Respublika bolalar ijtimoiy moslashuvi markazini yanada rivojlantirish va uning tomonidan imkoniyatlari cheklangan, ijtimoiy va huquqiy tahdid guruhlaridan bo‘lgan bolalarga va ularning oilalariga, shuningdek iqtidorli bolalarga ko‘rsatilayotgan ijtimoiy-pedagogik, huquqiy, tibbiy-reabilitatsiya va axborot-ta’lim yordamini kengaytirish uchun zarur shart-sharoitlar yaratish maqsadida Vazirlar Mahkamasi qaror qiladi:

1. Quyidagilar:

Vazirlar Mahkamasining “Respublika bolalar ijtimoiy moslashuvi markazini yanada rivojlantirish chora-tadbirlari to‘g‘risida” 2011-yil 23-sentabrdagi 267-son qaroriga muvofiq 2012-yilda Farg‘ona shahrida Respublika bolalar ijtimoiy moslashuvi markazining (keyingi o‘rinlarda Markaz deb ataladi) Farg‘ona mintaqaviy filiali tashkil etilganligi va 2013-2014-yillarda Qarshi va Samarqand shaharlarida Markazning mintaqaviy filiallari tashkil etilishi nazarda tutilayotganligi;

Markaz tomonidan Respublika bolalar ijtimoiy moslashuvi markazining mintaqaviy filiallari to‘g‘risidagi Namunaviy nizom belgilangan tartibda tasdiqlanganligi;

Markazning mintaqaviy filiallari faoliyatini moliyalashtirish, shu jumladan bitta avtotransport vositasi bilan ta’minlash Davlat budjeti parametrlarining tegishli yilga “Ta’lim” sohasida nazarda tutiladigan budjet mablag‘lari hisobiga amalga oshirilishi ma’lumot uchun qabul qilinsin.

2. Markaz mintaqaviy filiallarining namunaviy tuzilmasi ilovaga muvofiq tasdiqlansin, ular xodimlarining cheklangan soni 43 nafar, shu jumladan boshqaruv xodimlari soni – 9 nafar etib belgilansin.

3. Markaz O‘zbekiston Respublikasi Mehnat va aholini ijtimoiy muhofaza qilish vazirligi bilan birgalikda:

Markazning mintaqaviy filiallarini zamonaviy fikrlovchi, yuqori malakali, professionalizm va mas’uliyat tuyg‘usi yuqori bo‘lgan, imkoniyatlari cheklangan, ijtimoiy va huquqiy tahdid guruhlaridan bo‘lgan bolalarga va ularning oilalariga, shuningdek iqtidorli bolalarga ijtimoiy-pedagogik, huquqiy, tibbiy-reabilitatsiya va axborot-ta’lim yordami ko‘rsatish sohasida tegishli amaliy ish tajribasiga ega bo‘lgan xodimlar bilan ta’minlash yuzasidan zarur chora-tadbirlar ko‘rsin;

O‘zbekiston Respublikasi Moliya vazirligi bilan kelishgan holda ikki hafta muddatda xodimlarning ayrim toifalarini qo‘shimcha ravishda moddiy rag‘batlantirishni hisobga olgan holda Markaz filiallari xodimlariga mehnatga haq to‘lash bo‘yicha razryadlarni tasdiqlasin, shuningdek Markazning boshqaruv xodimlari uchun amalda bo‘lgan ustamalar to‘lash tartibini Markaz filiallari xodimlariga joriy etsin.

4. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari R.S. Azimov va O‘zbekiston Respublikasi Bosh vazirining o‘rinbosari A.I. Ikramov zimmasiga yuklansin.