O‘zbekiston Respublikasi Prezidentining «Qonunlarning havolaki normalarini amalga oshirishga qaratilgan normativ-huquqiy va boshqa hujjatlarni ishlab chiqish rejalarini tasdiqlash to‘g‘risida» 2013 yil 15 iyuldagi PQ-2003-son qarorini bajarish yuzasidan Vazirlar Mahkamasi qaror qiladi:
1. Xalq deputatlari viloyat va tuman Kengashi deputatining yo‘lovchilar transportida bepul yurishi hamda transport tashkilotlari bilan shu bilan bog‘liq hisob-kitoblarni amalga oshirish tartibi va shartlari to‘g‘risidagi nizom ilovaga muvofiq tasdiqlansin.
2. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari B.I. Zakirov zimmasiga yuklansin.
1. Ushbu Nizom xalq deputatlari viloyat va tuman Kengashi deputatiga yo‘lovchilar transportida bepul yurish xizmati ko‘rsatish tartibini, shuningdek ushbu Nizomga muvofiq bajarilgan tashuvlar uchun transport tashkilotlari bilan o‘zaro hisob-kitoblarni amalga oshirish tartibini belgilaydi.
2. Xalq deputatlari viloyat va tuman Kengashi deputati o‘zi deputat bo‘lgan tegishli viloyat, tuman hududida yo‘lovchilar transportida (taksi va shahar yo‘lovchilar transportidan tashqari) bepul yurish huquqidan foydalanadi.
3. Xalq deputatlari viloyat va tuman Kengashi deputati bepul chiptani rasmiylashtirish uchun belgilangan namunadagi deputat guvohnomasini ko‘rsatishi shart. Guvohnoma chiptani olish paytida ham, deputatni transportda olib yurish vaqtida ham haqiqiy bo‘lishi kerak. Amal qilish muddati o‘tgan guvohnoma asosida bepul chiptalarni rasmiylashtirishga va transportda olib yurish xizmatlari ko‘rsatishga yo‘l qo‘yilmaydi.
4. Xalq deputatlari viloyat va tuman Kengashi deputati temir yo‘l vokzallari va stansiyalari, avtovokzallar (avtostansiyalar) yoki transport tashkilotlari vakolatli agentliklarining chipta kassalarida deputat guvohnomasini ko‘rsatgan taqdirda muayyan reysga chiptani o‘z nomiga navbatdan tashqari rasmiylashtirish huquqiga ega.
5. Xalq deputatlari viloyat va tuman Kengashi deputatini transportda bepul olib yurish Qoraqalpog‘iston Respublikasi budjetining va viloyatlar mahalliy budjetlarining qo‘shimcha manbalari (moliya yili boshidagi bo‘sh qoldiqlar, daromadlar prognozini oshirib bajarish mablag‘lari, tejash natijasida bo‘shab qolgan budjet mablag‘lari) hisobiga amalga oshiriladi.
6. Xalq deputatlari viloyat va tuman Kengashi deputatiga «O‘ztemiryo‘lyo‘lovchi» ochiq aksiyadorlik jamiyatining chipta kassalarida (transportda yurish hujjatlarini oldindan sotish agentliklarida) deputatning ayni bir vaqtda deputatlik guvohnomasi va uning shaxsini tasdiqlovchi hujjati — pasporti ko‘rsatilgan taqdirda xizmat ko‘rsatiladi.
7. Tegishli viloyat, tuman hududida shahar atrofida qatnovchi temir yo‘l transportida yurish hujjatini (chiptasini) rasmiylashtirishda deputatning familiyasi, ismi va otasining ismi, uning guvohnomasi tartib raqami, mintaqa kodi shahar atrofida yurish chiptasi koreshogining orqa tomonida ko‘rsatiladi.
8. «O‘zbekiston temir yo‘llari» kompaniyasining «O‘ztemiryo‘lyo‘lovchi» ochiq aksiyadorlik jamiyati har oyda hisobot oyidan keyingi oyning 5-kunidan kechikmay Qoraqalpog‘iston Respublikasi Vazirlar Kengashiga, viloyatlar va tumanlar hokimliklariga oldingi oydagi bajarilgan tashuvlar bo‘yicha schyot-fakturani, tashuvlarning jami summasini ko‘rsatgan va transportda yurish hujjatlari nusxalarini ilova qilgan holda taqdim etadi.
9. «O‘zbekiston temir yo‘llari» kompaniyasining «O‘ztemiryo‘lyo‘lovchi» ochiq aksiyadorlik jamiyati xarajatlarini qoplash Qoraqalpog‘iston Respublikasi Vazirlar Kengashi, viloyatlar va tumanlar hokimliklari qarorlari bo‘yicha, ushbu Nizomning 5-bandida ko‘rsatilgan manbalar hisobiga Qoraqalpog‘iston Respublikasi Vazirlar Kengashi, viloyatlar va tumanlar hokimliklari tomonidan amalga oshiriladi.
10. Xalq deputatlari viloyat va tuman Kengashi deputati tegishli viloyat va tuman hududi doirasida avtovokzallar (avtostansiyalar) kassalarida deputat guvohnomasini va ushbu Nizomga ilovaga muvofiq belgilangan namunadagi avtomobil transportida bepul yurish uchun bir martalik talonni (keyingi o‘rinlarda bir martalik talon deb ataladi) ko‘rsatgan holda transportda yurish chiptasini navbatdan tashqari olish huquqiga ega.
11. So‘ralayotgan reysga bo‘sh o‘rinlar mavjud bo‘lmagan taqdirda xalq deputatlari viloyat va tuman Kengashi deputati keyingi reysda jo‘natilishi kerak.
12. Avtovokzal (avtostansiya) kassiri ko‘rsatilgan deputat guvohnomasi asosida bir martalik talonga deputatning familiyasi, ismi, otasining ismini, guvohnomasining tartib raqamini, qatnov zonasini, yo‘nalishini, tashuvchining nomini, avtomobil transportida yurish qiymatini, sanasini, shuningdek o‘zining familiyasi, ismi, otasining ismini kiritishi hamda kelgusida avtotransport tashkilotlari tomonidan bajarilgan tashuvlarning jami qiymatini hisobga olish uchun o‘z imzosi bilan tasdiqlashi kerak.
13. Xalq deputatlari viloyat va tuman Kengashi deputatining transportda oraliq to‘xtash joylari orqali yurishi deputat guvohnomasini va bir martalik talonni ko‘rsatish yo‘li bilan amalga oshiriladi, bir martalik talonda oldindan deputatning o‘zi tomonidan uning familiyasi, ismi, otasining ismi, deputat guvohnomasining tartib raqami, qatnov zonasi, yo‘nalishi, sanasi ko‘rsatiladi. Haydovchi, deputat guvohnomasini tekshirib ko‘rib, bir martalik talonda tashuvchining nomini, kelgusida avtotransport tashkiloti tomonidan bajarilgan tashuvlarning jami qiymatini hisobga olish uchun avtomobil transportida yurish qiymatini ko‘rsatishi kerak.
14. Bir martalik talonlar blankalari xalq deputatlari viloyat va tuman Kengashi buyurtmanomasi bo‘yicha tayyorlanadi hamda deputatlarga xizmat zaruriyatiga ko‘ra beriladi. Bir martalik talonlar blankalari qat’iy hisobot beriladigan hujjatlar hisoblanadi.
15. Belgilangan normadan ortiqcha olib yuriladigan bagaj uchun xalq deputatlari viloyat va tuman Kengashi deputatlari tomonidan, standart namunadagi hisob-kitob hujjatini rasmiylashtirgan holda, umumiy asoslarda haq to‘lanadi.
16. Xalq deputatlari viloyat va tuman Kengashi deputatini transportda olib yurish uchun ushbu Nizomga muvofiq olingan yo‘l chiptalarini rasmiylashtirish, qaytarib berish va qayta rasmiylashtirishda ko‘rsatib o‘tilgan xizmatlar uchun yig‘imlar undirilmaydi.
17. Har oyda hisobot oyidan keyingi oyning 5-kunidan kechikmay tashuvchilar tegishli ravishda Qoraqalpog‘iston Respublikasi Vazirlar Kengashiga, viloyatlar va tumanlar hokimliklariga oldingi oyda bajarilgan tashuvlar bo‘yicha schyot- fakturani, jami chiptalar qiymatini ko‘rsatgan va bir martalik talonlarni ilova qilgan holda taqdim etadilar.
18. Tashuvchilarning xarajatlarini qoplash Qoraqalpog‘iston Respublikasi Vazirlar Kengashi, viloyatlar va tumanlar hokimliklari qarorlari bo‘yicha, ushbu Nizomning 5-bandida ko‘rsatilgan manbalar hisobiga Qoraqalpog‘iston Respublikasi Vazirlar Kengashi, viloyatlar va tumanlar hokimliklari tomonidan amalga oshiriladi.
Xalq deputatlari viloyat va tuman Kengashi deputatining yo‘lovchilar transportida bepul yurishi hamda transport tashkilotlari bilan shu bilan bog‘liq hisob-kitoblarni amalga oshirish tartibi va shartlari to‘g‘risidagi nizomga
ILOVA
ILOVA
_________________________________________________deputatining |
F.I.O._________________________________________________________ |
Deputat guvohnomasining №______________________________________ |
Qatnov zonasi__________________________________________________ |
Qatnov yo‘nalishi_______________________________________________ |
Tashuvchining nomi______________________________________________ |
Transportda yurish qiymati______________________________________ |
Foydalanish sanasi_____________________________________________ |
Kassir (haydovchi)ning F.I.O.____________________________________ |
Kassir (haydovchi)ning imzosi____________________________________ |