O‘zbekiston Respublikasi Prezidentining “Davlat bojxona xizmati organlari faoliyatini yanada takomillashtirish va samaradorligini oshirish bo‘yicha chora-tadbirlar to‘g‘risida” 2011-yil 10-avgustdagi PQ-1595-son va “Mamlakatimizda ishlab chiqarilgan mahsulotlarning raqobatbardoshliligini yanada oshirish va tovarlarni respublikaga noqonuniy olib kirishga qarshi kurashni kuchaytirish to‘g‘risida” 2013-yil 29-yanvardagi PQ-1913-son qarorlarini bajarish yuzasidan, shuningdek bojxonada amalga oshirilayotgan ko‘zdan kechirishlar mexanizmini takomillashtirish va samaradorligini oshirish, bojxona nazoratini amalga oshirishda davlat bojxona xizmati organlari xodimlarining javobgarligini kuchaytirish maqsadida Vazirlar Mahkamasi qaror qiladi:

1. O‘zbekiston Respublikasi Vazirlar Mahkamasining “O‘zbekiston Respublikasining Bojxona chegarasi orqali olib o‘tilayotganda ko‘zdan kechirish majburiy bo‘lgan tovarlar Ro‘yxatini tasdiqlash to‘g‘risida” 2006-yil 4-maydagi 75-son qaroriga ilovaga muvofiq o‘zgartirish va qo‘shimchalar kiritilsin.

2. O‘zbekiston Respublikasi Davlat bojxona qo‘mitasi manfaatdor vazirliklar va idoralar bilan birgalikda o‘z idoraviy normativ-huquqiy hujjatlarini ushbu qarorga muvofiqlashtirsin.

3. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari R.S.Azimov zimmasiga yuklansin.

1. 2-bandning ikkinchi xatboshi quyidagi tahrirda bayon qilinsin:

“respublikaning bojxona chegarasi orqali olib o‘tilayotgan va ko‘rsatib o‘tilgan Ro‘yxatga kiritilgan tovarlar yuk bojxona deklaratsiyalari taqdim etish joylarida puxta ko‘zdan kechirilishini ta’minlasin”.

2. Quyidagi mazmundagi 2¹ — band qo‘shilsin:

“2¹. Belgilansinki, ko‘rsatib o‘tilgan Ro‘yxatga kiritilgan tovarlarni chegaradosh bojxona postlarida ko‘zdan kechirilishi quyidagi hollarda:

tovarga ilova qilingan hujjatlardagi ma’lumotlar o‘zaro bir-biriga muvofiq bo‘lmagan yoxud tashilayotgan tovarlarning to‘liq nomi va kodlari Tovarlarni tavsiflash va kodlashning uyg‘unlashtirilgan tizimiga muvofiq kamida 6 ta belgi darajasida ko‘rsatilmaganda;

bojxona nazoratining texnik vositalarini qo‘llash yakunlari bo‘yicha amaldagi ma’lumotlarning tovarga ilova qilingan hujjatlardagi ma’lumotlarga nomuvofiqligi aniqlanganda;

transport vositasining yuk bo‘lmasiga bevosita (erkin) kirish imkoniyati mavjud bo‘lganda;

O‘zbekiston Respublikasi Davlat bojxona qo‘mitasiga respublikaning boshqa huquqni muhofaza qilish organlari yoki respublika davlat boshqaruvi boshqa organlaridan tushgan materiallar, shuningdek xorijiy davlatlarning bojxona va boshqa davlat organlaridan hamda xalqaro tashkilotlardan olingan bojxonada ko‘zdan kechirishni amalga oshirish zarurligi to‘g‘risidagi ma’lumotlar mavjud bo‘lganda;

davlat bojxona xizmati organlari xodimlarida bojxona qonun hujjatlari buzilganligi to‘g‘risida asosli gumoni mavjud bo‘lganda majburiy tartibda amalga oshiriladi.

Bunda ko‘zdan kechirish davlat bojxona xizmati organi xodimining bildirgisi asosida hamda bojxona posti boshlig‘ining yoxud uning vazifasini bajaruvchi shaxsning yozma ruxsati bilan amalga oshiriladi”.