Oʻzbekiston Respublikasi Prezidentining “Oʻzbekiston Respublikasining 2015-yilgi asosiy makroiqtisodiy koʻrsatkichlari prognozi va Davlat budjeti parametrlari toʻgʻrisida” 2014-yil 4-dekabrdagi PQ-2270-son qarorini amalga oshirish maqsadida Vazirlar Mahkamasi qaror qiladi:

1. 2015-yil 1-yanvardan boshlab mikrofirmalar va kichik korxonalar uchun, shuningdek fermer xoʻjaliklari uchun yagona ijtimoiy toʻlov stavkasi 25 foizdan 15 foizgacha pasaytirilganligi maʼlumot uchun qabul qilinsin.

2. Belgilansinki, mikrofirmalar va kichik korxonalar, fermer xoʻjaliklari bundan mustasno, 2015-yil 1-yanvardan boshlab yagona ijtimoiy toʻlovni belgilangan stavka boʻyicha, biroq har bir xodimga bazaviy hisoblash miqdorining 65 foizidan kam boʻlmagan miqdorda hisoblaydilar.

Fermer xoʻjaliklari uchun yagona ijtimoiy toʻlovni belgilangan stavka boʻyicha, biroq har bir xodimga bazaviy hisoblash miqdorining 50 foizidan kam boʻlmagan miqdorda hisoblash tartibi saqlanib qoladi.

2¹. Oʻzbekiston Respublikasi Prezidentining “Aholining ijtimoiy zaif qatlami bandligini taʼminlashni ragʻbatlantirishning tashkiliy chora-tadbirlari toʻgʻrisida” 2018-yil 11-iyundagi PQ-3782-son qaroriga muvofiq, shunday tartib oʻrnatiladiki, unga koʻra shtatdagi xodimlarining 50 foizi nogironligi boʻlgan shaxslardan tashkil topgan nogironligi boʻlgan shaxslarning jamoat birlashmalari korxonalari jami xodimlarining mehnatiga haq toʻlash fondi uchun yagona ijtimoiy toʻlov stavkasi 4,7 foiz miqdorida belgilanadi va yagona ijtimoiy toʻlov summasi belgilangan tartibda taqsimlanadi.

3. Oʻzbekiston Respublikasi Moliya vazirligi manfaatdor vazirliklar va idoralar bilan birgalikda idoraviy normativ-huquqiy hujjatlarga ushbu qarordan kelib chiquvchi oʻzgartirishlar kiritsin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.