Elektr energiyasi isteʼmolini hisobga olish va nazorat qilish tizimini yanada takomillashtirish, shuningdek, yoʻqotishlarni kamaytirish, iqtisodiyot tarmoqlari va respublika hududlarining aholisi tomonidan isteʼmol qilinayotgan elektr energiyasini hisobga olishning aniqligi va toʻliqligini oshirish, maqsadida:

1. Quyidagilar:

2012-yil 27-martda Xalqaro tiklanish va taraqqiyot banki (XTTB) Direktorlar kengashi tomonidan Oʻzbekiston Respublikasiga “Elektr energiyasi isteʼmolini hisobga olish va nazorat qilishning avtomatlashtirilgan tizimini joriy etish. Oʻzbekiston Respublikasining Toshkent shahri, Toshkent va Sirdaryo viloyatlaridagi 0,4 kv isteʼmolchilarning elektr energiyasi isteʼmolini hisobga olish tizimi” (keyingi oʻrinlarda — loyiha) loyihasini amalga oshirish uchun XTTBning 5 yillik imtiyozli davrni oʻz ichiga olgan holda 25 yil muddatga 180,0 mln AQSH dollari miqdoridagi oddiy kapital resurslar hisobidan qarz berilishi maʼqullangani;

loyihani amalga oshirish davri 3 yil (2013 — 2016-yillar) deb belgilangani maʼlumot uchun qabul qilinsin.

2. Belgilansinki:

XTTBning qarzi Oʻzbekiston Respublikasiga Oʻzbekiston Respublikasi va XTTB oʻrtasidagi qarz bitimi asosida beriladi;

XTTBning qarzini soʻndirish, shuningdek, qarz boʻyicha foizlar, komissiyalar va boshqa xarajatlarni toʻlash “Oʻzbekenergo” DAKning oʻz mablagʻlari hisobidan amalga oshiriladi.

3. “Elektr energiyasi isteʼmolini hisobga olish va nazorat qilishning avtomatlashtirilgan tizimini joriy etish. Oʻzbekiston Respublikasining Toshkent shahri, Toshkent va Sirdaryo viloyatlaridagi 0,4 kv isteʼmolchilarning elektr energiyasi isteʼmolini hisobga olish tizimi” loyihasini amalga oshirish uchun XTTB qarzini soʻndirish hamda foiz va komissiyalarni toʻlashning prognoz jadvali ilovaga muvofiq tasdiqlansin.

4. Quyidagilarga:

Oʻzbekiston Respublikasi moliya vaziriga Oʻzbekiston Respublikasi nomidan XTTB bilan qarz bitimini hamda “Oʻzbekenergo” DAK bilan XTTB qarzini qayta kreditlash toʻgʻrisidagi bitimni imzolash;

“Oʻzbekenergo” DAK boshqaruvi raisiga XTTB bilan loyiha bitimini imzolash vakolati berilsin.

5. Oʻzbekiston Respublikasi Adliya vazirligi belgilangan tartibda Oʻzbekiston Respublikasi va XTTB oʻrtasidagi qarz bitimiga hamda “Oʻzbekenergo” DAK va XTTB oʻrtasidagi loyiha bitimiga yuridik xulosalar bersin.

6. “Oʻzbekenergo” DAK bir oy muddatda “Elektr energiyasi isteʼmolini hisobga olish va nazorat qilishning avtomatlashtirilgan tizimini joriy etish. Oʻzbekiston Respublikasining Toshkent shahri, Toshkent va Sirdaryo viloyatlaridagi 0,4 kv isteʼmolchilarning elektr energiyasi isteʼmolini hisobga olish tizimi” loyihasining texnik-iqtisodiy asoslari ishlab chiqilishi va vakolatli ekspertiza organlarida kelishilishini hamda belgilangan tartibda Vazirlar Mahkamasiga tasdiqlash uchun kiritilishini taʼminlasin.

7. Oʻzbekiston Respublikasi Tashqi ishlar vazirligi “Oʻzbekenergo” DAK buyurtmanomalariga asosan loyihani amalga oshirishda ishtirok etadigan xorijlik mutaxassislarga konsullik va boshqa yigʻimlar undirilmasdan vizalar rasmiylashtirilishini taʼminlasin.

8. Oʻzbekiston Respublikasi Ichki ishlar vazirligi “Oʻzbekenergo” DAK buyurtmanomalariga asosan loyihani amalga oshirishda ishtirok etadigan xorijlik mutaxassislarni davlat bojlarini toʻlashdan ozod qilgan holda, ularga koʻp martalik vizalar berilishi va muddati uzaytirilishi, shuningdek, ularning Oʻzbekiston Respublikasidagi vaqtinchalik yashash joyi boʻyicha vaqtinchalik propiskaga qoʻyilishi va uning muddati uzaytirilishini taʼminlasin.

9. Mazkur qarorning ijrosini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov va Oʻzbekiston Respublikasi Bosh vaziri oʻrinbosari G.I. Ibragimov zimmasiga yuklansin.