“Oʻzbekiston SSJda ijroiya va boshqaruv hokimiyati tuzilishini takomillashtirish hamda Oʻzbekiston SSJning Konstitutsiyasi (Asosiy Qonuni)ga oʻzgartishlar va qoʻshimchalar kiritish toʻgʻrisida”gi Oʻzbekiston SSJ Qonuniga binoan, tinchlik davrining ekstremal sharoitlarida aholini himoya qilishning yanada samarali sistemasini yaratish maqsadida Vazirlar Mahkamasi qaror qiladi:

1. Oʻzbekiston SSJ Vazirlar Mahkamasining favqulodda vaziyatlar boʻyicha Komissiyasi Oʻzbekiston SSJ Prezidenti huzuridagi Vazirlar Mahkamasining favqulodda vaziyatlar boʻyicha Komissiyasiga aylantirilsin.

2. Qoraqalpogʻiston MSSJ Vazirlar Kengashi, viloyat ijroiya qoʻmitalari va Toshkent shahar ijroiya qoʻmitasi favqulodda vaziyatlar boʻyicha shahar va nohiya komissiyalarini tuzsinlar.

3. OʻzSSJning potensial xavfli obyektlari boʻlgan vazirliklari, idoralari va davlat qoʻmitalari, konsernlari va birlashmalari favqulodda vaziyatlar boʻyicha tarmoq va obyekt komissiyalarini tuzsinlar.

4. Oʻzbekiston SSJ Prezidenti huzuridagi Vazirlar Mahkamasi Raisining Birinchi oʻrinbosari oʻrtoq Joʻrabekov Ismoil Hakimovich Oʻzbekiston SSJ fuqaro mudofaasi Boshligʻi etib tayinlansin va u Oʻzbekiston SSJ Prezidenti huzuridagi Vazirlar Mahkamasining favqulodda vaziyatlar boʻyicha Komissiyasining Raisi etib tasdiqlansin.

5. Oʻzbekiston SSJ Prezidenti huzuridagi Vazirlar Mahkamasi Raisining oʻrinbosari — resurslar, moddiy-texnika taʼminoti va bitimlar kompleksining rahbari oʻrtoq Sharipov Tohir Yahyoyevich Komissiya Raisining birinchi oʻrinbosari etib;

Oʻzbekiston SSJ Fuqaro mudofaasi shtabining boshligʻi oʻrtoq Rajiboyev Valikiyan Yunusovich Komissiya Raisining oʻrinbosari etib;

Oʻzbekiston SSJ Davlat tabiatni muhofaza qilish qoʻmitasining Raisi Komissiya Raisining oʻrinbosari etib tasdiqlansin.

Oʻzbekiston SSJ Prezidenti huzuridagi Vazirlar Mahkamasining favqulodda vaziyatlar boʻyicha Komissiyasi aʼzolari 1-ilovaga muvofiq tasdiqlansin. Komissiya Raisiga Komissiyaning shaxsiy tarkibini tasdiqlash yuklatilsin.

Oʻzbekiston SSJ Prezidenti huzuridagi Vazirlar Mahkamasining favqulodda vaziyatlar boʻyicha Komissiyasi haqidagi Vaqtinchalik nizom (2-ilova) tasdiqlansin.

6. Oʻzbekiston SSJ Prezidenti huzuridagi Vazirlar Mahkamasi apparatining strukturasiga Oʻzbekiston SSJ Prezidenti huzuridagi Vazirlar Mahkamasining favqulodda vaziyatlar boʻyicha Komissiyasining uch kishidan iborat sektori kiritilsin.

7. Oʻzbekiston SSJ Prezidenti huzuridagi Vazirlar Mahkamasi Komissiyasining axborot organi funksiyasi Oʻzbekiston SSR Ministrlar Sovetining 1980-yil 31-oktabrdagi 730-78-son qaroriga muvofiq tuzilgan strukturaviy boʻlinmaga yuklatilsin.

8. Belgilansinki, Qoraqalpogʻiston MSSJ Vazirlar Kengashi, xalq deputatlari viloyatlar va Toshkent shahar Sovetlari ijroiya qoʻmitalari favqulodda vaziyatlar boʻyicha komissiyalarining raislari Oʻzbekiston SSJ Prezidenti huzuridagi Vazirlar Mahkamasining favqulodda vaziyatlar boʻyicha Komissiyasi majlisida tegishli masalalar koʻrib chiqilayotganda ushbu Komissiya aʼzolari huquqi bilan qatnashadilar.

9. Oʻzbekiston SSR Ministrlar Sovetining 1990-yil 9-avgustdagi 286-son qarorining 9-punkti oʻz kuchini yoʻqotgan deb hisoblansin.

Oʻzbekiston SSJ Avtomobil yoʻllari vaziri

Oʻzbekiston SSJ Avtomobil transporti vaziri

Oʻzbekiston SSJ Ichki ishlar vaziri

Oʻzbekiston SSJ Uy-joy-kommunal xoʻjaligi vaziri

Oʻzbekiston SSJ Montaj va maxsus qurilish ishlari vaziri

Oʻzbekiston SSJ Binokorlik materiallari sanoati vaziri

Oʻzbekiston SSJ Aloqa vaziri

Oʻzbekiston SSJ Qurilish vaziri

Oʻzbekiston SSJ Melioratsiya va suv xoʻjaligi vaziri

Oʻzbekiston SSJ Qishloq xoʻjaligi vaziri

Oʻzbekiston SSJ Savdo vaziri

Oʻzbekiston SSJ Energetika va elektrlashtirish vaziri

Oʻzbekiston SSJ Sogʻliqni saqlash vaziri

Oʻzbekiston SSJ Adliya vaziri

OʻzSSJ Sanoatda ishlarning bexatar olib borilishini nazorat qilish va konchilik nazorati davlat qoʻmitasi raisi

Oʻzbekiston SSJ Davlat qurilish ishlari qoʻmitasining raisi

Oʻzbekiston SSJ Davlat suv xoʻjaligi qurilishi qoʻmitasining raisi

Oʻzbekiston jumhuriyat matlubot jamiyatlari uyushmasining raisi

Oʻzbekiston gidrometeorologiya jumhuriyat boshqarmasining boshligʻi

Oʻzbekiston SSJ Iqtisodiyot qoʻmitasi raisining birinchi oʻrinbosari

Oʻzbekiston SSJ Moddiy-texnika taʼminoti davlat-kooperativ qoʻmitasi raisining birinchi oʻrinbosari

Oʻzbekiston SSJ Davlat xavfsizligi qoʻmitasi raisining birinchi oʻrinbosari

Turkiston Harbiy okrugi qoʻshinlari Qoʻmondonining birinchi oʻrinbosari

Oʻrta Osiyo Temir yoʻli boshqarmasining boshligʻi

Oʻzbekiston Fuqaro aviatsiyasi boshqarmasining boshligʻi

Oʻzbekiston SSJ Harbiy komissari

Oʻzbekiston SSJ Fanlar akademiyasi Seysmologiya institutining seysmiklik va seysmik rayonlashtirish mintaqaviy laboratoriyasining mudiri

Komissiya kotibiyati: Oʻzbekiston SSJ Prezidenti huzuridagi Vazirlar Mahkamasi apparatining xodimi, Oʻzbekiston SSJ Fuqaro mudofaasi shtabining xodimi

1. Oʻzbekiston SSJ Prezidenti huzuridagi Vazirlar Mahkamasining favqulodda vaziyatlar boʻyicha Komissiyasining maqsadi quyidagilarni taʼminlashdan iborat:

jumhuriyat davlat boshqaruv organlari, Oʻzbekiston SSJning avariyalar, halokatlar, tabiiy va ekologik ofatlar, mintaqaga xos boʻlgan epidemiya va epizootiyalar roʻy beradigan hollarning oldini olish va favqulodda vaziyatlarda harakat qilish Davlat tizimiga kiritilgan kuchlar va vositalarning doimiy tayyor turishini taʼminlash;

Qoraqalpogʻiston MSSJ Vazirlar Kengashi, viloyat ijroiya qoʻmitalari va Toshkent shahar ijroiya qoʻmitasining favqulodda vaziyatlar boʻyicha komissiyalarining, jumhuriyatning barcha darajalardagi boshqaruv organlarining, Vazirlar Mahkamasining komplekslari, vazirliklar, davlat qoʻmitalari, konsernlar, idoralar hamda jumhuriyat hududida joylashgan ittifoq tasarrufidagi korxonalarning favqulodda vaziyatlarning oldini olish va bartaraf etish borasidagi ishlarini muvofiqlashtirish va nazorat qilish;

qutqarish va avariya-qayta tiklash ishlariga, mintaqada favqulodda vaziyat yuz berganda aholining hayotini saqlash va ularni falokat zonalaridan evakuatsiya qilish.

2. Komissiya oʻz faoliyatini Vazirlar Mahkamasi rahbarligida amalga oshiradi hamda Oʻzbekiston SSJ Oliy Kengashining qoʻmitalari va komissiyalari bilan oʻzaro aloqada ish olib boradi. Komissiya Raisi, Rais oʻrinbosarlari va Komissiya tarkibi Vazirlar Mahkamasining qaroriga binoan tayinlanadi.

Favqulodda vaziyatlar boʻyicha Komissiya oʻz faoliyatini OʻzSSJ Davlat tabiatni muhofaza qilish qoʻmitasi, OʻzSSJ Sanoatda ishlarning bexatar olib borilishini nazorat qilish va konchilik nazorati davlat qoʻmitasi, Oʻzbekiston gidrometeorologiya jumhuriyat boshqarmasi bilan muvofiqlashtirib boradi.

3. Komissiyaning asosiy vazifalari:

a) kundalik faoliyatda:

jumhuriyat vazirliklari, davlat qoʻmitalari, konsernlari, idoralari, birlashmalari, jumhuriyat avariya-qutqarish xizmatlari, Qoraqalpogʻiston MSSJ Vazirlar Kengashi, viloyat ijroiya qoʻmitalari va Toshkent shahar ijroiya qoʻmitasining favqulodda vaziyatlar boʻyicha komissiyalarining favqulodda vaziyatlarda harakat qilishga tayyorlik darajasini oshirish, aholi xavfsizligini taʼminlash, favqulodda vaziyatlarda sanoat, energetika, transport, aloqa, ijtimoiy-maishiy xizmat obyektlarining ishonchli va barqaror ishlashini taʼminlash borasidagi faoliyatini tashkil etadi va muvofiqlashtiradi;

roʻy berish ehtimoli boʻlgan favqulodda vaziyatlarni va ularning oqibatlarini prognozlash, jumhuriyat hududida avariyalar, falokatlar, tabiiy va ekologik ofatlar, epidemiyalar va epizootiyalar oqibatida yuzaga kelishi mumkin xavfli zonalarni (rayonlarni) belgilash, ekstremal hodisalar xavf-xatarini va koʻrilishi mumkin boʻlgan zararlarni baholash boʻyicha ishlarni yoʻnaltiradi;

favqulodda vaziyatlarning oldini olish va shunday hollarda harakat qilish boʻyicha Oʻzbekiston SSJ Davlat tizimi ishlariga rahbarlikni amalga oshiradi;

potensial xavfli obyektlarda avariyalar va falokatlarning oldini olishga, ular yuz bergan taqdirda hamda tabiiy ofatlar, epidemiyalar va epizootiyalar roʻy bergan hollarda koʻrilishi mumkin boʻlgan zararni kamaytirishga qaratilgan profilaktika choralari tizimini ishlab chiqadi;

roʻy berishi mumkin boʻlgan avariyalar, falokatlar, tabiiy ofatlar, epidemiyalar, epizootiyalarni tugatish boʻyicha tadbirlarning jumhuriyat rejasini tayyorlaydi;

ittifoq boshqaruv organlari bilan birgalikda jumhuriyat hududida aholining hayoti va salomatligi uchun potensial xavfli boʻlgan xalq xoʻjaligi va mudofaa xarakteridagi obyektlarning joylashishi nechogʻlik maqsadga muvofiqligi, shuningdek ularni bekitish, konservatsiyalash, tugatish, faoliyatini toʻxtatib qoʻyish masalalarini koʻrib chiqadi;

jumhuriyat boshqaruv organlarining avariya-qutqaruv xizmatlari, Oʻzbekiston SSJ kuchlari va vositalarining favqulodda vaziyatlarning oldini olish va shunday hollar yuz berganda harakat qilish boʻyicha komanda-shtab va maxsus mashqlarini oʻtkazadi;

jamoat tashkilotlari va tegishli tajribaga ega boʻlgan fuqarolarning favqulodda vaziyatlarning oldini olish boʻyicha tadbirlarda qatnashishi uchun sharoit yaratish chora-tadbirlarini amalga oshiradi;

jumhuriyat aholisini favqulodda vaziyatlarda harakat qilishga tayyorlash ishlarini tashkil etadi va muvofiqlashtiradi;

SSJI Vazirlar Mahkamasining favqulodda vaziyatlar boʻyicha Davlat komissiyasi bilan birgalikda qutqarish va avariya-qayta tiklash ishlarini samarali olib borish uchun zamonaviy texnika, asbob-uskunalar, mexanizmlar va materiallar ishlab chiqarish hamda xarid qilishni, xavfli texnogen va tabiat hodisalarini kuzatishni, ular ustidan nazorat sistemasini rivojlantiruvchi, aholini himoya qilish va kishilarning favqulodda vaziyatlarda yashashini taʼminlovchi yagona ilmiy-texnikaviy siyosatni ishlab chiqishda qatnashadi;

Vazirlar Mahkamasining Qonunchilik aktlarini, qarorlarini, farmoyishlarini, Komissiya kompetensiyasiga kiradigan masalalar boʻyicha boshqa normativ aktlarni ishlab chiqishni amalga oshiradi va ularning bajarilishini nazorat qilib boradi;

favqulodda vaziyatlar oqibatlari profilaktikasi, ularning oldini olish va bartaraf etish sohasidagi vatanimiz va xorijiy mamlakatlar tajribasini oʻrganish va undan foydalanishni tashkil etadi, Komissiya kompetensiyasi doirasida markaziy boshqaruv organlari, boshqa ittifoqdosh jumhuriyatlar, xorijiy mamlakatlar va xalqaro tashkilotlar bilan hamkorlikni muvofiqlashtiradi;

b) favqulodda vaziyatlar roʻy berganda va ularning oqibatlarini tugatishda:

favqulodda vaziyatlarning oldini olish va shunday hollarda harakat qilish boʻyicha Oʻzbekiston SSJ Davlat tizimini tayyor holatga keltirishni va uning ishlashini taʼminlaydi;

tegishli boshqaruv organlarini va aholini favqulodda vaziyatlarning roʻy berganligi, xarakteri va miqyoslari, ularning oqibatlarini tugatishning qanday borayotganligi haqida xabardor qilish va axborot bilan taʼminlashni tashkil etadi;

jumhuriyat hududida mintaqaviy favqulodda vaziyat roʻy bergan taqdirda qutqarish va avariya-tiklash ishlariga bevosita rahbarlik qiladi;

zarar koʻrgan aholiga, ularning yashashini taʼminlashga, falokat roʻy bergan rayonlardan koʻchirishga zarur ijtimoiy yordam koʻrsatish ishlarini tashkil etadi va muvofiqlashtiradi;

falokat roʻy bergan rayonga tashkilotlar va fuqarolardan, shu jumladan, xorijiy fuqarolardan yordam tariqasida tushadigan moddiy va moliyaviy mablagʻlarni hisobga olish va taqsimlash ishlarini tashkil etishni nazorat qiladi;

Qoraqalpogʻiston MSSJ Vazirlar Kengashi, viloyat ijroiya qoʻmitalari va Toshkent shahar ijroiya qoʻmitasi favqulodda vaziyatlar komissiyalarining avariyalar va falokatlarning sabablarini aniqlash yuzasidan olib boradigan ishida qatnashadi;

tegishli tajribaga ega boʻlgan jamoat tashkilotlari va fuqarolarning (shu jumladan, xorijiy fuqarolarning) favqulodda vaziyatlarning oqibatlarini tugatish boʻyicha tadbirlarda qatnashishi uchun sharoit yaratish ishlarini olib boradi;

odamlarning hayoti va salomatligi uchun bevosita xavf-xatar bartaraf etilgach, qidiruv-qutqarish ishlari olib borilgandan keyin, aholining yashashini taʼminlovchi obyektlar tiklab boʻlingandan soʻng favqulodda vaziyatlarning oqibatlarini tugatish ishlariga rahbarlik qilish mahalliy hokimiyat va boshqaruv organlariga, shuningdek tegishli vazirliklar, davlat qoʻmitalari, konsernlar, idoralar va birlashmalarga oʻtkaziladi.

4. Komissiya quyidagi huquqlarga ega:

zarur hollarda Oʻzbekiston SSJ Oliy Kengashiga yoki Oʻzbekiston SSJ Prezidentiga SSJI Ichki ishlar vazirligining ichki qoʻshinlarini, shuningdek, SSJI Qurolli Kuchlarining harbiy qismlarini avariyalar, falokatlar, ekologik va tabiiy ofatlarning oqibatlarini tugatishga, favqulodda vaziyatlar zonalarida jamoat tartibini saqlashni va aholining hayoti uchun zarur boʻlgan hamda xalq xoʻjaligi obyektlarini muhofaza qilishni taʼminlashga jalb etish haqida belgilangan tartibda taklif kiritish;

oʻz kompetensiyasi doirasida Oʻzbekiston SSJ Prezidenti huzuridagi Vazirlar Mahkamasining farmoyishlar tarzidagi qarorlarini qabul qilishda qatnashish;

Komissiya kompetensiyasiga taalluqli boʻlgan masalalarni hal etishda Oʻzbekiston SSJ Xalq xoʻjaligi komplekslari, ittifoq, jumhuriyat vazirliklari, davlat qoʻmitalari, konsernlar, idoralar, birlashmalarning rahbarlari bilan birgalikda qatnashish;

Qoraqalpogʻiston MSSJ Vazirlar Kengashi, viloyat ijroiya qoʻmitalari va Toshkent shahar ijroiya qoʻmitasi, vazirliklar, davlat qoʻmitalari, konsernlar, idoralar va birlashmalarning favqulodda vaziyatlar boʻyicha komissiyalarining ishini nazorat qilib borish, oʻz majlislarida ana shu komissiyalarning hisobotlarini eshitish;

favqulodda vaziyatlarning oldini olish va shunday hollarda harakat qilish boʻyicha Oʻzbekiston SSJ Davlat tizimiga kiruvchi kuchlar va vositalarning tayyorligini nazorat qilishni amalga oshirish;

vazirliklar, davlat qoʻmitalari, konsernlar, idoralar, birlashmalar, Qoraqalpogʻiston MSSJ Vazirlar Kengashi, xalq deputatlari mahalliy Sovetlari ijroiya qoʻmitalaridan Komissiya zimmasiga yuklangan vazifalarni amalga oshirish uchun zarur boʻlgan materiallarni talab qilish va olish;

favqulodda vaziyatlarning oldini olish va shunday xollarda harakat qilish boʻyicha Oʻzbekiston SSJ Davlat tizimiga kiruvchi kuchlar va vositalarni zarur boʻlgan qutqarish hamda avariya-qayta tiklash ishlariga, katta avariyalar, falokatlar, tabiiy va ekologik ofatlar, epidemiyalar va epizootiyalar roʻy berganda esa, SSJI Vazirlar Mahkamasining favqulodda vaziyatlar boʻyicha Davlat komissiyasi bilan kelishgan xolda, favqulodda vaziyatlarning oldini olish va shunday hollarda harakat qilish boʻyicha Yagona tizimga kiruvchi kuchlar va vositalarni belgilangan tartibda jalb etish;

jumhuriyat hududidagi mintaqaviy favqulodda vaziyat vujudga kelgan joyga borib, qutqarish va avariya-qayta tiklash ishlariga bevosita rahbarlik qilish;

favqulodda vaziyat paydo boʻlishi sezilgan hollarda, qaysi idoraga boʻysunishidan qatʼi nazar, jumhuriyat hududidagi xalq xoʻjaligi obyektlarining ishini toʻxtatib qoʻyish;

mahalliy avariyalar, falokatlar, tabiiy ofatlar, epidemiyalar va epizootiyalar roʻy bergan taqdirda oʻz vakillari va mutaxassislarini Qoraqalpogʻiston MSSJ, viloyatlar va Toshkent shahridagi favqulodda vaziyatlar boʻyicha komissiyalar ishida ishtirok etish uchun yuborish;

jumhuriyat xalq xoʻjaligining yetakchi mutaxassislarini potensial xavfli boʻlgan obyektlarni ekspertiza qilishga va shunday obyektlarning bexatar ishlashini nazorat qilishga jalb etish.

5. Vazirlar Mahkamasining Komissiyasi kundalik faoliyatida Komissiya Raisi tomonidan tasdiqlangan yillik va kvartal rejalarga muvofiq ish olib boradi. Komissiya majlislarida favqulodda vaziyatlarda ogohlantirish va harakatlar qilish masalalari koʻrib chiqiladi. Komissiya oʻz kompetensiyasi doirasida barcha jumhuriyat vazirliklari, davlat qoʻmitalari, birlashmalari, Qoraqalpogʻiston MSSJ Vazirlar Kengashi, xalq deputatlari Sovetlari viloyat, shahar va nohiya ijroiya qoʻmitalari, qaysi idoraga boʻysunishidan qatʼi nazar, tashkilotlar, korxonalar va muassasalar uchun bajarish majbur boʻlgan qarorlar qabul qiladi. Komissiya majlislari oʻrtasidagi davrda zarur qarorlar Komissiya Raisi yoki uning birinchi oʻrinbosari tomonidan qabul qilinib, tegishli koʻrsatmalar va topshiriqlar tarzida ijrochilarga yetkaziladi. Favqulodda vaziyatlar roʻy berganda avariya, falokat, tabiiy ofat, epidemiya va epizootiyalarning turi, ularning koʻlami va oqibatlariga qarab Komissiya tarkibidan operativ guruhlar tashkil etiladi. Bu guruhlarga Komissiya Raisi yoki uning oʻrinbosarlari boshchilik qiladilar va favqulodda vaziyatlar oqibatlarini tugatishga rahbarlikni taʼminlaydilar.

6. Komissiya Raisi Komissiya zimmasiga yuklangan vazifalar va funksiyalarning bajarilishi uchun masʼul boʻlib, Komissiya aʼzolari oʻrtasida vazifalarni taqsimlaydi, Komissiya va uning apparati ishini tashkil etadi.

7. Komissiya Raisiga amaldagi qonunchilikka binoan quyidagi huquqlar beriladi:

“Favqulodda holatning huquqiy rejimi haqida”gi SSJI Qonunining 4-moddasiga muvofiq favqulodda vaziyat zonasida jamoat tartibini, katta moliyaviy va moddiy boyliklar toʻplangan joylarni, aholining hayotiy faoliyatini taʼminlovchi va xalq xoʻjaligi obyektlarini qoʻriqlashni kuchaytirish, shuningdek favqulodda vaziyatlar zonasida fuqarolarning kirish-chiqishi uchun maxsus rejimni joriy etish;

mahalliy hokimiyat organlari bilan kelishgan holda, favqulodda vaziyat xarakteriga qarab, ofat roʻy bergan rayonlarda fuqarolarning yashashi va yurish-turishining alohida rejimini oʻrnatish;

favqulodda vaziyat oqibatlarining oldini olish yoki tugatish uchun zarur transport, tibbiy, qutqarish, qayta tiklash hamda jumhuriyatga boʻysunuvchi boshqa kuch va vositalarni, shuningdek, tegishli idora kuchlari va vositalarini (kelishuv boʻyicha), oʻzaro kelishib harakat qilish rejasiga koʻra harbiy boʻlinmalar va qismlarni jalb etish;

favqulodda vaziyatlar roʻy bergan zonalarda va ularning oqibatlarini tugatish uchun boʻlgan harakatlarda barcha zarur moddiy-texnika, tibbiy, oziq-ovqat va boshqa jumhuriyat resurslari va zapaslaridan, alohida hollarda esa (kelishuv boʻyicha) davlat va idora resurslari, rezervlari va zapaslaridan foydalanish.

Oʻzbekiston SSJ Fuqaro mudofaasi shtabi zimmasiga favqulodda vaziyatlarda va ularning oqibatlarini tugatishda boshqaruv boʻyicha mutaxassis kadrlarning malakasini oshirishni, favqulodda vaziyatlarda aholini harakat qilishga tayyorlash za takomillashtirish ishlarini tashkil etish yuklatilsin.

Komissiya oʻz tasarrufida quyidagilarga ega:

tegishli rejalashtirilgan davrga iqtisodiy va ijtimoiy rivojlantirish davlat rejalarida ehtiyot choralarini va favqulodda vaziyatlar oqibatlarini tugatish boʻyicha koʻzda tutilmagan ishlarni amalga oshirish uchun moʻljallangan maxsus moliyaviy za moddiy-texnika rezervlari. Mazkur rezervlarning hajmlari va nomenklaturasi toʻgʻrisidagi takliflar tegishli ravishda Oʻzbekiston SSJ Iqtisodiyot qoʻmitasi, Oʻzbekiston SSJ Moddiy-texnika taʼminoti davlat-kooperativ qoʻmitasi, Oʻzbekiston SSJ Moliya vazirligi, Oʻzbekiston SSJ Sogʻliqni saqlash vazirligi, Oʻzbekiston SSJ Qishloq xoʻjaligi vazirligi, Oʻzbekiston SSJ Neft mahsulotlari bilan taʼminlash davlat qoʻmitasi, SSJI Vazirlar Mahkamasi huzuridagi Moddiy resurslar Bosh boshqarmasining Oʻrta Osiyo hududiy boshqarmasi, Oʻzbekiston SSJ Fuqaro mudofaasi shtabi, boshqa vazirliklar va idoralar tomonidan Komissiya bilan kelishilgan holda tayyorlanadi.

Komissiya tomonidan ajratilgan mablagʻlarni sarflash va rezervlardan foydalanish uning qarori bilan amalga oshiriladi.

Komissiya ishchi apparatining tashkiliy tuzilishi Komissiya Raisi tomonidan belgilanadi.

Komissiya apparati favqulodda vaziyatlarning oldini olish, ularning oqibatida koʻriladigan zararni kamaytirishga qaratilgan tadbirlarni amalga oshirish boʻyicha kundalik ishlarni tashkil etadi, favqulodda vaziyatlarda ogohlantirish va harakatlar qilish boʻyicha Oʻzbekiston SSJ Davlat tizimining tayyorligini nazorat qilib boradi, Komissiya majlislariga hujjatlar tayyorlaydi, Komissiya qarorlarini ijrochilarga yetkazadi, ularning bajarilishini nazorat qiladi.

Komissiya faoliyatini axborot bilan taʼminlash Oʻzbekiston SSR Ministrlar Sovetining 1980-yil 31-oktabrdagi 730-78-son qaroriga muvofiq Oʻzbekiston SSJ Prezidenti huzuridagi Vazirlar Mahkamasi apparatida tuzilgan strukturaviy boʻlinma zimmasiga yuklatiladi.

Potensial xavfli obyektlari boʻlgan jumhuriyat vazirliklari, davlat qoʻmitalari, idoralari, birlashmalari rahbarlar (rahbarlarning birinchi oʻrinbosarlari) boshchilik qiladigan favqulodda vaziyatlar boʻyicha komissiyalar tuzadilar. Ular oʻzlariga qarashli obyektlarda va ularga yondosh rayonlarda favqulodda vaziyatlarning oldini olish, ularning yetkazishi mumkin boʻlgan zararini kamaytirish va ular oqibatlarini tugatish boʻyicha tadbirlar hamda ishlarni tayyorlash va oʻtkazish uchun shaxsan masʼuldirlar.

Favqulodda vaziyatlar boʻyicha tarmoq komissiyalari boʻysunuvchi korxonalarning favqulodda vaziyatlar boʻyicha obyekt komissiyalarining faoliyati, xavfsiz va chiqitsiz texnologiyani ishlab chiqish va joriy etish, himoya qilish va favqulodda vaziyatlarning oqibatlarini tugatishning zarur vositalarini ishlab chiqish yuzasidan yagona texnika siyosatini oʻtkazish, ekstremal sharoitda boshqarish boʻyicha mutaxassis kadrlar tayyorlash, favqulodda vaziyatlarning oqibatlarini tugatishda obyekt komissiyalariga yordam berish, shu jumladan, favqulodda vaziyatlar boʻyicha viloyat, shahar komissiyalarining kuch va vositalarini bu ishlarga jalb etish (kelishuv boʻyicha) ishlariga metodik rahbarlik qilish, bu ishlarni muvofiqlashtirish va nazorat qilishni amalga oshirishlari kerak.

Komissiya vazirliklar, davlat qoʻmitalari, konsernlar, idoralar, birlashmalar va potensial xavfli obyektlarda navbatchilik-dispetcherlik xizmatini tashkil etadi. Fuqaro mudofaasi boʻyicha ikkinchi boʻlimlarning shtatdagi xodimlari vazirliklar, davlat qoʻmitalari, konsernlar, idoralar, birlashmalarning favqulodda vaziyatlar boʻyicha komissiyalarining ishchi organi hisoblanadi.

Potensial xavfli obyektlari boʻlgan Oʻzbekiston SSJ vazirliklari, davlat qoʻmitalari, konsernlari, idoralari, birlashmalari mahalliy sharoitlardan kelib chiqqan holda favqulodda vaziyatlar boʻyicha komissiyalar haqida idoraviy nizomlarni ishlab chiqadilar, oʻz ishlarida Vazirlar Mahkamasi Komissiyasining Vaqtinchalik nizomidan foydalanadilar.

Vazirlikning komissiyasi haqidagi nizom OʻzSSJ Fuqaro mudofaasi shtabi bilan kelishilgan holda, vazir tomonidan tasdiqlanadi. Komissiyaning shaxsiy tarkibi: rais, rais oʻrinbosarlari, komissiya aʼzolari kollegiya (qoʻmita) qarori bilan tasdiqlanadi.

Xalq xoʻjaligi obyektining favqulodda vaziyatlar boʻyicha Komissiyasining tipovoy loyihasini vazirliklar, davlat qoʻmitalari, konsernlar, birlashmalar (tarmoq komissiyalari) ishlab chiqadilar. Obyekt komissiyalari oʻz nizomida asosiy vazifalarni, funksiyalarni, tarkibni va huquqlarni, favqulodda vaziyat xavfi boʻlganda uning oldini olish va shunday hollar roʻy berganda harakat qilish boʻyicha ishlarni tashkil etishni (mahalliy xususiyatlarni hisobga olgan holda) jalb etiladigan kuch va vositalarni aniqlaydilar.

Xususiy (sex) va obyekt vaziyatlarini obyekt komissiyalari zarur hollarda favqulodda vaziyatlar boʻyicha nohiya (shahar) va tarmoq komissiyalarining operativ guruhlari, kuch va vositalari ishtirokida bartaraf etadilar.

Tarmoq komissiyalari idoraga qarashli qaysi korxonalarda aholini shikastlanish (zararlanish) xavfidan xabardor qilishning muayyan sistemalari boʻlishini belgilaydilar. Ularni jihozlashni nazorat qilishni ham shu komissiyalar amalga oshiradilar.

Ofitserlar tarkibi bilan komplektlangan fuqaro mudofaasi shtabi bor boʻlgan viloyatlar, shaharlar va shaharlarning nohiyalarida fuqaro mudofaasi boshligʻi — favqulodda vaziyatlar boʻyicha komissiya raisi etib xalq deputatlari mahalliy Soveti raisining birinchi oʻrinbosari — ijroiya qoʻmita raisi tayinlanadi. Ishchi apparati funksiyasi fuqaro mudofaasi shtabi zimmasiga yuklanadi.

Fuqaro mudofaasi boʻyicha guruhga kiritilmagan shaharlarda, qishloq nohiyalarida, nohiya va viloyatga boʻysunadigan shaharlarda fuqaro mudofaasi boshligʻi — favqulodda vaziyatlar boʻyicha komissiya raisi etib xalq deputatlari Soveti raisining birinchi oʻrinbosari — ijroiya qoʻmita raisi tayinlanadi; nohiya va viloyatga boʻysunuvchi shaharlarda — xalq deputatlari Sovetining raisi tayinlanadi. Ishchi apparati funksiyasi ijroiya qoʻmita raisining favqulodda vaziyatlar va fuqaro mudofaasi (mavjud FM shtabi boshligʻi lavozimi) boʻyicha oʻrinbosari va favqulodda vaziyatlar boʻyicha komissiya kotibi zimmasiga yuklanadi.

Jumhuriyat tez harakat qilish koʻp profilli markazi (JTHQKPM) jumhuriyat hududida ekstremal vaziyatlarda odamlarni qutqarish boʻyicha professional bosh tashkilot boʻlib, favqulodda vaziyatlarning oldini olish va shunday hollar roʻy berganda harakat qilish boʻyicha yagona Davlat tizimiga kiradi.

JTHQKPM bevosita Oʻzbekiston SSJ Fuqaro mudofaasi boshligʻiga boʻysunadi.

JTHQKPM faoliyatiga umumiy rahbarlik qilish Vazirlar Mahkamasining favqulodda vaziyatlar boʻyicha Komissiyasi Raisi zimmasiga yuklanadi va u Jumhuriyat tez harakat qilish koʻp profilli markazi haqidagi nizomni tasdiqlaydi.

Belgilangan formadagi JTHQKPM guvohnomasini olgan qutqazuvchilar favqulodda vaziyatlar roʻy bergan zonaga kirish (chiqish) huquqiga egadirlar.