1998-yil paxta hosili o‘z vaqtida va sifatli yig‘ishtirib olinishini ta’minlash, paxta mahsuloti hajmlarini ko‘paytirish va sifatini yaxshilashda qishloq xo‘jaligi xodimlarining moddiy manfaatdorligini oshirish maqsadida Vazirlar Mahkamasi qaror qiladi:

1. Paxta yig‘im-terimi mavsumini uyushqoqlik bilan o‘tkazishga doir masalalarni tezkorlik bilan hal etish uchun 1-ilovaga muvofiq tarkibda Respublika komissiyasi tuzilsin.

2. Qoraqalpog‘iston Respublikasi Vazirlar Kengashi, viloyatlar va tumanlar hokimliklari, “O‘zqishloqxo‘jalikta’minottuzatish” davlat-kooperativ qo‘mitasi, Qishloq va suv xo‘jaligi vazirligi, “O‘zdavpaxtasanoatsotish” uyushmasi va “O‘zqishloqxo‘jalikmashxolding” kompaniyasi xo‘jaliklarning yig‘im-terimga tayyorligini puxta o‘rganib chiqsinlar va moddiy-texnika bazaning yig‘im-terimga va paxta tayyorlashga 1-sentabrgacha tayyorlab qo‘yilishini va yig‘im-terim mavsumi qisqa muddatlarda o‘tkazilishini ta’minlovchi qo‘shimcha chora-tadbirlar ko‘rsinlar.

3. Paxta yetishtirish va 1998-yil hosilidan paxta tolasi davlat xaridi hajmi Vazirlar Mahkamasining “1998-yilda yetishtiriladigan paxta xom ashyosi uchun avans berish to‘g‘risida” 1998-yil 4-fevraldagi 57-son qaroriga muvofiq belgilanganligi ma’lumot uchun qabul qilinsin.

4. 1998-yil hosili paxta xom ashyosiga o‘rtacha xarid narxlari xarid bozorida paxta tolasiga narx konyunkturasidan kelib chiqib paxtani qayta ishlash va tolani transportda tashish xarajatlarini hisobga olib 1 tonnasi uchun 24 300 so‘m miqdorida belgilansin.

O‘zbekiston Respublikasi Moliya vazirligi 1998-yil hosili paxta xom ashyosining yalpi xarid narxlari preyskurantini bir hafta muddatda ishlab chiqsin hamda manfaatdor vazirliklar va idoralarga yetkazsin.

“O‘zdavpaxtasanoatsotish” uyushmasi topshirilgan paxta xom ashyosi uchun xo‘jaliklar bilan uning qiymatining 90 foizi hisobidan kelib chiqib hisob-kitob qilsin, uzil-kesil hisob-kitoblar qayta ishlash yakunlari bo‘yicha qilinadi.

5. Hosilni yig‘ishtirib olishda moddiy rag‘batlantirishni kuchaytirish maqsadida xo‘jaliklarga paxta terganlik uchun quyidagi chegaralangan miqdorlarda haq to‘lash tavsiya etilsin:

ikki qatorli vertikal shpindelli paxta terish mashinasida terilgan konditsion og‘irligi 1 tonna bo‘lgan paxta uchun — kamida 135 so‘m, to‘rt qatorli mashinada terilganda — 85 so‘m, ikki qatorli gorizontal shpindelli mashinada terilganda — kamida 45 so‘m;

qo‘lda terilgan 1 kilogramm o‘rta tolali paxta uchun — kamida 5 so‘m, ingichka tolali paxta uchun kamida 6,5 so‘m.

Yig‘im-terim ishlarida band bo‘lganlar bilan paxta tayyorlash to‘g‘risidagi statistika ma’lumotlariga muvofiq har besh kunda hisob-kitob qilinsin.

Xo‘jaliklar rahbarlarining e’tibori yuqori navli paxta terib olinishi uchun terimchilarni rag‘batlantirishni nazarda tutgan holda yig‘im-terim mavsumining dastlabki kunlaridan boshlab paxta terimi uchun eng yuqori haq belgilanishi zarurligiga qaratilsin.

Pul-kredit siyosati bo‘yicha respublika komissiyasi (Mullajonov) agrosanoat kompleksida mehnatga haq to‘lashning bazaviy darajasini mazkur bandga muvofiq qayta ko‘rib chiqsin.

6. Markaziy bank, “Paxta-bank”, “O‘zsanoatqurilishbank”, “O‘ztadbirkorbank”, “Mevasabzavotbank” terimchilar va paxta terish mashinalarining mexanik-haydovchilari bilan, shuningdek paxtani yuklash, tushirish, tayyorlash, transportda tashish va joylashtirish hamda ishlov berish, paxta terish texnikasiga texnik xizmat ko‘rsatish va tuzatish bilan band bo‘lgan xodimlar bilan mehnatga haq to‘lashning idora ichki normativlari bo‘yicha o‘z vaqtida hisob-kitob qilish uchun xo‘jaliklarni, mashina-traktor parklarini va tayyorlov punktlarini, paxta tozalash zavodlarini naqd pul bilan ta’minlasinlar.

7. O‘zbekiston Respublikasi Qishloq va suv xo‘jaligi vazirligi (Bobojonov), Qoraqalpog‘iston Respublikasi Vazirlar Kengashi, viloyatlar va tumanlar hokimliklari g‘o‘za bargini to‘kish 2-ilovaga muvofiq hajmlarda va muddatlarda o‘tkazilishini ta’minlasinlar.

“O‘zbekiston havo yo‘llari” milliy aviakompaniyasi (Ro‘zmetov) O‘zbekiston Respublikasi Qishloq va suv xo‘jaligi vazirligi hamda “O‘zagrokimyota’minot” davlat-aksiyadorlik birlashmasining buyurtmanomalari bo‘yicha g‘o‘za bargini to‘kish uchun zarur miqdorda samolyotlar va vertolyotlar ajratsin.

8. “O‘zqishloqxo‘jalikmash-xolding” xolding kompaniyasi (Matchonov), “O‘zqishloqxo‘jalikta’minottuzatish” davlat-kooperativ qo‘mitasi (Olimjonov), O‘zbekiston Respublikasi Qishloq va suv xo‘jaligi vazirligi (Bobojonov), Qoraqalpog‘iston Respublikasi Vazirlar Kengashi, viloyatlar hokimliklari:

shu yil 10-sentabrgacha mashinalarni traktorlarga tirkagan holda, paxta terish texnikasini, yuklash-transportda tashish vositalarini to‘liq tayyor holga keltirsinlar, terish-transport otryadlarini mexanizatorlar bilan butlasinlar. Dvigatellar, uzellar va agregatlarni, boshqa zarur materiallarni almashtirish fondlari tashkil etsinlar. Paxtani mashinada terishni tashkil etish va o‘tkazish O‘zbekiston Respublikasi Qishloq va suv xo‘jaligi vazirligining tavsiyalariga muvofiq amalga oshirilsin;

paxta terish mashinalarini paxta yig‘im-terimiga 3-ilovaga muvofiq miqdorlarda chiqarsinlar;

paxta terish mashinalaridan unumli foydalanish maqsadida ularni terim-transport otryadlari tarkibida jamlasinlar va ishlashini tashkil etsinlar.

9. “O‘zqishloqxo‘jalikmash-xolding” xolding kompaniyasi (Matchonov) paxta yig‘im-terimi mavsumi boshlanishiga qadar 500 ta vertikal shpindelli, 141 ta gorizontal shpindelli paxta terish mashinasi, shuningdek “O‘zqishloqxo‘jalikta’minottuzatish” davlat-kooperativ qo‘mitasi tashkilotlari bilan tuzilgan shartnomalarga muvofiq traktorlar, pritseplar, ko‘rak terish mashinalari, ko‘sak chuviydigan mashinalar va ehtiyot qismlar yetkazib berilishini ta’minlasin.

“O‘zqishloqxo‘jalikta’minottuzatish” davlat-kooperativ qo‘mitasi “Keys-2022” gorizontal shpindelli paxta terish mashinalari qiymatini “O‘z Keysmash” qo‘shma korxonasiga to‘lasin.

10. O‘zbekiston Respublikasi Qishloq va suv xo‘jaligi vazirligi, “O‘zqishloqxo‘jalikta’minottuzatish” davlat-kooperativ qo‘mitasi Jizzax va Sirdaryo viloyatlari hokimliklari bilan birgalikda Farg‘ona vodiysi viloyatlaridan hosilni yig‘ib-terib olishga paxta terish texnikasi va mehnat resurslarini safarbar qilish yuzasidan shartnomalar tuzilishini tashkil etsinlar.

12. “O‘zqishloqxo‘jalikmash-xolding” xolding kompaniyasi va “O‘zqishloqxo‘jalikta’minottuzatish” davlat-kooperativ qo‘mitasi paxta terish texnikasini mavsumga tayyorlashni tugallashda xo‘jaliklarga va mashina-traktor parklariga texnikaviy yordam ko‘rsatish hamda ularning uzluksiz ishlashini ta’minlash uchun sanoat korxonalarini viloyatlarga 4-ilovaga muvofiq biriktirsinlar.

13. “O‘zdavneftmahsulot” birlashmasi (Tojiyev) yonilg‘i-moylash materiallari, “O‘zkimyosanoat” uyushmasi (Yusupbekov) esa defoliantlar 1998-yil sentabr — noyabr oylarida xo‘jaliklarga, mashina-traktor parklariga va paxta tozalash korxonalariga yig‘im-terim ishlarini, tayyorlov punktlarida paxtaga ishlov berishni, kuzga shudgorlashni va boshoqli don ekishni uzluksiz o‘tkazish uchun zarur bo‘lgan hajmlarda, ular qiymatining 15 foizini oldindan undirmagan holda, hisob-kitoblarni paxta xom ashyosining paxta tozalash zavodlariga sotilishiga qarab birinchi navbatda amalga oshirish sharti bilan, yetkazib berilishini ta’minlasin.

“O‘zbekiston temir yo‘llari” davlat-aksiyadorlik kompaniyasi (Ermetov) neft, gaz kondensati va neft mahsulotlari ular qiymatining 15 foizi oldindan undirilmagan holda yetkazib berilishini ta’minlasin hamda 1998-yil sentabr — dekabr oylari davrida “O‘zbekneftgaz” milliy koporatsiyasi korxonalariga penya hisoblamasin.

14. O‘zbekbirlashuv, “O‘zbeksavdo” kompaniyasi, “Yog‘moytamakisanoat” uyushmasi, “O‘zdonmahsulot” korporatsiyasi qishloq aholisini va paxta terimi qatnashchilarini oziq-ovqat mahsulotlari bilan ta’minlash masalalarini o‘z vaqtida hal etsinlar, joylarda ko‘chma savdo tashkil etsinlar.

15. O‘zbekiston Respublikasi Sog‘liqni saqlash vazirligi paxta yig‘im-terimida band bo‘lgan xodimlarga tibbiy xizmat ko‘rsatish chora-tadbirlarini belgilasin.

16. O‘zbekiston Respublikasi Madaniyat ishlari vazirligi hosilni yig‘ishtirib olish davrida terimchilarga madaniy xizmat ko‘rsatishni tashkil etsin, san’at va adabiyot ustalarining xo‘jaliklarga borishlarini nazarda tutsin.

17. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari I.H. Jo‘rabekov zimmasiga yuklansin.