O‘zbekiston Respublikasi Oliy Majlisining 1999-yil 15-apreldagi “Jizzax viloyati tarkibida Yangiobod ma’muriy-hududiy tumani tuzish to‘g‘risida”gi va O‘zbekiston Respublikasi Oliy Majlisi Kengashining 1999-yil 3-iyundagi “Navoiy shahri tarkibida Karmana tumanini tashkil etish to‘g‘risida”gi qarorlariga binoan hamda ushbu hududlarda fuqarolarning huquq va manfaatlarini sud yo‘li bilan himoya qilinishini ta’minlash, jinoyatchilikka qarshi kurash va huquq-tartibotni mustahkamlash maqsadida, O‘zbekiston Respublikasi “Sudlar to‘g‘risida”gi Qonunining 79-moddasiga asosan:

1. O‘zbekiston Respublikasi Adliya vazirligining Jizzax viloyati Yangiobod tumani va Navoiy shahar Karmana tumani sudlarini tashkil etish to‘g‘risidagi taklifi ma’qullansin.

2. Jizzax viloyati Yangiobod tumani va Navoiy shahar Karmana tumani sudlarining tarkibi 1 va 2-ilovalarga muvofiq tasdiqlansin*.

3. Jizzax va Navoiy viloyat hokimliklari bir oy muddat ichida Yangiobod va Karmana tuman sudlarini binolar va zarur moddiy-texnikaviy vositalar bilan ta’minlasinlar.

4. Mazkur Farmonning ijrosini ta’minlash yuzasidan nazoratni olib borish O‘zbekiston Respublikasi Prezidentining Huquqni muhofaza qiluvchi va nazorat idoralari faoliyatini muvofiqlashtirish bo‘yicha Davlat maslahatchisi O‘. Komilov zimmasiga yuklatilsin.