O‘zbekiston Respublikasi Prezidentining “O‘zbekiston Respublikasida investitsiya iqlimi va ishbilarmonlik muhitini yanada takomillashtirishga doir qo‘shimcha chora-tadbirlar to‘g‘risida” 2014-yil 7-apreldagi PF-4609-son Farmoniga muvofiq, aksiyadorlik jamiyatlarida korporativ boshqaruvni takomillashtirish, shuningdek qimmatli qog‘ozlar bozorini yanada rivojlantirish maqsadida Vazirlar Mahkamasi qaror qiladi:

1. Aksiyadorlik jamiyatlarining korporativ veb-saytlariga qo‘yiladigan talablar to‘g‘risidagi nizom 1-ilovaga muvofiq tasdiqlansin va u 2015-yil 1-yanvardan boshlab amalga kiritilsin.

2. O‘zbekiston Respublikasi Hukumatining 2-ilovaga muvofiq ayrim qarorlariga o‘zgartirish va qo‘shimchalar kiritilsin.

3. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari R.S. Azimov zimmasiga yuklansin.

1. Ushbu Nizom O‘zbekiston Respublikasi Prezidentining “O‘zbekiston Respublikasida investitsiya iqlimi va ishbilarmonlik muhitini yanada takomillashtirishga doir qo‘shimcha chora-tadbirlar to‘g‘risida” 2014-yil 7-apreldagi PF-4609-son Farmoniga muvofiq ishlab chiqilgan hamda aksiyadorlik jamiyatlarining (keyingi o‘rinlarda jamiyat deb ataladi) korporativ veb-saytlariga va ushbu saytlarda joylashtirilishi majburiy bo‘lgan axborotga qo‘yiladigan talablarni belgilaydi.

2. Aksiyadorlik jamiyati shaklida tashkil etilgan xo‘jalik boshqaruvi organining korporativ veb-sayti O‘zbekiston Respublikasi Vazirlar Mahkamasining 2013-yil 31-dekabrdagi 355-son qarori bilan tasdiqlangan Davlat va xo‘jalik boshqaruvi organlari, mahalliy davlat hokimiyati organlarining rasmiy veb-saytiga qo‘yiladigan asosiy talablarga ham muvofiq bo‘lishi kerak.

3. Jamiyatning korporativ veb-saytida majburiy joylashtirilishi kerak bo‘lgan axborotga quyidagilar tegishlidir:

jamiyat faoliyatining predmeti va maqsadlari;

jamiyatning ustavi, shu jumladan unga o‘zgartirish va qo‘shimchalar hamda jamiyatning tasdiqlangan biznes-rejalari;

jamiyatni rivojlantirish strategiyasi to‘g‘risidagi axborot;

jamiyatning tashkiliy tuzilmasi, uning tarkibiy bo‘linmalari, filiallari, vakolatxonalari, shu’ba va tobe xo‘jalik jamiyatlarining nomi, ularning telefonlari raqamlari, manzili (pochta va elektron manzillari), ularning ish tartibi to‘g‘risidagi ma’lumotlar;

jamiyatning rahbarlari (direktor va boshqaruv raisi) to‘g‘risidagi ma’lumotnoma axborot;

bo‘sh ish o‘rinlari, ishga qabul qilish shartlari va nomzodlarga qo‘yiladigan talablar to‘g‘risidagi ma’lumotlar;

jamiyat yoki uning boshqaruv organlari tomonidan tuzilgan kollegial va maslahat organlari (komissiyalar, kengashlar, qo‘mitalar va boshqalar) to‘g‘risidagi ma’lumotlar;

jamiyatning affillangan shaxslari ro‘yxati;

korporativ boshqaruv masalalari bo‘yicha jamiyatning ichki hujjatlari, shu jumladan aksiyadorlarning umumiy yig‘ilishi tomonidan tasdiqlangan korporativ boshqaruv kodeksi (u mavjud bo‘lganda);

“Qimmatli qog‘ozlar to‘g‘risida”gi O‘zbekiston Respublikasi Qonunining 44-moddasiga muvofiq oshkor qilinishi kerak bo‘lgan jamiyat faoliyatidagi muhim faktlar;

aksiyadorlarning umumiy yig‘ilishida qabul qilingan qarorlar bo‘yicha ovoz berish yakunlari (ushbu qarorlar qabul qilingan sanadan boshlab o‘ttiz kun mobaynida e’lon qilinadi);

aksiyadorlarning umumiy yig‘ilishi o‘tkazilishi, sanasi, vaqti, o‘tkaziladigan joyi, kun tartibi to‘g‘risidagi ma’lumotlar;

qimmatli qog‘ozlar emissiyasi prospektlari, shuningdek qimmatli qog‘ozlar bozori to‘g‘risidagi qonunchilikka muvofiq oshkor qilinishi kerak bo‘lgan jamiyatning choraklik va yillik hisobotlari;

jamiyat tomonidan o‘tkaziladigan ommaviy tadbirlar (majlislar, kengashlar, uchrashuvlar, matbuot konferensiyalari, seminarlar va brifinglar, davra suhbatlari, rasmiy tashriflar) to‘g‘risidagi ma’lumotlar, matbuot-relizlar va kundalik faoliyat to‘g‘risidagi boshqa axborot;

jamiyat tomonidan ishlab chiqariladigan mahsulotlar (bajariladigan ishlar va ko‘rsatiladigan xizmatlar) ro‘yxati hamda ular to‘g‘risidagi ma’lumotlar;

tovarlarni yetkazib berish (ishlarni bajarish, xizmatlar ko‘rsatish) bo‘yicha jamiyat va uning tashkilotlari tomonidan o‘tkaziladigan ochiq tanlovlar (tenderlar) va kimoshdi savdolari to‘g‘risidagi ma’lumotlar;

jamiyatning moliya-xo‘jalik holatini va uni rivojlantirish dinamikasini tavsiflovchi asosiy ko‘rsatkichlar to‘g‘risidagi muhim ma’lumotlar, jamiyat faoliyati to‘g‘risidagi axborot tusidagi tahliliy sharhlar, shuningdek jamiyat faoliyatining samaradorligi, shu jumladan ijro etuvchi organining samaradorlikning muhim ko‘rsatkichlari bajarilishi to‘g‘risida ma’lumot;

oxirgi uch yilda hisoblangan va to‘langan dividendlar, shu jumladan qarzdorlik miqdori to‘g‘risidagi ma’lumotlar, aksiyadorlar tomonidan dividendlarni olish uchun bog‘lanish ma’lumotlari va boshqa ma’lumotlar;

yillik moliya-xo‘jalik faoliyatni tekshirish natijalari bo‘yicha auditorlik tashkilotining xulosasi;

jamiyat tomonidan o‘z aksiyalarining sotib olinishi to‘g‘risidagi ma’lumotlar;

korporativ veb-saytdagi axborot materiallaridan boshqa shaxslar foydalanganda jamiyatning korporativ veb-saytiga majburiy havolalar ko‘rsatilishi to‘g‘risidagi talab;

jamiyatning korporativ veb-saytida joylashtirishni jamiyat zarur deb hisoblaydigan boshqa ma’lumotlar.

4. Jamiyatning korporativ veb-saytida boshqa manbalardan ma’lumotlarni joylashtirishga faqat axborot manbai ko‘rsatilgan taqdirda yo‘l qo‘yiladi.

5. Jamiyatning korporativ veb-saytida quyidagilar bo‘lishi kerak:

guruhlar bo‘yicha joylashtirilgan axborot tasniflangan holda qulay va oddiy interfeys;

jamiyat veb-saytining foydalaniladigan interfeysi unda joylashtirilgan axborotning tuzilishi to‘g‘risidagi ko‘rgazmali tasavvurni, bo‘limlar va sahifalarga darhol va mantiqli o‘tishni ta’minlashi kerak;

jamiyat bilan qayta aloqa bog‘lash, yuridik va jismoniy shaxslardan murojaatlarni qabul qilish imkoniyati;

joylashtirilgan axborotni arxivlashtirish, tiklash va takrorlash imkoniyati;

elektron pochta vositasida hamda yangilashlar va yangiliklarni yetkazib berishning ommabop avtomatlashtirilgan formatlari vositasida korporativ veb-saytning yangilanishlariga yozilish imkoniyati.

6. Jamiyatning korporativ veb-saytida joylashtirilgan axborotdan uning tomonidan bazaviy axborot xizmatlari ko‘rsatilishi doirasida foydalanish erkin va bepul bo‘lishi kerak.

Jamiyat bazaviy axborot xizmatlaridan tashqari, jamiyatning korporativ veb-sayti orqali, qonunchilikda belgilangan tartibda pulli asosda qo‘shimcha xizmatlar ko‘rsatishi mumkin.

7. Jamiyat ijro etuvchi organ rahbarining qarori bilan jamiyatning korporativ veb-saytidagi axborotni shakllantirish, joylashtirish, shuningdek yangilash uchun mas’ul bo‘lgan shaxsni belgilaydi.

8. Jamiyatning korporativ veb-saytidagi axborot davlat tilida taqdim etilishi kerak. Jamiyat korporativ veb-saytining boshqa tillardagi versiyalari bo‘lishi mumkin.

9. Jamiyatning korporativ veb-saytida joylashtirilgan axborot yo‘q qilinishi, blokirovka qilinishi, buzilishi va qalbakilashtirilishining, shuningdek ruxsat berilmagan aralashuvlar boshqa shakllarining oldini olish bo‘yicha jamiyat tomonidan himoya qilishning tegishli chora-tadbirlari ko‘rilishi kerak.

10. Jamiyatning korporativ veb-saytida joriy etish uchun majburiy bo‘lgan asosiy funksiyalarga quyidagilar tegishlidir:

jamiyatning korporativ veb-sayti bo‘yicha izlash;

mobil qurilmalar uchun soddalashtirilgan dizaynli jamiyat veb-sayti versiyasi;

imkoniyatlari cheklangan shaxslar uchun qo‘shimcha qulayliklar yaratish (kontrastni qo‘shimcha qilish, shriftni kattalashtirish, ovoz jo‘rligi va boshqa funksiyalar);

jamiyatning veb-saytidan xavfsiz foydalanish (maxfiy axborotni berishni yoki pulli xizmatlar ko‘rsatishni nazarda tutuvchi saytlar uchun);

fuqarolarning murojaatlarini shu jumladan elektron pochtaga bildirishnoma yuborish vositasida ko‘rib chiqishni va vaqtini kuzatib borish;

jamoatchilik fikrini o‘rganish va jamiyat faoliyatiga tegishli masalalarni muhokama qilish vositalari (on-layn-so‘rovlar, bloglar, forumlar);

tashriflarni va statistikani nazorat qilish vositalari.

11. Ustav kapitalida davlat ulushi 50 foizdan ortiq bo‘lgan, aholi va tadbirkorlik subyektlari uchun bevosita yoxud o‘zining idoraviy mansub tashkilotlari orqali xizmatlar ko‘rsatuvchi va/yoki tovarlarni sotuvchi jamiyatlarning korporativ veb-saytlarida quyidagi funksiyalar nazarda tutilishi kerak:

tovarlar, ishlar va xizmatlarning turlari va qiymati (tariflar) to‘g‘risidagi to‘liq va muhim ma’lumotlarni qulay shaklda taqdim etish;

arizalar, deklaratsiyalar, so‘rovnomalar, blankalar va boshqa zarur hujjatlarning elektron shakllarini shu jumladan mobil qurilmalar yordamida to‘ldirish;

to‘lovlarga shu jumladan mobil qurilmalar yordamida on-layn haq to‘lash;

xizmatlar ko‘rsatish yuzasidan so‘rovnomani rasmiylashtirishda (shakllarni to‘ldirishda) hujjatlarning elektron versiyalarini ilova qilish.

12. Jamiyatning korporativ veb-saytida joylashtirilgan axborot ishonchli bo‘lishi va jamiyat faoliyatini xolisona yoritishi kerak.

13. Jamiyatning korporativ veb-saytida davlat siriga va xizmatda foydalanish uchun tegishli bo‘lgan axborot, shuningdek qonunchilikka muvofiq e’lon qilish va tarqatish taqiqlangan boshqa axborot bo‘lmasligi kerak.

14. Jamiyat ijroiya organining rahbari ushbu Nizomga muvofiq jamiyatning korporativ veb-saytida joylashtiriladigan axborotning to‘liqligi va to‘g‘riligi uchun javob beradi.

15. Ushbu Nizom talablari buzilishida aybdor bo‘lgan shaxslar qonunchilikda nazarda tutilgan tartibda javobgarlikka tortiladilar.

16. Ushbu Nizom talablariga rioya etilishini nazorat qilish qimmatli qog‘ozlar bozorini tartibga solish bo‘yicha vakolatli davlat organi tomonidan aloqa, axborotlashtirish va telekommunikatsiya texnologiyalari sohasidagi maxsus vakolatli organ bilan birgalikda amalga oshiriladi.

1. Vazirlar Mahkamasining 1994-yil 8-iyundagi 285-son qarori bilan tasdiqlangan O‘zbekiston Respublikasi hududida qiymatli qog‘ozlar bilan bitishuvlar tuzish va ularni ro‘yxatdan o‘tkazish tartibi to‘g‘risidagi nizomda:

a) 2-bandning ikkinchi xatboshidagi “ochiq” so‘zi chiqarib tashlansin;

v) 5-band quyidagi tahrirda bayon qilinsin:

“5. Birja bozorida va uyushgan birjadan tashqari bozorda qimmatli qog‘ozlarga doir bitimlar tuzish va ularni ro‘yxatdan o‘tkazish ularni yozma (qog‘ozda) rasmiylashtirish zaruriyatisiz elektron shaklda amalga oshiriladi. Qimmatli qog‘ozlar bilan boshqa bitimlar yozma shaklda tuziladi va qonun hujjatlarida belgilangan tartibda ro‘yxatdan o‘tkaziladi.

Aksiyadorlik jamiyatlari aksiyalarining oldi-sotdisi bo‘yicha ikkilamchi bozordagi bitimlar faqat qimmatli qog‘ozlarning birja bozorida va uyushgan birjadan tashqari bozorda tuziladi, aksiyadorlarning talabiga ko‘ra aksiyadorlik jamiyati tomonidan o‘z aksiyalarini sotib olish bo‘yicha bitimlar bundan mustasno.

Investor umumiy qiymati mazkur aksiyadorlik jamiyati ustav kapitalining yigirma va undan ko‘p foizini tashkil qiladigan aksiyadorlik jamiyati aksiyalari paketining bir yoki bir nechta bitimlar tuzish natijasida mustaqil ravishda va (yoki) affillangan shaxslar bilan birgalikda sotib olganligi haqidagi axborotni qimmatli qog‘ozlar bozorini tartibga solish bo‘yicha vakolatli davlat organi tomonidan belgilangan tartibda oshkor qilishi shart”;

g) quyidagi mazmundagi 5¹-band qo‘shilsin:

“5¹. Qimmatli qog‘ozlar savdosining tashkilotchisi investorlardan sotishga qo‘yiladigan qimmatli qog‘ozlarni oldindan baholashning o‘tkazilishini talab qilishga, agar bunday talab qonunchilikda belgilanmagan bo‘lsa, shuningdek qimmatli qog‘ozlarni ularning nominal qiymatidan past narxda sotishni taqiqlashga haqli emas”;

d) 14-band o‘z kuchini yo‘qotgan deb hisoblansin;

e) 20¹-band quyidagi tahrirda bayon qilinsin:

“20¹. Qimmatli qog‘ozlar savdosining tashkilotchilari, Qimmatli qog‘ozlarning markaziy depozitariysi va qimmatli qog‘ozlar bilan bitimlar tuzishda ro‘yxatdan o‘tkazuvchilar bo‘lgan qimmatli qog‘ozlar bozorining boshqa professional ishtirokchilari, agar bitimlarni tuzishda qimmatli qog‘ozlar bozori to‘g‘risidagi qonunchilikning buzilganligini aniqlashgan bo‘lsa, qimmatli qog‘ozlar bilan bitimlarni ro‘yxatdan o‘tkazishni rad etishlari shart”;

j) 22-band o‘z kuchini yo‘qotgan deb hisoblansin;

z) 25-bandning birinchi jumlasidan keyin “elektron shaklda tuzilgan bitimlar bundan mustasno” so‘zlari qo‘shilsin;

i) 25¹-band quyidagi tahrirda bayon qilinsin:

“25¹. Depozitariy:

qimmatli qog‘ozlarni begonalashtirishga cheklovni faqat tegishli davlat organining yozma talabnomasi mavjud bo‘lgan taqdirdagina qo‘yadi, yozma talabnomada qimmatli qog‘ozlar egasining nomi (ismi), uning identifikatsiyalash ma’lumotlari, qo‘yilgan cheklashning amal qilish muddati, shuningdek cheklovni qo‘yish uchun asos mavjud bo‘lishi kerak;

ikki ish kuni mobaynida tegishli davlat organini qimmatli qog‘ozlarni begonalashtirishga cheklov qo‘yish bo‘yicha talablarni bajarish mumkin emasligi to‘g‘risida tegishli davlat organini yozma ravishda xabardor qilishi shart, agar davlat organi talabnomasida ushbu bandning ikkinchi xatboshida ko‘rsatilgan axborot mavjud bo‘lmasa;

qimmatli qog‘ozlar egasini unga tegishli bo‘lgan qimmatli qog‘ozlarni begonalashtirishga cheklov qo‘yilganligi to‘g‘risida cheklash belgilangan (qo‘yilgan) vaqtdan boshlab ikki ish kuni mobaynida xabardor qilishi shart”.

3. Vazirlar Mahkamasining “O‘zbekiston Respublikasi Davlat mulki qo‘mitasi huzuridagi Qimmatli qog‘ozlar bozori faoliyatini muvofiqlashtirish va nazorat qilish markazining Qimmatli qog‘ozlar komissiyalari xalqaro tashkiloti (IOSCO)ga kirishi to‘g‘risida” 1998-yil 12-yanvardagi 16-son qarorida:

a) 2-banddagi “Davlat mulki qo‘mitasi huzuridagi Qimmatli qog‘ozlar bozori faoliyatini muvofiqlashtirish va nazorat qilish” so‘zlari “Davlat raqobat qo‘mitasi huzuridagi Qimmatli qog‘ozlar bozorini muvofiqlashtirish va rivojlantirish” so‘zlari bilan almashtirilsin;

b) 4-band quyidagi tahrirda bayon qilinsin:

“4. O‘zbekiston Respublikasi Davlat raqobat qo‘mitasi xususiylashtirishdan tushadigan milliy valyutadagi mablag‘larning Qimmatli qog‘ozlar komissiyalari xalqaro tashkiloti tomonidan belgilanadigan a’zolik badallarini hamda Komissiya tomonidan o‘tkaziladigan tadbirlarda Qimmatli qog‘ozlar bozorini muvofiqlashtirish va rivojlantirish markazining bo‘lishi va qatnashishi bilan bog‘liq boshqa xarajatlarni to‘lash uchun ajratilishini ta’minlasin”.

4. Vazirlar Mahkamasining 2006-yil 16-oktabrdagi 215-son qarori (O‘zbekiston Respublikasi QT, 2006-y., 10-son, 77-modda) bilan tasdiqlangan Davlatga tegishli aksiyalar paketlarini (ulushlarni) ishonchli boshqaruvga berish tartibi to‘g‘risidagi nizomning 10-bandi to‘rtinchi xatboshidagi “aksiyalar paketlarini” so‘zlaridan keyin “shuningdek O‘zbekiston Respublikasi Moliya vazirligining depo hisob raqamlaridagi davlat aksiya paketlarini” so‘zlari qo‘shilsin.