Navroʻz umumxalq bayramini munosib nishonlashga tayyorgarlik koʻrish, xalqimiz orasida milliy qadriyatlarimizga xos boʻlgan oʻzaro mehr-oqibat va hamjihatlikni yanada kuchaytirish, begʻaraz yordam, mehr-muruvvat kabi ezgu fazilatlarni yuksaltirish, mahallalar, aholi turar joylarini obodonlashtirish va koʻkalamzorlashtirish, respublikaning barcha hududlarida sanitariya holatini yaxshilash hamda “Sogʻlom bola yili” Davlat dasturida koʻzda tutilgan vazifalarni amalga oshirish maqsadida:

1. Oʻzbekiston “Mahalla” xayriya jamoat fondi, “Kamolot” yoshlar ijtimoiy harakati, Oʻzbekiston Respublikasi Sogʻliqni saqlash, Oliy va oʻrta maxsus taʼlim hamda Xalq taʼlimi vazirliklari, “Oʻzkommunxizmat” agentligi, mahalliy davlat hokimiyati organlari, jamoatchilik vakillarining 2014-yil mart-aprel oylarida mamlakatimizning barcha hududlarida obodonlashtirish va koʻkalamzorlashtirish oyligi hamda 15-mart kuni umumxalq xayriya hasharini oʻtkazish toʻgʻrisidagi takliflari maʼqullansin.

2. 2014-yil mart-aprel oylarida mamlakatimizning barcha hududlarida obodonlashtirish va koʻkalamzorlashtirish oyligi hamda 15-mart kuni umumxalq xayriya hasharini oʻtkazish boʻyicha ishchi guruh tarkibi ilovaga muvofiq tasdiqlansin.

3. Ishchi guruh (A.Ikramov), Oʻzbekiston “Mahalla” xayriya jamoat fondi (A.Ahmedov), Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari obodonlashtirish va koʻkalamzorlashtirish oyligi hamda umumxalq xayriya hasharini oʻtkazish doirasida quyidagi tadbirlarni amalga oshirishni nazarda tutsinlar:

mahallalar, aholi punktlari, guzarlar, xiyobonlar, ziyoratgohlar va qabristonlarni, koʻp qavatli uylar yon-atrofi va hovlilar hududini, ariqlar, koʻcha va yoʻlaklarni hamda bolalar maydonchalarini tartibga keltirish;

barcha turar joy mavzelari va mahallalarda gul koʻchatlari, mevali va manzarali daraxtlar ekish, boʻsh hududlarda bogʻlar barpo etish, daraxtlarni oqlash va butash;

keksa va nogironlar, yolgʻiz qariyalar, boquvchisini yoʻqotgan kam taʼminlangan oilalarning uy-joy sharoitlarini yaxshilashga koʻmaklashish;

joylarda obodonlashtirish va koʻkalamzorlashtirish ishlari oʻtkazilishi jarayonida toʻplangan chiqindilarning mahalliy davlat hokimiyati organlari va boshqa mutasaddi idoralar tomonidan alohida belgilangan joylarga olib chiqilishini taʼminlash;

umumxalq xayriya hashari qatnashchilarini zarur texnika vositalari va anjomlar bilan taʼminlash.

4. Oʻzbekiston Respublikasi Qishloq va suv xoʻjaligi vazirligi, “Meva-sharbat” bogʻdorchilik, uzumchilik va vinochilik ilmiy-ishlab chiqarish korporatsiyasi, Manzarali bogʻdorchilik va oʻrmon xoʻjaligi respublika ilmiy-ishlab chiqarish markazi hamda joylardagi davlat oʻrmon xoʻjaliklari qishloq va mahallalar hududlarini koʻkalamzorlashtirish hamda yangi bogʻlar barpo etish uchun zarur boʻladigan manzarali va mevali daraxt koʻchatlarini tegishli tashkilot hamda korxonalarga oʻrnatilgan tartibda oʻz vaqtida yetkazib berishni taʼminlasinlar.

5. Oʻzbekiston “Mahalla” xayriya jamoat fondi (A.Ahmedov), “Kamolot” yoshlar ijtimoiy harakati Markaziy Kengashi (B.Ganiyev) va mahalliy davlat hokimiyati organlariga obodonlashtirish va koʻkalamzorlashtirish oyligi hamda umumxalq xayriya hasharini oʻtkazish tadbirlariga fuqarolarning oʻzini oʻzi boshqarish organlari, xususiy uy-joy mulkdorlari shirkatlari, taʼlim muassasalari, harbiy qismlar va boshqa tashkilotlarni, shuningdek respublikaning barcha aholisini, ayniqsa, yoshlarni keng jalb qilish choralarini koʻrish tavsiya etilsin.

6. Hashar munosabati bilan vazirliklar, idoralar va boshqa tashkilotlarda mehnat qilayotgan xodimlarning bir kunlik ish haqi miqdoridagi mablagʻlari Oʻzbekiston “Mahalla” xayriya jamoat fondining respublika boshqaruvi hamda Qoraqalpogʻiston Respublikasi, viloyatlar va Toshkent shahar boʻlimi, tuman va shahar boʻlinmalari boshqaruvlarining bankdagi hisob raqamlariga ixtiyoriy ravishda oʻtkazilishi belgilab qoʻyilsin.

7. Oʻzbekiston “Mahalla” xayriya jamoat fondi (A.Ahmedov) xayriya hasharidan tushgan mablagʻlar “Sogʻlom bola yili” Davlat dasturida belgilangan tadbirlarni amalga oshirish, kam taʼminlangan oilalarga, nogiron va yolgʻiz keksalarga moddiy hamda maʼnaviy yordam koʻrsatish, yosh oilalarni ijtimoiy qoʻllab-quvvatlash, mahallalardagi mavjud sport maydonchalarini joriy taʼmirlash hamda ularni kerakli sport anjomlari bilan jihozlash, fuqarolar yigʻinlarining moddiy-texnika bazasini yaxshilash kabi tadbirlarga sarflanishini nazarda tutsin.

8. Oʻzbekiston Respublikasi Ichki ishlar vazirligi (A.Ahmedbayev) obodonlashtirish va koʻkalamzorlashtirish oyligi davomida, ayniqsa, umumxalq xayriya hashari kuni jamoat tartibini saqlash, yongʻin va yoʻl harakati xavfsizligini taʼminlash choralarini koʻrsin hamda hashar tadbirlarida texnik jihatdan soz boʻlgan texnika vositalaridan foydalanishni nazoratga olsin.

9. Oʻzbekiston Milliy teleradiokompaniyasi (A.Xadjayev), Oʻzbekiston Milliy axborot agentligi (M.Hazratqulov) va boshqa ommaviy axborot vositalariga obodonlashtirish va koʻkalamzorlashtirish oyligining borishini hamda umumxalq xayriya hasharining oʻtkazilishini keng yoritish tavsiya etilsin.

10. Ushbu farmoyishning bajarilishini nazorat qilish Oʻzbekiston Respublikasi Bosh vazirining oʻrinbosari A.I. Ikramov zimmasiga yuklatilsin.