Cheklangan suv resurslaridan oqilona foydalanishni taʼminlash va suv taqchilligi oqibatlarini yengillashtirish maqsadida Vazirlar Mahkamasi qaror qiladi:

1. Qoraqalpogʻiston Respublikasi, viloyatlar va suv xoʻjaligi tizimlari boʻyicha 2000-2001-yillarda novegetatsiya va vegetatsiya davrlarida suv olish limitlari hamda asosiy suv omborlarining ishlash rejimi 1 va 2-ilovalarga* muvofiq tasdiqlansin.

Oʻzbekiston Respublikasi Qishloq va suv xoʻjaligi vazirligi suv olishning 1-ilovaga muvofiq belgilangan limitlarini 10 kunliklarga boʻlgan holda barcha suv isteʼmolchilariga yetkazsin hamda unga qatʼiy rioya etilishini taʼminlasin.

Belgilansinki, respublikaning barcha suv omborlari irrigatsiya rejimida ishlaydi, ushbu rejimga Oʻzbekiston Respublikasi Qishloq va suv xoʻjaligi vazirligining takliflari boʻyicha tuzatishlar kiritiladi.

2. 2000-yilning IV choragida va 2001-yilda suv taqchilligini yengillashtirishga doir qoʻshimcha ishlarni amalga oshirish boʻyicha topshiriqlar 3 — 7-ilovalarga* muvofiq maʼqullansin.

Oʻzbekiston Respublikasi Qishloq va suv xoʻjaligi vazirligi, Qoraqalpogʻiston Respublikasi Vazirlar Kengashi, viloyatlar hokimliklari topshiriqlarning belgilangan muddatlarda bajarilishini taʼminlasinlar, buning uchun mavjud moddiy va mehnat resurslarini, transport, qurilish va yer qazish texnikasini safarbar etsinlar. Zaruriyat boʻlganda boshqa tashkilotlar shartnoma boʻyicha jalb etilsin.

Oʻzbekiston Respublikasi Qishloq va suv xoʻjaligi vazirligiga hamda Energetika va elektrlashtirish vazirligiga kam suvli obyektlar qurilishini loyihalashtirish bilan bir vaqtda alohida chizmalar va smetalar boʻyicha mablagʻ bilan taʼminlashga ruxsat berilsin.

4. Oʻzbekiston Respublikasi Makroiqtisodiyot va statistika vazirligi, Moliya vazirligi:

Oʻzbekiston Respublikasi Qishloq va suv xoʻjaligi vazirligiga suv taqchilligini yengillashtirish ishlarini olib borish uchun 2000-yilga 3,0 mlrd soʻm miqdorida kapital qoʻyilmalarning qoʻshimcha limitini ajratsinlar;

2001-yil investitsiya dasturini shakllantirishda Qishloq va suv xoʻjaligi vazirligiga, “Amudaryo” va “Sirdaryo” suv xoʻjaligi havzasi birlashmalariga mazkur qarorga 3-7-ilovalarga muvofiq foydalanish tadbirlarini moliyalashga mablagʻlar va suv taqchilligini yengillashtirish ishlari bajarilishini taʼminlaydigan hajmlarda kapital qoʻyilmalar ajratilishini nazarda tutsinlar.

5. Nasos stansiyalari va sugʻorish uchun quduqlarning tashqi elektr taʼminoti obyektlarini loyihalash va qurish boʻyicha buyurtmachi funksiyasi Oʻzbekiston Respublikasi Energetika va elektrlashtirish vazirligiga yuklansin, bunda koʻrsatib oʻtilgan obyektlar Oʻzbekiston Respublikasi Qishloq va suv xoʻjaligi vazirligining mablagʻlari hisobiga taʼminlanishi nazarda tutilsin.

6. Namangan, Fargʻona, Qashqadaryo, Surxondaryo, Navoiy, Samarqand viloyatlari hokimliklari qishloq xoʻjaligi korxonalari balansidagi artezian quduqlar ularning oʻz mablagʻlari hisobiga tiklanishini taʼminlasinlar.

Oʻzbekiston Respublikasi Qishloq va suv xoʻjaligi vazirligi hamda Moliya vazirligi, Davlat ehtiyojlari uchun xarid qilinadigan qishloq xoʻjaligi mahsulotlarining hisob-kitob jamgʻarmasi 2001yilgi boshoqli don ekinlari, paxta va sholi hosili uchun avans berishga mablagʻlar ajratishda yuqorida koʻrsatib oʻtilgan ishlarning bajarilishi uchun xoʻjaliklarning ehtiyojlarini hisobga olsinlar.

7. Oʻzbekiston Respublikasi Qishloq va suv xoʻjaligi vazirligi:

kollektor-drenaj tarmoqlarini va kanallarni oʻz vaqtida tozalash uchun joriy yilning IV choragida 20 ta ekskavator va 2001-yilda 100 ta, shu jumladan birinchi yarim yilda 50 ta ekskavator tayyorlanishini taʼminlasin;

sugʻorish uchun yangi quduqlar qurish, mavjudlarini jihozlash va rekonstruksiya qilish maqsadida chuqurlik nasoslari tayyorlanishi va xarid qilinishini taʼminlasin.

8. Oʻzbekiston Respublikasi Qishloq va suv xoʻjaligi vazirligining Tashqi iqtisodiy aloqalar vazirligida roʻyxatdan oʻtkazilgan kontraktlari boʻyicha import qilingan nasos-kuch uskunalari va ularga boshqa materiallar bojxona toʻlovlaridan ozod qilinsin (bojxonada rasmiylashtirish uchun yigʻimlar bundan mustasno).

9. Respublikaning Andijon, Buxoro, Jizzax, Qashqadaryo, Navoiy, Namangan, Samarqand va Fargʻona viloyatlari xoʻjaliklarida sholi ekish maqsadga muvofiq emas deb hisoblansin, boshqa viloyatlar boʻyicha esa Oʻzbekiston Respublikasi Qishloq va suv xoʻjaligi vazirligi suv resurslari bilan taʼminlashni hisobga olgan holda 2001-yil yanvar oyida taklif kiritsin.

10. Oʻzbekiston Respublikasi Makroiqtisodiyot va statistika vazirligi Energetika va elektrlashtirish vazirligi, “Oʻzbekneftgaz” milliy xolding kompaniyasi bilan birgalikda Oʻzbekiston Respublikasi Qishloq va suv xoʻjaligi vazirligiga vazirlik hisob-kitoblari boʻyicha 2001-yilda elektr energiyasi va yonilgʻi-moylash materiallari uchun qoʻshimcha limitlar ajratishni nazarda tutsin.

11. Gidrometeorologiya bosh boshqarmasi 2001-yil 1-aprelgacha, uzoq muddatli ob-havo maʼlumotlari aniqligini oshirish uchun, Turkmaniston va Tojikiston Respublikasining gidrometeorologiya xizmatlari bilan kelishgan holda Fedchenko muzligidagi kuzatishlarni tiklash masalalarini koʻrib chiqsin, zaruriyat boʻlganda mazkur masala yuzasidan taklif kiritsin.

13. Oʻzbekiston Respublikasi Qishloq va suv xoʻjaligi vazirligi Tojikiston Respublikasi bilan kelishgan holda Qayroqqum suv omboridagi suvni oxirigacha tushirish orqali undan qoʻshimcha miqdorda suv olish maqsadida “Maxram-O” nasos stansiyasining ishonchli ravishda ishlashini taʼminlash ishlarini bajarsin.

14. Oʻzbekiston Respublikasi Tashqi ishlar vazirligi, Davlat chegaralarini himoya qiluvchi qoʻmita, Davlat bojxona qoʻmitasi, Davlat soliq qoʻmitasi zarur hujjatlarning oʻz vaqtida rasmiylashtirilishini hamda Oʻzbekiston Respublikasidan tashqarida joylashgan suv taqchilligini yengillashtirish obyektlariga ishchi xodimlar, avtotransport, texnika Oʻzbekiston Respublikasi Davlat chegarasi orqali toʻsiqsiz oʻtishini, asbob-uskunalar va moddiy-texnika resurslari olib oʻtilishini, bunda bojxona boji va yigʻimlar undirilmasligini taʼminlasinlar.

15. Oʻzbekiston Respublikasi Tashqi ishlar vazirligi, Tashqi iqtisodiy aloqalar vazirligi, Qishloq va suv xoʻjaligi vazirligi, Energetika va elektrlashtirish vazirligi, “Oʻzbekneftgaz” milliy xolding kompaniyasi 2000-yil 1-dekabrgacha Norin-Sirdaryo suv omborlari kaskadining suv-energetika resurslaridan oqilona foydalanish boʻyicha tegishli hukumatlararo bitimlar tuzilishini taʼminlasinlar.

16. Suv resurslaridan foydalanish masalalari boʻyicha vazirliklar va idoralar faoliyatini muvofiqlashtirish boʻyicha 8-ilovaga* muvofiq tarkibda maxsus komissiya tashkil etilsin.

Quyidagilar:

vazirliklar va idoralarning suv taqchilligini yengillashtirishga yoʻnaltirilgan ishlarni bajarish boʻyicha faoliyatini nazorat qilish va muvofiqlashtirish;

suv resurslarining belgilangan limitlariga rioya qilinishini va sugʻorish suvlaridan oqilona foydalanishni oʻrganish komissiyaning asosiy vazifalari etib belgilansin.

Maxsus komissiyaga zaruriyat boʻlganda suv taqchilligini yengillashtirish boʻyicha bir martalik ishlarni bajarishga tegishli vazirliklar va idoralarning kuchlari va mablagʻlarini belgilangan tartibda jalb etishga ruxsat berilsin.

17. Qoraqalpogʻiston Respublikasi Vazirlar Kengashi, viloyatlar hokimliklari, Oʻzbekiston Respublikasi Qishloq va suv xoʻjaligi vazirligi maxsus komissiya bilan birgalikda bir oy muddatda suv resurslarini oqilona boshqarish va ulardan foydalanish boʻyicha qoʻshimcha chora-tadbirlarni ishlab chiqsinlar va amalga oshirsinlar. Suvdan samarali foydalanish ustidan nazorat qilish kuchaytirilsin, suv isteʼmolchilari oʻrtasida suv aylanishiga rioya qilinishi hamda tumanlararo, viloyatlararo va respublikalararo irrigatsiya tizimlari boʻyicha suvning toʻsiqsiz oʻtkazilishi taʼminlansin.

18. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari T. Xoltoyev va Oʻzbekiston Respublikasi Prezidentining Davlat maslahatchisi I. Joʻrabekov zimmasiga yuklansin.