O‘zbekiston Respublikasi Prezidentining “Kapital qurilishda iqtisodiy islohotlarni yanada chuqurlashtirishning asosiy yo‘nalishlari to‘g‘risida” 2003-yil 6-maydagi PF–3240-son Farmonini bajarish yuzasidan Vazirlar Mahkamasi qaror qiladi:

1. Qurilish sohasidagi huquqbuzarliklar uchun yuridik shaxslarga solinadigan jarimalarni undirish tartibi to‘g‘risidagi nizom ilovaga muvofiq tasdiqlansin.

2. O‘zbekiston Respublikasi Davlat arxitektura va qurilish qo‘mitasi, yuridik shaxslar tomonidan qurilish sohasidagi amaldagi qonun hujjatlariga, tasdiqlangan normativ hujjatlarga, standartlarga, qurilish normalari va qoidalariga rioya etilishi ustidan qattiq nazorat o‘rnatsinlar, “Qurilish sohasidagi huquqbuzarliklar uchun yuridik shaxslarning javobgarligi to‘g‘risida”gi O‘zbekiston Respublikasi Qonuni talablariga hamda ushbu Nizomga qat’iy amal qilsinlar.

3. Vazirlar Mahkamasining “Qurilish sohasidagi huquqbuzarliklar uchun yuridik shaxslarga solinadigan jarimalarni undirish tartibini tasdiqlash haqida” 2001-yil 2-martdagi 106-son qarori (O‘zbekiston Respublikasi QT, 2001-y., 3-son, 14-modda) o‘z kuchini yo‘qotgan deb hisoblansin.

4. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari K.N.To‘laganov zimmasiga yuklansin.

1. Mazkur Nizom “Qurilish sohasidagi huquqbuzarliklar uchun yuridik shaxslarning javobgarligi to‘g‘risida”gi O‘zbekiston Respublikasi Qonuniga muvofiq yuridik shaxslarga solinadigan jarimalarni qo‘llash tartibini belgilaydi.

2. Qurilish sohasidagi huquqbuzarliklar to‘g‘risidagi ishlarni ko‘rib chiqish va ular uchun yuridik shaxslarga jarimalar solish mazkur Nizomda nazarda tutilgan xususiyatlarni hisobga olgan holda O‘zbekiston Respublikasining Ma’muriy huquqbuzarliklar to‘g‘risidagi kodeksida belgilangan tartibda amalga oshiriladi.

3. Quyidagilar qurilish sohasidagi huquqbuzarliklar to‘g‘risidagi ishlarni ko‘rib chiqish va:

O‘zbekiston Respublikasi Davlat arxitektura va qurilish qo‘mitasi raisi va uning o‘rinbosarlari — eng kam oylik ish haqining yuz baravarigacha miqdorda, shuningdek “Qurilish sohasidagi huquqbuzarliklar uchun yuridik shaxslarning javobgarligi to‘g‘risida”gi O‘zbekiston Respublikasi Qonunining 6-bandida nazarda tutilgan hollarda;

Hududiy arxitektura va qurilish bosh boshqarmalari boshliqlari va hududiy arxitektura-qurilish nazorati inspeksiyalari boshliqlari va ularning o‘rinbosarlari — eng kam oylik ish haqining ellik baravarigacha miqdorda, “Qurilish sohasidagi huquqbuzarliklar uchun yuridik shaxslarning javobgarligi to‘g‘risida”gi O‘zbekiston Respublikasi Qonunining 6-moddasida nazarda tutilgan hollarda esa — eng kam oylik ish haqining besh yuz baravarigacha miqdorda jarimalar solish huquqiga ega;

4. Jarimalar yuridik shaxslar tomonidan jarima solish to‘g‘risidagi qaror qabul qilingan kundan boshlab o‘n besh kundan ortiq bo‘lmagan muddatda to‘lanadi.

Jarima solish to‘g‘risidagi qaror uni qabul qilgan organ (mansabdor shaxs) tomonidan bajartiriladi.

Yuridik shaxslarga — tadbirkorlik subyektlariga jarima sud tartibida, ular huquqbuzarlik sodir etilganligini e’tirof etgan va jarimani ixtiyoriy ravishda to‘lagan hollarda esa — vakolatli organ tomonidan solinadi;

5. Tadbirkorlik subyektining oxirgi hisobot sanasidagi joriy aktivlari summasining 20 foizidan ortiq bo‘lgan jarimalarni undirish unga undiriladigan summani undirish to‘g‘risida qaror qabul qilingan kundan boshlab 6 oy mobaynida to‘lovlarni har oyda bo‘lib-bo‘lib to‘lash imkonini bergan holda amalga oshiriladi.

6. Jarima solish to‘g‘risidagi qaror yuzasidan belgilangan tartibda shikoyat qilinganda yoki norozi bo‘linganda qaror shikoyat yoki norozilik qoniqarsiz qoldirilgandan so‘ng bajarilishi kerak. Bunday hollarda jarima shikoyat va norozilik qoniqarsiz qoldirilganligi to‘g‘risida xabardor qilingan kundan boshlab o‘n besh kundan ortiq bo‘lmagan muddatda to‘lanishi kerak.

7. Jarima yuridik shaxslar tomonidan tegishli summalarni o‘tkazish yo‘li bilan to‘lanadi, ular quyidagi tartibda taqsimlanadi:

jarima summalarining 62 foizi O‘zbekiston Respublikasi respublika budjetiga;

30 foizi — tumanlar va shaharlar budjetlariga;

8 foiz — “Davarxitektqurilish” qo‘mitasi va unga idoraviy mansub hududiy davlat arxitektura-qurilish nazorati inspeksiyalarining moddiy-texnika bazasini rivojlantirish uchun O‘zbekiston Respublikasi Davlat arxitektura va qurilish qo‘mitasiga yo‘naltiriladi.

8. Jarima muddatida to‘lanmagan taqdirda qaror sud hujjatlarini va boshqa organlar hujjatlarini bajarish uchun belgilangan tartibda majburiy bajartiriladi.