O‘zbekiston Respublikasining “O‘zbekiston Respublikasining Markaziy banki to‘g‘risida”gi Qonuni va O‘zbekiston Respublikasi Prezidentining 2014-yil 7-apreldagi PF-4609-son “O‘zbekiston Respublikasida investitsiya iqlimi va ishbilarmonlik muhitini yanada takomillashtirishga doir qo‘shimcha chora-tadbirlar to‘g‘risida”gi Farmoniga muvofiq O‘zbekiston Respublikasi Markaziy banki Boshqaruvi qaror qiladi:

1. O‘zbekiston Respublikasi Markaziy banki Boshqaruvining 2008-yil 23-avgustdagi 18/6-sonli qarori (ro‘yxat raqami 1863, 2008-yil 27-sentabr) (O‘zbekiston Respublikasi qonun hujjatlari to‘plami, 2008-y., 40-41-son, 414-modda) bilan tasdiqlangan O‘zbekiston Respublikasi bank depozitorlarining Milliy axborotlar bazasi va unda mijozlarga xos raqam berish hamda bank hisobvaraqlari ro‘yxatini yuritish tartibi to‘g‘risidagi nizomga ilovaga muvofiq o‘zgartirish va qo‘shimchalar kiritilsin.

2. Mazkur qaror rasmiy e’lon qilingan kundan e’tiboran kuchga kiradi.

1. 11-band quyidagi tahrirdagi xatboshi bilan to‘ldirilsin:

“Kun davomida qayta ishlangan barcha so‘rov turlari bo‘yicha ma’lumot bank ish kuni yakunida BDMAB tomonidan solishtirish uchun banklarga yuboriladi.”.

2. 20-band “hamda mijozning oldin” degan so‘zlardan keyin “BDMABdan xos raqam olib ro‘yxatdan o‘tganligini va” degan so‘zlar bilan to‘ldirilsin.

3. 26-band quyidagi tahrirda bayon etilsin:

“26. Agar mijozning asosiy depozit hisobvarag‘i yopilgan bo‘lsa, u holda mijozga ikkilamchi depozit hisobvaraqlar bankning boshqa filiallari yoki boshqa banklarda ochilmaydi hamda bankka bajarilmaganlik belgisi bilan javob qaytariladi. Shuningdek, hisobvaraqlardan mablag‘larni hisobdan chiqarish amallari vaqtincha to‘xtatilgan bo‘lsa, u holda mijozga ikkilamchi depozit hisobvaraq bankning boshqa filiallari yoki boshqa banklarda ochilmaydi (O‘zbekiston Respublikasi Prezidenti va Hukumatining hujjatlari asosida ochiladigan hisobvaraqlar, kredit (ssuda), 22600 (22696 dan tashqari), 23100, 23200 (23206 dan tashqari) va 23500 hisobvaraqlari bundan mustasno) hamda bankka bajarilmaganlik belgisi bilan javob qaytariladi.”.

4. 58-bandda “Ssuda va maxsus (232XX) tranzit hisobvaraqlari” degan so‘zlar “Mijozning asosiy depozit, ssuda va maxsus (232XX) tranzit hisobvaraqlari” degan so‘zlar bilan almashtirilsin.

5. 1-ilovaning yigirma uchinchi va yigirma to‘rtinchi xatboshilari quyidagi tahrirda bayon etilsin:

“21” belgi — O‘zbekiston Respublikasining Soliq kodeksi 96-moddasiga muvofiq soliq tekshiruvini o‘tkazishga soliq to‘lovchi tomonidan to‘sqinlik qilingan yoki soliq to‘lovchi daromadlar olish uchun foydalanayotgan yoxud soliq solish obyektini saqlash bilan bog‘liq hududlarni, binolarni, shu jumladan joylarni ko‘zdan kechirish uchun davlat soliq xizmati organining mansabdor shaxslarini kiritish rad etilgan, soliq to‘lovchi qayd etilgan manzilda bo‘lmagan, shuningdek soliq to‘lovchi tomonidan soliq hisoboti va (yoki) moliyaviy hisobot taqdim etilmagan hollarda davlat soliq xizmati organining arizasiga ko‘ra sud qarori asosida ushbu soliq to‘lovchining banklardagi hisobvaraqlari bo‘yicha operatsiyalar to‘xtatib turilgan hollarda asosiy depozit hisobvaraqqa xizmat ko‘rsatuvchi bank tomonidan BDMAB orqali Davlat soliq qo‘mitasiga va barcha ikkilamchi hisobvaraq ochgan banklarga uzatiladi.

“22” belgi — O‘zbekiston Respublikasining Soliq kodeksi 96-moddasiga muvofiq soliq tekshiruvini o‘tkazishga soliq to‘lovchi tomonidan to‘sqinlik qilingan yoki soliq to‘lovchi daromadlar olish uchun foydalanayotgan yoxud soliq solish obyektini saqlash bilan bog‘liq hududlarni, binolarni, shu jumladan joylarni ko‘zdan kechirish uchun davlat soliq xizmati organining mansabdor shaxslarini kiritish rad etilgan, soliq to‘lovchi qayd etilgan manzilda bo‘lmagan, shuningdek soliq to‘lovchi tomonidan soliq hisoboti va (yoki) moliyaviy hisobot taqdim etilmagan hollarda davlat soliq xizmati organining arizasiga ko‘ra sud qarori asosida ushbu soliq to‘lovchining banklardagi operatsiyalari to‘xtatib turilgan hisobvaraqlari sud qarori asosida qayta harakatga keltirilgan hollarda asosiy depozit hisobvaraqqa xizmat ko‘rsatuvchi bank tomonidan BDMAB orqali Davlat soliq qo‘mitasiga va barcha ikkilamchi hisobvaraq ochgan banklarga uzatiladi.”.