Oʻzbekiston Respublikasi Prezidentining 2011-yil 23-avgustdagi PQ–1602-sonli “Oʻzbekiston Respublikasi Adliya vazirligi faoliyatini yanada takomillashtirish chora-tadbirlari toʻgʻrisida”gi qarori (Oʻzbekiston Respublikasi qonun hujjatlari toʻplami, 2012-y., 29-son, 329-modda) va Oʻzbekiston Respublikasi Vazirlar Mahkamasining 2007-yil 24-avgustdagi 182-sonli “Davlat va xoʻjalik boshqaruvi organlari, mahalliy davlat hokimiyati organlari, davlat korxonalari, muassasalari va tashkilotlari faoliyatini huquqiy taʼminlash darajasini yanada oshirish chora-tadbirlari toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2007-y., 35-36-son, 355-modda) asosan buyuraman:

1. Mahalliy davlat hokimiyati organlarining yuridik xizmati xodimi lavozimiga tavsiya etiladigan nomzodlarni adliya organlari bilan kelishish tartibi toʻgʻrisidagi nizom ilovaga muvofiq tasdiqlansin.

2. Mazkur buyruq davlat roʻyxatidan oʻtkazilsin va bu haqda Idoraviy meʼyoriy hujjatlarni davlat roʻyxatidan oʻtkazish boshqarmasi (B. Boliyev) Oʻzbekiston Respublikasi vazirliklari, davlat qoʻmitalari va idoralari normativ-huquqiy hujjatlarining davlat reyestriga tegishli yozuv kiritsin.

3. Tashkiliy-nazorat va tahlil boshqarmasi (M. Ishbekov) hamda Qonun hujjatlarini turkumlash va huquqiy axborot boshqarmasi (S. Nuriyev) ushbu normativ-huquqiy hujjatni barcha manfaatdor shaxslarga yetkazilishi va “Oʻzbekiston Respublikasi qonun hujjatlari toʻplami” — “Sobraniye zakonodatelstva Respubliki Uzbekistan”da nashr etilishini taʼminlasin.

4. Mazkur buyruq rasmiy eʼlon qilingan kundan eʼtiboran kuchga kiradi.

5. Mazkur buyruq ijrosini nazorat qilish vazirning birinchi oʻrinbosari M. Ikramov zimmasiga yuklansin.

Mazkur Nizom Oʻzbekiston Respublikasi Prezidentining 2011-yil 23-avgustdagi PQ–1602-sonli “Oʻzbekiston Respublikasi Adliya vazirligi faoliyatini yanada takomillashtirish chora-tadbirlari toʻgʻrisida”gi qarori (Oʻzbekiston Respublikasi qonun hujjatlari toʻplami, 2012-y., 29-son, 329-modda) va Oʻzbekiston Respublikasi Vazirlar Mahkamasining 2007-yil 24-avgustdagi 182-sonli “Davlat va xoʻjalik boshqaruvi organlari, mahalliy davlat hokimiyati organlari, davlat korxonalari, muassasalari va tashkilotlari faoliyatini huquqiy taʼminlash darajasini yanada oshirish chora-tadbirlari toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2007-y., 35-36-son, 355-modda) muvofiq, mahalliy davlat hokimiyati organlarining (bundan buyon matnda hokimlik deb yuritiladi) yuridik xizmati xodimi lavozimiga tavsiya etiladigan nomzodlarni adliya organlari bilan kelishish tartibini belgilaydi.

1. Hokimliklarning yuridik xizmati xodimi lavozimiga tavsiya etilgan nomzodlarni (bundan buyon matnda nomzod deb yuritiladi) adliya organlari bilan kelishish ularni tavsiya etilgan lavozimga layoqatliligi va kasbiga munosib yoki munosib emasligini aniqlash maqsadida amalga oshiriladi.

2. Vazirlar Mahkamasining 2007-yil 24-avgustdagi 182-sonli qarori bilan tasdiqlangan Davlat boshqaruvi organlari va mahalliy davlat hokimiyati organlarining yuridik xizmati toʻgʻrisidagi nizomning 5-bandiga muvofiq, viloyatlar va Toshkent shahar hokimliklari yuridik xizmati xodimlari lavozimga Oʻzbekiston Respublikasi Adliya vazirligi bilan, tumanlar va shaharlar hokimliklari yuridik xizmati xodimlari Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari (bundan buyon matnda hududiy adliya organlari deb yuritiladi) bilan kelishilgan holda tayinlanadilar.

3. Hokimliklar tomonidan yuridik xizmat lavozimiga kelishish uchun bir va undan ortiq nomzodlar tavsiya etilishi mumkin.

4. Hokimliklar nomzodni kelishish uchun tegishli adliya organiga quyidagi hujjatlarni taqdim etadi:

hokimning nomzodni lavozimga tavsiya etish toʻgʻrisidagi taqdimnomasi;

nomzodning ushbu Nizomning 1 va 2-ilovalariga muvofiq shakldagi anketasi va yaqin qarindoshlari haqidagi maʼlumot;

oliy yuridik maʼlumot toʻgʻrisidagi diplomning notarial tasdiqlangan nusxasi yoki oliy yuridik maʼlumot toʻgʻrisidagi diplomdan koʻchirma — Oʻzbekiston Respublikasi oliy taʼlim muassasalarini davlat granti boʻyicha oʻqib tugatganlar uchun. Agar nomzod xorijda taʼlim olgan boʻlsa, xorijda oʻqishni tamomlaganlik toʻgʻrisidagi hujjat va ushbu hujjatning Oʻzbekiston Respublikasidagi hujjatga ekvivalent deb topilganligi toʻgʻrisida vakolatli davlat organi tomonidan berilgan guvohnomaning notarial tasdiqlangan nusxalari;

mehnat daftarchasining belgilangan tartibda tasdiqlangan nusxasi yoxud undan koʻchirma, agar mavjud boʻlsa.

Hokimlik tomonidan taqdim etilgan hujjatlar qaytarib berilmaydi.

5. Nomzodni kelishish u bilan suhbat oʻtkazish yoʻli bilan amalga oshiriladi.

6. Suhbat adliya organlarida tashkil etiladigan hokimliklarning yuridik xizmati xodimi lavozimiga tavsiya etiladigan nomzodlarni adliya organlari bilan kelishish boʻyicha komissiyalar (bundan buyon matnda komissiya deb yuritiladi) tomonidan oʻtkaziladi.

7. Komissiyalar tarkibi Oʻzbekiston Respublikasi adliya vaziri tomonidan kamida besh kishidan, yaʼni rais, uning oʻrinbosari va aʼzolaridan iborat tarkibda tasdiqlanadi.

Oʻzbekiston Respublikasi Adliya vazirligida vazirning tegishli oʻrinbosari, hududiy adliya organlarida esa, hududiy adliya organi rahbari komissiya raisi hisoblanadi.

8. Komissiya faoliyatini tashkil qilish boʻyicha tashkiliy masalalar uning ishchi organi tomonidan amalga oshiriladi. Bunda adliya organlarining tegishli tarkibiy boʻlinmasi komissiyaning ishchi organi hisoblanadi.

9. Suhbat hujjatlar tegishli adliya organiga kelib tushgan sanadan boshlab bir oy ichida oʻtkaziladi.

10. Ishchi organ hujjatlarni koʻrib chiqish jarayonida ularda kamchiliklar borligi aniqlanmasa, nomzodni tavsiya etgan hokimlikka suhbat oʻtkazilishidan kamida besh kun oldin suhbat oʻtkaziladigan kun, vaqt va joy haqida yozma ravishda xabar beradi.

11. Taqdim etilgan hujjatlarda kamchiliklar borligi aniqlangan taqdirda, ishchi organ tomonidan uch ish kuni ichida nomzodni suhbatga qoʻyishni rad etish toʻgʻrisida qaror qabul qilinadi va nomzodni tavsiya etgan hokimlikka yozma ravishda xabar beriladi.

12. Suhbatga qoʻyishni rad etish uchun asos boʻlgan kamchiliklar bartaraf etilgan taqdirda, ushbu Nizomning 4-bandida belgilangan hujjatlar takroran koʻrib chiqish uchun taqdim qilinishi mumkin.

13. Komissiya ishida aʼzolarning yarmidan koʻpi qatnashgan taqdirda, vakolatli hisoblanadi.

14. Nomzod bilan uning kasb faoliyatiga bogʻliq boʻlgan qonunchilik sohalari, shu jumladan konstitutsiyaviy huquq, fuqarolik huquqi va mehnat huquqi sohalari, shartnomaviy-huquqiy faoliyat va sud ishlarini yuritish asoslari boʻyicha suhbat oʻtkaziladi.

15. Suhbat natijalari mazkur Nizomning 3-ilovasiga muvofiq shakldagi suhbat varaqasida aks ettiriladi. Suhbat varaqasida komissiya aʼzolari tomonidan berilgan savollarning javobi “toʻgʻri”, “notoʻgʻri”, “toʻliq emas” yoki “javob berilmadi” shaklida baholanadi.

16. Komissiya aʼzolari nomzodning bilimi, shuningdek ish tajribasini hisobga olib, uni suhbatdan oʻtgan yoki oʻtmagan deb topish haqida qaror qabul qiladi. Mazkur qaror komissiya aʼzolarining oddiy koʻpchilik ovozi bilan qabul qilinadi. Ovozlar teng boʻlib qolgan taqdirda, komissiya raisining ovozi hal qiluvchi hisoblanadi.

Uzrsiz sabablarga koʻra suhbatga kelmagan nomzodlar komissiya tomonidan suhbatdan oʻtmagan deb topiladi.

17. Suhbat natijalariga koʻra nomzodning suhbatdan oʻtganligi yoki oʻtmaganligi holati boʻyicha tegishli ishchi organi uch ish kuni ichida nomzodni tavsiya etgan hokimlikka yozma ravishda javob berishi lozim.

18. Suhbatdan oʻtgan deb topilgan nomzodlar ikki hafta davomida tegishli adliya organlarida stajirovka oʻtaydi.

19. Suhbatdan oʻta olmagan nomzodlar uch oydan soʻng, umumiy asoslarda ushbu lavozimga qayta tavsiya etilishi mumkin.

20. Nomzodlarni kelishish bilan bogʻliq toʻplangan barcha hujjatlar tegishli komissiyaning ishchi organida saqlanadi.

21. Ushbu Nizom talablarining buzilishida aybdor boʻlgan shaxslar qonun hujjatlariga muvofiq javob beradi.