“Oʻzbekiston havo yoʻllari” MAK havo kemalari parkini “Boing” kompaniyasi (AQSH) ishlab chiqargan “Boing-767-300ER” samolyotlari bilan yanada yangilashni taʼminlash maqsadida Vazirlar Mahkamasi qaror qiladi:

1. Quyidagilar:

Islom taraqqiyot banki (ITB) Ijrochi direktorlar kengashi tomonidan 2013-yil 19-mayda “Oʻzbekiston havo yoʻllari” Milliy aviakompaniyasining havo kemalari parkini yangilash va unifikatsiyalash” investitsiya loyihasini amalga oshirish doirasida “Boing-767-300ER” rusumli uchinchi va toʻrtinchi samolyotlarni “Sotish (xarid qilish) va qayta lizing” shartlari asosida 12 yil muddatga umumiy qiymati 170 million AQSH dollari miqdorida moliyalashtirish maʼqullangani;

“Boing” kompaniyasi loyiha doirasida 2013-yil may oyida “Oʻzbekiston havo yoʻllari” MAKga uchinchi samolyotni yetkazib bergani va 2013-yil iyun oyida qurilgan hamda foydalanishga tayyor boʻlgan toʻrtinchi “Boing-767-300ER” samolyotini qiymati toʻlangandan soʻng yetkazib berishga tayyorligini maʼlum qilgani;

sotib olinadigan samolyotlar qiymati ITBning moliyaviy mablagʻlari hisobiga qoplanishini hisobga olib, “Boing” kompaniyasi “Oʻzbekiston havo yoʻllari” MAK tomonidan ilgari toʻlangan 60,63 mln AQSH dollari miqdoridagi avans va yetkazib berish toʻlovlari qaytarilishini kafolatlagani maʼlumot uchun qabul qilinsin.

2. Oʻzbekiston Respublikasi Moliya vazirligi, Tashqi iqtisodiy aloqalar, investitsiyalar va savdo vazirligi, Tashqi iqtisodiy faoliyat milliy banki, “Oʻzbekiston havo yoʻllari” milliy aviakompaniyasi, Islom taraqqiyot banki va “Boing” kompaniyasi bilan kelishilgan holda uchinchi va toʻrtinchi “Boing-767-300ER” samolyotlarini sotib olishni moliyalashtirish tartibi 1* va 1-a ilovalarga muvofiq maʼqullansin.

3. Belgilansinki:

ITB moliyaviy mablagʻlaridan maqsadli va samarali foydalanish uchun masʼul ijro etuvchi organ “Oʻzbekiston havo yoʻllari” Milliy aviakompaniyasi hisoblanadi;

sublizing toʻlovlarini toʻlash va ularga xizmat koʻrsatish bilan bogʻliq xarajatlar “Oʻzbekiston havo yoʻllari” MAKning oʻz mablagʻlari hisobiga amalga oshiriladi;

tuzilgan bitimlar boʻyicha Oʻzbekiston Respublikasi Tashqi iqtisodiy faoliyat milliy banki va “Oʻzbekiston havo yoʻllari” milliy aviakompaniyasining majburiyatlari yuzasidan, shuningdek, sublizing toʻgʻrisidagi bitimlar boʻyicha “Oʻzbekiston havo yoʻllari” milliy aviakompaniyasining majburiyatlari yuzasidan Oʻzbekiston Respublikasi Tashqi iqtisodiy faoliyat milliy bankiga ITB tomonidan Oʻzbekiston Respublikasi Hukumati kafolatlari berilganligi uchun toʻlov undirilmaydi.

4. Loyiha doirasida 2013-yilda uchinchi va toʻrtinchi “Boing-767-300ER” samolyotlarini sotib olish uchun ITB tomonidan beriladigan moliyaviy mablagʻlarni qaytarish jadvallari 2 va 3-ilovalarga* muvofiq tasdiqlansin.

5. Oʻzbekiston Respublikasi Moliya vaziri:

Oʻzbekiston Respublikasi Tashqi iqtisodiy faoliyat milliy bankiga “Oʻzbekiston havo yoʻllari” MAKning sublizing toʻgʻrisidagi bitimlar boʻyicha majburiyatlari yuzasidan Oʻzbekiston Respublikasi kafolatlarini bersin;

loyiha doirasida Oʻzbekiston Respublikasi Tashqi iqtisodiy faoliyat milliy bankiga “Oʻzbekiston havo yoʻllari” MAK majburiyatlari boʻyicha Oʻzbekiston Respublikasining avval berilgan kafolatlariga ushbu qarordan kelib chiqadigan oʻzgartirishlar kiritsin.

6. Oʻzbekiston Respublikasi Adliya vazirligi “Oʻzbekiston havo yoʻllari” MAK va ITB, Oʻzbekiston Respublikasi Tashqi iqtisodiy faoliyat milliy banki va ITB oʻrtasidagi bitimlar, shuningdek, Oʻzbekiston Respublikasi Hukumati va ITB oʻrtasidagi Kafolat bitimlari boʻyicha belgilangan tartibda yuridik xulosa bersin.

7. “Oʻzbekiston havo yoʻllari” MAK:

ushbu qaror doirasida imzolanadigan bitimlarni tayyorlash uchun jalb qilingan xalqaro konsultantlar va yuridik kompaniyalar xizmatlari uchun haq toʻlanishi taʼminlansin;

Oʻzbekiston Respublikasi Tashqi iqtisodiy faoliyat milliy banki hamda Oʻzbekiston Respublikasi Tiklanish va taraqqiyot jamgʻarmasi bilan birgalikda loyiha doirasida ilgari tuzilgan kredit shartnomalariga mazkur qarordan kelib chiqadigan oʻzgartirishlar kiritilsin.

8. Ushbu qaror doirasida imzolanadigan kelishuvlarning amal qilish davri mobaynida:

2013-yilda “Oʻzbekiston havo yoʻllari” MAK uchun sotib olinadigan uchinchi va toʻrtinchi “Boing-767-300ER” samolyotlari bojxona toʻlovlaridan (bojxona rasmiylashtiruvi yigʻimlaridan tashqari);

Oʻzbekiston Respublikasi Tashqi iqtisodiy faoliyat milliy banki, “Oʻzbekiston havo yoʻllari” milliy aviakompaniyasi va Islom taraqqiyot banki havo kemalarining oldi-sotdi, lizing va sublizing bitimlarini tuzish bilan bogʻliq barcha turdagi soliqlarni toʻlashdan;

ITB tuziladigan bitimlar doirasida Oʻzbekiston Respublikasidagi toʻlov manbaida daromad (foyda) soliqlarini toʻlashdan ozod etilsin.

9. Oʻzbekiston Respublikasi Hukumatining 4-ilovaga muvofiq ayrim qarorlariga oʻzgartirishlar kiritilsin.

10. Ushbu qaror ijrosini nazorat qilish Oʻzbekiston Respublikasi Bosh vaziri Sh.M. Mirziyoyev zimmasiga yuklatilsin.

1. “Boing” kompaniyasi “Oʻzbekiston havo yoʻllari” MAKga ikkita samolyot yetkazib bermoqda, ulardan uchinchisi 2013-yilning may oyida, toʻrtinchisi 2013-yilning iyun oyida yetkazib beriladi.

2. Oʻzbekiston Respublikasi Hukumati, Oʻzbekiston Respublikasi Tashqi iqtisodiy faoliyat milliy banki, “Oʻzbekiston havo yoʻllari” milliy aviakompaniyasi hamda Islom taraqqiyot banki oʻrtasida 2013-yilda ikkita “Boing-767-300ER” samolyotini xarid qilishni moliyalashtirishga doir tegishli bitimlar (har bir samolyot uchun alohida) imzolanadi.

3. “Oʻzbekiston havo yoʻllari” MAK samolyotlarni oldi-sotdi shartnomalari asosida samolyotlarga boʻlgan benefitsiar mulkchilik huquqini “Boing” kompaniyasidan xarid qilish qiymati boʻyicha ITBga oʻtkazadi.

4. Islom taraqqiyot banki “Oʻzbekiston havo yoʻllari” milliy aviakompaniyasiga “Boing” kompaniyasi bilan hisob-kitob qilishi uchun har bir samolyotning toʻliq qiymati miqdorida mablagʻ ajratmoqda.

5. “Oʻzbekiston havo yoʻllari” MAK ITBdan olgan mablagʻlarni har bir samolyotning qiymati hisobiga “Boing” kompaniyasiga oʻtkazadi.

6. “Boing” kompaniyasi “Oʻzbekiston havo yoʻllari” Milliy aviakompaniyasiga ushbu samolyotlar boʻyicha oldindan toʻlangan 60,63 million AQSH dollari miqdoridagi avans va yetkazib berish toʻlovlarining bir qismini qaytarmoqda. Bu summaga Oʻzbekiston Respublikasi Tiklanish va taraqqiyot jamgʻarmasining 50,38 million AQSH dollari hamda “Oʻzbekiston havo yoʻllari” Milliy aviakompaniyasining 10,25 million AQSH dollari miqdoridagi oʻz mablagʻlari kiradi.

7. “Oʻzbekiston havo yoʻllari” MAK ilgari “Boing” kompaniyasiga avans toʻlovlari sifatida toʻlangan 50,38 million AQSH dollari miqdoridagi mablagʻni Oʻzbekiston Respublikasi Tiklanish va taraqqiyot jamgʻarmasiga muddatidan oldin qaytarmoqda.

8. ITB Oʻzbekiston Respublikasi Tashqi iqtisodiy faoliyat milliy bankiga samolyotlarni lizing bitimlari boʻyicha 12 yil muddatga lizingga beradi.

9. Oʻzbekiston Respublikasi Tashqi iqtisodiy faoliyat milliy banki sublizing bitimlari boʻyicha samolyotlarni “Oʻzbekiston havo yoʻllari” milliy aviakompaniyasiga sublizingga beradi.

10. “Oʻzbekiston havo yoʻllari” MAK va ITB sugʻurta huquqlarini oʻtkazish toʻgʻrisidagi bitimlarni imzolaydilar. Bu bitimlar “Oʻzbekiston havo yoʻllari” MAKning ikkita “Boing-767-300ER” samolyotini sugʻurtalash boʻyicha tovon olish huquqini ITB foydasiga oʻtkazishni nazarda tutadi.

11. Oʻzbekiston Respublikasi Tashqi iqtisodiy faoliyat milliy banki va ITB xizmat koʻrsatuvchi agent toʻgʻrisidagi bitimlarni, shuningdek, havo kemalarini sotib olish va sotish majburiyatlarini imzolaydi.

12. Oʻzbekiston Respublikasi Tashqi iqtisodiy faoliyat milliy banki va “Oʻzbekiston havo yoʻllari” milliy aviakompaniyasi Oʻzbekiston Respublikasi Tashqi iqtisodiy faoliyat milliy banki tomonidan ITB bilan servis agenti toʻgʻrisidagi bitimlar boʻyicha oʻz funksiyalari va majburiyatlarini “Oʻzbekiston havo yoʻllari” milliy aviakompaniyasi foydasiga oʻtkazish toʻgʻrisidagi bitimlarni imzolaydi.

13. Oʻzbekiston Respublikasi Hukumati va ITB tuzilgan bitimlar doirasida Oʻzbekiston Respublikasi Tashqi iqtisodiy faoliyat milliy banki va “Oʻzbekiston havo yoʻllari” milliy aviakompaniyasining majburiyatlari boʻyicha Kafolat bitimlarini imzolaydi.

1. Vazirlar Mahkamasining “Oʻzbekiston havo yoʻllari” MAK havo kemalari parkini yangilash va unifikatsiyalash chora-tadbirlari toʻgʻrisida” 2009-yil 13-iyuldagi 198-son qarori 3-bandida:

birinchi xatboshidagi “texnika” soʻzidan soʻng “(toʻrtta “Boing-767-300ER” samolyoti va ularga moʻljallangan zaxira dvigateli bundan mustasno)” soʻzlari kiritilsin;

toʻrtinchi xatboshidan keyin quyidagi mazmundagi xatboshilar qoʻshilsin:

“Toʻrtta “ Boing-767-300ER” samolyoti va ularga moʻljallangan zaxira dvigatel boʻyicha quyidagilar moliyalashtirish manbalari ekanligi maʼlumot uchun qabul qilinsin:

birinchi va ikkinchi samolyotlar, shuningdek, zaxira dvigatel uchun — texnika qiymatining 90 foizi miqdorida Oʻzbekiston Respublikasi Tiklanish va taraqqiyot jamgʻarmasining kreditlari hamda texnika qiymatining 10 foizi miqdorida “Oʻzbekiston havo yoʻllari” MAKning oʻz mablagʻlari;

uchinchi va toʻrtinchi samolyotlar uchun — Islom taraqqiyot bankining (ITB) texnika qiymatining 100 foizi miqdoridagi moliyaviy mablagʻlari”;

beshinchi xatboshi sakkizinchi xatboshi deb hisoblansin.

2. Vazirlar Mahkamasining “Oʻzbekiston havo yoʻllari” MAK havo kemalari parkini yangilash va unifikatsiyalash” investitsiya loyihasini amalga oshirishga doir qoʻshimcha chora-tadbirlar toʻgʻrisida” 2012-yil 3-fevraldagi 29-son qarorining 3-bandi ikkinchi xatboshi va qarorga 1-ilova chiqarib tashlansin.