O‘zbekiston Respublikasi Oliy Majlisi qaror qiladi:

O‘zbekiston Respublikasi Oliy Majlisi deputatlari faoliyatining ta’minoti to‘g‘risidagi Nizom tasdiqlansin.

1. O‘zbekiston Respublikasining Konstitutsiyasi hamda “O‘zbekiston Respublikasining Oliy Majlisi to‘g‘risida”gi Konstitutsiyaviy Qonunga muvofiq Oliy Majlis deputatlariga o‘z huquq va burchlarini moneliksiz va samarali amalga oshirish uchun sharoit yaratib beriladi.

2. Oliy Majlisning deputatlari deputatlik faoliyatini amalga oshirish uchun ishlab chiqarish yoki xizmat vazifalarini bajarishdan ozod qilinishi mumkin.

3. Oliy Majlis Raisi, uning o‘rinbosarlari, qo‘mitalarning raislari, rais o‘rinbosarlari va kotiblari Oliy Majlisda, qoida tariqasida, doimiy asosda ishlaydilar.

Boshqa deputatlarni Oliy Majlisda doimiy asosda ishlashga o‘tkazish masalasini tegishli qo‘mita raisining taqdimiga binoan Oliy Majlisning Raisi tomonidan hal etiladi.

Oliy Majlisda doimiy asosda ishlaydigan deputatlar o‘z vakolatlari davrida haq to‘lanadigan boshqa biron-bir lavozimni egallashlari, tadbirkorlik faoliyati bilan shug‘ullanishlari mumkin emas.

4. Oliy Majlis deputatlariga deputatlik faoliyati bilan bog‘liq xarajatlar uchun oy sayin eng kam ish haqining besh baravari miqdorida daromad solig‘i olinmaydigan mablag‘ to‘lanadi.

5. Oliy Majlisda doimiy asosda ishlaydigan deputatlarga Oliy Majlis Raisi Oliy Majlis Kengashi bilan kelishilgan holda belgilaydigan ish haqi to‘lanadi.

6. Deputatning Oliy Majlisda ishlagan vaqti umumiy va uzluksiz ish stajiga, ixtisosi bo‘yicha ish stajiga qo‘shib hisoblanadi.

Deputatning har yilgi pul to‘lanadigan mehnat ta’tili 36 ish kunidan iborat bo‘ladi.

7. Oliy Majlisga doimiy ishga o‘tkazilgan deputatlarning vakolatlari muddati tugagach, ularga avvalgi ishlari (lavozimlari) beriladi yoki bunday ish (lavozim) bo‘lmasa, mehnat to‘g‘risidagi qonun hujjatlariga muvofiq avvalgisiga teng boshqa ish (lavozim) beriladi.

8. Deputatlarning Oliy Majlis sessiyalarida, uning Kengashi, qo‘mitalari va komissiyalarining majlislarida qatnashgan vaqtlarida, shuningdek Oliy Majlis rahbariyatining topshiriqlarini bajarish maqsadida safarda bo‘lgan vaqtlarida asosiy ish joylaridagi o‘rtacha ish haqi saqlanib qoladi, ularga xizmat safari puli to‘lanadi hamda mehmonxonada turish bilan bog‘liq xarajatlari qoplanadi.

Ushbu bandda qayd etilgan hollarda xizmat safari puli hamda mehmonxonada turish bilan bog‘liq xarajatlar puli Oliy Majlis Kotibiyatida to‘lanadi.

O‘zbekiston Respublikasi sarhadlaridan tashqariga xizmat safariga chiquvchi Oliy Majlis deputatlarining xarajatlari qonun hujjatlarida belgilangan tartibda qoplanadi.

9. Oliy Majlis deputatlari O‘zbekiston Respublikasi hududida davlat passajir transportining barcha turlarida (taksidan va transport boshqa turlarining buyurtma yo‘nalishlardan tashqari) tekin yurish huquqidan foydalanadilar.

Oliy Majlis deputati o‘z guvohnomasini ko‘rsatganidan keyin temir yo‘l vokzallari va stansiyalarining chipta sotadigan kassalari, fuqarolik aviatsiyasi agentligi yoki aeroportlar Oliy Majlis deputatiga poyezdining yotoqli yoki yumshoq o‘rindiqli vagonidan, samolyot salonidan navbatsiz joy berishlari shart. Deputat Oliy Majlis sessiyasiga borayotganida unga samolyot chiptalari uchishdan kamida ikki soat oldin, boshqa hollarda esa kamida bir sutka oldin beriladi.

Chiptasida o‘rindiqning tartib raqami ham ko‘rsatiladigan shaharlararo, shuningdek shahar atrofiga qatnovchi avtobuslarda Oliy Majlis deputati avtovokzallar va avtostansiyalarning kassalaridan navbatsiz olinadigan bepul chipta bilan yuradi.

Boshqa barcha hollarda Oliy Majlis deputati davlat passajir transportida (taksidan va transport boshqa turlarining buyurtma yo‘nalishlaridan tashqari) Oliy Majlis deputatining guvohnomasini ko‘rsatishi orqali qatnaydi.

Oliy Majlis deputati transportning har bir turida amalda bo‘lgan normalarga mos og‘irlikdagi qo‘l yukini bepul olib yurish huquqiga ega.

10. Oliy Majlisga doimiy ishga o‘tkazilgan boshqa shaharlik deputatlarga oila a’zolari bilan birgalikda yashashlari uchun tegishli davrga xizmat turar joyi berib qo‘yiladi.

Deputat Oliy Majlisdagi doimiy ishi tugagan taqdirda o‘zi egallab turgan xizmat turar joyini ikki oylik muddatda bo‘shatib berishi shart.