘laridan maqsadli foydalanilishi, Jamg‘armaning, unga qarashli korxonalar va tashkilotlarning moliyaviy va xo‘jalik faoliyati ustidan nazoratni amalga oshiradi.

16. Jamg‘arma boshqaruvi raisi va a’zolari Jamg‘arma qatnashchilari konferensiyasi tomonidan saylanadi.

Jamg‘arma boshqaruvi raisi maqomiga va mehnatga haq to‘lash shartlariga ko‘ra Sog‘liqni saqlash vaziri o‘rinbosariga tenglashtiriladi.

17. Jamg‘arma boshqaruvi raisi Jamg‘armaga rahbarlik qiladi hamda Jamg‘arma va mintaqaviy filiallar faoliyati uchun javob beradi, Jamg‘arma nomidan ishonchnomasiz ish ko‘radi, boshqa yuridik shaxslar, shu jumladan xorijiy yuridik shaxslar bilan munosabatlarda Jamg‘arma manfaatlarini ifodalaydi, boshqaruv qarorlarini imzolaydi.

Boshqaruv rais rahbarligi ostida:

Jamg‘arma faoliyatining asosiy yo‘nalishlari bo‘yicha uning faoliyatini muvofiqlashtiradi;

Jamg‘arma markaziy apparati, uning mintaqaviy filiallari va vakolatxonalari faoliyatiga umumiy rahbarlik qiladi;

maqsadli dasturlar ishlab chiqilishi va amalga oshirilishini tashkil etadi;

har xil tashkilotlarda, shu jumladan xorijiy tashkilotlarda Jamg‘arma manfaatlarini ifodalaydi.

18. Jamg‘arma markaziy apparatining joriy faoliyatiga ijrochi direktor rahbarlik qiladi, u Jamg‘arma nomidan ishonchnomasiz ish ko‘radi, o‘z vakolati doirasida buyruqlar chiqaradi, mehnat to‘g‘risidagi qonunlarga muvofiq xodimlarni (Jamg‘arma boshqaruvi bilan kelishgan holda) ishga qabul qiladi va ishdan bo‘shatadi, shtat jadvalini, markaziy apparat va mintaqaviy filiallarning joriy sarf-xarajatlari smetasini tasdiqlaydi, Jamg‘arma mablag‘larini belgilangan tartibda tasarruf qiladi, yuridik va jismoniy shaxslar bilan shartnomalar tuzadi.

19. Jamg‘arma mintaqaviy filiallari rahbarlari Qoraqalpog‘iston Respublikasi Vazirlar Kengashining raisi, viloyatlar hokimlarining tavsiyasiga ko‘ra Vasiylik kengashi bilan kelishgan holda tayinlanadilar hamda maqomiga va mehnatga haq to‘lash shartlariga ko‘ra sog‘liqni saqlash mintaqaviy organlari rahbarlarining o‘rinbosarlariga tenglashtiriladilar.

20. Jamg‘arma markaziy apparatining shtatdagi xodimlari soni 18 nafar etib (xizmat ko‘rsatuvchi xodimlardan tashqari), mintaqaviy filiallar xodimlari soni esa 4 nafar etib belgilanadi.

Jamg‘arma apparati va uning mintaqaviy filiallarining sarf-xarajatlari Jamg‘armaning o‘z mablag‘lari hisobidan qoplanadi.

Jamg‘arma markaziy apparati va uning mintaqaviy filiallari xodimlarining lavozim maoshlarini belgilashda Yagona tarif setkasi bo‘yicha quyidagi tarif razryadlari qo‘llaniladi:

21. Jamg‘armaning mol-mulki asosiy vositalardan va Jamg‘arma qatnashchilarining badallari hamda boshqa tushumlar hisobiga Jamg‘arma tomonidan sotib olingan boshqa aktivlardan shakllanadi.

22. “Sog‘lom avlod uchun” hukumatga qarashli bo‘lmagan xalqaro xayriya jamg‘armasining pul mablag‘lari:

Jamg‘arma qatnashchilarining pul badallaridan;

budjetdan tashqari jamg‘armalar ajratiladigan mablag‘lardan;

O‘zbekiston Respublikasining ham rezidentlari, ham norezidentlari bo‘lgan yuridik va jismoniy shaxslarning, shuningdek xalqaro tashkilotlarning homiylik mablag‘laridan;

Jamg‘arma faoliyatidan, shuningdek Jamg‘arma oldiga qo‘yilgan vazifalarni hal etish maqsadida u tomonidan tashkil etilgan korxonalar va tashkilotlar faoliyatidan olingan daromadlardan;

qonun hujjatlari bilan taqiqlanmagan boshqa tushumlardan shakllanadi.

23. Jamg‘armaning daromadlari va xarajatlari yillik smetasi Jamg‘arma boshqaruvining taqdimnomasiga ko‘ra Vasiylik kengashi tomonidan tasdiqlanadi.

Jamg‘arma mablag‘lari birinchi navbatda tegishli davlat dasturlari va Hukumat qarorlari bilan nazarda tutilgan tadbirlarga, eng avvalo “Sog‘lom avlod” davlat dasturini amalga oshirishga sarflanadi.

Jamg‘arma mintaqaviy filiallari hisob raqamlaridagi mablag‘lar qoldig‘i kalendar yil oxiridagi holatiga ko‘ra uch kun muddatda ularni Jamg‘arma markaziy apparatining maxsus hisob raqamiga o‘tkazish yo‘li bilan to‘planadi va undan navbatdagi kalendar yilda maqsadli xarajatlarni mablag‘ bilan ta’minlash uchun foydalanilishi mumkin.

24. Jamg‘arma soliqlar, yig‘imlar va to‘lovlarni amaldagi qonun hujjatlariga muvofiq to‘laydi.

25. Jamg‘arma va uning mintaqaviy filiallari o‘z majburiyatlari bo‘yicha o‘ziga tegishli barcha mol-mulk bilan javob beradi.

Davlat Jamg‘arma majburiyatlari bo‘yicha javob bermaydi, Jamg‘arma esa davlat majburiyatlari bo‘yicha javob bermaydi.

26. Jamg‘armaning mulkiy huquqlari O‘zbekiston Respublikasining jamoat tashkilotlari uchun belgilangan qonun hujjatlariga muvofiq himoya qilinadi.

27. Jamg‘arma faoliyati Jamg‘arma konferensiyasining qaroriga ko‘ra yoki qonun hujjatlarida belgilangan hollarda to‘xtatiladi.

28. Tugatilgan Jamg‘armaning kreditorlarning talablari qondirilgandan keyin qolgan mol-mulki davlat ixtiyoriga o‘tadi.