Avtomototransport vositalarini doimiy va vaqtincha saqlash boʻyicha xizmatlar koʻrsatuvchi yuridik shaxslar faoliyatini tartibga solish, shuningdek ushbu xizmatlar sifatini oshirish maqsadida Vazirlar Mahkamasi qaror qiladi:

1. Avtomototransport vositalarini doimiy va vaqtincha saqlash joylarini tashkil etish va ulardan foydalanish tartibi toʻgʻrisidagi nizom ilovaga muvofiq tasdiqlansin.

Davlat soliq xizmati organlari avtomototransport vositalarini doimiy va vaqtincha saqlash boʻyicha xizmatlar koʻrsatuvchi yuridik shaxslar faoliyati yuzasidan qatʼiy nazorat oʻrnatsinlar.

2. Vazirlar Mahkamasining “Avtotransport vositalarini vaqtincha saqlash boʻyicha pulli xizmatlar koʻrsatuvchi yuridik shaxslar faoliyatini tartibga solish chora-tadbirlari toʻgʻrisida” 2010-yil 5-apreldagi 63-son qarori (Oʻzbekiston Respublikasi QT, 2010-y., 4-son, 15-modda) oʻz kuchini yoʻqotgan deb hisoblansin.

3. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

1. Ushbu Nizom yuridik shaxslar tomonidan avtomototransport vositalarini saqlash xizmatlari koʻrsatish sohasidagi faoliyatni amalga oshirish tartibini belgilaydi.

2. Avtomototransport vositalarini saqlash xizmatlari deganda ushbu Nizomda avtomototransport vositalarini saqlash joylarini avtomototransport vositalarining aniq egalariga (ularning vakillariga) biriktirgan yoki biriktirmagan holda avtomototransport vositalarini doimiy va vaqtincha saqlash boʻyicha pullik asosda koʻrsatiladigan xizmatlar tushuniladi.

3. Ushbu Nizom:

fuqarolarning avtomototransport vositalarini saqlash uchun avtomototransport vositalari egalariga tuman (shahar) hokimining qaroriga muvofiq berilgan ular yashaydigan joylar yaqinidagi yer uchastkalarida ularning mablagʻlari hisobiga qurilgan yakka tartibdagi garajlarga — inshootlarga;

tashkilotlarga berilgan, avtomototransport vositalari saqlanganligi uchun toʻlov undirilmaydigan yer uchastkalarida joylashgan avtomototransport vositalarini saqlash joylariga;

qonun hujjatlari buzilganligi uchun ushlangan avtomototransport vositalarining toʻxtash joylariga tatbiq etilmaydi.

4. Ushbu Nizomda quyidagi asosiy tushunchalardan foydalaniladi:

avtomobillar toʻxtash joyi — avtomototransport vositalarini doimiy va vaqtincha saqlash uchun moʻljallangan bino, inshoot (bino, inshootning bir qismi) yoki maxsus ochiq maydon;

yopiq turdagi avtomobillar toʻxtash joyi — tashqi devor bilan toʻsilgan yer ustidagi avtomobillar toʻxtash joyi, shuningdek yer ostidagi hamda atrofi oʻralgan — yarmi yer ostida, yarmi yer ustida joylashgan avtomobillar toʻxtash joyi;

ochiq turdagi avtomobillar toʻxtash joyi — tashqi devor bilan toʻsilmagan yer ustidagi avtomobillar toʻxtash joyi, shuningdek ochiq inshoot, hech boʻlmaganda, ikki qarama-qarshi tomonning ancha joyi ochiq boʻlgan inshoot.

5. Avtomototransport vositalarini saqlash xizmatlari avtomobillar toʻxtash joylarida faqat yuridik shaxslar tomonidan koʻrsatiladi.

6. Yer uchastkalarini berish masalalari boʻyicha qarorlar Vazirlar Mahkamasining “Shaharsozlik faoliyatini amalga oshirish hamda qishloq xoʻjaligiga oid boʻlmagan ehtiyojlar uchun yer uchastkalari berish, shuningdek obyektlarni qurishga ruxsatnomalar berish tartibini tubdan soddalashtirish chora-tadbirlari toʻgʻrisida” 2013-yil 25-fevraldagi 54-son qaroriga muvofiq tuman (shahar) hokimi tomonidan qabul qilinadi.

7. Tuman (shahar) hokimining qarorlarida berilayotgan yer uchastkasining konturi aniq belgilangan, tegishli reja-kartografiya materiallari ilova qilingan holda avtomototransport vositalarini saqlash xizmatlari koʻrsatishni tashkil etish uchun berilayotgan yer uchastkasi maydoni koʻrsatiladi.

8. Avtomototransport vositalarini saqlash xizmatlari koʻrsatishni tashkil etish uchun yer uchastkalari berishda tuman (shahar) hokimining qarorlarida yer uchastkalarining avtomototransport vositalarini saqlash xizmatlarini tashkil etish uchun aniq maqsadni koʻzlab berilishi koʻrsatiladi.

9. Avtomototransport vositalarini doimiy yoki vaqtincha saqlash xizmatlari koʻrsatish uchun yer uchastkalarini ijaraga (subijaraga) berishga yoʻl qoʻyilmaydi.

10. Avtomototransport vositalarini doimiy va vaqtincha saqlash joylari quyidagi talablarga javob berishi kerak:

qattiq qoplama, yoritish, axlatni toʻplash uchun konteynerlar, yongʻinga qarshi vositalar, qattiq shataklar va shatakka oluvchi trosslar mavjudligi;

yoʻl harakati xavfsizligi talablarini taʼminlaydigan hududga kirish va undan chiqish uchun maxsus ajratilgan joylarning mavjudligi;

hudud toʻsilgan boʻlishi yoxud kirish (chiqish) uchun maxsus ajratilgan joyni aylanib oʻtib hududga erkin kirish (undan chiqish) imkonini bermaydigan boshqa toʻsiqlarga ega boʻlishi;

avtomototransport vositalarining erkin kirishi (chiqishi)ni istisno etuvchi shlagbaum (yoki boshqa qurilma) mavjudligi;

agar bir necha qatorlarda avtomototransport vositalarini doimiy va vaqtincha saqlash imkoniyati mavjud boʻlsa, hudud ichida avtomototransport vositalarining harakatlanishi uchun ajratilgan polosalar mavjudligi;

kirish (chiqish) uchun ajratilgan joyda nazoratchi-kassirning xonasi (budkasi) boʻlishi kerak, uning tashqi tomoniga koʻrinarli joyda avtomototransport vositalarini saqlash xizmatlari koʻrsatish tariflari va shartlari yirik harflarda yozilgan (harflarning yirikligi kamida 3 sm boʻlgan) yozuv joylashtiriladi;

avtomototransport vositalarini joylashtirish tegishli sxemasining mavjudligi;

avtomototransport vositalarini saqlash xizmatlari koʻrsatuvchi yuridik shaxs, ish rejimi, telefon raqami koʻrsatilgan “Pulli avtomobillar toʻxtash joyi” lavhasi mavjudligi;

nogironlarning avtomototransport vositalari uchun maxsus jihozlangan kamida ikkita joy mavjudligi.

11. Avtomobil toʻxtash joylari hududlarida quyidagilar taqiqlanadi:

avtomobil toʻxtash joylarini qurish boʻyicha loyihada nazarda tutilmagan vaqtinchalik va kapital inshootlarni barpo etish va oʻrnatish;

avtomototransport vositasini taʼmirlash, yuvish, unga yonilgʻi-moylash materiallari quyish, buning uchun maxsus ajratilgan joydan tashqari;

dvigatel va agregatlar uchun ochiq holdagi olovdan foydalanish;

avtomototransport vositasini soatiga 5 km dan ortiq tezlikda boshqarish;

tamaki chekish, spirtli ichimliklar ichish;

yonilgʻi-moylash materiallarini saqlash uchun joylar barpo etish;

avtomototransport vositalarini chorpoyalarga, tagliklarga va shu kabilarga qoʻyish.

12. Mijoz uchun qulay boʻlgan kirib kelish joyida quyidagilar osib qoʻyilishi kerak:

avtomototransport vositalarini saqlash qoidalari;

yongʻin xavfsizligi talablari;

avtomototransport vositalarini qabul qilib olish va saqlash uchun masʼul shaxslarning vazifalari;

koʻrsatiladigan xizmatlar uchun amaldagi tariflar;

yuridik shaxsning davlat roʻyxatidan oʻtkazilgani toʻgʻrisidagi guvohnomaning nusxasi.

13. Avtomototransport vositasini doimiy saqlash uchun rasmiylashtirish yozma shartnoma tuzish yoʻli bilan amalga oshiriladi, unda biriktirilgan joy koʻrsatiladi.

14. Avtomototransport vositasini avtomobil toʻxtash joyiga qabul qilib olish va uni avtomobil toʻxtash joyidan chiqarib ketish faqat navbatchi xodim ishtirokida amalga oshiriladi.

15. Avtomototransport vositalarini saqlash xizmatlari koʻrsatuvchi yuridik shaxslar fiskal xotiraga ega boʻlgan nazorat-kassa mashinasiga, qonun hujjatlarida nazarda tutilgan hollarda esa onlayn nazorat-kassa mashinalari yoki virtual kassaga va plastik kartochkalardan toʻlovlarni qabul qilish boʻyicha hisob-kitob terminaliga ega boʻlishlari kerak.

16. Avtomototransport vositalarini saqlash boʻyicha koʻrsatilgan xizmatlar uchun toʻlov avtomototransport vositalarini saqlash boʻyicha xizmatlar koʻrsatuvchi yuridik shaxslar tomonidan belgilanadigan tariflar, lekin xalq deputatlari tegishli tuman (shahar) Kengashi tomonidan xizmatlarning ushbu turi uchun belgilangan toʻlovning cheklangan miqdoridan yuqori boʻlmagan tariflar boʻyicha amalga oshiriladi.

17. Avtomototransport vositalarini vaqtincha saqlash boʻyicha koʻrsatilgan xizmatlar uchun hisob-kitob avtomototransport vositasining avtomobil toʻxtash joyi hududiga kirib kelgan vaqti koʻrsatilgan talon asosida, fiskal xotirali nazorat-kassa mashinasi yoki plastik kartochkalardan toʻlovlarni qabul qilish boʻyicha hisob-kitob terminali chekini bergan holda hududdan chiqib ketishda amalga oshiriladi.

Avtomototransport vositalarini doimiy saqlash uchun toʻlov ushbu Nizomning 13-bandi talablariga rioya etgan holda tuzilgan yozma shartnomalar asosida amalga oshiriladi.

18. Avtomototransport vositalarini saqlash boʻyicha koʻrsatilgan xizmatlar uchun toʻlov naqd hisob-kitob qilish yoʻli bilan ham, plastik kartochkalardan foydalangan holda ham amalga oshiriladi. Avtomototransport vositalarini saqlash boʻyicha naqd hisob-kitob qilish yoʻli bilan xizmatlar koʻrsatishdan tushum qonunchilikda belgilangan tartibda inkassatsiya qilinadi (banklarga topshiriladi).

19. Yoqilgʻi yoki moy, suyuq va suyultirilgan gaz sizib turgan, shuningdek saloni yoki bagajnigida tez yonuvchi, portlash xavfi boʻlgan, radioaktiv yoki zaharli moddalar boʻlgan, yoʻl-transport hodisasi natijasida texnik jihatdan shikastlangan avtomototransport vositalari doimiy va vaqtincha saqlashga Oʻzbekiston Respublikasi Ichki ishlar vazirligining Davlat yoʻl harakati xavfsizligi xizmati organlarining tegishli maʼlumotnomasisiz qabul qilinmaydi.

Eng yuqori vazni 3,5 tonnadan ortiqni tashkil qiladigan va haydovchining oʻrindigʻidan tashqari, oʻtirish joylari soni sakkiztadan ortiq boʻlgan avtomototransport vositalari ham doimiy va vaqtincha saqlash uchun avtomobil toʻxtash joylarida saqlashga qabul qilinmaydi, ushbu avtomototransport vositalari uchun nazarda tutilgan maxsus avtomobil toʻxtash joylari bundan mustasno.

20. Uylar yonidagi hududda, ushbu hududlarning obodonlashtirish elementlari bilan taʼminlanganlik normativ talablariga rioya etilganda, shuningdek uy-joylarning derazalaridan normativ boʻyicha uzoqlikka qatʼiy rioya qilinganda avtomototransport vositalarini doimiy saqlash uchun yopiq turdagi va ochiq turdagi avtomobil toʻxtash joylarini joylashtirishga ruxsat etiladi.

21. Avtomototransport vositalari egalarining yakka tartibdagi garajlari buzib tashlangan taqdirda ularga avtomobil vositalarini doimiy saqlash boʻyicha uy-joy mavzelaridagi buzib tashlangan yakka tartibdagi garajlar oʻrnida tashkil etiladigan avtomobil toʻxtash joyida doimiy ravishda bepul birkitilgan joy beriladi.

Avtomototransport vositalarining egalariga doimiy birkitilgan vaqtincha saqlash joylarida avtomototransport vositasi egasining uy manzili va avtomototransport vositasining davlat tartib raqami yozilgan tablichka oʻrnatilgan boʻlishi kerak.

22. Turar joy mavzelaridagi avtomototransport vositalarini doimiy saqlash joylaridagi boʻsh yotgan yoxud vaqtinchalik foydalanilmayotgan (band boʻlmagan) joylarda, ushbu joylar birkitilgan avtomototransport vositalari egalari bilan kelishgan holda, fiskal xotirali nazorat-kassa mashinasidan va plastik kartochkalardan toʻlovlarni qabul qilish boʻyicha hisob-kitob terminalidan majburiy ravishda foydalanilgan taqdirda avtomototransport vositalarini vaqtincha saqlash boʻyicha xizmatlar koʻrsatishga yoʻl qoʻyiladi.

23. Avtomototransport vositalarini saqlash boʻyicha xizmatlar koʻrsatuvchi yuridik shaxslar avtomototransport vositalarini vaqtincha saqlash (avtotransport vositalarining dehqon (oziq-ovqat) bozorlarining avtomobillar toʻxtash joyida vaqtincha toʻxtab turishi bundan mustasno) boʻyicha pulli xizmatlar koʻrsatish huquqi uchun Oʻzbekiston Respublikasi Soliq kodeksida belgilangan tartibda aniq belgilab qoʻyilgan soliq va yigʻim toʻlaydilar.

24. Ushbu Nizom 23-bandining amal qilishi Oʻzbekiston Respublikasi Soliq kodeksida belgilangan tartibda yagona soliq toʻlovi yoxud umumiy belgilangan soliqlar toʻlaydigan avtomototransport vositalarini doimiy saqlash boʻyicha xizmatlar koʻrsatuvchi yuridik shaxslarga tatbiq etilmaydi.

25. Avtomototransport vositalarini vaqtincha saqlash boʻyicha xizmatlar koʻrsatish huquqi uchun yigʻim miqdori xalq deputatlari tegishli tuman (shahar) Kengashi tomonidan belgilanadi va u cheklangan stavkalardan ortiq boʻlishi va qonun hujjatlarida belgilangan miqdorlardan past boʻlishi mumkin emas.

26. Avtomototransport vositalarini vaqtincha saqlash boʻyicha faoliyat bilan birga faoliyatning boshqa turlarini amalga oshiruvchi yuridik shaxslar faoliyatning ushbu turlari boʻyicha alohida hisob yuritishlari hamda tegishli soliqlar toʻlashi va Oʻzbekiston Respublikasi Soliq kodeksida belgilangan tartibda boshqa majburiy toʻlovlarni toʻlashi shart.

27. Navbatchi xodim ishga qabul qilinayotganda avtomototransport vositalarini saqlash boʻyicha xizmatlar koʻrsatadigan yuridik shaxs rahbari tomonidan yongʻin xavfsizligi talablari boʻyicha yoʻriqnoma bilan tanishtirilishi kerak. Navbatchi xodim yongʻinni oʻchirishning birlamchi vositalarini bilishi va ularga ega boʻlishi kerak.

28. Avtomototransport vositalarini saqlashga topshirayotgan avtomototransport vositalari egalari yongʻin xavfsizligi rioya etishlari kerak.

29. Avtomototransport vositalarini saqlash boʻyicha xizmatlar koʻrsatuvchi yuridik shaxslar sanitariya normalari va yongʻin xavfsizligi talablariga rioya etilishi, avtomototransport vositalarining saqlanishi, shu jumladan ularni doimiy va vaqtincha saqlash vaqtida, yaʼni ular egalariga (yoki ularning vakillariga) qaytarilgungacha yoxud ular majburiy ravishda maxsus avtomobil toʻxtash joyiga evakuatsiya qilingungacha roʻy bergan avtomobil vositalarining olib qochib ketilishi, oʻgʻirlanishi, qismlarga ajratilishi va shikastlanishi uchun javob beradilar.

30. Avtomototransport vositalarini saqlash boʻyicha xizmatlar koʻrsatuvchi yuridik shaxsga zarar yetkazilgan taqdirda avtomototransport vositasining egasi (yoxud uning vakili) yetkazilgan zarar uchun javob beradi.

31. Avtomototransport vositalarini saqlash boʻyicha xizmatlar koʻrsatuvchi yuridik shaxslar:

avtomototransport vositalarining tabiiy ofatlar (zilzila, dovullar, suv toshqini va boshqalar) vaqtida shikastlanganligi uchun;

avtomototransport vositalari ularni saqlash boʻyicha xizmatlar koʻrsatiladigan hududdan chiqib ketgandan keyin avtomototransport vositalarining saqlanishiga taalluqli bildirilgan eʼtirozlar uchun javob bermaydilar.

32. Tuman (shahar) hokimining koʻrsatib oʻtilgan maqsad uchun yer uchastkasi ajratish toʻgʻrisidagi qarorisiz yuridik shaxslar tomonidan avtomototransport vositalarini saqlash boʻyicha xizmatlar koʻrsatish sohasida faoliyatni amalga oshirish ruxsat beruvchi hujjatlarsiz faoliyat turlarini amalga oshirishga tenglashtiriladi va qonun hujjatlarida belgilangan javobgarlik choralarini qoʻllashga sabab boʻladi.

33. Ushbu Nizom talablarining buzilishida aybdor boʻlgan shaxslar qonun hujjatlariga muvofiq javob beradilar.