Oʻzbekiston Respublikasi “Davlat bojxona xizmati toʻgʻrisida”gi Qonunining (Oʻzbekiston Respublikasi Oliy Majlisining Axborotnomasi, 1997-y., 9-son, 230-modda) 6-moddasi va Oʻzbekiston Respublikasi Vazirlar Mahkamasining 2013-yil 13-apreldagi 106-son “Oʻzbekiston Respublikasida tovarlar va transport vositalarini vaqtinchalik chetdan olib kelish (chetga olib chiqish) shartlari toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2013-y., 16-son, 217-modda) muvofiq Oʻzbekiston Respublikasi Davlat bojxona qoʻmitasi va Ichki ishlar vazirligi qaror qiladilar:

1. Oʻzbekiston Respublikasi Davlat bojxona qoʻmitasi va Ichki ishlar vazirligining 2010-yil 28-oktabrdagi 01-02/12-8, 20-son “Oʻzbekiston Respublikasi hududiga olib kirilayotgan transport vositalarini bojxona rasmiylashtiruvidan oʻtkazish va Oʻzbekiston Respublikasi Ichki ishlar vazirligi hududiy Davlat yoʻl harakati xavfsizligi xizmati organlarida roʻyxatga olish tartibi toʻgʻrisidagi nizomni tasdiqlash haqida”gi qaroriga (roʻyxat raqami 2156, 2010-yil 19-noyabr) (Oʻzbekiston Respublikasi qonun hujjatlari toʻplami, 2010-y., 47-son, 439-modda) ilovaga muvofiq oʻzgartirish va qoʻshimchalar kiritilsin.

2. Mazkur qaror rasmiy eʼlon qilingan kundan eʼtiboran kuchga kiradi.

1. Qarorda:

a) nomi quyidagi tahrirda bayon etilsin:

“Bojxona chegarasidan olib oʻtilayotgan avtotransport vositalarini bojxona rasmiylashtiruvidan oʻtkazish tartibi toʻgʻrisida nizomni tasdiqlash haqida”;

b) 1-band quyidagi tahrirda bayon etilsin:

“1. Bojxona chegarasidan olib oʻtilayotgan avtotransport vositalarini bojxona rasmiylashtiruvidan oʻtkazish tartibi toʻgʻrisida nizom ilovaga muvofiq tasdiqlansin.”.

2. Nizomda:

a) nomi quyidagi tahrirda bayon etilsin:

“Bojxona chegarasidan olib oʻtilayotgan avtotransport vositalarini bojxona rasmiylashtiruvidan oʻtkazish tartibi toʻgʻrisida nizom”;

b) muqaddima quyidagi tahrirda bayon etilsin:

“Mazkur Nizom Oʻzbekiston Respublikasi Bojxona kodeksiga (Oʻzbekiston Respublikasi Oliy Majlisining Axborotnomasi, 1998-y., 2-son, 36-modda), Oʻzbekiston Respublikasi “Davlat bojxona xizmati toʻgʻrisida”gi Qonunining (Oʻzbekiston Respublikasi Oliy Majlisining Axborotnomasi, 1997-y., 9-son, 230-modda) 6-moddasiga, Oʻzbekiston Respublikasi Vazirlar Mahkamasining 1996-yil 21-noyabrdagi 408-son “Xorijiy fuqarolarning va fuqaroligi boʻlmagan shaxslarning Oʻzbekiston Respublikasiga kelishlari, ketishlari, bu erda boʻlishlari va tranzit oʻtishlari tartibi toʻgʻrisida”gi, 1997-yil 26-maydagi 256-son “Avtomototransport vositalarini roʻyxatdan oʻtkazish, qayta roʻyxatdan oʻtkazish va ularning hisobini olib borish, milliy davlat raqami belgilarini berish va ularni almashtirish ishlarini tartibga solish haqida”gi va 2013-yil 13-apreldagi 106-son “Oʻzbekiston Respublikasida tovarlar va transport vositalarini vaqtinchalik chetdan olib kelish (chetga olib chiqish) shartlari toʻgʻrisida”gi (Oʻzbekiston Respublikasi qonun hujjatlari toʻplami, 2013-y., 16-son, 217-modda) qarorlariga muvofiq bojxona chegarasidan olib oʻtilayotgan avtotransport vositalarini bojxona rasmiylashtiruvidan oʻtkazish tartibini belgilaydi.”;

v) 1-band quyidagi tahrirda bayon etilsin:

“1. Avtotransport vositalari bojxona chegarasidan olib oʻtilayotganda Oʻzbekiston Respublikasi Davlat bojxona qoʻmitasining Qoraqalpogʻiston Respublikasi, viloyatlar va Toshkent shahri boʻyicha boshqarmalari va “Toshkent-AERO” ixtisoslashtirilgan bojxona kompleksi (keyingi oʻrinlarda davlat bojxona xizmatining hududiy organlari deb yuritiladi) bojxona postlarida bojxona rasmiylashtiruvidan oʻtkaziladi.”;

g) 2-bandda:

ikkinchi — yettinchi xatboshilar quyidagi tahrirda bayon etilsin:

“avtotransport vositalari — yoʻlovchilar, bagaj, yuklar tashishga hamda maxsus ishlarni bajarishga moʻljallangan avtomobillar, shatakchi avtomobillar, tirkama va yarim tirkamalar hamda mototransport vositalari;

tovar sifatida olib kirilayotgan avtotransport vositalari — xorijiy davlatlarning roʻyxatga olish idoralarida roʻyxatdan chiqarilgan yoki roʻyxatida boʻlmagan va Oʻzbekiston Respublikasi hududiga olib kirilayotgan avtotransport vositalari;

xorijiy avtotransport vositalari — xorijiy davlatlarning roʻyxatga olish idoralarida roʻyxatda turgan va Oʻzbekiston Respublikasi hududiga:

chet el fuqarolari va Oʻzbekiston Respublikasi hududida doimiy yashash joyiga ega boʻlmagan fuqaroligi boʻlmagan shaxslarning shaxsiy ehtiyojlarini qondirish;

yuklar va yoʻlovchilarni xalqaro tashish maqsadlarida vaqtincha olib kiriladigan avtotransport vositalari;

avtotransport vositasining egasi — avtotransport vositasining mulkdori yoki qonun hujjatlarida belgilangan asoslar va doirada avtotransport vositasiga egalik qiluvchi yoki undan foydalanuvchi yoxud uni tasarruf etuvchi fuqaro yoki yuridik shaxs;”;

quyidagi mazmundagi xatboshilar bilan toʻldirilsin:

tovar sifatida olib chiqilayotgan avtotransport vositalari — Oʻzbekiston Respublikasi Ichki ishlar vazirligining Davlat yoʻl harakati xavfsizligi xizmatining (keyingi oʻrinlarda DYHXX deb yuritiladi) hududiy organlarida roʻyxatdan chiqarilgan yoki roʻyxatida boʻlmagan xorijiy davlatga olib chiqilayotgan avtotransport vositalari;

tovar sifatida tranzit olib oʻtilayotgan avtotransport vositalari — xorijiy davlatlarning roʻyxatga olish idoralarida roʻyxatdan chiqarilgan yoki roʻyxatida boʻlmagan xorijiy davlatga Oʻzbekiston Respublikasi hududi orqali tranzit olib oʻtilayotgan avtotransport vositalari;

Oʻzbekiston Respublikasi avtotransport vositalari — DYHXXning hududiy organlarida roʻyxatda turgan va xorijiy davlatlar hududiga:

Oʻzbekiston Respublikasi fuqarolari va Oʻzbekiston Respublikasi hududida doimiy yashash joyiga ega boʻlgan fuqaroligi boʻlmagan shaxslarning shaxsiy ehtiyojlarini qondirish;

yuklar va yoʻlovchilarni xalqaro tashish maqsadlarida vaqtincha olib chiqiladigan avtotransport vositalari.”;

d) quyidagi mazmundagi 2¹-band bilan toʻldirilsin:

“2¹. Mazkur Nizom talablari quyidagilarga tatbiq qilinmaydi:

anklavlarda roʻyxatga olingan shaxslar tomonidan aynan shu erda foydalanish maqsadida olib kirilayotgan/chiqilayotgan avtotransport vositalariga;

Oʻzbekiston Respublikasi hududida joylashgan boshqa davlatlarning obyektlarida faoliyat koʻrsatuvchi shaxslar boshqaruvidagi avtotransport vositalariga;

xorijiy davlat hududida joylashgan Oʻzbekiston Respublikasining obyektlarida faoliyat koʻrsatuvchi shaxslar boshqaruvidagi avtotransport vositalariga;

xorijiy davlatlar diplomatik va konsullik vakolatxonalarining hamda ularga tenglashtirilgan vakolatxonalarning Oʻzbekiston Respublikasi hududida normal faoliyat koʻrsatishini taʼminlash uchun moʻljallangan, shuningdek ushbu vakolatxonalarning diplomatik agentlari hamda maʼmuriy-texnik xodimlari hamda Oʻzbekiston Respublikasi hududida doimiy yashash joyiga ega boʻlmagan ularning oila aʼzolari tomonidan shaxsiy foydalanish uchun olib kelinadigan avtotransport vositalariga.”;

e) II — V boblar quyidagi tahrirda bayon etilsin:

3. Xorijiy avtotransport vositasi Oʻzbekiston Respublikasiga kirishida kirish bojxona posti xodimi tomonidan mazkur Nizomning 1-ilovasida keltirilgan shaklda “Avtotransport vositasini qaytarib olib chiqish toʻgʻrisida majburiyatnoma” rasmiylashtiriladi.

4. Xorijiy avtotransport vositasining kirish va chiqish bojxona postlari oraligʻida tirkamasi yoki yarim tirkamasi almashtirilmaydigan hollarda, unga mazkur Nizomning 1-ilovasida keltirilgan shaklda “Avtotransport vositasini qaytarib olib chiqish toʻgʻrisida majburiyatnoma” rasmiylashtiriladi.

Tirkamasi yoki yarim tirkamasi almashtiriladigan hollarda xorijiy avtotransport vositasining yuk tortgichiga mazkur Nizomning 2-ilovasida, tirkamasiga yoki yarim tirkamasiga mazkur Nizomning 3-ilovasida keltirilgan shaklda “Avtotransport vositasini qaytarib olib chiqish toʻgʻrisida majburiyatnoma” rasmiylashtiriladi.

5. “Avtotransport vositasini qaytarib olib chiqish toʻgʻrisida majburiyatnoma” avtotransport vositasi bojxona bojlari va soliqlardan toʻliq ozod etilgan muddatga rasmiylashtiriladi.

6. “Avtotransport vositasini qaytarib olib chiqish toʻgʻrisida majburiyatnoma”ni rasmiylashtirish uchun xorijiy avtotransport vositasining egasi (haydovchisi) tomonidan taqdim etilgan fuqarolik pasporti, avtotransport vositasini qayd etish guvohnomasi va ogʻzaki maʼlumotlar asos boʻladi.

7. “Avtotransport vositasini qaytarib olib chiqish toʻgʻrisida majburiyatnoma” “Avto” YaAAT dasturi orqali ikki nusxada kirish bojxona posti xodimi tomonidan chop etiladi.

“Avtotransport vositasini qaytarib olib chiqish toʻgʻrisida majburiyatnoma”ning birinchi nusxasi kirish bojxona posti ish yurituvida qoladi, ikkinchi nusxasi esa xorijiy avtotransport vositasining egasiga (haydovchisiga) beriladi.

8. Xorijiy avtotransport vositasining egasi (haydovchisi) “Avtotransport vositasini qaytarib olib chiqish toʻgʻrisida majburiyatnoma”da aks ettirilgan maʼlumotlarni tekshirib chiqadi, toʻgʻriligini oʻz imzosi bilan tasdiqlaydi va avtotransport vositasini belgilangan muddatda Oʻzbekiston Respublikasidan qaytarib olib chiqib ketish majburiyatini oladi.

9. Kirish bojxona posti xodimi oʻz imzosi va shaxsiy muhrini qoʻyish orqali “Avtotransport vositasini qaytarib olib chiqish toʻgʻrisida majburiyatnoma”ni rasmiylashtiradi.

10. Oʻzbekiston Respublikasi hududida xorijiy avtotransport vositasidan foydalanishda uning egasi (haydovchisi) doimiy ravishda oʻzi bilan birga “Avtotransport vositasini qaytarib olib chiqish toʻgʻrisida majburiyatnoma”ni olib yurishi shart.

11. Xorijiy avtotransport vositasi Oʻzbekiston Respublikasidan qaytarib olib chiqilishida uning egasi (haydovchisi) tomonidan chiqish bojxona postiga “Avtotransport vositasini qaytarib olib chiqish toʻgʻrisida majburiyatnoma” taqdim etiladi.

12. Chiqish bojxona posti xodimi oʻz imzosi va shaxsiy muhrini qoʻyish orqali “Avtotransport vositasini qaytarib olib chiqish toʻgʻrisida majburiyatnoma”ni nazoratdan yechadi.

13. Xorijiy avtotransport vositasiga mazkur Nizomning 1-ilovasida keltirilgan shaklda “Avtotransport vositasini qaytarib olib chiqish toʻgʻrisida majburiyatnoma” rasmiylashtirilib, uning tirkamasi yoki yarim tirkamasi respublika hududida almashtiriladigan hollarda “Avtotransport vositasini qaytarib olib chiqish toʻgʻrisida majburiyatnoma” TIF bojxona postida nazoratdan yechilib, mazkur Nizomning 2 va 3-ilovalarida keltirilgan shaklda yangi “Avtotransport vositasini qaytarib olib chiqish toʻgʻrisida majburiyatnoma” rasmiylashtiriladi.

14. Avval rasmiylashtirilgan va nazoratda qolib ketgan “Avtotransport vositasini qaytarib olib chiqish toʻgʻrisida majburiyatnoma”si mavjud boʻlgan avtotransport vositasiga masalaga oydinlik kiritilgunga qadar yangi “Avtotransport vositasini qaytarib olib chiqish toʻgʻrisida majburiyatnoma” rasmiylashtirilmaydi va nazoratdan yechilmaydi.

15. Xorijiy avtotransport vositasi Oʻzbekiston Respublikasi hududida bir yil mobaynida umumiy hisobda uch oygacha bojxona bojlari va soliqlardan toʻliq ozod etilgan holda boʻlishi mumkin, xalqaro yuk va yoʻlovchi tashishda qoʻllaniladigan avtotransport vositasi bundan mustasno.

Xalqaro yuk va yoʻlovchi tashishda qoʻllaniladigan xorijiy avtotransport vositasi Oʻzbekiston Respublikasi hududida transport operatsiyalarini amalga oshirish muddatida, lekin uch oydan koʻp boʻlmagan muddatga bojxona bojlari va soliqlardan toʻliq ozod qilgan holda boʻlishi mumkin.

16. Bir yil davomida bojxona bojlari va soliqlardan toʻliq ozod etilgan muddat oʻtgandan soʻng xorijiy avtotransport vositasini Oʻzbekiston Respublikasiga olib kirilishida ushbu avtotransport vositasiga tovar sifatida olib kirilayotgan deb qaraladi.

17. Mazkur Nizomning 15-bandida koʻrsatilgan muddatlar tugagandan soʻng, xorijiy avtotransport vositasi Oʻzbekiston Respublikasi hududidan olib chiqib ketilishi yoki davriy bojxona toʻlovlari toʻlangan holda “vaqtincha olib kirish” rejimiga yoxud boshqa bojxona rejimiga rasmiylashtirilishi lozim.

18. Mazkur Nizomning 17-bandi talablari bajarilmagan hollarda xorijiy avtotransport vositasini qaytarib olib chiqib ketish muddati oʻtgan har bir kun uchun dvigatel hajmining har kub. santimetridan — 0,01 AQSh dollari miqdorida yigʻim undiriladi, xalqaro yuk va yoʻlovchi tashishda qoʻllaniladigan avtotransport vositasi bundan mustasno.

19. Yigʻim:

AQSh dollarida hisoblanadi;

milliy valyuta — soʻmda Oʻzbekiston Respublikasi Markaziy banki tomonidan ularni toʻlash kunida belgilangan kurs boʻyicha toʻlanadi;

bojxona postida yoki davlat bojxona xizmatining hududiy organlari tomonidan undiriladi hamda belgilangan tartibda Oʻzbekiston Respublikasi Davlat budjetiga oʻtkaziladi;

bank kvitansiyasi asosida kirim qilinadi.

20. Xorijiy avtotransport vositasini olib chiqish muddatini buzganlik uchun tegishli chora koʻrilib, yigʻim toʻliq undirilgunga qadar avtotransport vositasi davlat bojxona xizmatining hududiy organi yoki bojxona posti tomonidan vaqtincha ushlab turiladi. Avtotransport vositasi vaqtincha ushlab turilgan davr uchun yigʻim hisoblanmaydi va undirilmaydi.

Oʻzbekiston Respublikasining vakolatli organlarining qarorlariga asosan avtotransport vositasi yoki uning egasi (haydovchisi) vaqtincha ushlab turilgan davr uchun ham yigʻim undirilmaydi. Bunda bojxona postiga avtotransport vositasi yoki uning egasi (haydovchisi) vakolatli organlar tomonidan ushlab turilgan muddatni tasdiqlovchi tegishli davlat organi tomonidan tasdiqlangan hujjatni taqdim etishi lozim.

21. Belgilangan muddatda respublika hududidan qaytarib olib chiqilmagan xorijiy avtotransport vositalari toʻgʻrisida har oy yakuni boʻyicha keyingi oyning 5-sanasiga qadar qaytarib olib chiqish muddatidan 5 kundan ortiq vaqt oʻtgan holatlar yuzasidan davlat bojxona xizmatining hududiy organlari tomonidan DYHXXning hududiy organlariga avtotransport vositalari va ularni olib kirgan shaxslar boʻyicha tegishli maʼlumotlar taqdim etiladi.

22. Belgilangan muddatda respublika hududidan qaytarib olib chiqilmagan avtotransport vositalari toʻgʻrisida davlat bojxona xizmatining hududiy organlari tomonidan DYHXXning hududiy organlariga taqdim etilgan maʼlumotlar har oy yakuni boʻyicha yangilanib boriladi.

23. DYHXXning hududiy organlari tomonidan davlat bojxona xizmatining hududiy organlari maʼlumotlari asosida respublika hududidan qaytarib olib chiqilmagan xorijiy avtotransport vositalari aniqlangan taqdirda ular boʻyicha qonun hujjatlarida belgilangan choralarni koʻrish uchun uch ish kuni mobaynida davlat bojxona xizmatining hududiy organlarini xabardor qiladilar.

24. Oʻzbekiston Respublikasi hududida “Avtotransport vositasini qaytarib olib chiqish toʻgʻrisida majburiyatnoma” asosida harakatlanayotgan xorijiy avtotransport vositasi Oʻzbekiston Respublikasining vakolatli idoralari tomonidan musodara qilingan hollarda, unga rasmiylashtirilgan “Avtotransport vositasini qaytarib olib chiqish toʻgʻrisida majburiyatnoma” vakolatli organlarning tegishli qarori asosida rasmiylashtirgan bojxona posti tomonidan nazoratdan yechiladi.

25. Oʻzbekiston Respublikasi hududida “Avtotransport vositasini qaytarib olib chiqish toʻgʻrisida majburiyatnoma” asosida harakatlanayotgan xorijiy avtotransport vositasi yengib boʻlmas kuch yoki yoʻl-transport hodisasi yuz berishi natijasida foydalanishga mutlaqo yaroqsiz holga kelganda, unga rasmiylashtirilgan “Avtotransport vositasini qaytarib olib chiqish toʻgʻrisida majburiyatnoma” vakolatli organlarning tegishli hujjatlari asosida majburiyatnoma rasmiylashtirgan bojxona posti tomonidan nazoratdan yechiladi.

26. Oʻzbekiston Respublikasi hududida “Avtotransport vositasini qaytarib olib chiqish toʻgʻrisida majburiyatnoma” asosida harakatlanayotgan xorijiy avtotransport vositasi “erkin muomalaga chiqarish”, “vaqtincha olib kirish” yoxud boshqa bojxona rejimiga rasmiylashtirilganda, unga rasmiylashtirilgan “Avtotransport vositasini qaytarib olib chiqish toʻgʻrisida majburiyatnoma” bojxona yuk deklaratsiyasini (keyingi oʻrinlarda BYuD deb yuritiladi) rasmiylashtirgan TIF bojxona posti tomonidan nazoratdan yechiladi.

27. Agar “Avtotransport vositasini qaytarib olib chiqish toʻgʻrisida majburiyatnoma” yoʻqolgan yoki yaroqsiz holga kelganda dublikat olish uchun avtotransport vositasi egasi (haydovchisi) avtotransport vositasi joylashgan hududdagi davlat bojxona xizmatining hududiy organlariga mazkur Nizomning 6-bandida koʻrsatilgan hujjatlar bilan murojaat qiladi.

28. Davlat bojxona xizmatining hududiy organlari tomonidan “Avto” YaAATdan foydalangan holda oldingi “Avtotransport vositasini qaytarib olib chiqish toʻgʻrisida majburiyatnoma”ga yozilgan tegishli maʼlumotlar va avtotransport vositasini qaytarib olib chiqish muddati tekshiriladi. Avtotransport vositasini qaytarib olib chiqish muddati oʻtib ketganligi aniqlangan taqdirda, davlat bojxona xizmatining hududiy organining mansabdor shaxsi tomonidan qonun hujjatlari asosida tegishli choralar koʻriladi.

29. Koʻrib chiqish yakuni boʻyicha bir ish kuni mobaynida davlat bojxona xizmatining hududiy organlari tomonidan “Avtotransport vositasini qaytarib olib chiqish toʻgʻrisida majburiyatnoma” dublikati beriladi. “Avtotransport vositasini qaytarib olib chiqish toʻgʻrisida majburiyatnoma”ning yuqori oʻng burchagiga “Dublikat” deb yoziladi va davlat bojxona xizmatining hududiy organi boshligʻi yoki uning oʻrinbosari imzosi va boshqarma muhri bilan tasdiqlanadi.

30. Oʻzbekiston Respublikasi avtotransport vositasini Oʻzbekiston Respublikasi hududidan olib chiqishda chiqish bojxona posti xodimi tomonidan mazkur Nizomning 4-ilovasiga muvofiq “Avtotransport vositasini qaytarib olib kirish toʻgʻrisida majburiyatnoma” rasmiylashtiriladi.

31. “Avtotransport vositasini qaytarib olib kirish toʻgʻrisida majburiyatnoma”ni rasmiylashtirish uchun Oʻzbekiston Respublikasi avtotransport vositasi egasi (haydovchisi) tomonidan taqdim etilgan fuqarolik pasporti, avtotransport vositasini qayd etish guvohnomasi va ogʻzaki maʼlumotlar asos boʻladi.

32. “Avtotransport vositasini qaytarib olib kirish toʻgʻrisida majburiyatnoma” “Avto” YaAAT dasturi orqali ikki nusxada chiqish bojxona posti xodimi tomonidan chop etiladi.

“Avtotransport vositasini qaytarib olib kirish toʻgʻrisida majburiyatnoma”ning birinchi nusxasi chiqish bojxona posti ish yurituvida qoladi, ikkinchi nusxasi esa Oʻzbekiston Respublikasi avtotransport vositasi egasiga (haydovchisiga) beriladi.

33. Oʻzbekiston Respublikasi avtotransport vositasi egasi (haydovchisi) “Avtotransport vositasini qaytarib olib kirish toʻgʻrisida majburiyatnoma”da aks ettirilgan maʼlumotlarni tekshirib chiqadi, toʻgʻriligini oʻz imzosi bilan tasdiqlaydi va avtotransport vositasini belgilangan muddatda Oʻzbekiston Respublikasiga qaytarib olib kirish majburiyatini oladi.

34. Chiqish bojxona posti xodimi oʻz imzosi va shaxsiy muhrini qoʻyish orqali “Avtotransport vositasini qaytarib olib kirish toʻgʻrisida majburiyatnoma”ni rasmiylashtiradi.

35. Oʻzbekiston Respublikasi avtotransport vositasi Oʻzbekiston Respublikasiga qaytarib olib kirilishida uning egasi (haydovchisi) tomonidan kirish bojxona postiga “Avtotransport vositasini qaytarib olib kirish toʻgʻrisida majburiyatnoma” taqdim etiladi.

36. Kirish bojxona posti xodimi oʻz imzosi va shaxsiy muhrini qoʻyish orqali “Avtotransport vositasini qaytarib olib kirish toʻgʻrisida majburiyatnoma”ni nazoratdan yechadi.

37. “Avtotransport vositasini qaytarib olib kirish toʻgʻrisida majburiyatnoma” rasmiylashtirilgan Oʻzbekiston Respublikasi avtotransport vositasining yuk tortgichi va tirkama yoki yarim tirkamasi alohida olib kirilgan taqdirda, ushbu haqida rasmiylashtirilgan “Avtotransport vositasini qaytarib olib kirish toʻgʻrisida majburiyatnoma”ga kirish bojxona posti tomonidan tegishli belgi qoʻyiladi. Mazkur holatda “Avtotransport vositasini qaytarib olib kirish toʻgʻrisida majburiyatnoma” Oʻzbekiston Respublikasi avtotransport vositasining yuk tortgichi va tirkama yoki yarim tirkamasi toʻliq olib kirilgandan soʻng nazoratdan yechiladi.

38. Avval rasmiylashtirilgan va nazoratda qolib ketgan “Avtotransport vositasini qaytarib olib kirish toʻgʻrisida majburiyatnoma”si mavjud boʻlgan avtotransport vositasiga masalaga oydinlik kiritilgunga qadar yangi “Avtotransport vositasini qaytarib olib kirish toʻgʻrisida majburiyatnoma” rasmiylashtirilmaydi va nazoratdan yechilmaydi.

39. Oʻzbekiston Respublikasi avtotransport vositasi xorijiy davlat hududida bir yil mobaynida umumiy hisobda uch oygacha bojxona bojlari va soliqlardan toʻliq ozod etilgan holda boʻlishi mumkin, xalqaro yuk va yoʻlovchi tashishda qoʻllaniladigan avtotransport vositasi bundan mustasno.

Xalqaro yuk va yoʻlovchi tashishda qoʻllaniladigan Oʻzbekiston Respublikasi avtotransport vositasi xorijiy davlat hududida transport operatsiyalarini amalga oshirish muddatida, lekin uch oydan koʻp boʻlmagan muddatga bojxona bojlari va soliqlardan toʻliq ozod etilgan holda boʻlishi mumkin.

40. Bir yil davomida bojxona bojlari va soliqlardan toʻliq ozod etilgan muddat oʻtgandan soʻng Oʻzbekiston Respublikasi avtotransport vositasini xorijiy davlat hududiga olib chiqilishida ushbu avtotransport vositasiga tovar sifatida olib chiqilayotgan deb qaraladi.

41. Mazkur Nizomning 39-bandida koʻrsatilgan muddatlar tugagandan soʻng, Oʻzbekiston Respublikasi avtotransport vositasi Oʻzbekiston Respublikasi hududiga olib kirilishi yoki “vaqtincha olib chiqish” rejimiga yoxud “eksport” bojxona rejimiga rasmiylashtirilishi lozim.

42. Mazkur Nizomning 41-bandi talablari bajarilmagan hollarda Oʻzbekiston Respublikasi avtotransport vositasini qaytarib kirish muddati oʻtgan har bir kun uchun dvigatel hajmining har kub. santimetridan — 0,01 AQSh dollari miqdorida yigʻim undiriladi, xalqaro yuk va yoʻlovchi tashishda qoʻllaniladigan avtotransport vositasi bundan mustasno.

43. Yigʻim:

AQSh dollarida hisoblanadi;

milliy valyuta — soʻmda Oʻzbekiston Respublikasi Markaziy banki tomonidan ularni toʻlash kunida belgilangan kurs boʻyicha toʻlanadi;

bojxona postida yoki davlat bojxona xizmatining hududiy organlari tomonidan undiriladi hamda belgilangan tartibda Oʻzbekiston Respublikasi Davlat budjetiga oʻtkaziladi;

bank kvitansiyasi asosida kirim qilinadi.

44. Oʻzbekiston Respublikasi avtotransport vositasini olib kirish muddatini buzganlik uchun tegishli chora koʻrilib, yigʻim toʻliq undirilgunga qadar avtotransport vositasi davlat bojxona xizmatining hududiy organi tomonidan vaqtincha ushlab turiladi. Avtotransport vositasi vaqtincha ushlab turilgan davr uchun yigʻim hisoblanmaydi va undirilmaydi.

Xorijiy davlatning vakolatli organlarining qarorlariga asosan avtotransport vositasi yoki uning egasi (haydovchisi) vaqtincha ushlab turilgan davr uchun ham yigʻim undirilmaydi. Bunda bojxona postiga avtotransport vositasi yoki uning egasi (haydovchisi) vakolatli organlar tomonidan ushlab turilgan muddatni tasdiqlovchi tegishli davlat organi tomonidan tasdiqlangan hujjat taqdim etilishi lozim.

45. Belgilangan muddatda respublika hududiga qaytarib olib kirilmagan Oʻzbekiston Respublikasi avtotransport vositalari toʻgʻrisida har oy yakuni boʻyicha keyingi oyning 5-sanasiga qadar qaytarib olib kirish muddatidan 5 kundan ortiq vaqt oʻtgan holatlar yuzasidan davlat bojxona xizmatining hududiy organlari tomonidan DYHXXning hududiy organlariga avtotransport vositalari va ularni olib chiqqan shaxslar boʻyicha tegishli maʼlumotlar taqdim etiladi.

46. Belgilangan muddatda respublika hududiga qaytarib olib kirilmagan avtotransport vositalari toʻgʻrisida davlat bojxona xizmatining hududiy organlari tomonidan DYHXXning hududiy organlariga taqdim etilgan maʼlumotlar har oy yakuni boʻyicha yangilanib boriladi.

47. DYHXXning hududiy organlari tomonidan davlat bojxona xizmatining hududiy organlari maʼlumotlari asosida respublika hududiga qaytarib olib kirilmagan Oʻzbekiston Respublikasi avtotransport vositalari aniqlangan taqdirda ular boʻyicha qonun hujjatlarida belgilangan choralarni koʻrish uchun uch ish kuni mobaynida davlat bojxona xizmatining hududiy organlarini xabardor qiladilar.

48. Xorijiy davlat hududida “Avtotransport vositasini qaytarib olib kirish toʻgʻrisida majburiyatnoma” asosida harakatlanayotgan Oʻzbekiston Respublikasi avtotransport vositasi xorijiy davlatning vakolatli idoralari tomonidan musodara qilingan va yengib boʻlmas kuch yoki yoʻl-transport hodisasi yuz berishi natijasida foydalanishga mutlaqo yaroqsiz holga kelgan hollarda, unga rasmiylashtirilgan “Avtotransport vositasini qaytarib olib kirish toʻgʻrisida majburiyatnoma” Oʻzbekiston Respublikasining diplomatiya vakolatxonalari yoki konsullik muassasalari tomonidan belgilangan tartibda tasdiqlangan xorijiy davlatning vakolatli organlarining tegishli hujjatlari asosida majburiyatnoma rasmiylashtirgan bojxona posti tomonidan nazoratdan yechiladi.

49. Xorijiy davlat hududida “Avtotransport vositasini qaytarib olib kirish toʻgʻrisida majburiyatnoma” asosida harakatlanayotgan Oʻzbekiston Respublikasi avtotransport vositasi “eksport” yoki “vaqtincha olib chiqish” bojxona rejimiga rasmiylashtirilganda, unga rasmiylashtirilgan “Avtotransport vositasini qaytarib olib chiqish toʻgʻrisida majburiyatnoma” BYuD rasmiylashtirgan TIF bojxona posti tomonidan nazoratdan yechiladi.

50. Tovar sifatida Oʻzbekiston Respublikasiga olib kirilayotgan va tranzit olib oʻtilayotgan avtotransport vositasiga “Avtotransport vositasini qaytarib olib chiqish toʻgʻrisida majburiyatnoma” rasmiylashtirilmaydi. Uning TIF yoki chiqish bojxona postiga bojxona nazorati ostida yetkazib berilishini nazorat qilish uchun kirish bojxona postida YUYEBNK yoki XYT kitobchasi rasmiylashtiriladi.

51. Avtotransport vositasi jismoniy shaxslar tomonidan tovar sifatida olib kirilganda ularning bojxona rasmiylashtiruvi avtotransport vositasi egasining doimiy yashash joyida, yuridik shaxslar tomonidan olib kirilganda esa faoliyat hududida joylashgan TIF bojxona postida amalga oshiriladi.

52. Tovar sifatida olib kirilgan avtotransport vositasi “erkin muomalaga chiqarish” yoki “vaqtincha olib kirish” bojxona rejimiga rasmiylashtirilgandan soʻng uning egasiga TIF bojxona posti tomonidan ushbu Nizomning 5-ilovasiga muvofiq “Avtotransport vositasini olib kirish guvohnomasi” (keyingi oʻrinlarda “guvohnoma” deb yuritiladi) beriladi.

DYHXXning hududiy organlarida roʻyxatga olinmaydigan avtotransport vositalariga guvohnoma berilmaydi.

53. Guvohnoma qatʼiy hisobda turadigan, himoya darajasiga, seriyaga va tartib raqamiga ega boʻlgan gerbli (maxsus) blankalarda “Davlat belgisi” davlat-ishlab chiqarish birlashmasida tayyorlanadi.

54. Avtotransport vositasini Oʻzbekiston Respublikasi hududiga “erkin muomalaga chiqarish” yoki “vaqtincha olib kirish” bojxona rejimlariga rasmiylashtirgan shaxslar BYuD rasmiylashtirilgan kundan soʻng 10 kun muddat ichida avtotransport vositasini DYHXXning hududiy organlarida roʻyxatdan oʻtkazishlari shart.

55. Roʻyxatdan oʻtkazishda, avtotransport vositasining turi, rusumi, markasi davlat bojxona xizmatining hududiy organi tomonidan berilgan guvohnomada qanday bayon etilgan boʻlsa, aynan shu nom bilan qayd etilishi lozim.

56. Oʻzbekiston Respublikasidan tovar sifatida olib chiqilayotgan avtotransport vositasiga guvohnoma rasmiylashtirilmaydi hamda DYHXXning hududiy organlarida roʻyxatdan chiqarish uchun asos BYuD hisoblanadi.

57. Yuridik va jismoniy shaxslar tomonidan tovar sifatida olib kirilayotgan avtotransport vositalarini DYHXXning hududiy organlarida roʻyxatdan oʻtkazish uchun asos guvohnoma hisoblanadi.

Vakolatli idoralar tomonidan musodara qilingan avtotransport vositalarini DYHXXning hududiy organlarida roʻyxatdan oʻtkazish uchun guvohnoma talab etilmaydi.

“Erkin muomalaga chiqarish” bojxona rejimiga rasmiylashtirilgan avtotransport vositalari uchun berilgan guvohnomalar 5 yil davomida, “vaqtincha olib kirish” bojxona rejimiga rasmiylashtirilgan avtotransport vositalari uchun berilgan guvohnomalar esa vaqtincha olib kirish muddati tugagandan soʻng 3 yil davomida DYHXXning hududiy organlarida saqlanadi.

“Erkin muomalaga chiqarish” bojxona rejimiga rasmiylashtirilgan avtotransport vositalarining guvohnomalarida “avtotransport vositasini oʻzga shaxsga foydalanishga, egalik qilishga berish yoki oʻzgacha ravishda oʻtkazish cheklanadi” soʻzlari qayd etilgan hollarda:

5 yil muddat doirasida avtotransport vositasini oʻzga shaxsga foydalanishga, egalik qilishga berish yoki oʻzgacha ravishda oʻtkazish, BYuDga tegishli oʻzgartirishlar kiritilgandan va yangi guvohnoma rasmiylashtirib berilgandan soʻng amalga oshiriladi;

5 yillik muddat oʻtgandan soʻng, BYuDga oʻzgartirish kiritilmasdan va yangi guvohnoma rasmiylashtirilmasdan qonun hujjatlari asosida avtotransport vositasini oʻzga shaxsga foydalanishga, egalik qilishga berish yoki oʻzgacha ravishda oʻtkazish mumkin.

58. Agar guvohnoma yoʻqolgan yoki yaroqsiz holga kelganda dublikat olish uchun avtotransport vositasi egasi guvohnomaning yoʻqolishi yoki yaroqsiz holga kelishining sabablarini koʻrsatgan holda ushbu guvohnomani bergan TIF bojxona posti boʻysunadigan davlat bojxona xizmatining hududiy organiga yozma ariza bilan murojaat qiladi. Arizaga avtotransport vositasining egasi (haydovchisi) shaxsini tasdiqlovchi hujjat ilova qilinadi.

Guvohnoma dublikatini olish uchun yuridik shaxs tomonidan murojaat qilinganda, murojaatnoma ushbu yuridik shaxsning muhri bilan tasdiqlanadi.

59. Guvohnomaning dublikatini berish toʻgʻrisidagi murojaatnoma kelib tushganda davlat bojxona xizmatining hududiy organi boshligʻi yoki uning oʻrinbosarining topshirigʻiga asosan yoʻqolgan yoki yaroqsiz holga kelgan guvohnomani rasmiylashtirgan TIF bojxona posti tomonidan bir ish kuni mobaynida yangi guvohnoma yozib beriladi. Berilgan guvohnomaning yuqori oʻng burchagida “Dublikat” deb yozilib, yoʻqolgan yoki yaroqsiz holga kelgan guvohnomaning raqami koʻrsatiladi va bojxona postining mansabdor shaxsi imzosi hamda shaxsiy muhri bilan tasdiqlanadi.

Yoʻqolgan guvohnomalar raqamlari boʻyicha davlat bojxona xizmatining hududiy organlari tomonidan yoʻqolganligi aniqlangan kundan soʻng bir ish kuni mobaynida Oʻzbekiston Respublikasi Davlat bojxona qoʻmitasiga maʼlumot yuboriladi. Davlat bojxona xizmatining hududiy organlaridan maʼlumot kelib tushgandan soʻng uch ish kuni mobaynida DYHXXga tegishli maʼlumot yuboriladi.

60. Davlat bojxona xizmatining hududiy organlari DYHXXning hududiy organlari bilan har chorak yakuni boʻyicha erkin muomalaga chiqarilgan hamda vaqtincha olib kirilgan avtotransport vositalari boʻyicha maʼlumotlarni solishtiradilar.

61. Davlat bojxona xizmatining hududiy organi tomonidan BYuD raqami, guvohnoma raqami, avtotransport vositasi rusumi, dvigatel, kuzov va shassi raqamlari, avtotransport vositasi egasi boʻyicha maʼlumotlar roʻyxati har chorak yakunidan soʻng keyingi oyning 15-sanasiga qadar DYHXXning hududiy organlariga taqdim etiladi.

62. DYHXXning hududiy organlari davlat bojxona xizmatining hududiy organlaridan maʼlumot kelib tushgandan soʻng 15 kun muddatda roʻyxatda koʻrsatilgan avtotransport vositalarini DYHXXning hududiy organlarida roʻyxatga olinganligini tekshirib chiqib, natijasi yuzasidan davlat bojxona xizmatining hududiy organiga maʼlumot yuboradi.

63. Davlat bojxona xizmatining hududiy organi tomonidan taqdim etilgan maʼlumotda koʻrsatilgan avtotransport vositasi DYHXXning hududiy organlarida roʻyxatga olinmaganligi aniqlangan taqdirda DYHXXning hududiy organlari tomonidan ushbu avtotransport vositasini qidirib topish choralari koʻriladi.

64. Davlat bojxona xizmatining hududiy organi tomonidan taqdim etilgan roʻyxatda koʻrsatilmagan, lekin DYHXXning hududiy organlarida roʻyxatga olingan xorijdan olib kelingan avtotransport vositalari aniqlangan taqdirda, ushbu avtotransport vositasini respublika hududiga qonuniy olib kirilganligiga aniqlik kiritish maqsadida avtotransport vositasi va uning egasi haqida maʼlumotlar DYHXXning hududiy organlari tomonidan davlat bojxona xizmatining hududiy organlariga taqdim etiladi.

65. Mazkur bob talablari chet el fuqarolari va fuqaroligi boʻlmagan shaxslar tomonidan tovar sifatida olib kirilayotgan avtotransport vositasi uchun ham tatbiq etiladi.

66. Mazkur Nizom talablarini buzishda aybdor shaxslar Oʻzbekiston Respublikasining qonun hujjatlariga muvofiq javobgar boʻladilar.”;

j) VI — VIII-boblar oʻz kuchini yoʻqotgan deb hisoblansin;

z) 1 va 2-ilovalar ushbu oʻzgartirish va qoʻshimchalarning 1 va 2-ilovalariga muvofiq tahrirda bayon etilsin;

i) ushbu oʻzgartirish va qoʻshimchalarning 3, 4 va 5-ilovalariga muvofiq tahrirdagi 3, 4 va 5-ilovalar bilan toʻldirilsin.