Oʻzbekiston Respublikasi bilan Pokiston Islom Respublikasi, bundan keyin “Tomonlar” deb ataluvchilar,

ekstraditsiya toʻgʻrisida shartnoma yordamida ikki davlat oʻrtasida jinoyatchilik va terrorizmga qarshi kurashdagi hamkorligi samarali boʻlishiga koʻmaklashish istagida,

quyidagilar toʻgʻrisida ahdlashib oldilar:

Har bir Tomon boshqa Tomonga tegishli soʻrov olingan taqdirda hamda ushbu Shartnoma qoidalarini eʼtiborga olib, soʻrayotgan Tomonda qidirilayotgan istalgan shaxsni boshqa Tomonga tutib topshirishga olib keladigan huquqbuzarlik yuzasidan sud taʼqibini amalga oshirish yoki shunday huquqbuzarlik yuzasidan hukm chiqarilishi yoxud uning ijro etilishi uchun tutib topshirishga rozidir.

1. Ushbu Shartnomaga koʻra, ikkala Tomonning qonunlariga muvofiq soʻrayotgan Tomonning yurisdiksiyasiga kiradigan va kamida bir yil qamashni yoki boshqa tarzda ozodlikdan mahrum etishni taqozo etadigan yoxud yanada jiddiyroq jazo beriladigan va ekstraditsiya toʻgʻrisida tegishli qonunlarga muvofiq keladigan huquqbuzarliklar tutib topshirishga olib keladigan huquqbuzarliklar sanaladi. Tutib topshirish toʻgʻrisidagi soʻrov shunday huquqbuzarlikni amalga oshirganligi uchun qamash yoki boshqacha tarzda ozodlikdan mahrum etish toʻgʻrisida hukm ijro etilishi uchun qidirilayotgan shaxsga taalluqli boʻlsa, bu jazo muddatining tugashiga olti oydan ortiqroq vaqt qolgan holdagina tutib topshirish amalga oshirilishi mumkin.

2. Biron-bir huquqbuzarlik ikkala Tomonning qonunlariga binoan ana shunday huquqbuzarlikmi yoki yoʻqmi ekanligini aniqlash uchun quyidagilarning ahamiyati yoʻq:

a) ayni huquqbuzarlikni tashkil etgan faoliyat yoki faoliyatsizlik Tomonlarning qonunlariga koʻra huquqbuzarlikning shu toifasiga mansubmi yo ayni huquqbuzarlik shunday atama bilan nomlanadimi;

b) ushbu huquqbuzarlikni tashkil etgan unsurlar Tomonlarning qonunlariga koʻra farqlanadimi, bunda soʻrayotgan Tomon dalil qilib keltirayotgan faoliyat yoki faoliyatsizlik eʼtiborga olinishi koʻzda tutiladi.

3. Tutib topshirish toʻgʻrisidagi soʻrov bir necha alohida huquqbuzarlikka oid boʻlsa va ularning har biri ikkala Tomonning qonunlariga koʻra jazolansa, ammo ularning ayrimlari ushbu moddaning 1-bandida bayon etilgan talablarga toʻgʻri kelmasa, soʻralayotgan Tomon shaxsni oxirgi huquqbuzarliklari yuzasidan, hech boʻlmaganda tutib topshirishga olib keladigan bitta huquqbuzarligi uchun tutib topshirilishiga ruxsat berishi mumkin.

4. Quyidagi atamalar ushbu maʼnoda qoʻllanadi:

“faoliyat” — shaxsning ijtimoiy xavfli, ongli va faol xatti-harakati;

“faoliyatsizlik” — qonunda belgilab qoʻyilgan, shaxsning bajarishi majburiy boʻlgan muayyan faoliyati bajarmasligidan iborat ijtimoiy xavfli, ongli va sust xatti-harakati.

1. Ushbu Shartnomaga koʻra quyidagi hollarda tutib topshirish kafolatlanmasligi kerak:

a) qidirilayotgan shaxs soʻralayotgan Tomon yoki uchinchi davlatning sud organlari tarafidan tutib topshirish soʻralishiga olib kelgan jinoyati uchun aybdor deb topilgan, hukm qilingan yoki oqlangan boʻlsa;

b) qidirilayotgan shaxsning sud taftishi soʻralayotgan Tomonning qonunlariga muvofiq muddati oʻtganligi sababli toʻxtatilsa;

s) tutib topshirish soʻralgan jinoyati uchun shaxs, xoh soʻralayotgan Tomonda, xoh uchinchi davlatda boʻlsin, jazoni oʻtayotgan boʻlsa.

2. Ichki qonunlarga muvofiq va hamjihatlik asosida tutib topshirilishi soʻralayotgan shaxs soʻralayotgan Tomonning fuqarosi boʻlsa, soʻrovni bajarish rad etilishi mumkin. Tutib topshirish rad etiladigan boʻlsa, soʻralayotgan Tomon shaxsni tutib topshirishni soʻrashga olib kelgan jinoyati uchun sud taʼqibi etish masalasini hal etish uchun vakolatli organlarga topshirishi mumkin. Soʻralayotgan Tomon soʻrayotgan Tomonga amalga oshirilgan har qanday ish va jinoiy tekshiruv natijalarini xabar qilishi lozim. Shaxsning fuqaroligi tutib topshirishni talab etishga olib kelgan jinoyat sodir etilgan paytda aniqlanishi kerak.

1. Agar huquqbuzarlik siyosiy xususiyatga ega boʻlsa yoki tutib topshirish talab qilingan shaxsga soʻralayotgan Tomon siyosiy boshpana bergan boʻlsa, tutib topshirish rad etilishi mumkin.

2. Ushbu Shartnomaga koʻra quyidagi huquqbuzarliklar siyosiy xususiyatga ega huquqbuzarlik hisoblanmaydi:

a) Gaaga shahrida 1970-yil 16-dekabrda imzolash uchun ochilgan Havo kemasini noqonuniy egallashning oldini olish toʻgʻrisidagi konvensiyaga muvofiq huquqbuzarliklar;

b) Monreal shahrida 1971-yil 21-sentabrda imzolash uchun ochilgan Fuqaro aviatsiyasi xavfsizligiga qarshi qaratilgan noqonuniy xatti-harakatlarning oldini olish toʻgʻrisidagi konvensiyaga muvofiq huquqbuzarliklar;

c) Nyu-York shahrida 1973-yil 14-dekabrda imzolash uchun ochilgan Xalqaro muhofazaga ega boʻlgan shaxslarga, bunga diplomatik agentlar ham kiradi, qarshi qaratilgan jinoyatlarning oldini olish va unga barham berish toʻgʻrisidagi konvensiyaga muvofiq huquqbuzarliklar;

d) Nyu-York shahrida 1979-yil 17-dekabrda imzolash uchun ochilgan Odamlarni garovga tutib qolishga qarshi Xalqaro konvensiyaga muvofiq huquqbuzarliklar;

e) Oʻzbekiston Respublikasi bilan Pokiston Islom Respublikasi ishtirok etgan yoki ishtirok etishi mumkin boʻlgan, terrorizmga qarshi kurash sohasida xalqaro konvensiyalarga muvofiq huquqbuzarliklar.

1. Tutib topshirish toʻgʻrisidagi soʻrov yozma ravishda yuboriladi. Soʻrovlar, tasdiqlovchi hujjatlar va boshqa xabarlar Tomonlar tayinlagan markaziy organlar tarafidan diplomatik kanallar orqali bevosita joʻnatiladi.

2. Tutib topshirish toʻgʻrisidagi soʻrovga quyidagi materiallar ilova qilinadi:

a) barcha hollarda;

i) talab etilayotgan shaxsning mumkin qadar aniq tasviri hamda ushbu shaxsning kimligi va fuqaroligini aniqlashda asqotadigan boshqa har qanday axborot;

ii) qonunning ushbu huquqbuzarlikni toifalaydigan tegishli moddasi matni, yoki zarur boʻlsa, ushbu huquqbuzarlik toʻgʻri keladigan moddasi matni va ushbu huquqbuzarlik uchun berilishi mumkin boʻlgan jazo tavsifi;

b) shaxs biron-bir huquqbuzarlikda ayblanayotgan boʻlsa, sud tomonidan yoki boshqa vakolatli organ tarafidan ushbu shaxsni hibsga olish toʻgʻrisida berilgan order yoki shunday orderning tasdiqlangan nusxasi, tutib topshirish toʻgʻrisida soʻrov kelib tushishiga sabab boʻlgan huquqbuzarlik tavsifi, shuningdek taxmin etilgan huquqbuzarlik tarkibidagi faoliyat yoki faoliyatsizlik tavsifi, bunga u amalga oshirilgan vaqt hamda joy ham qoʻshiladi;

c) shaxs huquqbuzarlik boʻyicha hukm qilingan boʻlsa, tutib topshirish toʻgʻrisidagi soʻrov kelib tushishiga sabab boʻlgan huquqbuzarlikning tavsifi, shuningdek taxmin etilgan huquqbuzarlik tarkibidagi faoliyat yoki faoliyatsizlik tavsifi hamda qaror yoxud boshqa har qanday hujjatning asli yo tasdiqlangan nusxasi, unda ayblov qismi va chiqarilgan hukm bayon etilishi, hukmni ijro etish tarzi va jazoning qolgan qismi koʻrsatilishi lozim;

d) shaxs huquqbuzarlik yuzasidan hukm qilingan boʻlsa, uning yoʻqligida ushbu moddaning 2- (b) bandida eslatilgan hojatlardan tashqari ushbu shaxs uni himoya qilish yoki uning borligi chogʻida ishni qayta muhokama etish uchun qanday huquqiy vositalarga ega ekanligi tavsifi;

e) shaxs huquqbuzarlik yuzasidan hukm qilingan, ammo hukm ijro etilmagan boʻlsa, tutib topshirish toʻgʻrisidagi soʻrov kelib tushishiga sabab boʻlgan huquqbuzarlikning tavsifi, shuningdek taxmin etilgan huquqbuzarlik tarkibidagi faoliyat yo faoliyatsizlik tavsifi, shuningdek ayblov qismi bayon etilgan hujjat hamda hukmni ijro etish moʻljallanayotganligini tasdiqlovchi ariza.

3. Tutib topshirish toʻgʻrisidagi soʻrovni asoslash uchun taqdim qilinadigan hujjatlar soʻralayotgan Tomon tiliga yoki inglizchaga tarjima qilib beriladi.

Tutib topshirish toʻgʻrisida soʻrov va uni tasdiqlovchi hujjatlar, shuningdek bunday soʻrovga javoban berilgan boshqa materiallar vakolatli organning gerbli muhri va vakolatli mansabdor shaxsning imzosi bilan tasdiqlangan boʻlishi lozim.

Soʻralayotgan Tomon tutib topshirish toʻgʻrisidagi soʻrovni asoslash uchun berilgan axborotni yetarli emas deb hisoblasa, u oʻzi belgilaydigan maqbul bir muddat ichida qoʻshimcha axborot berishni talab qilishi mumkin.

1. Soʻralayotgan Tomon tutib topshirish toʻgʻrisidagi soʻrovni uning qonunlarida koʻzda tutilgan protseduralarga muvofiq koʻrib chiqadi va oʻz qarori toʻgʻrisida soʻrayotgan davlatga darhol xabar qiladi.

2. Soʻrov toʻla yoki qisman rad etilsa, buning sabablari izohlab berilishi mumkin.

1. Tutib topshirishga ruxsat berilganligi toʻgʻrisida xabar olingach, Tomonlar shaxsni topshirish toʻgʻrisida darhol kelishib oladilar va soʻralayotgan Tomon soʻrayotgan Tomonga talab etilgan shaxs qancha vaqt davomida topshirish uchun hibsda ushlab turilganini xabar qiladi.

2. Shaxs soʻralayotgan Tomon hududidan shu Tomon belgilagan maqbul muddat mobaynida qabul qilinadi. Shaxs shu davr mobaynida qabul qilinmasa, soʻralayotgan Tomon uni ozod qilishi hamda ushbu huquqbuzarlik munosabati bilan bu shaxsni tutib topshirishni rad etishi mumkin.

3. Agar oʻziga bogʻliq boʻlmagan sabablarga koʻra biror-bir Tomon shaxsni tutib topshira olmasa yoki qabul qila olmasa, u bu toʻgʻrida boshqa Tomonni xabardor qiladi. Tomonlar tutib topshirishning yangi muddatini birgalikda belgilaydi, bunda ushbu moddaning 2-bandi qoidalari qoʻllanadi.

Agar shaxs tutib topshirish toʻgʻrisida iltimos kelib tushgan huquqbuzarlik uchun emas, balki boshqa biror-bir huquqbuzarlik uchun belgilangan hukmni ijro etish maqsadida hukm qilingan boʻlsa, soʻralayotgan Tomon bu shaxsga nisbatan sud taʼqibi qoʻzgʻatish maqsadida tutib topshirish toʻgʻrisidagi soʻrov yuzasidan qaror qabul qilinganidan keyin talab qilinayotgan shaxsni topshirishni kechiktirishi mumkin. Bunday holda soʻralayotgan Tomon soʻrayotgan Tomonni tegishli ravishda xabardor qiladi.

1. Agar topshirishga ruxsat berilgan boʻlsa, soʻralayotgan Tomon qonunlari yoʻl qoʻyadigan darajada hamda uchinchi davlatlarning tegishli ravishda rioya etilishi zarur boʻlgan huquqlarini eʼtiborga olgan holda, huquqbuzarlik natijasida qoʻlga kiritilgan yoki dalil sifatida asqotishi mumkin boʻlgan, soʻralayotgan Tomonda topilgan mulk soʻrayotgan Tomon iltimosiga koʻra topshiriladi.

2. Aytib oʻtilgan mulk soʻralayotgan Tomonda hibsga olinishi yoki musodara qilinishi lozim boʻlsa, u ushlab qolinishi yoki vaqtincha topshirilishi mumkin.

3. Soʻralayotgan Tomon qonunlari yoki uchinchi davlatlar huquqlarini himoya qilish manfaatlari taqozo etsa, mazkur Tomon yoki davlat talabiga koʻra shu yoʻsinda topshirilgan har qanday mulk soʻralayotgan Tomonga sud tekshiruvi tutagach bepul qaytarib beriladi.

1. Ushbu Shartnomaga muvofiq tutib topshirilayotgan shaxsga nisbatan quyidagi shartlardan biriga toʻgʻri keladigan huquqbuzarliklardan tashqari hollarda sud taʼqibi, hukm chiqarish, ushlash, qayta tutib uchinchi davlatga topshirish amalga oshirilmaydi va tutib topshirishgacha sodir etilgan har qanday huquqbuzarlik uchun soʻrayotgan Tomon hududida uning shaxsiy erkinligi biror-bir boshqa cheklashga duchor etilmaydi:

a) tutib topshirish toʻgʻrisida ruxsat berilgan huquqbuzarlik;

b) uning xususida soʻralayotgan Tomon oʻz roziligini beradigan har qanday boshqa huquqbuzarlik. Agar huquqbuzarlikning oʻzi ushbu Shartnomaga muvofiq tutib berishga olib kelsa, rozilik beriladi.

2. Ushbu moddaga muvofiq soʻralayotgan Tomon roziligini olish uchun iltimosga ushbu Shartnoma 5-moddasining 2-bandida koʻrsatilgan hujjatlar hamda huquqbuzarlik xususida tutib topshirilayotgan shaxs tomonidan qilingan har qanday arizaning yuridik rasmiylashtirilgan yozuvi ilova qilinadi.

3. Agar shaxs soʻrayotgan Tomondan chiqib ketish imkoniyatiga ega boʻlib, u huquqbuzarlik uchun masʼuliyatdan uzil-kesil ozod qilinganidan keyin 45 kun davomida buni qilmagan boʻlsa, yoki agar bu shaxs soʻrayotgan Tomon hududidan avval chiqib ketgani holda unga ixtiyoriy ravishda qaytgan boʻlsa, ushbu moddaning 1-bandi qoʻllanmaydi.

1. Agar shaxs Tomonlardan biriga uchinchi davlatdan boshqa Tomonning hududi orqali tutib topshirilishi kerak boʻlsa, bu shaxs topshirilishi lozim boʻlgan Tomon boshqa Tomondan uning hududi orqali bu shaxsni tranzit oʻtkazishga ruxsat soʻraydi. Ushbu qoida boshqa Tomon hududida qoʻnishi rejalashtirilmagan havo transportidan foydalanishda qoʻllanmaydi.

2. Bir Tomondan tegishli axborotni oʻz ichiga olgan bunday iltimos olingach, boshqa Tomon bu iltimosni oʻz qonunlarida koʻzda tutilgan protseduralarga muvofiq ravishda koʻrib chiqadi. Mazkur Tomon bu iltimos uning asosiy manfaatlariga ziyon yetkazmasagina uni tezlik bilan qoniqtiradi.

3. Tranzit oʻtkazish vaqtida tranzit davlati shaxsni qoʻriqlashning yuridik imkoniyatini taʼminlaydi.

4. Rejalashtirilmagan qoʻnishga toʻgʻri kelsa, tranzit oʻtkazish uchun ruxsat soʻralishi lozim boʻlgan Tomon hamrohlik qiluvchi xodimning iltimosiga koʻra oʻtkazishayotgan shaxsni 48 soat davomida ushbu moddaning 1-bandiga muvofiq taqdim etiladigan tranzit oʻtkazish toʻgʻrisida iltimos olingunicha qoʻriqlab turishi mumkin.

Agar bir Tomon bir shaxsni tutib topshirish toʻgʻrisida bir vaqtning oʻzida boshqa Tomondan va qaysidir uchinchi davlatdan soʻrovlar olsa, u shaxsni ulardan qaysi biriga topshirishni oʻz ixtiyoriga koʻra belgilaydi.

Ushbu Shartnomaga muvofiq markaziy organlar barcha soʻrovlarni, shuningdek ularga javoblarni beradilar va oladilar.

Oʻzbekiston Respublikasidan — Prokuratura hamda Pokiston Islom Respublikasidan — Ichki ishlar va narkotik moddalarini nazorat qilish vazirligi (Ichki boʻlim) markaziy organlar deb hisoblanadi.

1. Soʻralayotgan Tomon tutib topshirish toʻgʻrisidagi iltimosga taalluqli ravishda kelib chiqqan har qanday sud tekshiruvi xarajatlarini oʻz yurisdiksiyasi doirasida qoplaydi.

2. Soʻralayotgan Tomon, shuningdek mulkni hibsga olish va topshirish, yoxud uning xususida tutib topshirish toʻgʻrisida iltimos kelib tushgan shaxsni hibsga olish va ushlash munosabati bilan oʻz hududida qilingan xarajatlarni qoplaydi.

3. Soʻrayotgan Tomon soʻralayotgan Tomon hududidan shaxsni olib chiqish xarajatlarini, jumladan tranzitga taalluqli xarajatlarni qoplaydi.

Ushbu Shartnoma Tomonlarning ular ishtirok etgan xalqaro shartnoma/konvensiyalaridan kelib chiqadigan huquq va majburiyatlariga daxl qilmaydi.

Istalgan Tomonning iltimosiga koʻra Tomonlar ushbu Shartnomani ham umuman, ham konkret biron-bir soʻrovga taalluqli ravishda talqin qilish va tatbiq etish borasida darhol maslahatlashuv oʻtkazadilar.

Ushbu Shartnoma Tomonlarning yozma ravishda bergan oʻzaro roziligiga koʻra alohida bayonnomalar tuzish orqali oʻzgartirilishi va toʻldirilishi mumkin. Bu bayonnomalar ushbu Shartnomaning 20-moddasi qoidalariga muvofiq kuchga kiradi va ushbu Shartnomaning tarkibiy qismi hisoblanadi.

1. Ushbu Shartnoma ratifikatsiya qilinishi, qabul qilib olinishi yoki tasdiqlanishi lozim. Ratifikatsiya qilish, qabul qilib olish yoki tasdiqlash toʻgʻrisidagi hujjatlarni almashish iloji boricha qisqa muddatda amalga oshiriladi.

2. Ushbu Shartnoma ratifikatsiya qilish, qabul qilib olish yoki tasdiqlash toʻgʻrisidagi hujjatlar almashingan kundan keyin oʻttizinchi kuni kuchga kiradi.

3. Ushbu Shartnoma u kuchga kirganidan soʻng berilgan soʻrovlarga taalluqli boʻladi.

4. Istalgan Tomon boshqa Tomonga xabarnoma yuborib, ushbu Shartnomani denonsatsiya qilishi mumkin. Bunday denonsatsiya boshqa Tomon xabarnomani olgan sanadan olti oy oʻtgach kuchga kiradi.

Islomobod shahrida 2001-yil yanvarda ikki nusxada, har biri oʻzbek va ingliz tillarida tuzildi, bunda barcha matnlar bir xil kuchga ega. Ushbu Shartnoma qoidalarini talqin qilishda tafovutlar yuzaga chiqsa, ingliz tilidagi matn asosiy deb hisoblanadi.