O‘zbekiston Respublikasi Soliq kodeksi 68-moddasi, O‘zbekiston Respublikasi “Davlat soliq xizmati to‘g‘risida”gi Qonunining 7-moddasiga va O‘zbekiston Respublikasi Prezidentining 2013-yil 15-iyuldagi PQ-2003-sonli “Qonunlarning havolaki normalarini amalga oshirishga qaratilgan normativ-huquqiy va boshqa hujjatlarni ishlab chiqish rejalarini tasdiqlash to‘g‘risida”gi qaroriga muvofiq O‘zbekiston Respublikasi Davlat soliq qo‘mitasi qaror qiladi:

1. Soliq solish obyektlari hamda soliq solish bilan bog‘liq obyektlar to‘g‘risidagi ma’lumotlar bazasini shakllantirish va yuritish tartibi to‘g‘risidagi nizom ilovaga muvofiq tasdiqlansin.

2. Mazkur qaror rasmiy e’lon qilingan kundan e’tiboran kuchga kiradi.

Mazkur Nizom O‘zbekiston Respublikasi Soliq kodeksining 68-moddasiga muvofiq, davlat soliq xizmati organlarida soliq solish obyektlari hamda soliq solish bilan bog‘liq obyektlar to‘g‘risidagi ma’lumotlar bazasini elektron tarzda shakllantirish va yuritish tartibini belgilaydi.

1. Soliq solish obyektlarini va soliq solish bilan bog‘liq obyektlarni hisobga olish davlat soliq xizmati organi tomonidan har bir soliq to‘lovchi bo‘yicha hamda u to‘layotgan barcha soliqlar va boshqa majburiy to‘lovlar bo‘yicha, soliq solish obyektlari hamda soliq solish bilan bog‘liq obyektlar to‘g‘risidagi ma’lumotlar bazasini shakllantirish va yuritish, shu jumladan elektron shaklda shakllantirish va yuritish orqali amalga oshiriladi.

2. Ushbu Nizomning qoidalari tovarlarni O‘zbekiston Respublikasining bojxona chegarasi orqali olib o‘tilishi munosabati bilan to‘lanishi lozim bo‘lgan soliqlar va boshqa majburiy to‘lovlarga, shuningdek undirilishi tegishli davlat organlari va tashkilotlari tomonidan amalga oshiriladigan boshqa majburiy to‘lovlarga tatbiq etilmaydi.

3. Soliq solish obyektlari va soliq solish bilan bog‘liq obyektlar to‘g‘risidagi ma’lumotlar bazasi obyekt joylashgan joydagi hududiy davlat soliq xizmati organlarida ichki va tashqi axborot manbalari asosida elektron ko‘rinishda shakllantiriladi.

4. Ichki manbalar quyidagilardan iborat:

a) soliq to‘lovchilar tomonidan davlat soliq xizmati organlariga taqdim etiladigan choraklik, yillik moliyaviy hisobotlar, soliqlar va boshqa majburiy to‘lovlar bo‘yicha hisob-kitoblar, aniqlashtirilgan soliq hisobotlari, tushuntirish xatlari, ma’lumotlar va ma’lumotnomalar to‘g‘risidagi;

b) quyidagilarning summasi ko‘rsatilgan soliq to‘lovchilarning shaxsiy kartochkalari to‘g‘risidagi:

hisoblangan, to‘langan soliqlar va boshqa majburiy to‘lovlar;

qaytarilgan, kamaytirilgan hamda ortiqcha to‘langan soliqlar va boshqa majburiy to‘lovlar;

soliqlar va boshqa majburiy to‘lovlar bo‘yicha qarzdorlik va hisoblangan penyalar;

v) qo‘shimcha yoki kamaytirishga hisoblangan soliqlar va boshqa majburiy to‘lovlar to‘g‘risidagi soliq tekshiruvlari dalolatnomalari, shuningdek soliq tekshiruvlari materiallari bo‘yicha sud qarorlari asosida yoki ixtiyoriy ravishda to‘langan (undirilgan) jarimalar summalari to‘g‘risidagi;

g) soliq qonunchiligi sohasida yo‘l qo‘yilgan huquqbuzarlik uchun ma’muriy jarima qo‘llanilgan shaxslar va qo‘llanilgan jarima summasi to‘g‘risidagi;

d) jismoniy va yuridik shaxslarni ro‘yxatdan o‘tkazish ma’lumotlarini o‘z ichiga oluvchi davlat soliq xizmati organlarida hisobga qo‘yilgan soliq to‘lovchilar to‘g‘risidagi;

e) soliq to‘lovchilarning mol-mulk, yer soliqlari hamda suv resurslaridan foydalanganlik uchun soliq bo‘yicha soliq solish obyektlarini hisobga qo‘yish to‘g‘risidagi;

j) chakana savdo va xizmat ko‘rsatish sohasida bank kassalariga naqd pul tushumi kelib tushishi bo‘yicha o‘tkazilgan xronometrajlar natijalari to‘g‘risidagi axborotlar.

5. Tashqi manbalar quyidagilardan iborat:

a) davlat ro‘yxatidan o‘tkazuvchi organlarning tadbirkorlik subyektlari to‘g‘risidagi;

b) O‘zbekiston Respublikasi Soliq kodeksining 84-moddasi hamda O‘zbekiston Respublikasi Prezidentining 2012-yil 30-oktabrdagi PQ-1843-sonli “O‘zbekiston Respublikasi davlat soliq xizmati idoralari axborot-kommunikatsiya tizimi faoliyati samaradorligini yanada oshirish chora-tadbirlari to‘g‘risida”gi qaroriga 2-ilovada nazarda tutilgan tegishli organlar va tashkilotlar tomonidan davlat soliq xizmati organlariga taqdim etiladigan soliq to‘lovchilarning majburiyatlari yuzaga kelganligi (tugatilishi) to‘g‘risidagi;

v) O‘zbekiston Respublikasi Davlat soliq qo‘mitasining yozma so‘roviga asosan tegishli axborot taqdim etuvchi boshqa organlar va tashkilotlarning soliq to‘lovchilarning majburiyatlari yuzaga kelganligi (tugatilishi) to‘g‘risidagi axborotlari.

6. Soliq to‘lovchilarni hisobga qo‘yish va soliq to‘lovchilarni obyektlar bo‘yicha hisobga qo‘yish O‘zbekiston Respublikasi Soliq kodeksining 80 va 81-moddalarida belgilangan tartibda amalga oshiriladi.

7. Soliq to‘lovchilar — jismoniy shaxslarni hisobga qo‘yish tuman (shahar) davlat soliq inspeksiyalarining jismoniy shaxslar soliq ma’muriyatchiligi bo‘limlari (tuzilmalari) tomonidan amalga oshiriladi.

Bunda, jismoniy shaxsning pasport ma’lumotlari asosida ushbu Nizomning 1-ilovasiga muvofiq shaklda Soliq to‘lovchi — jismoniy shaxsni ro‘yxatga olish varaqasi to‘ldiriladi hamda tuman (shahar) davlat soliq inspeksiyasining jismoniy shaxslar soliq ma’muriyatchiligi bo‘limi (tuzilmasi) mas’ul xodimi tomonidan ushbu davlat soliq inspeksiyasining tahlil va prognozlash bo‘limi (tuzilmasi) mas’ul xodimiga taqdim etiladi. O‘z navbatida, ushbu mas’ul xodim tomonidan soliq to‘lovchi to‘g‘risidagi barcha ma’lumotlar O‘zbekiston Respublikasi soliq to‘lovchilarining yagona reyestriga kiritiladi.

Ma’lumotlar O‘zbekiston Respublikasi soliq to‘lovchilarning yagona reyestrida ishlovdan o‘tkazilgach, tuman (shahar) davlat soliq inspeksiyasi tomonidan jismoniy shaxsga ushbu Nizomning 2-ilovasiga muvofiq shaklda Soliq to‘lovchining O‘zbekiston Respublikasi Davlat soliq qo‘mitasida ro‘yxatga olinganligi va unga identifikatsiya raqami berilganligi to‘g‘risida guvohnoma beriladi.

Soliq to‘lovchi — jismoniy shaxsni ro‘yxatga olish varaqasidagi ma’lumotlar o‘zgarganda, jismoniy shaxs tomonidan ushbu Nizomning 3-ilovasiga muvofiq shaklda Soliq to‘lovchi — jismoniy shaxsning ro‘yxat ma’lumotlaridagi o‘zgarishlar varaqasi to‘ldiriladi.

8. Jismoniy shaxsning mol-mulk solig‘i, yer solig‘i hamda suv resurslaridan foydalanganlik uchun soliq bo‘yicha soliq solish obyektlari to‘g‘risidagi ma’lumotlari asosida tuman (shahar) davlat soliq inspeksiyasining jismoniy shaxslar soliq ma’muriyatchiligi bo‘limi (tuzilmasi) mas’ul xodimi tomonidan ushbu Nizomning 4-ilovasiga muvofiq shaklda Soliq to‘lovchi — jismoniy shaxsning soliqlarini hisobga qo‘yish varaqasi to‘ldiriladi hamda ushbu davlat soliq inspeksiyasining tahlil va prognozlash bo‘limi (tuzilmasi) mas’ul xodimiga taqdim etiladi va mazkur ma’lumotlar Jismoniy shaxslarning soliq majburiyatlarini hisobga olish dasturiy majmuasiga kiritiladi.

9. Tadbirkorlik subyektlariga “yagona darcha” tamoyili bo‘yicha davlat xizmatlari ko‘rsatish yagona markazlarida ro‘yxatdan o‘tkazilmaydigan soliq to‘lovchi — yuridik shaxslarni tuman (shahar) davlat soliq inspeksiyasida soliq to‘lovchi sifatida hisobga qo‘yish uchun soliq to‘lovchi — yuridik shaxslarning mansabdor shaxslari tomonidan ushbu Nizomning 5-ilovasiga muvofiq shaklda Soliq to‘lovchi — yuridik shaxsni ro‘yxatga olish varaqasi to‘ldiriladi hamda ushbu davlat soliq inspeksiyasining yuridik shaxslar soliq ma’muriyatchiligi va kameral nazorat bo‘limi (tuzilmasi) mas’ul xodimi tomonidan qabul qilib olinadi.

Soliq to‘lovchi — yuridik shaxsning mansabdor shaxsi tomonidan belgilangan tartibda Soliq to‘lovchi — yuridik shaxsni ro‘yxatga olish varaqasi to‘ldirilgandan keyin tuman (shahar) davlat soliq inspeksiyasining yuridik shaxslar soliq ma’muriyatchiligi va kameral nazorat bo‘limi (tuzilmasi) mas’ul xodimi uni ushbu davlat soliq inspeksiyasining tahlil va prognozlash bo‘limi (tuzilmasi) mas’ul xodimiga taqdim etadi. O‘z navbatida, ushbu mas’ul xodim tomonidan soliq to‘lovchi to‘g‘risidagi barcha ma’lumotlar O‘zbekiston Respublikasi soliq to‘lovchilarining yagona reyestriga kiritiladi.

Ma’lumotlar O‘zbekiston Respublikasi soliq to‘lovchilarning yagona reyestrida ishlovdan o‘tkazilgach, tuman (shahar) davlat soliq inspeksiyasi tomonidan soliq to‘lovchi — yuridik shaxsga ushbu Nizomning 6-ilovasiga muvofiq shaklda Soliq to‘lovchining O‘zbekiston Respublikasi Davlat soliq qo‘mitasida ro‘yxatga olinganligi va unga identifikatsiya raqami berilganligi to‘g‘risida guvohnoma beriladi, soliq to‘lovchi — yuridik shaxsning alohida bo‘linmasiga esa ushbu Nizomning 7-ilovasiga muvofiq shaklda Soliq to‘lovchi — yuridik shaxsning alohida bo‘linmasi O‘zbekiston Respublikasi Davlat soliq qo‘mitasida ro‘yxatga olinganligi va unga identifikatsiya raqami berilganligi to‘g‘risida guvohnoma beriladi.

Soliq to‘lovchi — yuridik shaxsni ro‘yxatga olish varaqasidagi ma’lumotlar o‘zgarganda, soliq to‘lovchi — yuridik shaxsning mansabdor shaxsi tomonidan bunday o‘zgarishlar yuzaga kelgan kundan e’tiboran o‘n kunlik muddatda ushbu Nizomning 8-ilovasiga muvofiq shaklda Soliq to‘lovchi — yuridik shaxsning ro‘yxat ma’lumotlaridagi o‘zgarishlar varaqasi to‘ldiriladi.

Soliq to‘lovchi — yuridik shaxs to‘g‘risida qo‘shimcha ma’lumotlar yuzaga kelganda soliq to‘lovchi — yuridik shaxsning mansabdor shaxsi tomonidan ushbu Nizomning 9-ilovasiga muvofiq shaklda Soliq to‘lovchi — yuridik shaxs to‘g‘risida qo‘shimcha ma’lumotlar varaqasi to‘ldiriladi.

10. Soliq to‘lovchilarni O‘zbekiston Respublikasi soliq to‘lovchilarining yagona reyestridan chiqarish O‘zbekiston Respublikasi Soliq kodeksining 83-moddasiga ko‘ra, quyidagi tartibda amalga oshiriladi:

soliq to‘lovchi — jismoniy shaxslar — O‘zbekiston Respublikasining rezidentlari — ular vafot etgandan keyin, basharti soliqlar va boshqa majburiy to‘lovlarni to‘lash majburiyatlari ularning merosxo‘rlari tomonidan to‘liq uzilgan yoki soliq qarzi belgilangan tartibda hisobdan chiqarilgan bo‘lsa;

soliq to‘lovchi — yuridik shaxslar — O‘zbekiston Respublikasining rezidentlari — ular tugatilganidan keyin, basharti soliqlar va boshqa majburiy to‘lovlarni to‘lash majburiyati to‘liq uzilgan yoki soliq qarzi belgilangan tartibda hisobdan chiqarilgan bo‘lsa;

O‘zbekiston Respublikasining norezidentlari — ularning O‘zbekiston Respublikasi soliq to‘lovchilarining yagona reyestriga kiritilishini belgilagan holatlar bekor bo‘lgan, soliqlar va boshqa majburiy to‘lovlarni to‘lash majburiyati to‘liq uzilgan taqdirda.

11. Mazkur Nizom talablarining buzilishida aybdor bo‘lgan shaxslar qonunchilik hujjatlarida belgilangan tartibda javobgar bo‘ladi.