2001-yil hosili uchun boshoqli don ekinlari navlar boʻyicha oqilona joylashtirilishini, boshoqli don ekinlarini kuzgi ekish oʻz vaqtida va sifatli oʻtkazilishini taʼminlash, shuningdek lalmi dehqonchilik samaradorligini oshirish maqsadida Vazirlar Mahkamasi qaror qiladi:

1. Qayd etilsinki, Oʻzbekiston Respublikasi Qishloq va suv xoʻjaligi vazirligi, Jizzax, Qashqadaryo, Navoiy, Samarqand va Surxondaryo viloyatlari hokimliklari oʻtgan yillardagi xatolardan zarur xulosalar chiqarib olmadilar, 2000-yil hosilidan Vazirlar Mahkamasining 1999-yil 17-avgustdagi 391-son qarori bilan belgilab berilgan boshoqli don ekinlari urugʻlarini tayyorlash hajmi bajarilishini taʼminlamadilar, bu bilan 2001-yil hosili uchun boshoqli don ekinlarini kuzgi ekishda qoʻshimcha qiyinchiliklar yaratdilar.

Jizzax (Mirziyoyev), Qashqadaryo (Hamidov), Navoiy (Dilov), Samarqand (Roʻziyev) va Surxondaryo (Olimjonov) viloyatlarining hokimlari xoʻjaliklarni sifatli urugʻlik bilan zarur miqdorda taʼminlash yuzasidan shoshilinch choralar koʻrsinlar.

Boshoqli don ekinlari urugʻi tayyorlash barbod etilganligi uchun Qashqadaryo viloyati hokimining birinchi oʻrinbosari F. Ashurovga va Samarqand viloyati hokimining birinchi oʻrinbosari B. Berdimurodovga hayfsan eʼlon qilinsin, Jizzax viloyati hokimi Sh.Mirziyoyev ogohlantirilsin.

2. 2001-yilda kutilayotgan suv taqchilligini hisobga olib Makroiqtisodiyot va statistika vazirligi, Qishloq va suv xoʻjaligi vazirligining Qoraqalpogʻiston Respublikasi Vazirlar Kengashi va viloyatlar hokimliklari bilan kelishilgan boshoqli don ekinlarining tezpishar va serhosil navlarini sugʻoriladigan va lalmi yerlarda joylashtirish, 2001-yil hosili uchun boshoqli don ekinlari maydonlari, hosildorligi va yalpi hosili boʻyicha takliflari 1 va 2-ilovalarga muvofiq qabul qilinsin.

Lalmi yerlarda don ekish va yetishtirishda ortiqcha xarajatlarga yoʻl qoʻymaslik uchun 2001-yil hosili uchun lalmi yerlarda boshoqli don ekinlari maydoni 182 ming gektargacha qisqartirilsin, ular asosan namligi taʼminlangan yerlarda ekilsin.

Gʻalla ekilmagan qolgan lalmi yerlar shudgor qilinsin va keyingi yilda ekishda foydalanish uchun dam berib qoʻyilsin.

4. “Oʻzdonmahsulot” davlat korporatsiyasi:

joriy yilning 5-oktabrigacha boshoqli don ekinlari urugʻliklarini tozalash, ularni navlarga ajratish, sarxillash, sertifikatsiyalash, qoplarga joylashtirish va sotish ishlarini tugatsin. Urugʻliklarning sifatini saqlash maqsadida ularni polietilen qoplarga solishni qatʼiyan taʼqiqlasin, xoʻjaliklarga konditsiyasiz va dorilanmagan urugʻlar berilishiga yoʻl qoʻymasin;

2001-yil hosili uchun respublikaning elita-urugʻchilik xoʻjaliklariga boshoqli don ekinlarining 1,2 ming tonna superelita va elita urugʻlari olib kelinishini taʼminlasin;

Qishloq va suv xoʻjaligi vazirligining taqsimoti boʻyicha lalmi yerlar uchun davlat resurslaridan xoʻjaliklarga 21,8 ming tonna urugʻlik bersin;

Oʻzbekiston Respublikasi Qishloq va suv xoʻjaligi vazirligi, Qoraqalpogʻiston Respublikasi Vazirlar Kengashi va viloyatlar hokimliklari bilan birgalikda 2001-yil hosilidan 4 va 5-ilovalarga muvofiq yuqori sifatli boshoqli don ekinlari urugʻligi tayyorlanishini taʼminlasin.

5. “Oʻzbekiston temir yoʻllari” davlat-aksiyadorlik kompaniyasi Andijon viloyatidan boshoqli don ekinlari urugʻliklarini tashish uchun vagonlar uzluksiz berilishini taʼminlasin.

6. Quyidagilar Qishloq va suv xoʻjaligi vazirligi, Qoraqalpogʻiston Respublikasi Vazirlar Kengashi, viloyat hokimliklarining muhim vazifalari hisoblansin:

xoʻjaliklarda qabul qilingan qishloq xoʻjaligi ekinlarini almashlab va navbati bilan ekish sxemasini hisobga olgan holda boshoqli don ekinlarini unumli va suv taʼminoti kafolatlangan yerlarga joylashtirish va ekish, shuningdek donni asosan prognoz qilingan hosil olinishi va xarajatlar qoplanishini taʼminlaydigan namligi taʼminlangan lalmi yerlarda ekish;

ekishni bugʻdoyning tezpishar va sermahsul navli urugʻlar bilan mazkur qarorda tasdiqlangan boshoqli don ekinlari navlar boʻyicha joylashtirilishiga qatʼiy amal qilgan holda oʻtkazish. Meliorativ holati yomon boʻlgan shoʻrlangan yerlarga tuproq oldindan yuvilgandan keyin ekish;

boshoqli don ekinlarini ekishni qulay agrotexnika muddatlarida — Qoraqalpogʻiston Respublikasi, Xorazm, Jizzax, Sirdaryo viloyatlari va Fargʻona vodiysi viloyatlarida 25-oktabrgacha, janubiy mintaqalarda 1-noyabrgacha, lalmi yerlarda 15-noyabrgacha tugallash. Bu talablarning bajarilishi uchun xoʻjaliklar, tumanlar va viloyatlarning rahbarlari shaxsan javob beradilar.

7. “Oʻzkimyosanoat” uyushmasi don ekinlari uchun azotli, fosforli va kaliyli oʻgʻitlar oʻz vaqtida, ulardan fosforli va kaliyli oʻgʻitlar ekishdan oldin va ekish bilan birga solish uchun joriy yilning 10-oktabrigacha, azotli oʻgʻitlar 2001-yilning 1-martigacha yetkazib berilishini taʼminlasin.

8. Oʻzbekiston Respublikasi Qishloq va suv xoʻjaligi vazirligi, “Oʻzqishloqxoʻjaliktaʼminottuzatish” davlat-kooperativ qoʻmitasining don ekish mashinalarining zarur kompleksini taʼmirlash va tayyorlash tugallanganligi, “Oʻzqishloqxoʻjalikmash-xolding” kompaniyasining esa xoʻjaliklarning buyurtmalari boʻyicha takomillashtirilgan konstruksiyali seyalkalar va ularga ehtiyot qismlar tayyorlash tashkil etilganligi haqidagi axboroti maʼlumot uchun qabul qilinsin.

9. Oʻzbekiston Respublikasi Qishloq va suv xoʻjaligi vazirligi, “Oʻzqishloqxoʻjaliktaʼminottuzatish” davlat-kooperativ qoʻmitasi, “Oʻzqishloqxoʻjalikmash-xolding” kompaniyasi, “Oʻzkimyosanoat” uyushmasi, “Oʻzbekneftgaz” kompaniyasi kuzgi don ekishda, avvalo oʻz vaqtida mineral oʻgʻitlar, neft mahsulotlarini yetkazib berishda, yerlarni haydashda, haydov traktorlari, seyalkalarni tayyorlashda, ularga ehtiyot qismlar, uzellar va agregatlar keltirishda xoʻjaliklarga aniq yordam koʻrsatish yuzasidan bir hafta muddatda tadbirlar ishlab chiqsinlar va oʻz tasarrufidagi har bir boʻlinmaga yetkazsinlar.

10. Mazkur qarorning bajarilishini nazorat qilish Bosh vazir oʻrinbosari T. Xoltoyev va Oʻzbekiston Respublikasi Prezidentining Davlat maslahatchisi I. Joʻrabekov zimmasiga yuklansin.