Vazirlar Mahkamasi qaror qiladi:

Oʻzbekiston SSJ dehqonchilik-sanoat kompleksini moddiy-texnikaviy taʼminlash va texnikani tuzatish davlat-kooperativ qoʻmitasi (“Oʻzselxozsnabremont”) toʻgʻrisidagi ilova qilinayotgan Nizom tasdiqlansin.

1. Oʻzbekiston SSJ dehqonchilik-sanoat kompleksini moddiy-texnikaviy taʼminlash va texnikani tuzatish davlat-kooperativ qoʻmitasi (“Uzselxozsnabremont”) Oʻzbekiston SSJ Prezidentining 1991-yil 15-apreldagi Farmoniga va Oʻzbekiston SSJ Prezidenti huzuridagi Vazirlar Mahkamasining 1991-yil 6-maydagi 119-son qaroriga muvofiq tashkil etilgan.

2. “Uzselxozsnabremont” jumhuriyat dehqonchilik-sanoat kompleksiga kiruvchi davlat boshqaruvining jumhuriyat organi hisoblanadi va Oʻzbekiston SSJ Prezidenti huzuridagi Vazirlar Mahkamasiga boʻysunadi.

“Uzselxozsnabremont” oʻz faoliyatida SSJI qonunlariga, SSJI xalq deputatlari syezdining va SSJI Oliy Kengashining boshqa qarorlariga, Oʻzbekiston SSJ qonunlariga, Oʻzbekiston SSJ Oliy Kengashining boshqa qarorlariga, SSJI Vazirlar Mahkamasining qarorlari va farmoyishlariga, Oʻzbekiston SSJ Prezidenti huzuridagi Vazirlar Mahkamasining qarorlari va farmoyishlariga, mazkur Nizomga va boshqa normativ aktlarga amal qiladi.

“Uzselxozsnabremont” tizimining faoliyati paychilarning yakka tartibda va jamoa boʻlib aʼzo boʻlishi, kooperativ, davlat, qoʻshma, ijara, xususiy va jamoat tashkilotlari, korxonalari hamda jumhuriyat dehqonchilik-sanoat kompleksi sohasida yakka tartibdagi ishlab chiqarish faoliyati bilan shugʻullanuvchi shaxslarning ixtiyoriy qatnashuvi asoslarida amalga oshiriladi.

3. “Uzselxozsnabremont” yuridik shaxs hisoblanadi, bank muassasalarida oʻzining mustaqil va yigʻma balanslariga, hisob-kitob, valyuta va boshqa schyotlariga ega boʻladi, qatnashuvchi korxonalarning, ijara va qonunda koʻzda tutilgan boshqa mulkchilik turlarining kollektiv mulkchiligi huquqida oʻz mulkiga, Oʻzbekiston SSJ Davlat gerbi tasvirlangan hamda oʻz nomi oʻzbek va rus tillarida yozilgan muhrga, shtamplarga, xos ish qogʻozlariga va boshqa rekvizitlarga ega boʻladi.

4. “Uzselxozsnabremont”ning asosiy vazifalari quyidagilardan iborat:

ittifoq rejalashtiruvchi organlari, OʻzSSJ Iqtisodiyot qoʻmitasi markazlashgan tartibda taqsimlaydigan mahsulotga ehtiyojni aniqlash va resurslar olish, isteʼmolchilarning yetkazib beruvchilarga birkitib qoʻyilishini taʼminlash, dehqonchilik-sanoat kompleksining isteʼmolchilariga qaror topgan xoʻjalik aloqalari boʻyicha mahsulot yetkazib berish yuzasidan shartnomalarni tuzishda yordam koʻrsatish;

oʻzaro mahsulot yetkazib berish toʻgʻrisida hukumatlararo bitimlarni tuzishga materiallar tayyorlash va unda qatnashish;

ishlab chiqarish vositalari bozorining shakllanishiga, mollarning maqbul harakatiga, savdo-vositachilik va tijorat faoliyatini, marketingni rivojlantirishga, kichik korxonalar, tashqi savdo tashkilotlari va qoʻshma korxonalarning shoxobchalarini, kichik ulgurji, vositachilik va chakana savdo magazinlarini, tijorat banklarini, tovar birjalarini, aksionerlik va sugʻurta jamiyatlarini tashkil etishga har tomonlama yordam berish, dehqonchilik-sanoat kompleksi isteʼmolchilariga xizmat koʻrsatish uchun ulgurji yarmarkalar va auksionlar tashkil etish, qishloq xoʻjaligi korxonalari va yetkazib beruvchi korxonalar oʻrtasida vositachilik barter operatsiyalarini amalga oshirish;

kolxozlarga, sovxozlarga hamda jumhuriyat dehqonchilik-sanoat kompleksining boshqa korxonalari va tashkilotlariga, yordamchi xoʻjaliklarga, shuningdek fuqarolarning ijara va shaxsiy xoʻjaliklariga traktorlarni, avtomobillarni, qishloq xoʻjaligi va melioratsiya mashinalarini, asbob-uskunalarni, materiallarni, maxsus kiyim-kechak va poyafzallarni, yakka tartibda himoyalanishning boshqa vositalarini hamda qishloq xoʻjaligi ishlab chiqarishi, qurilish va boshqa maqsadlar uchun zarur boʻlgan boshqa moddiy-texnika vositalarini oʻz vaqtida va toʻla yetkazib berishni tashkil etish, xoʻjaliklarni koʻrsatilgan moddiy-texnika vositalari bilan taʼminlashning ilgʻor shakllari va usullarini tashkil etish hamda joriy qilishni takomillashtirish, oʻz moddiy-texnika bazasini va tovar yetkazib berish shoxobchalarini rivojlantirish;

dehqonchilik-sanoat kompleksi korxonalari va tashkilotlarining ijtimoiy va ishlab chiqarish maqsadlarida koʻrilayotgan va qayta barpo etilayotgan obyektlarini shartnoma asosida buyumlar va asbob-uskunalar bilan butlashni taʼminlash;

jumhuriyat dehqonchilik-sanoat kompleksining resurs potensialidan va rezervidan foydalangan holda moddiy-texnika vositalarining almashlash fondini shakllantirish, bozorni barqarorlashtirish fondini barpo etishda qatnashish, isteʼmolchilar va ishlab chiqaruvchilar oʻrtasida qaror topgan ishlab chiqarish va xoʻjalik aloqalarini saqlab qolish va rivojlantirish;

shartnoma asoslarida kolxozlarga, sovxozlarga hamda boshqa korxonalar va tashkilotlarga, shuningdek fuqarolarning ijara va shaxsiy xoʻjaliklariga tegishli boʻlgan traktorlarni, avtomobillarni, kombaynlarni, boshqa murakkab qishloq xoʻjaligi mashinalarini, ularning dvigatellari, uzellari va agregatlarini, sugʻorish texnikasini, asbob-uskunalarni, chorvachilik fermalari va komplekslarini, metall qirqish dastgohlarini, elektr dvigatellarini, nazorat-oʻlchov asboblarini, avtomatlashtirish vositalarini, energetika qurilmalarini tuzatishni va ularga texnika xizmati koʻrsatishni tashkil etish, kafolat muddati davrida ishdan chiqqan sotilgan qishloq xoʻjaligi texnikasi va chorvachilik asbob-uskunalarini tuzatish;

iqtisodiy va ijtimoiy rivojlanish koʻrsatkichlarini bajarish, davlat intizomiga qattiq rioya qilinishini taʼminlash, asosiy fondlardan, mehnat, yoqilgʻi-energetika, moddiy, moliyaviy va boshqa resurslardan, kapital mablagʻlardan oqilona va samarali foydalanish, qurilish qiymatini pasaytirish va muddatlarini qisqartirish, asosiy fondlarni oʻz vaqtida ishga tushirish, shuningdek ishlab chiqarish quvvatlarini normativ muddatlarda oʻzlashtirish;

qoʻmita tashkilotlari va korxonalarida mehnatni muhofaza qilish, xavfsizlik texnikasi, baxtsiz hodisalar, yoʻl-transport hodisalarining va yoʻl harakati qoidalari buzilishining oldini olish boʻyicha tadbirlarni amalga oshirish;

avtomobillar, qishloq xoʻjaligi mashinalarining yaroqsiz holga kelgan detallari, uzellari va agregatlarini yigʻishni va tiklashni tashkil etish;

shartnoma boʻyicha koʻrilayotgan, qayta barpo etilayotgan chorvachilik, parrandachilik, teplitsa komplekslarida va dehqonchilik-sanoat kompleksining boshqa ishlab chiqarish obyektlarida ishlab chiqarish jarayonlarini mexanizatsiyalashtirish uchun texnologiya, yordamchi, energetika va ventilyatsiya asbob-uskunalarini, nazorat-oʻlchov asboblarini va avtomatlashtirish vositalarini, ishga tushirish-sozlash ishlarini, shuningdek ichki va yoritish elektr priborlari va ishga tushirish-boshqarish apparatlarini montaj qilish boʻyicha ishlarni amalga oshirish.

5. “Uzselxozsnabremont” oʻzining asosiy vazifalariga muvofiq:

dehqonchilik va chorvachilik uchun yangi texnikani ishlab chiqarish va yaratish boʻyicha ehtiyojni oʻrganadi, takliflarni umumlashtiradi, ularga buyurtmalarni tuzadi, shuningdek qishloqda fan va texnika yutuqlarini joriy qilish, oʻz tasarrufidagi korxonalar va tashkilotlarda fan-texnika taraqqiyotini jadallashtirish, tarmoq fanining samaradorligini oshirish, uning ishlab chiqarish bilan aloqasini mustahkamlash ishlarini muvofiqlashtiradi;

oʻz transport korxonalarining kuchlari bilan kolxozlarga, sovxozlarga hamda dehqonchilik-sanoat kompleksining boshqa korxonalari va tashkilotlariga transport xizmati koʻrsatishni tashkil etadi;

xorijiy firmalar bilan tashqi-iqtisodiy faoliyatni, shu jumladan, barter ayirboshlash funksiyalarini belgilangan tartibda amalga oshiradi;

qishloq xoʻjaligi texnikasini tuzatish, ularga texnika xizmati koʻrsatish va saqlashni, shuningdek neft-ombor xoʻjaliklarini tashkil etish, neft mahsulotlaridan tejam bilan foydalanish boʻyicha normativ-texnik va metodik hujjatlarni ishlab chiqishni tashkil etadi;

traktorlar, qishloq xoʻjaligi va melioratsiya texnikasi hamda asbob-uskunalarini loyihalashtirish uchun texnik topshiriqlarni, bunday texnikani tayyorlash uchun texnik shartlarni (GOSTlarni) koʻrib chiqadi va kelishib oladi;

oʻrta boʻgʻin mutaxassislarini tayyorlashni va malakasini oshirishni, demokratik asoslardan keng foydalangan holda boshqaruv apparati, jumhuriyat, viloyat, nohiyalararo hamda nohiya korxonalari va tashkilotlari rahbar kadrlarini tanlash va joy-joyiga qoʻyishni tashkil qiladi. Ehtiyojga va tizimning istiqboldagi rivojlanishiga muvofiq ravishda kadrlar taʼminotini oldindan aniqlashni amalga oshiradi.

6. “Uzselxozsnabremont”ga quyidagi huquqlar beriladi:

belgilangan tartibda OʻzSSJ Davlat statistika qoʻmitasidan, vazirliklar hamda tayyorlov idoralaridan, korxonalar, tashkilotlar va muassasalardan qishloq xoʻjaligiga moddiy-texnika vositalarining qanday yetkazib berilayotganligi, shuningdek qishloq xoʻjaligiga yetkazib beriladigan moddiy-texnika vositalarini ishlab chiqarish toʻgʻrisida, Qoʻmita tizimidagi korxonalar va tashkilotlarning faoliyati haqida hisobot maʼlumotlarini olish;

dehqonchilik-sanoat kompleksining barcha resurslaridan sugʻurta fondini barpo qilish uchun ishlab chiqarish-texnika maqsadlaridagi mahsulotlarning besh foizgacha taqsimlanmaydigan rezervini qoldirish;

belgilangan tartibda va zaruratga qarab mashinalar, asbob-uskunalar, ehtiyot qismlar va boshqa moddiy-texnika vositalarini dehqonchilik-sanoat kompleksi vazirliklari va idoralari, “Karakalpakselxozsnabremont” va “Oblselxozsnabremont” tashkilotlari oʻrtasida taqsimlash;

taʼsischilar bilan kelishuvga muvofiq maxsus va boshqa fondlarni tuzish, oʻz oborot mablagʻlariga va oʻz asosiy fondlariga ega boʻlish;

ixtiyoriy ravishda shartnoma asoslarida toʻla mustaqillikni va yuridik shaxs huquqlarini saqlagan holda ittifoq va jumhuriyat davlat, kooperativ hamda aralash birlashmalar va uyushmalarga kirish;

isteʼmolchining olishdan voz kechishi munosabati bilan boʻsh qolgan mahsulotni, normativdan tashqari, ortiqcha va foydalanilmagan moddiy resurslarni oborotga jalb qilish, shuningdek normativdan ortiqcha zaxiralarga ega boʻlgan isteʼmolchilarga yetkazib berishni tartibga solib turish;

binolarni, inshootlarni, asbob-uskunalarni, transport vositalarini sotib olish, korxonalarga, tashkilotlarga va yakka tartibdagi ishlab chiqarish faoliyati bilan shugʻullanuvchi fuqarolarga sotish va berish, ayirboshlash, ijaraga berish, vaqtincha foydalanishga berish, shuningdek yaroqsiz boʻlib qolganligi va maʼnaviy eskirganligi sababli asosiy fondlarni balansdan chiqarish;

shartnoma asoslarida oʻz moddiy va pul resurslarini mahsulot ishlab chiqaruvchi korxonalar va tashkilotlarga berish;

oʻz vazifalarini yaxshiroq bajarish maqsadida oʻz mablagʻlarining bir qismini shartnoma asoslarida davlat, kooperativ hamda boshqa korxonalar va tashkilotlarning mablagʻlari bilan birlashtirish;

belgilangan tartibda aksiyalar va boshqa qimmatbaho qogʻozlar chiqarish va sotib olish, xorijiy firmalar bilan birga qoʻshma korxonalar, brokerlik va lizing kompaniyalari barpo etish, taqchil mahsulotlarni yetkazib berish yuzasidan bitimlar tuzish, birgalikda koʻrgazma-yarmarkalar, auksionlar oʻtkazish, birja operatsiyalarini amalga oshirish va tashqi iqtisodiyot bankida valyuta schyotlariga ega boʻlish;

ish haqi, moddiy yordam, isteʼmolchilarni taʼminlashda yuqori koʻrsatkichlarga erishgan tarmoq xodimlarini mukofotlash va taqdirlash fondlarini tuzish, lavozimlar roʻyxatini, xodimlarning maoshlari va stavkalarini, tasarrufidagi korxonalar va tashkilotlarni boshqarish tuzilmasini tasdiqlash;

tarmoqning moddiy-texnika negizini va ijtimoiy sohasini rivojlantirish, fan-texnika taraqqiyotini joriy qilish, past rentabelli korxonalar va tashkilotlarga moliyaviy yordam berish, oʻz shaxsiy yordamchi xoʻjaliklarini barpo etayotgan, oʻziga uy qurayotgan tarmoq xodimlariga va boshqa ehtiyojlar uchun kredit berish maqsadida isteʼmol va jamgʻarma fondlarini, sugʻurta fondlarini tashkil etish;

ijtimoiy rivojlanish, markaziy apparat, tizimning korxonalari va tarkibiy boʻlinmalari xodimlarining uy-joy-maishiy sharoitlarini yaxshilash tadbirlarini amalga oshirish;

Qoʻmita belgilangan tartibda jumhuriyatdan tashqarida, shuningdek xorijiy mamlakatlar va oʻz vakolatxonalarini ochishi mumkin.

7. “Uzselxozsnabremont” tizimida moliyaviy taʼminlash asoslari:

qoʻmitaning markaziy apparati “Karakalpakselxozsnabremont”, “Oblselxozsnabremont” tashkilotlari hamda qoʻmita tasarrufidagi boshqa korxonalar va tashkilotlar shartnoma asosida ajratadigan mablagʻlar hisobiga saqlanadi;

dehqonchilik-jamoat kompleksini moddiy-texnikaviy taʼminlash va muhandislik xizmati koʻrsatishni tashkil etishning yangi shakl va usullarini ishlab chiqish va joriy qilish uchun qoʻmita huzurida 30 foizgacha amortizatsiya ajratmalari hisobidan korxonalar va tashkilotlar tomonidan shartnoma asosida beriladigan mablagʻlar evaziga renovatsiya fondi tuziladi;

ustav fondi, renovatsiya fondi, valyuta fondi, budjet va boshqa ajratmalar, shuningdek qoʻmita tomonidan hosil qilinadigan boshqa pul va moddiy mablagʻlar “Uzselxozsnabremont”ning mol-mulkini tashkil etadi;

qoʻmitaning ustav fondi qatnashuvchi korxonalarning kirish badallaridan tashkil topadi. Ustav fondi va kirish badallarining miqdori har bir qatnashuvchi uchun Qoʻmita Kengashi qarori bilan belgilanadi;

valyuta, markazlashgan va boshqa fondlarni barpo etish uchun yillik maqsadli ajratmalar va ulardan foydalanish tartibini Qoʻmita Kengashi belgilaydi;

qoʻmitaning mol-mulkidan foydalanish va uning moliya-xoʻjalik faoliyatini nazorat qilish Qoʻmita Kengashi tuzadigan taftish komissiyasi tomonidan amalga oshiriladi.

Qoʻmitaning va uning tarkibiga kiruvchi korxonalarning moliya-xoʻjalik faoliyatini taftish qilish yiliga kamida bir marta oʻtkaziladi.

8. “Uzselxozsnabremont”ni boshqarish oʻz-oʻzini boshqarish, keng demokratiya, oshkoralik, faoliyatga taalluqli barcha masalalarni hal qilish Qoʻmita boʻlinmalari vakillarining faol qatnashuvi asosida amalga oshiriladi.

Tizimning paychi korxonalari va tashkilotlari vakillarining konferensiyasi (yigʻilishi) Qoʻmitani boshqarishning yuqori organi hisoblanadi.

Konferensiya Qoʻmitaning rahbar organlarini, shu jumladan, “Uzselxozsnabremont” Kengashini va “Uzselxozsnabremont” raisini hamda taftish komissiyasini saylaydi, rahbariyat va taftish komissiyasining oʻz ishi toʻgʻrisidagi hisobotlarini eshitadi, iqtisodiy va ijtimoiy rivojlanish faoliyati dasturini ishlab chiqadi, Qoʻmitani qayta tashkil etish va faoliyatini toʻxtatish hamda uning tarkibidan chiqish masalalarini hal qiladi.

Navbatdagi konferensiyalar Qoʻmita Kengashi tomonidan ikki yilda bir marta chaqiriladi. Konferensiyaga delegatlar tizimning xoʻjalik hisobidagi korxonalari va tashkilotlarida, Qoʻmita markaziy apparatining boʻlinmalarida saylanadi.

Konferensiyada koʻrib chiqiladigan masalalar Kengash va taftish komissiyasi tomonidan kiritiladi.

Konferensiya delegatlarning kamida 2/3 qismi qatnashganda masalalarni hal qilishga haqlidir. Delegatlikka saylanmagan Kengash va taftish komissiyasi aʼzolari uning ishida maslahat ovozi berish huquqi bilan qatnashadilar.

Konferensiyalar oʻrtasidagi davrlarda tizimni boshqarish vazifasini konferensiyaga hisob beruvchi Kengash amalga oshiradi.

Qoʻmita Kengashi Qoʻmita hayʼati tarkibini tuzadi, Qoʻmita faoliyati masalalarini hal qiladi, konferensiya vakolatiga kiruvchi masalalar bundan mustasnodir. Qoʻmita Kengashi majlislari hayʼat tomonidan, zaruratga qarab, ammo yiliga kamida ikki marta chaqiriladi.

Hayʼat Qoʻmita Kengashining ijro qiluvchi-boshqaruvchi organi hisoblanadi, joriy tashkiliy, moliya-xoʻjalik va ijtimoiy faoliyatni yoʻnaltirib boradi, uning majlislari zaruratga qarab, ammo oyiga kamida bir marta oʻtkaziladi. Hayʼat oʻz tarkibidagilarning yarmidan koʻpi majlisda qatnashgandagina masalalarni hal qilishga haqlidir, u yiliga kamida bir marta Kengash oldida hisob beradi.

Taftish komissiyasi oʻz aʼzolari orasidan komissiya raisini, uning oʻrinbosarini saylaydi, bir shaxsning ayni bir vaqtda hayʼat tarkibiga va taftish komissiyasiga saylanishiga yoʻl qoʻymaydi hamda oʻz ishida Qoʻmita toʻgʻrisidagi Nizomga va taftish komissiyasi toʻgʻrisidagi Nizomga amal qiladi.

“Uzselxozsnabremont”ga konferensiyada saylanadigan va Oʻzbekiston SSJ Prezidenti huzuridagi Vazirlar Mahkamasi tasdiqlaydigan Rais boshchilik qiladi.

“Uzselxozsnabremont” Raisi:

Kengash, Qoʻmita hayʼati va unga boʻysunuvchi boʻlinmalar faoliyatiga rahbarlik qiladi, Qoʻmitaga yuklatilgan vazifalar va burchlarning bajarilishi uchun shaxsan javob beradi;

qoʻmita vakolatlari doirasida SSJI va Oʻzbekiston SSJ qonunlarini bajarish uchun buyruqlar, farmoyishlar, yoʻriqnomalar chiqaradi, qoʻmita tasarrufidagi tashkilotlar toʻgʻrisidagi nizomlarni (ustavlarni) hamda Kengash (hayʼat)ning Qoʻmitaga qarashli boʻlinmalarni tuzishda qayta tashkil etish va tugatish toʻgʻrisidagi qarorlarini tasdiqlaydi;

amaldagi qonunchilikka rioya qilgan holda, belgilangan lavozimlar nomenklaturasiga muvofiq, Qoʻmita apparati va unga boʻysunuvchi boʻlinmalar xodimlarini ishga tayinlaydi va ishdan boʻshatadi;

“Uzselxozsnabremont” nomidan ishonchnomalar beradi, banklarda schyotlar ochadi, amaldagi qonunchilikka muvofiq qoʻmitaning mol-mulki va mablagʻlarini tasarruf etadi.

“Uzselxozsnabremont” Raisi tasdiqlangan xodimlar soni doirasida, “Uzselxozsnabremont” Kengashi tasdiqlagan xarajatlar smetasiga muvofiq, Qoʻmita Markaziy apparati tuzilishini va lavozimlar roʻyxatini tasdiqlaydi.

SSSR Ministrlar Sovetining 1989-yil 29-sentabrdagi 803-son va Oʻzbekiston SSR Ministrlar Sovetining 1989-yil 28-oktabrdagi 355-son qarorlarida belgilangan mehnatga haq toʻlash va mukofotlash shartlari “Uzselxozsnabremont” markaziy apparati xodimlariga ham taalluqlidir.

“Uzselxozsnabremont” toʻgʻrisidagi Nizom taʼsischilarning konferensiyasida qabul qilinadi va Oʻzbekiston SSJ Prezidenti huzuridagi Vazirlar Mahkamasi tomonidan, tarkibiy boʻlinmalari toʻgʻrisidagi nizomlar esa Qoʻmita Raisi tomonidan tasdiqlanadi.