Oʻzbekiston Respublikasi bilan Hindiston Respublikasi, bundan keyin “Ahdlashuvchi Tomonlar” deb ataluvchilar,

jinoiy huquqbuzarlikni amalga oshirgan shaxslarni oʻzaro ushlab berish toʻgʻrisida quyidagi qoidalarni qabul qilish orqali har ikkala Tomonning jinoyatchilikka qarshi kurashishdagi hamkorlik samaradorligini oshirish niyatida,

jinoyatchilikning oldini olish va terrorizmga qarshi kurashda konkret tadbirlarni amalga oshirish zarurligini eʼtirof etib,

quyidagilar toʻgʻrisida ahdlashib oldilar:

1. Har bir Ahdlashuvchi Tomon ushbu Shartnomada koʻzda tutilgan holat va shartlarga muvofiq huquqbuzarlikda ayblanayotgan yoki hukm qilingan, soʻrayotgan Tomon hududida ushbu Shartnomaning 2-moddasida berilgan taʼrifga muvofiq, ushlab berishga olib keladigan huquqbuzarlikni amalga oshirgan hamda soʻralayotgan Tomon hududida boʻlib turgan shaxsni, uning ushbu huquqbuzarligi Shartnoma kuchga kirganidan avval yoki keyin amalga oshirilganidan qatʼi nazar, boshqa Ahdlashuvchi Tomonga ushlab berish majburiyatini oladi.

2. Ushlab berish, agar shunday holatlarda soʻralayotgan Tomon ham yurisdiksiyaga ega boʻladigan huquqbuzarlik yuzasidan, soʻrayotgan Tomon hududidan tashqarida amalga oshirilgan, ushbu Shartnomaning 2-moddasida berilgan taʼrifga muvofiq keladigan va uning yurisdiksiyasiga kiradigan huquqbuzarlik tufayli ham amalga oshirilishi mumkin. Bunday hollarda soʻralayotgan Tomon huquqbuzarlikning qay darajada ogʻir ekanligini hisobga olgan holda, ishning barcha jihatlariga eʼtibor qaratadi.

3. Ushlab berish, shuningdek ushbu Shartnomaning 2-moddasi taʼriflariga muvofiq keladigan, soʻrayotgan Tomonining fuqarosi uchinchi davlatda sodir etgan va soʻrayotgan Tomon oʻz yurisdiksiyasini huquqbuzarning fuqaroligi bilan dalillayotgan huquqbuzarlikka nisbatan, yoki soʻralayotgan Tomon hududida sodir etilgan hamda shu Tomonning qonunlariga koʻra ushlab berishga olib keladigan huquqbuzarlikka nisbatan ham amalga oshirilishi mumkin.

1. Har bir Ahdlashuvchi Tomonning qonunlariga koʻra kamida bir yil ozodlikdan mahrum etish bilan jazolanadigan huquqbuzarliklar ushbu Shartnomaga muvofiq ushlab berishni taqozo etadigan huquqbuzarliklar hisoblanadi.

2. Soliq toʻlash va daromad borasidagi, shuningdek fiskal tarzdagi huquqbuzarliklar ham ushlab berishni taqozo etadigan huquqbuzarliklar hisoblanadi.

Ushbu Shartnomaga muvofiq, ushlab berish talab etilayotgan shaxsning qilmishi, u soʻralayotgan Tomon hududida toʻla yoki qisman amalga oshirilgan boʻlishidan qatʼi nazar, bu qilmish va uning oqibati yoxud kutilayotgan oqibati, birgalikda olib qaralganida, ikkala Ahdlashuvchi Tomonning qonunlariga koʻra ushlab berishni taqozo etadigan huquqbuzarliklarga nisbatan ham ushlab berish amalga oshiriladi.

1. Ikkala Ahdlashuvchi Tomonning qonunlariga koʻra har qanday uchinchi shaxsning fitna, gijgijlash, suiqasdga urinish kabi qilmishlari, ushlab berishni taqozo etadigan har qanday huquqbuzarlikni boshlashi yoki unda ishtirok etishi huquqbuzarlik deb hisoblanadi.

2. Ikkala Ahdlashuvchi Tomonning qonunlariga koʻra Ahdlashuvchi Tomonlardan birining istalgan fuqarosi uning hududidan tashqarida amalga oshirgan har qanday huquqbuzarlik ham huquqbuzarlik deb hisoblanadi.

1. Quyidagi hollarda ushlab berishni rad etish mumkin:

1.1 huquqbuzarlik sodir etilgan paytda shaxs soʻralayotgan Tomonning fuqarosi boʻlgan boʻlsa; yoki

1.2 soʻrayotgan Tomonga bergan taqdirda u irqiy, diniy, milliy mansubiyati yoxud siyosiy qarashlari tufayli sudga tortilishi yoki jazolanishi mumkinligini isbot qilishi; yoki

1.3 u soʻrayotgan Tomonga barcha holatlarni hisobga olgan holda uni ushlab berish quyidagi sabablarga koʻra nohaq va shafqatsiz boʻlishini isbotlay olsa:

1.3.1 soʻralayotgan Tomonning qonunlariga koʻra, jinoiy taʼqibni qoʻzgʻash yoki hukmni ijro etish uchun belgilangan muddatning oʻtib ketganligi yoxud boshqa qonuniy asos bunga yoʻl bermasa;

1.3.2 unga qoʻyilgan aybning sudga tortishga olib kelmasligi, yoki

1.4 soʻralayotgan Tomonning qonunlariga koʻra ushlab berishga yoʻl qoʻyilmasa;

1.5 shaxs ayblanayotgan yoki shu asosda hukm qilingan huquqbuzarlik harbiy jinoyat boʻlib, umumiy jinoyat huquqida huquqbuzarlik sanalmasa.

2. Agar shaxs soʻrovda koʻrsatilgan huquqbuzarlik uchun soʻralayotgan Tomonda jinoiy taʼqib etilgan hamda hukm qilingan yoki oqlangan hollarda ham uni ushlab berish rad etilishi mumkin.

3. Soʻrovni taqozo etgan qilmishi uchun shaxs bu Tomonning sudi tarafidan sudlanishi mumkin boʻlsa, soʻralayotgan Tomon ushlab berish toʻgʻrisidagi soʻrovni rad etishi mumkin.

4. Oʻtalayotgan jazo muddatining tutashiga olti oydan oz muddat qolgan ushlab berish toʻgʻrisidagi soʻrov rad etilishi mumkin.

1. Agar huquqbuzarlik siyosiy xususiyatga ega boʻlsa, ushlab berish rad etilishi mumkin.

2. Ushbu Shartnomaga koʻra, quyidagi huquqbuzarliklar siyosiy xususiyatga ega huquqbuzarlik hisoblanmaydi:

(a) Havo kemalarini noqonuniy egallashning oldini olish toʻgʻrisida imzolash uchun Gaaga shahrida 1970-yil 16-dekabrda ochilgan konvensiyaga muvofiq huquqbuzarliklar;

(b) Fuqaro aviatsiyasi xavfsizligiga qarshi qaratilgan noqonuniy xatti-harakatlarning oldini olish toʻgʻrisida imzolash uchun Monreal shahrida 1971-yil 21-sentabrda ochilgan konvensiyaga muvofiq huquqbuzarliklar;

(c) Xalqaro muhofazaga ega boʻlgan shaxslarga, bunga diplomatik agentlar ham kiradi, qarshi qaratilgan jinoyatlarning oldini olish va barham berish toʻgʻrisida imzolash uchun Nyu-York shahrida 1973-yil 14-dekabrda ochilgan konvensiyaga muvofiq huquqbuzarliklar;

(d) Odamlarni garovga ushlab turishga qarshi Nyu- York shahrida 1979-yil 17-dekabrda ochilgan Xalqaro konvensiyaga muvofiq huquqbuzarliklar;

(e) qotillik;

(f) qasddan boʻlmagan va yengillashtiruvchi hollardagi qotillik;

(g) jarohatlash yoki ziyon yetkazganlik, qurol-yarogʻ, xavfli moddalar ishlatgan holda yoinki boshqa biron tarzda ataylabdan yaralash va ogʻir tan jarohati yetkazish;

(h) kishilar hayotiga tajovuz yoki mol-mulkka jiddiy ziyon yetkazish niyatida portlashlarni amalga oshirish;

(i) qasddan oʻzi yoki boshqalar vositasida kishilar hayotiga tajovuz yoki mol-mulkka jiddiy ziyon yetkazish niyatida portlovchi moddalarni ishlab chiqarish yoki sotib olish;

j) qasddan oʻzi yoki boshqalar vositasida kishilar hayotiga tajovuz yoki mol-mulkka jiddiy ziyon yetkazish niyatida oʻq otar qurollar va boshqa narsalarni saqlash;

(k) oʻzi va boshqa kishilarni hibsga olish yoki tutishga shaxsning qarshilik qilishi va daf etish niyatida qurol ishlatishi;

(l) kishilar hayotiga tajovuz qilish yoki ularning hayotiga xavf solib turgan falokatdan qutulish imkoniyatini yoʻqqa chiqarish niyatida jamoatchilik ishlatadigan yoki boshqa maqsadda qoʻllanadigan mol-mulkka ziyon yetkazish;

(m) toʻlov undirish niyatida kishilarni oʻgʻirlash, ayollar va bolalarni oʻgʻirlash, noqonuniy hibsga olish, noqonuniy ushlab turish, bunga garovga olish ham kiradi;

(n) qotillikka gijgijlash;

(o) soʻralayotgan Tomonning qonunlariga muvofiq terrorizmga aloqador deb hisoblanadigan boshqa huquqbuzarliklar, siyosiy tarzdagi bundan huquqbuzarliklar mustasno, yoki;

(p) mazkur huquqbuzarliklarni maxfiy ravishda amalga oshirish yoki amalga oshirishga urinish yoxud shunday huquqbuzarliklarni amalga oshirgan yoki amalga oshirishga uringan shaxslarga sheriklik qilish.

1. Agar soʻralayotgan Tomon ushbu Shartnoma 5- moddasining 1.1 va 3-bandlarida koʻrsatilgan sabablarga koʻra ushlab berishni rad etsa, u bu ishni qabul qilib olib, jinoiy taʼqibni amalga oshirish uchun oʻz vakolatli organlariga topshiradi.

2. Agar vakolatli organlar ushbu ish yuzasidan jinoiy taʼqibni amalga oshirmaslikka qaror qilgan boʻlsa, ushlab berish toʻgʻrisidagi soʻrov yana ushbu Shartnomaga muvofiq koʻrib chiqiladi.

1. Ushlab berilishi soʻralayotgan shaxs soʻralayotgan Tomon hududida boshqa jinoyati uchun jinoiy javobgarlikka tortilgan yoki jazoni oʻtayotgan boʻlsa, ushlab berish ish boʻyicha tadbirlar yakunlanishiga qadar, jazoni oʻtab boʻlish yoki muddatidan oldin ozod qilinishiga qadar kechiktirilishi mumkin, bu toʻgʻrida soʻrayotgan Tomonga xabar beriladi.

2. Ushlab berishning kechiktirilishi javobgarlikka tortish muddatining oʻtib ketishiga sabab boʻlsa yoki huquqbuzarlikni tekshirishni qiyinlashtiradigan boʻlsa, shaxs soʻrayotgan Tomonning maxsus soʻrovi boʻyicha vaqtincha ushlab berilishi mumkin.

3. Vaqtincha ushlab berilgan shaxs soʻralayotgan Tomonga ish boʻyicha tadbirlar tugashi bilanoq qaytarilishi lozim.

1. Ushlab berish toʻgʻrisidagi soʻrov diplomatik kanallar orqali yuboriladi.

2. Ushlab berish toʻgʻrisidagi soʻrovda:

2.1 ushlab berilishi soʻralayotgan shaxsning familiyasi va ismi (ota ismi), uning fuqaroligi, yashash yoki boʻlib turish joyi va boshqa zarur materiallar, shuningdek, iloji boʻlsa bu shaxsning ogʻzaki qiyofasi, fotorasmlari va barmoq izlari;

2.2 soʻrov ushlab berilishini taqozo etgan huquqbuzarlik tarkibining tavsifi; va

2.3 tegishli qonunning:

2.3.1 shunday huquqbuzarlik baholangan matni; hamda

2.3.2 ushbu huquqbuzarlik amalga oshirilganligi uchun sanksiyasi matni ilova etilishi kerak.

3. Jinoiy taʼqibni amalga oshirish uchun ushlab berish toʻgʻrisidagi soʻrov matniga mazkur maʼlumotlardan tashqari, soʻrayotgan Tomonning sudi yoki vakolatli organining hibsga olish uchun qarori nusxasi ilova etilishi lozim.

4. Soʻrov hukm qilingan shaxsga oid boʻlsa, unga shuningdek hukmning tasdiqlangan nusxasi hamda ushbu shaxs hukmni inkor etolmasligi xususida bayonnoma ilova qilinishi, shuningdek ushbu shaxs jazo muddatining qancha qismini oʻtamaganligi koʻrsatib oʻtilishi lozim.

5. Soʻralayotgan Tomon ushbu Shartnoma boʻyicha unga taqdim etilgan axborot yetarli emas, deb hisoblasa, tez orada qoʻshimcha axborot etilishi darkor.

1. Oshigʻich hollarda soʻralayotgan Tomon soʻrayotgan Tomon vakolatli organlarining diplomatik kanallar yoki Xalqaro Jinoiy Politsiya Tashkiloti INTERPOLning Milliy Markaziy Byurosi orqali bergan soʻroviga binoan oʻz qonunlariga muvofiq holda shaxsni ushlab berish toʻgʻrisidagi soʻrov olingunicha ham hibsga olishi mumkin. Bu xildagi soʻrovda ushbu shaxsni ushlab berish toʻgʻrisida soʻrov yuborish hamda unga tegishli hibsga olish toʻgʻrisida order yoki hukm mavjudligiga havola etilishi hamda agar mavjud boʻlsa, ushbu Shartnoma 9-moddasining 2.1 hamda 2.3 bandlarida koʻrsatilgan maʼlumotlar, shuningdek soʻralayotgan Tomon hududida shaxs huquqbuzarlikni amalga oshirgan yoki taʼqib qilinayotgan holida hibsga olish uchun order berilishida asqotadigan boshqa axborot boʻlishi lozim.

2. Agar ushlab berish toʻgʻrisidagi soʻrov olinmasa, soʻrov asosida hibsga olingan shaxs hibsga olinganidan keyin 60 kunlik muddat oʻtgunicha ozod qilinishi lozim. Bu qoida keyinchalik ushbu shaxsni ushlab berish toʻgʻrisida soʻrov olinganidan keyingi tadbirlarini oʻtkazishga toʻsqinlik qilmaydi.

1. Ushlab berilgan shaxs soʻralayotgan Tomonning roziligisiz soʻrayotgan Tomon hududida soʻrovda koʻrsatilganidan boʻlak huquqbuzarlikni amalga oshirganligi shuningdek uni ushlab berish toʻgʻrisidagi asoslovda etilgan, dalillar asosida fosh etilgan, biroq kamroq ahamiyatli boʻlgan huquqbuzarliklar uchun jazoga tortilmasligi hamda ushbu shaxs soʻralayotgan Tomonning oldindan roziligi olinmasdan turib hech qaysi uchinchi davlatga berib yuborilmasligi lozim.

2. Quyidagi hollarda soʻralayotgan Tomonning roziligini soʻrash talab etilmaydi:

2.1 ushlab berilgan shaxs jinoiy taʼqib, jazoni oʻtash tugaganligi yoki istalgan qonuniy asosda ozod etilganidan keyin 30 kun ichida, imkoni boʻlgani holda soʻrayotgan Tomon hududini tark etmagan boʻlsa. Berilgan shaxs soʻrayotgan Tomon hududini oʻziga bogʻliq boʻlmagan sabablarga binoan tark etish imkoni boʻlmagan vaqt bunga qoʻshilmaydi;

2.2 ushlab berilgan shaxs soʻrayotgan Tomon hududini tark etgach, oʻz ixtiyori bilan yana unga qaytib kelsa.

3. Ushbu modda 1-bandining qoidalari shaxs soʻrayotgan Tomonga qaytib kelganidan keyin amalga oshirgan huquqbuzarliklarga yoki bu huquqbuzarliklarga bogʻliq ravishda kelib chiqadigan masalalarga tatbiq etilmaydi.

1. Bir Ahdlashuvchi Tomon hududida uning qonunlariga muvofiq ravishda nashr etilgan yoki tasdiqlangan, shuningdek vakolatli sudlar va boʻlak organlar tarafidan belgilangan tartibda olingan hujjatlar boshqa Ahdlashuvchi Tomon hududida legalizatsiya qilinmaydi.

2. Bir Tomon hududida rasmiy hisoblangan hujjatlar ikkinchi Tomon hududida ham rasmiy kuchga ega boʻladi.

1. Bir huquqbuzarlik yuzasidan Ahdlashuvchi Tomonlardan bir miqdordagi soʻrovlar tushgan boʻlsa, ustuvorlik avval huquqbuzarlik qaysi Tomonning hududida amalga oshirilib, uning xavfsizligi va manfaatlariga, yoki fuqarolarining xavfsizligi hamda manfaatlariga daxl qilgan boʻlsa, oʻshanga va oxirgi navbatda ushlab berilishi soʻralayotgan shaxs qaysi Tomonning fuqarosi boʻlsa, oʻshanga beriladi.

2. Agar shart-sharoit bir xil boʻlsa, soʻrovni birinchi boʻlib bergan Ahdlashuvchi Tomonga imtiyoz beriladi. Agar ushlab berish bir necha huquqbuzarlik yuzasidan talab etilayotgan boʻlsa, imtiyoz jinoyat tarkibi va uning jiddiyligiga qarab belgilanadi.

Soʻrayotgan Tomonning qonunlariga muvofiq, ushlab berilishi soʻralayotgan shaxsga amalga oshirgan huquqbuzarligi uchun oʻlim jazosi berilishi mumkin boʻlsa, ammo soʻralayotgan Tomonning qonunlarida bunday huquqbuzarlik uchun oʻlim jazosini belgilash koʻzda tutilmagan boʻlsa, bunday hollarda soʻrayotgan Tomon soʻralayotgan Tomonning fikricha oʻlim jazosi amalga oshirilmasligiga yetarli darajada inontirmagunicha ushlab berish rad etilishi mumkin.

1. Ushlab berishga ruxsat olinganligi toʻgʻrisida xabarni olgach, Tomonlar asossiz kechiktirishsiz talab etilayotgan shaxsni oʻtkazish yuzasidan kelishib oladilar va soʻralayotgan Tomon soʻrayotgan Tomonga talab etilayotgan shaxs qaysi muddat davomida berish uchun ushlanganini xabar qiladi.

2. Shaxs soʻralayotgan Tomon hududidan shu soʻralayotgan Tomon belgilagan maqbul vaqt ichida qabul qilib olib ketilishi kerak, basharti, shaxs bu davr ichida olib ketilmasa, soʻralayotgan Tomon ushbu shaxsni ozod qilishi va uni ayni jinoyati tufayli ushlab berishni rad etishi mumkin.

3. Tomonlardan birontasi uzrli sabablarga binoan ushlab berilishi kerak boʻlgan shaxsni berish yoki qabul qilish imkonini topolmasa, u bu toʻgʻrisida boshqa Tomonni xabardor qiladi. Bu holda har ikkala Tomon ushlab berishning yangi muddatini tayinlaydilar, bunda ushbu moddaning 2-bandi qoidalari qoʻllanadi.

1. Agar shaxs biron-bir Tomonga boshqa Tomonning hududi orqali uchinchi davlatdan olib kelinadigan boʻlsa, ushbu shaxs. beriladigan Tomon boshqa Tomondan ushbu shaxsni uning hududi orqali tranzit oʻtkazish uchun ruxsat berishni soʻraydi. Bu qoida havo transportidan foydalanilayotgan va boshqa Tomonning hududida qoʻnib oʻtish moʻljallanmagan hollarda qoʻllanmaydi.

2. Tegishli axborot darj etilgan bunday soʻrov olingach, soʻralayotgan Tomon ushbu soʻrovni oʻz qonunlarida koʻzda tutilgan tartiblarga muvofiq koʻrib chiqadi. Agar bu soʻrovni bajarish uning tub maqsadlariga ziyon yetkazmasa, soʻralayotgan Tomon uni tezda qondirish chorasini koʻradi.

3. Tranzit tashish chogʻida tranzit davlati shaxsni hibsda saqlashning yuridik imkoniyatlarini etadi.

4. Moʻljallanmagan qoʻnish hollarida tranzit olib oʻtilishi toʻgʻrisida soʻrov berilishi kerak boʻlgan Tomon kuzatuvchi xodimning iltimosiga koʻra, tranzit tashish toʻgʻrisida ushbu moddaning 1-bandi qoidalariga muvofiq soʻrov olingunicha 48 soatlik vaqt mobaynida shaxsni hibsda ushlab turishi mumkin.

1. Soʻralayotgan Tomon oʻz qonunlarida belgilangan tartiblar doirasida, soʻrayotgan Tomonning soʻroviga koʻra, ushlab berilayotgan shaxs amalga oshirgan jinoyat quroli boʻlib xizmat qilgan, shuningdek jinoyat izlari qolgan yoki jinoyat orqasida topilgan narsalarni berib yuboradi.

2. Mazkur narsalar ushlab berilishi lozim boʻlgan shaxsning oʻlimi, qochib ketganligi yoki boshqa sabablar bilan amalga oshmay qolgan hollarda ham berib yuboriladi.

3. Soʻralayotgan Tomon ushbu moddaning 1-bandida koʻrsatilgan narsalarni berib yuborishni, agar ular soʻralayotgan Tomonda boshqa jinoiy ish koʻrib chiqilishi uchun lozim boʻlsa, bu ish yakunlanguniga qadar orqaga surishi mumkin.

4. Uchinchi shaxslarning soʻrayotgan Tomonga berib yuborilgan narsalariga boʻlgan huquqlariga qayta ziyon yetkazilmaydi. Ishni koʻrib chiqish yakunlanganidan keyin soʻrayotgan Tomon bu narsalarni oʻz hududida yashaydigan egalariga qaytarib beradi. Agar ularning egalari soʻralayotgan Tomon hududida boʻlsa, bu narsalar ularga topshirish uchun berib yuboriladi. Agar narsalarning egalari uchinchi davlat hududida boʻlsalar, narsalarni ularga qaytarish xarajatlari soʻrayotgan Tomon hisobidan boʻladi.

5. Narsalar va pul mablagʻlarini oʻtkazish soʻralayotgan Tomon qonunlarida koʻzda tutilgan doirada boʻladi.

Tomonlar oʻz qonunlariga muvofiq, ushlab berishni taqozo etadigan jinoiy ishlar yuzasidan bir-biriga imkoni boricha huquqiy yordam beradilar.

Ushlab berishga aloqador barcha xarajatlarni hududida ushlab berish amalga oshiriladigan Ahdlashuvchi Tomon koʻtaradi. Ushlab berilgan shaxsni ikkinchi Ahdlashuvchi Tomon hududi orqali uchinchi davlatdan tranzit tashish xarajatlari tranzitni amalga oshirayotgan Tomon zimmasida boʻladi.

Ushbu Shartnomani bajarishda Ahdlashuvchi Tomonlar oʻz davlat tillaridan foydalanadilar va boshqa Ahdlashuvchi Tomonning davlat tilidagi yoki inglizcha tarjimasini ilova etadilar.

Ushbu Shartnoma Ahdlashuvchi Tomonlarning ular ishtirok etgan boshqa xalqaro konvensiyalar shartnomalardan kelib chiqadigan majburiyatlariga daxl qilmaydi.

Ahdlashuvchi Tomonlar istalgan Ahdlashuvchi Tomonning iltimosiga binoan ushbu Shartnomani yaxlit yoinki undagi biron-bir konkret jihatni talqin qilish va qoʻllash yuzasidan darhol maslahatlashuv oʻtkazadilar.

1. Ushbu Shartnoma ratifikatsiya qilinishi kerak hamda ratifikatsiya yorliqlari almashingan kundan kuchga kiradi.

2. Istalgan Ahdlashuvchi Tomon diplomatik kanallar orqali istalgan vaqtda ikkinchi Ahdlashuvchi Tomonga uning faoliyatini toʻxtatish niyati toʻgʻrisida bildirishnoma yuborib, uning faoliyatini toʻxtatishi mumkin. Ushbu Shartnoma shunday bildirishnoma olganidan keyin olti oy oʻtgach oʻz faoliyatini toʻxtatadi.

Dehli shahrida, 2000-yil 2-mayda ikki nusxada, oʻzbek, hind va ingliz tillarida tuzildi, bunda barcha matnlar bir xil kuchga ega. Talqinda har xilliklar kelib chiqqan hollarda ingliz tilidagi matn qoʻllanadi.