“O‘zbekiston Respublikasining Davlat madhiyasi to‘g‘risida”gi O‘zbekiston Respublikasining Qonuni (O‘zbekiston Respublikasi Oliy Kengashining Axborotnomasi, 1993-y., 1-son, 52-modda) va O‘zbekiston Respublikasi Prezidentining 2013-yil 15-iyuldagi PQ-2003-son “Qonunlarning havolaki normalarini amalga oshirishga qaratilgan normativ-huquqiy va boshqa hujjatlarni ishlab chiqish rejalarini tasdiqlash to‘g‘risida”gi qaroriga muvofiq buyuraman:

1. O‘zbekiston Respublikasi hududida respublika va xalqaro sport musobaqalarini o‘tkazish vaqtida O‘zbekiston Respublikasining Davlat madhiyasini ijro etish qoidalari ilovaga muvofiq tasdiqlansin.

2. Mazkur buyruq rasmiy e’lon qilingan kundan e’tiboran kuchga kiradi.

Mazkur Qoidalar “O‘zbekiston Respublikasining Davlat madhiyasi to‘g‘risida”gi O‘zbekiston Respublikasining Qonuni (O‘zbekiston Respublikasi Oliy Kengashining Axborotnomasi, 1993-y., 1-son, 52-modda) va O‘zbekiston Respublikasi Prezidentining 2013-yil 15-iyuldagi PQ-2003-son (O‘zbekiston Respublikasi qonun hujjatlari to‘plami, 2013-y., 29-son, 373-modda) “Qonunlarning havolaki normalarini amalga oshirishga qaratilgan normativ-huquqiy va boshqa hujjatlarni ishlab chiqish rejalarini tasdiqlash to‘g‘risida”gi qaroriga muvofiq, O‘zbekiston Respublikasi hududida respublika va xalqaro sport musobaqalarini o‘tkazish vaqtida O‘zbekiston Respublikasining Davlat madhiyasini (bundan buyon matnda Davlat madhiyasi deb yuritiladi) ijro etish tartibini belgilaydi.

1. Sport musobaqalarini o‘tkazish vaqtida Davlat madhiyasining ijro etilishi musobaqa tashkilotchilari tomonidan ta’minlanadi. Bunda sport musobaqalari deganda, musobaqaning g‘olibi va sovrindorlarini aniqlash maqsadida sportning har xil turlari bo‘yicha sportchilar yoki sport jamoalari o‘rtasida o‘tkaziladigan bellashuv tushuniladi.

2. Davlat madhiyasi “O‘zbekiston Respublikasining Davlat madhiyasi to‘g‘risida”gi O‘zbekiston Respublikasining Qonuni bilan tasdiqlangan matni va musiqaviy tahririga aynan muvofiq holda ijro etilishi lozim.

3. Sport musobaqalarini o‘tkazish vaqtida Davlat madhiyasini qisqartirib ijro etilishiga yo‘l qo‘yiladi. Bunda Davlat madhiyasining boshlanishi va naqorat bir martadan aytiladi.

4. Davlat madhiyasi O‘zbekiston Respublikasi chempionatlarini, milliy terma komandalar ishtirokida xalqaro sport musobaqalarini o‘tkazish vaqtida hamda xalqaro sport musobaqalarining O‘zbekiston Respublikasi sport terma komandalarining vakillari bo‘lgan g‘oliblarini mukofotlash marosimlarini o‘tkazish vaqtida ijro etiladi.

5. Davlat madhiyasi tik turib va o‘ng qo‘l kaftini ko‘krakning chap tomoniga qo‘yib davlat bayrog‘iga yuzini burgan holda kuylanadi (tinglanadi).

6. Xalqaro sport musobaqalarini o‘tkazish vaqtida O‘zbekiston Respublikasining Davlat madhiyasini ijro etish marosimi xalqaro sport tashkilotlarining mavjud amaliyotini inobatga olgan holda belgilanadi.

7. Mazkur Qoidalar talablarining buzilishida aybdor bo‘lgan shaxslar qonunchilik hujjatlarida belgilangan tartibda javobgarlikka tortiladi.

8. Mazkur Qoidalar O‘zbekiston Respublikasi Tashqi ishlar vazirligi, Mudofaa vazirligi, Ichki ishlar vazirligi, Xalq ta’limi vazirligi va O‘zbekiston Mudofaasiga ko‘maklashuvchi “Vatanparvar” tashkiloti Markaziy Kengashi bilan kelishilgan.