Respublikada pillachilik sohasini boshqarishni takomillashtirish, bozor munosabatlarini chuqurlashtirish hamda soha korxonalarining eksport salohiyatini oshirish maqsadida:

1. Oʻzbekiston Respublikasi Davlat mulkini boshqarish va tadbirkorlikni qoʻllab-quvvatlash davlat qoʻmitasi, Oʻzbekiston Respublikasi Qishloq va suv xoʻjaligi vazirligi, “Oʻzbekyengilsanoat” davlat uyushmasi, Oʻzbekiston qishloq xoʻjaligi ilmiy ishlab chiqarish markazi, Qoraqalpogʻiston Respublikasi Vazirlar Kengashi va viloyatlar hokimliklari, shuningdek, ipakchilik sohasida xoʻjalik yurituvchi subyektlarning:

Oʻzbekiston Respublikasi Qishloq va suv xoʻjaligi vazirligi huzuridagi “Pilla” uyushmasini, “Oʻzbekyengilsanoat” davlat uyushmasining “Andijon ipagi”, “Xon atlas” va “Kumush tola” aksiyadorlik kompaniyalarini tugatish;

“Shoyi” aksiyadorlik kompaniyasi hamda “Pilla-xolding” xolding kompaniyasini oʻz ichiga oladigan “Oʻzbekipagi” mustaqil uyushmasini tashkil etish;

ipakli va aralash gazlamalar ishlab chiqaradigan shoyi toʻqish korxonalari, shuningdek tabiiy shoyi ishlab chiqarish va qayta ishlash boʻyicha markaziy ilmiy-tadqiqot institutini oʻz ichiga oladigan “Shoyi” aksiyadorlik kompaniyasini tuzish;

tarkibiga pilla xomashyosi va ipakli kalava ishlab chiqaradigan shoyi toʻqish sanoati, ipak qurti urugʻi tayyorlaydigan zavodlar, xom pillani qabul qilish va dastlabki ishlov berish korxonalari, tutchilik xoʻjaliklari, ipak qurti naslchilik stansiyalari va avtotransport korxonalari, shuningdek, bevosita kompaniyaga boʻysundiriladigan Oʻzbekiston Ipakchilik ilmiy-tadqiqot instituti kiradigan “Pilla-xolding” xolding kompaniyasi va uning hududiy aksiyadorlik birlashmalarini tashkil etish haqidagi takliflari qabul qilinsin.

2. “Oʻzbek ipagi” uyushmasining asosiy vazifalari va faoliyat yoʻnalishlari quyidagicha belgilansin:

“Pilla-xolding” xolding kompaniyasi va “Shoyi” aksiyadorlik kompaniyasining sifatli quruq pilla, pilla xomashyosi va ipak kalava, jahon bozorida raqobatbardosh boʻlgan tabiiy va aralash shoyi gazlamalari ishlab chiqarishning yagona texnologik jarayonini taʼminlash borasidagi faoliyatini muvofiqlashtirish;

uyushma tarkibiga kiradigan kompaniyalarning korxona va tashkilotlari oʻrtasidagi xoʻjalik va texnologik aloqalarni shartnoma munosabatlari tizimini takomillashtirish yoʻli bilan mustahkamlash;

pillachilik sohasida xususiylashtirish jarayonini chuqurlashtirish hamda agrosanoat integratsiyasi va kooperatsiyasining yangi tashkiliy shakllarini rivojlantirish;

sifatli urugʻ va pilla tayyorlash, pillakashlik, ipak yigirish, shoyi toʻqish sohalari boʻyicha ishlab chiqarishga ilgʻor texnologiyalarni joriy etish borasida yagona texnikaviy va investitsion siyosat yuritish;

pillachilik sohasiga, jumladan, xorijiy sarmoyalar ishtirokidagi korxonalar barpo etish yoʻli bilan, xorijiy sarmoyalar jalb etish;

ipakchilik mahsulotlarini eksport qilish hajmini koʻpaytirish uchun ichki va tashqi bozorning marketing tadqiqotlarini amalga oshirish, respublika ipakchilik sanoati korxonalari mahsulotlarining jahon bozorida raqobatbardoshligini taʼminlash.

3. Yangi tutzorlar barpo etilgan maydonlar 3 yil muhlatga yer soligʻidan ozod qilinsin.

4. Oʻzbekiston Respublikasi Vazirlar Mahkamasi bir hafta muddat ichida mazkur Farmonning bajarilishi boʻyicha qaror qabul qilsin.