Janubiy Kemachi neft-gaz kondensati konidan suyuq uglevodorodlarni maksimal darajada ajratib olishni yanada ta’minlash hisobiga uglevodorod xomashyosi ishlab chiqarishni kengaytirish maqsadida Vazirlar Mahkamasi qaror qiladi:

1. “O‘zbekneftgaz” milliy xolding kompaniyasi quyidagilarni nazarda tutuvchi “Janubiy Kemachi konini obod qilishni yakunlash” investitsiya loyihasini bosqichma-bosqich amalga oshirayotganligi ma’lumot uchun qabul qilinsin:

I bosqichda (qurilish muddati — 2016-yil) kapital qo‘yilmalar hajmi 359 322,84 ming AQSH dollariga teng bo‘lgan gazni qazib olish, tashish, tayyorlash va “saykling-jarayon” qatlamiga qayta haydash obyektlarini qurish;

investitsiya loyihasining II bosqichi doirasida 37 ta foydalanish qudug‘i va siquv kompressor stansiyasini qurish.

2. Quyidagilar “Janubiy Kemachi konini obod qilishni yakunlash” investitsiya loyihasining I bosqichini amalga oshirishni moliyalashtirish manbalari etib belgilansin:

“O‘zbekneftgaz” MXKning 326 307,66 ming AQSH dollariga teng miqdordagi o‘z mablag‘lari;

O‘zbekiston Respublikasi Tiklanish va taraqqiyot jamg‘armasining “O‘zsanoatqurilishbank” ochiq aksiyadorlik tijorat banki orqali qayta moliyalashtiriladigan import asbob-uskunalar va materiallar sotib olish uchun ajratiladigan 33 015,18 ming AQSH dollariga teng miqdordagi krediti 7 yil muddatga, shu jumladan 2 yil imtiyozli davr bilan, yillik 4,0 foiz stavkasi bilan, shu jumladan qayta moliyalashtiruvchi bankning yillik 1,0 foiz miqdoridagi marjasi bilan.

3. Belgilab qo‘yilsinki:

“O‘zbekneftgaz” MXK qarz oluvchi va ko‘rsatib o‘tilgan investitsiya loyihasini amalga oshirish, O‘zbekiston Respublikasi Tiklanish va taraqqiyot jamg‘armasining ajratiladigan kreditidan maqsadli va samarali foydalanish uchun mas’ul bo‘lgan ijro etuvchi organ hisoblanadi;

O‘zbekiston Respublikasi Tiklanish va taraqqiyot jamg‘armasi kreditini qaytarish va unga xizmat ko‘rsatish bilan bog‘liq xarajatlar “O‘zbekneftgaz” MXKning o‘z mablag‘lari hisobiga amalga oshiriladi.

4. Quyidagilar:

“Janubiy Kemachi konini obod qilishni yakunlash” investitsiya loyihasining (I bosqich) asosiy texnik-iqtisodiy parametrlari bilan birgalikdagi texnik-iqtisodiy asoslanishi 1-ilovaga* muvofiq;

“Janubiy Kemachi konini obod qilishni yakunlash” investitsiya loyihasi (I bosqich) bo‘yicha O‘zbekiston Respublikasi Tiklanish va taraqqiyot jamg‘armasi kreditini so‘ndirishning prognoz jadvali 2-ilovaga* muvofiq tasdiqlansin.

5. O‘zbekiston Respublikasi Davlat arxitektura va qurilish qo‘mitasi belgilangan tartibda loyiha hujjatlarining davlat ekspertizasidan o‘tkazilishini ta’minlasin va “Janubiy Kemachi konini obod qilishni yakunlash” investitsiya loyihasini (I bosqich) amalga oshirish doirasida qurilish-montaj ishlarining bajarilishi sifati ustidan davlat arxitektura-qurilish nazoratini o‘rnatsin.

6. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari G‘.I. Ibragimov zimmasiga yuklansin.