Kamol topayotgan avlodning jismoniy va ma’naviy salomatligini shakllantirishning eng muhim omillaridan biri sifatida ommaviy bolalar sporti rivojlantirilishini ta’minlash, yosh avlodning sog‘lom turmush tarziga va sportni sevishga intilishini har tomonlama qo‘llab-quvvatlash, bolalar-o‘smirlar sport maktablari xodimlarini qayta tayyorlash va ularning malakasini oshirishning tashkiliy asoslarini tubdan qayta ko‘rib chiqish hamda takomillashtirish maqsadida Vazirlar Mahkamasi qaror qiladi:

1. O‘zbekiston Respublikasi Xalq ta’limi vazirligi, Madaniyat va sport ishlari vazirligi hamda Oliy va o‘rta maxsus ta’limi vazirligining Iqtisodiyot vazirligi va Moliya vazirligi bilan kelishilgan Bolalar-o‘smirlar sport maktablari xodimlarini qayta tayyorlash va ularning malakasini oshirish markazini (keyingi o‘rinlarda Markaz deb ataladi) tashkil etish to‘g‘risidagi taklifi qabul qilinsin.

Belgilab qo‘yilsinki, Markaz yuridik shaxs maqomiga ega bo‘lgan, idoraviy mansubligidan qat’i nazar, respublika bolalar-o‘smirlar sport maktablarining rahbar kadrlarini, instruktor-metodistlarini hamda trener-o‘qituvchilar tarkibini qayta tayyorlaydigan va ularning malakasini oshiradigan davlat ta’lim muassasasi hisoblanadi.

2. Quyidagilar Markazning asosiy vazifalari etib belgilansin:

respublika bolalar-o‘smirlar sport maktablarining rahbar kadrlarini, instruktor-metodistlarini hamda trener-o‘qituvchilar tarkibini qayta tayyorlashni va ularning malakasini oshirishni zamonaviy darajada, o‘qitishning xalqaro e’tirof etilgan metodlaridan foydalangan holda amalga oshirish;

respublika bolalar-o‘smirlar sport maktablarining rahbar kadrlarini, instruktor-metodistlarini hamda trener-o‘qituvchilar tarkibini qayta tayyorlash va ularning malakasini oshirish bo‘yicha normativlar hamda o‘quv-metodik materiallarni ilg‘or xalqaro tajribadan va zamonaviy ta’lim dasturlaridan foydalangan holda ishlab chiqish;

bolalar-o‘smirlar sport maktablari trener-o‘qituvchilarini qayta tayyorlash va ularning malakasini oshirish jarayoniga sportchilar tayyorlash sohasidagi mutaxassislarning kasbiy bilimlarini takomillashtirishga, shuningdek ularda iqtidorli yosh sportchilarni aniqlash mahorati va ko‘nikmalarini rivojlantirishga hamda ulardan xalqaro sport arenalarida respublika sharafini munosib himoya qilishga qodir bo‘lgan professional sportchilarni tayyorlashga yo‘naltirilgan zamonaviy va samarali dasturlarni joriy etish;

respublika bolalar-o‘smirlar sport maktablarining rahbar kadrlarini, instruktor-metodistlarini hamda trener-o‘qituvchilari tarkibini qayta tayyorlash va ularning malakasini oshirish bo‘yicha ta’lim jarayoni sifati va natijalarini tizimli tahlil qilishni, monitoringini, ularning zamonaviy talablarga muvofiq yuqori sifatli o‘quv-trenirovka jarayonini ta’minlash uchun zarur bo‘lgan kasbiy ko‘nikmalari va layoqatini rivojlantirish dinamikasini baholashni amalga oshirish.

3. O‘zbekiston Respublikasi Xalq ta’limi vazirligi huzuridagi Bolalar-o‘smirlar sport maktablari xodimlarini qayta tayyorlash va ularning malakasini oshirish markazi tuzilmasi 1-ilovaga muvofiq tasdiqlansin.

4. Markaz xodimlarining lavozim maoshlari respublika oliy ta’lim muassasalari tegishli lavozimlarining mehnatga haq to‘lash bo‘yicha lavozim maoshlari miqdorlariga tenglashtirilsin.

5. O‘zbekiston Respublikasi Xalq ta’limi vazirligi:

uch oy muddatda Markaz ustavining belgilangan tartibda ishlab chiqilishini va tasdiqlanishini, shuningdek uning davlat ro‘yxatidan o‘tkazilishini ta’minlasin;

Markazni yuqori malakali va tashabbuskor xodimlar hamda mutaxassislar bilan ta’minlash chora-tadbirlarini amalga oshirsin;

Markazda respublika bolalar-o‘smirlar sport maktablarining rahbar kadrlarini, instruktor-metodistlarini va trener-o‘qituvchilar tarkibini qayta tayyorlash va ularning malakasini oshirish parametrlarini har yili sport turlari bo‘yicha qayta tayyorlash yo‘nalishlari bo‘yicha belgilangan tartibda aniqlasin va tasdiqlasin, bunda tinglovchilarning malaka oshirish kurslaridan har 5 yilda kamida bir marta o‘tishi davriyligiga rioya etsin.

6. Quyidagilar Markaz faoliyatini moliyalashtirish manbalari etib belgilansin:

Markazning joriy ta’minotiga hamda respublika bolalar-o‘smirlar sport maktablarining rahbar kadrlarini, instruktor-metodistlarini hamda trener-o‘qituvchilar tarkibini qayta tayyorlash va ularning malakasini oshirishga, malaka oshirishning belgilangan davriyligini hisobga olgan holda ajratiladigan O‘zbekiston Respublikasi Davlat budjeti mablag‘lari;

xo‘jalik faoliyatidan va shartnoma asosida xizmatlar ko‘rsatishdan tushadigan mablag‘lar;

jismoniy va yuridik shaxslarning xayriya ehsonlari va maqsadli badallari, xalqaro moliya institutlari, xorijiy hukumat va donor tashkilotlari grantlari, shuningdek qonun hujjatlarida taqiqlanmagan boshqa manbalar.

7. O‘zbekiston Respublikasi Moliya vazirligi:

2015-yildan boshlab O‘zbekiston Respublikasi Davlat budjeti parametrlarida Markaz faoliyatini moliyalashtirish va unga yuklangan vazifalarni bajarish bilan bog‘liq xarajatlar uchun zarur budjet mablag‘larini “Ta’lim” sohasiga ajratiladigan mablag‘lar doirasida nazarda tutsin;

Markazni 2 ta, shu jumladan 1 ta xizmat va 1 ta maxsus avtotransport vositasi bilan ta’minlashga limit ajratsin.

8. Belgilab qo‘yilsinki:

Markazga qayta tayyorlash va malaka oshirishga yuboriladigan tinglovchilarning asosiy ish joyi bo‘yicha o‘rtacha ish haqi ularning ishdan ajralgan holdagi butun o‘qish davrida saqlanib qoladi;

Markazga ishdan ajralgan holda qayta tayyorlash va malaka oshirishga boshqa hududlardan yuboriladigan tinglovchilar o‘qish davrida yotoqxonada yashash joylari bilan ta’minlanadi, shuningdek ularning o‘qish joyiga borishi va u yerdan qaytishi uchun bir martalik yo‘lkira xarajatlari ularni yuborayotgan tomon hisobidan qoplanadi.

9. Markaz Toshkent shahri, Shayxontohur tumani, Ko‘kcha darvozasi ko‘chasi, 27-uy manzilidagi binolar va inshootlarga joylashtirilsin.

O‘zbekiston Respublikasi Xalq ta’limi vazirligi 2015/2016 o‘quv yili boshlangungacha:

O‘zbekiston Respublikasining Xususiylashtirish, monopoliyadan chiqarish va raqobatni rivojlantirish davlat qo‘mitasi bilan birgalikda Toshkent shahri, Shayxontohur tumani, Ko‘kcha darvozasi ko‘chasi, 27-uy manzilida joylashgan sobiq 98-son maktab-internat binolari va inshootlarini tezkor boshqaruv huquqi bilan Markazga tekin bersin;

Markazning binolari va inshootlarining bosqichma-bosqich rekonstruksiya qilinishini hamda zarur o‘quv-laboratoriya va sport anjomlari, kompyuter texnikasi, mebellar, sport inventarlari va boshqa inventarlar bilan jihozlanishini ta’minlasin.

10. Quyidagilar:

Toshkent shahar hokimligi huzuridagi “Yagona buyurtmachi xizmati” injiniring kompaniyasi Markazga ajratilgan binoni rekonstruksiya qilish bo‘yicha buyurtmachi etib;

O‘zbekiston Respublikasi Xalq ta’limi vazirligi huzuridagi Bolalar sportini rivojlantirish jamg‘armasi mablag‘lari Markazning binolari va inshootlarni rekonstruksiya qilish hamda uni zarur o‘quv-laboratoriya va sport anjomlari, kompyuter texnikasi, mebellar, sport inventarlari va boshqa inventarlar bilan jihozlash bo‘yicha xarajatlarni qoplash manbai etib belgilansin.

11. O‘zbekiston Respublikasi Davlat arxitektura va qurilish qo‘mitasi Markaz binosini rekonstruksiya qilish bo‘yicha loyiha-smeta hujjatlarining ekspertizadan o‘tkazilishini ta’minlasin hamda bajariladigan qurilish-montaj ishlari sifatiga rioya etilishi yuzasidan davlat arxitektura-qurilish nazoratini o‘rnatsin.

13. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari R.S. Azimov va O‘zbekiston Respublikasi Bosh vazirining o‘rinbosari A.I. Ikramov zimmasiga yuklansin.