Oʻzbekiston Respublikasi Hukumati va Gruziya Hukumati, keyingi oʻrinlarda “Tomonlar” deb ataladi,

Oʻzbekiston Respublikasi bilan Gruziya oʻrtasida savdodan tashqari toʻlovlarni amalga oshirishda pul mablagʻlari erkin oʻtishini taʼminlash maqsadida,

quyidagilar toʻgʻrisida ahdlashdilar:

Tomonlar ijtimoiy ahamiyatli savdodan tashqari toʻlovlarning kuyidagi turlari, aynan kuyidagilar boʻyicha pul mablagʻlari erkin joʻnatilishini taʼminlaydilar:

pensiyalar, alimentlar, davlat nafaqalari, toʻlovlar va kompensatsiyalar, shu jumladan xodimlarning mehnat vazifalarini bajarish bilan bogʻliq ravishda mayib boʻlish, kasb kasalligi yoxud sogʻligʻiga boshqacha tarzda shikast yetkazilishi tufayli unga yetkazilgan zararni qoplashga oid toʻlovlar;

sud va tergov organlarining hukmlari, qarorlari, ajrimlari asosida toʻlanadigan summalar;

fuqarolarning vafot etishi bilan bogʻliq toʻlovlar (dafn marosimi bilan bogʻliq transport xarajatlari);

sud, tergov, hakamlik, notarial va huquqni muhofaza qiluvchi boshqa organlarning xarajatlarini qoplash boʻyicha toʻlovlar, shuningdek ushbu organlar tomonidan koʻrib chiqiladigan ishlar boʻyicha davlat poshlinasi.

siyosiy qatagʻonlar qurbonlariga, ularning oila aʼzolari va merosxoʻrlariga pul kompensatsiyalari.

Savdodan tashqari operatsiyalar boʻyicha toʻlovlar Tomonlar vakolatli banklarining korrespondentlik schyotlari orqali amalga oshiriladi.

Ijtimoiy ahamiyatli toʻlovlar boʻyicha pul mablagʻlarini joʻnatuvchilardan qabul qilish va ularni oluvchilarga toʻlash tegishli Tomonlar milliy valyutasida amalga oshiriladi.

Bir Tomon milliy valyutasining ikkinchi Tomon milliy valyutasiga nisbatan rasmiy kursi Oʻzbekiston Respublikasi Markaziy banki va Gruziya Milliy banki tomonidan AQSh dollarining kross-kursi orqali belgilanadi.

Tomonlar bu maqsadlar uchun milliy valyutalarning Tomonlar Markaziy banklari tomonidan belgilanadigan tartibda toʻliq va oʻz vaqtida oʻzaro konvertatsiya qilinishini taʼminlaydilar.

Tomonlarning har biri zarur boʻlganda Davlatlararo Bitimlar va har ikki davlatning milliy qonunchiligi doirasida ikkinchi Tomonni, oldindan, kamida uch oy oldin pul joʻnatish toʻxtatilishi yoki yuqorida aytib oʻtilgan toʻlovlarni amalga oshirish amaliyotiga kiritiladigan oʻzgartirishlar haqida xabardor qilgan holda pul joʻnatishga cheklashlar joriy etishlari mumkin.

Tomonlar Tomonlarning Moliya vazirliklariga mazkur Bitimning 1-moddasida koʻrsatilgan savdodan tashqari toʻlovlar roʻyxatiga oʻzgartirish va aniqlashlar kiritish vakolatini beradilar.

Tomonlarning aloqa vazirliklari savdodan tashqari toʻlovlar boʻyicha oʻzaro hisob-kitoblarni oʻtkazish haqida ikki tomonlama bitim tuzadilar. Bitim Tomonlarning Moliya vazirliklari hamda Markaziy (Milliy) banklari tomonidan kelishiladi.

Mazkur Bitimga Tomonlarning oʻzaro roziligiga koʻra oʻzgartirish va qoʻshimchalar kiritilishi mumkin, bu oʻzgartirish va qoʻshimchalar mazkur Bitimning bir qismi hisoblanadi.

Mazkur Bitimni bajarish va talqin qilish bilan bogʻliq nizoli masalalar maslahatlashuvlar va muzokaralar yoʻli bilan hal etiladi.

Mazkur Bitim Tomonlar uning kuchga kirishi uchun zarur boʻlgan davlat ichki tartiblari bajarilganligi toʻgʻrisida bir-birlarini soʻnggi marta yozma ravishda xabardor qilgan kundan boshlab kuchga kiradi va Tomonlardan hech biri uning amal qilishini toʻxtatish haqidagi oʻz niyati toʻgʻrisida diplomatik yoʻllar bilan yozma ravishda maʼlum qilguniga qadar amal qiladi. Ushbu holda Bitim Tomonlardan biri bunday bildirishnoma olgan sanadan boshlab uch oy oʻtgandan keyin oʻz kuchini yoʻqotadi.

1996-yil 28-may Tbilisi shahrida har biri oʻzbek, gruzin va rus tillarida boʻlgan ikki asl nusxada tuzildi.

Mazkur Bitim moddalarini talqin qilishda kelishmovchiliklar kelib chiqqan taqdirda rus tilidagi matn maʼlumotnoma matn hisoblanadi.