2003-yil paxta hosilini oʻz vaqtida va uyushqoqlik bilan yigʻishtirib olish, tuzilgan kontraktatsiya shartnomalari bajarilishini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Vazirlar Mahkamasining “Paxta xomashyosi yetishtirishda bozor prinsiplarini amalga oshirish va uni yetishtirishni tashkil etishni yanada takomillashtirish chora-tadbirlari toʻgʻrisida” 2003-yil 19-fevraldagi 93-son qaroriga muvofiq:

paxta yetishtiruvchi qishloq xoʻjaligi korxonalarining paxta xomashyosi yetishtirishni koʻpaytirishdan manfaatdorligini ragʻbatlantirish maqsadida belgilangan prognoz hajmlaridan ortiqcha yetishtirilgan paxta xomashyosi uchun joriy hisob-kitoblar yagona xarid narxlaridan 20 foiz ortiq boʻlgan shartnomaviy narxlar boʻyicha amalga oshirilishi belgilab qoʻyilganligi;

yetishtirilgan paxta xomashyosi uchun yakuniy hisob-kitoblar uni paxta tolasiga qayta ishlashda tola chiqishi va ishlab chiqarilgan paxta tolasining sifatiga qarab hamda jahon bozorida shakllanayotgan narxlar konyunkturasi hisobga olingan holda amalga oshirilishi maʼlumot uchun qabul qilinsin.

2. Oʻzbekiston Respublikasi Moliya vazirligi Oʻzbekiston Respublikasi Iqtisodiyot vazirligi hamda Qishloq va suv xoʻjaligi vazirligi bilan birgalikda Oʻzbekiston Respublikasi Prezidentining “Paxta narxini shakllantirish mexanizmi toʻgʻrisida” 2002-yil 20-avgustdagi PF-3114-son Farmonini bajarish yuzasidan joriy yilning 27-avgustiga qadar jahon bozorida paxta tolasi uchun shakllanayotgan narxlar konyunkturasini hisobga olgan holda xarid narxlarini belgilasin va bir hafta muddatda paxta yetishtiruvchi xoʻjaliklarga xarid narxlari preyskurantini va hisob-kitob qilish tartibini yetkazsin.

Qoʻlda va mashinada terilgan paxta uchun haq toʻlash paxta hosilini yigʻishtirib olish uchun oʻtgan yil toʻlangan haq darajasidan kamida 10 foiz ortiq boʻlishi kerak.

Paxta yetishtiruvchi qishloq xoʻjaligi korxonalari texnologiya kartalariga muvofiq paxta xomashyosi yetishtirish xarajatlarini va yigʻim-terim shartlarini hisobga olgan holda, shuningdek paxta hosildorligi va moliyaviy imkoniyatlarga qarab terimchilarga Oʻzbekiston Respublikasi Moliya vazirligi tomonidan belgilangan eng kam narxlardan kelib chiqib, biroq undan kam boʻlmagan miqdorlarda tabaqalashtirilgan haq toʻlanishini taʼminlasinlar.

3. “Oʻzkimyosanoat”, “Oʻzqishloqxoʻjalikkimyo” kompaniyalari va “Oʻzbekiston havo yoʻllari” milliy aviakompaniyasi Qoraqalpogʻiston Respublikasi Vazirlar Kengashi va viloyatlar hokimliklari bilan birgalikda paxta yetishtiruvchi qishloq xoʻjaligi korxonalarini defoliantlar bilan taʼminlashda, texnika vositalarini tayyorlashda va gʻoʻzani oʻz vaqtida defoliatsiya qilish uchun zarur miqdorda samolyotlar ajratishda amaliy yordam koʻrsatsinlar.

4. “Oʻzneftmahsulot” aksiyadorlik kompaniyasi:

paxta yigʻim-terimida va paxta tayyorlashda qatnashayotgan texnikaning uzluksiz ishlashini taʼminlash hamda yerni shudgorlashni tugallash uchun viloyatlarning taqdim etilgan hisob-kitoblari boʻyicha yonilgʻi-moylash materiallarining zarur zaxirasini yaratsin;

qishloq xoʻjaligi korxonalariga, mashina-traktor parklariga, paxta tozalash sanoati korxonalariga va paxta xomashyosini yigʻishtirib olish, tashish va unga ishlov berishda band boʻlgan boshqa tashkilotlarga ushbu ishlarni bajarish uchun zarur miqdorlarda yonilgʻi-moylash materiallari uzluksiz yetkazib berilishini tashkil etsin.

5. 2003-yil paxta xomashyosini oʻz vaqtida va sifatli yigʻishtirib olishga koʻmaklashish uchun ilovaga muvofiq tarkibda ishchi guruh tashkil etilsin, unga:

yigʻim-terimga tayyorgarlik koʻrish va uni oʻtkazish bilan bogʻliq masalalarni tezkorlik bilan hal qilish;

paxta xomashyosi yetishtiruvchilar bilan kelishgan holda defoliatsiyani oʻtkazish muddatlarini belgilash huquqi berilsin.

6. Mazkur qarorning bajarilishini nazorat qilish Oʻzbekiston Respublikasi Prezidentining Davlat maslahatchisi I.H. Joʻrabekov va Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.