Oʻzbekiston Respublikasi Hukumati va Ozarboyjon Respublikasi Hukumati, keyingi oʻrinlarda Tomonlar deb yuritiladi,

iqtisodiy, sanoat va ilmiy-texnikaviy hamkorlik ikki tomonlama munosabatlarni barqaror va uzoq muddatli asoslarda rivojlantirishning eng muhim va zarur elementi ekanligini eʼtirof etib,

ularning davlatlari ishlab chiqarish va ilmiy-texnik salohiyatlarining vujudga kelgan oʻzaro texnologik aloqalarini hisobga olib,

Tomonlar davlatlari xoʻjalik faoliyati subyektlari oʻrtasidagi oʻzaro toʻgʻridan toʻgʻri ishlab chiqarish aloqalarining bozor munosabatlari bazasida umumiy iqtisodiy makonni yaratishdagi hal qiluvchi rolini eʼtirof etib,

korxonalar va tarmoqlar oʻrtasidagi ishlab chiqarish kooperatsiyasini qoʻllab-quvvatlash va oʻzaro manfaatli rivojlantirish uchun qulay sharoitlarni taʼminlashga intilib,

har ikki mamlakat oʻrtasidagi oʻzaro iqtisodiy faoliyatning erishilgan darajasiga tayanib,

iqtisodiy oʻsishning qatʼiyligi, oʻz fuqarolari hayot sharoitlarini yaxshilash, ish bilan taʼminlashni kengaytirish, material va odam resurslaridan samarali foydalanish hamda atrof-muhitni himoya qilishni taʼminlash maqsadlariga suyanib,

quyidagilar haqida ahdlashdilar:

Tomonlar mulkchilikning barcha shakllaridagi korxonalar, tarmoq va tarmoqlararo komplekslarning toʻgʻridan toʻgʻri ishlab chiqarish aloqalari asosida kooperatsiyani amalga oshirish va rivojlantirishida koʻmaklashadilar.

Tomonlar ishlab chiqarishni xalqaro ixtisoslashtirish va kooperatsiyalash, ularni amalga oshirish uchun sharoitlar yaratish, sanoat tarmoqlarida ustuvorliklarni aniqlash, hamkorlikdagi loyihalar va dasturlarni ishlab chiqish va amalga oshirishga koʻmaklashish maqsadida zarur chora-tadbirlarni koʻradilar.

Tomonlar:

kooperatsiya boʻyicha tovarlar yetkazib berish deyilganda pirovard mahsulotni birgalikda tayyorlash uchun zarur boʻlgan xomashyo, materiallar, uzellar, detallar, ehtiyot qismlar, zagotovkalar, yarim fabrikatlar, butlovchi materiallar va texnologik oʻzaro bogʻlik tarmoq va tarmoqlararo ahamiyatga ega boʻlgan boshqa buyumlarni yetkazib berish tushunilishi;

xizmatlar koʻrsatish deyilganda ilmiy-tadqiqot, loyiha, qurilish-montaj ishlari, aloqa, axborot, dam olish, taʼlim, transport xizmatlari hamda texnik xizmat koʻrsatish va texnologik operatsiyalar tushunilishi;

tovarlarni qayta ishlash, bojxona tartiblari doirasida yetkazib berish deyilganda Tomonlar davlatlarining bojxona qonunchiligi belgilagan shartlarga muvofiq tovarlar yetkazib berish tushunilishi haqida kelishdilar.

Tomonlar xoʻjalik faoliyati subyektlari tegishli tarmoqlar va tarmoqlararo bitimlarga asoslanib tuzgan shartnoma (kontrakt)larni ishlab chiqarish kooperatsiyasi va toʻgʻridan toʻgʻri aloqalarning asosiy shakllari hisoblaydilar.

Tomonlar quyidagi tarmoqlarda ishlab chiqarish kooperatsiyasi toʻgʻrisida bitimlar tuzishni ustuvor hisoblaydilar:

yonilgʻi-energetika kompleksi;

metallurgiya, kimyo, neft-kimyo sanoati;

mashinasozlik sanoati;

transport va aloqa;

meditsina va farmakologiya sanoati;

qishloq xoʻjaligi va oziq-ovqat sanoati;

yengil sanoat;

ilmiy va qidiruv ishlari;

tabiatdan foydalanish va atrof muhitni muhofaza qilish.

Ishlab chiqarish kooperatsiyasi toʻgʻrisidagi tarmoqlar va tarmoqlararo bitimlarda kooperatsiyada qatnashuvchi va mahsulot ishlab chiqarish (xizmat koʻrsatish) ixtisoslashuvini, shuningdek nomenklatura hamda mahsulotlar (xizmat koʻrsatish) kooperatsiyalangan yetkazib berish hajmlarini saqlab qoluvchi korxona va tashkilotlar roʻyxatlari belgilab qoʻyiladi.

Mahsulotlarni Tomonlar davlatlari bojxona chegaralari orqali bojxonada rasmiylashtirish va oʻtkazish uchun mazkur Bitimning 4-moddasida koʻrsatib oʻtilgan Shartnoma (kontrakt)lar asos hisoblanadi.

Ishlab chiqarish kooperatsiyasi doirasida yetkazib beriladigan mahsulot (xizmat)larga deklaratsiya toʻldirish va hisobga olish Tomonlar bojxona organlari tomonidan ularning qonunchiliklariga muvofiq amalga oshiriladi.

Oldi-berdi xomashyolaridan kooperatsiya boʻyicha ishlab chiqariladigan mahsulotlar yetkazib berish oldi-berdi xomashyolari bilan operatsiyalar haqida Tomonlar davlatlarida amalda boʻlgan qonunchilikka muvofiq amalga oshiriladi.

Ishlab chiqarish kooperatsiyasi doirasida yetkazib beriladigan xomashyo, materiallar va butlovchi materiallar qayta eksport qilinmaydi.

Tomonlar ishlab chiqarish sohasida integratsiya jarayonlarini rivojlantirish maqsadida xoʻjalik faoliyati subyektlari munosabatlarining korxonalar va tarmoqlar kooperatsiya aloqalarini tartibga solish qismida oʻz mamlakatlari milliy qonunchiligi normalarini muvofiqlashtirish va yaqinlashtirish boʻyicha izchil ish olib borishga shartlashib oldilar.

Tomonlar zarur holatlarda koʻp bilim talab qiladigan ishlab chiqarish va eksportga yoʻnaltirilgan tarmoqlar, shuningdek import oʻrnini bosuvchi mahsulotlar chiqarishda kooperatsiyaning rivojlanishini tezlashtiruvchi kreditlar va investitsiyalar jalb qilinishi shartlarini kelishib oladilar.

Tomonlar ularni hal etishni manfaatdor vazirliklar va idoralarga topshirib:

marketing, lizing tadqiqotlarini oʻtkazish va koʻrgazmalar tashkil etish, xizmatlar koʻrsatish;

ularning mamlakatlari oʻrtasida hamkorlar izlash, shartnoma (kontrakt)larni tayyorlash, tuzish va bajarishda yordam berishni taʼmin etuvchi zamonaviy kommunikatsiyalarni rivojlantirish;

mutaxassislar tayyorlash boʻyicha tadbirlarni birgalikda amalga oshirish muammolarini hal etishni hamkorlikda tashkil etadilar.

Mazkur Bitim Tomonlarning oʻzaro roziliklari boʻyicha oʻzgartirilishi va toʻldirilishi mumkin.

Mazkur Bitim imzolangan kundan boshlab kuchga kiradi, besh yil mobaynida amalda boʻladi va agar shartlashuvchi Tomonlarning biri boshqa shartlashuvchi Tomonga tegishli muddatning tugashidan kamida olti oy oldin uni toʻxtatish haqidagi oʻz niyati haqida yozma ravishda xabar bermasa, oʻz-oʻzidan keyingi besh yilga uzaytiriladi.

1996-yil 27-mayda Baku shahrida har biri oʻzbek, ozarboyjon va rus tillarida ikki nusxada tuzildi, barcha matnlar bir xil kuchga egadir.

Mazkur Bitim qoidalarini talqin etishda rus tilidagi matndan foydalaniladi.