Mahalliy korxonalar tomonidan ishlab chiqarilayotgan mahsulotlarning raqobatbardoshligini yanada oshirish, ularni ishlab chiqarish hajmlarini koʻpaytirish hamda ichki va tashqi bozorlarda sotish va shu asosda sanoat ishlab chiqarishining barqaror rivojlanishi va eksport salohiyat oʻsishini taʼminlash maqsadida Vazirlar Mahkamasi qaror qiladi:

1. Vazirliklar, idoralar, kompaniyalar, uyushmalar va yirik sanoat korxonalari tomonidan Oʻzbekiston Respublikasi Iqtisodiyot vazirligi va Moliya vazirligi bilan birgalikda birinchi navbatda:

energiya resurslari isteʼmolini qisqartirish va ishlab chiqarish energiya samaradorligini oshirish;

axborot-kommunikatsiya texnologiyalarini joriy etish asosida texnologiya jarayonlarini hamda moddiy-xomashyo resurslari sarflarini, foydalanish va noishlab chiqarish xarajatlari meʼyorlarini ratsionalizatsiyalash;

mehnat unumdorligini oʻstirish, boshqaruv va sanoat-ishlab chiqarish xodimlari sonini maqbullashtirish, boshqa omillar hisobiga ishlab chiqarish obyektlari boʻyicha sanoat mahsuloti tannarxini pasaytirishga yoʻnaltirilgan kompleks chora-tadbirlar ishlab chiqilganligi maʼlumot uchun qabul qilinsin.

2. Kompaniyalar, uyushmalar va boshqa xoʻjalik birlashmalari va korxonalarning Oʻzbekiston Respublikasi Iqtisodiyot vazirligi, Moliya vazirligi hamda Xususiylashtirish, monopoliyadan chiqarish va raqobatni rivojlantirish davlat qoʻmitasi bilan kelishilgan 2013-yilda xoʻjalik birlashmalari va yirik sanoat korxonalarida mahsulot tannarxini oʻrtacha 11,2 foizga qisqartirishning yigʻma parametrlari boʻyicha takliflari ilovaga* muvofiq maʼqullansin.

Vazirliklar, idoralar va xoʻjalik birlashmalari rahbarlari tarmoq boʻyicha tannarxni qisqartirishning tasdiqlangan yigʻma parametrlaridan kelib chiqib oʻn kun muddatda ularning tarkibiga kiradigan sanoat korxonalari uchun mahsulot tannarxini qisqartirishning maqsadli parametrlarini tasdiqlasinlar.

3. Vazirlar Mahkamasi komplekslari, vazirliklar, idoralar va xoʻjalik birlashmalari rahbarlari:

korxonalarda mahsulot tannarxini pasaytirish boʻyicha qabul qilinadigan chora-tadbirlarning amalga oshirilishi ustidan choraklik monitoring olib borilishini belgilasinlar;

olib boriladigan monitoring yakunlari boʻyicha, zaruriyat boʻlganda, mahsulot tannarxini pasaytirish boʻyicha parametrlarga erishishning toʻliqligi va samaradorligiga bogʻliq ravishda korxonalar rahbarlarini moddiy ragʻbatlantirish yoki ularning shaxsiy javobgarligi choralarini qoʻllasinlar.

4. Vazirlar Mahkamasining 2003-yil 18-noyabrdagi 518-son qaroriga muvofiq tashkil etilgan Yoqilgʻi-energetika resurslarini tejash boʻyicha komissiya (Sh.M.Mirziyoyev) bir oy muddatda 2013-2014-yillarda yoqilgʻi-energiya resurslaridan foydalanish samaradorligini baholash hamda xarajatlarni pasaytirish va ishlab chiqarishning energiya samaradorligini oshirish boʻyicha qoʻshimcha chora-tadbirlarni ishlab chiqish maqsadida yoqilgʻi-energetika isteʼmolchilarini energetik oʻrganib chiqish jadvallarini belgilangan tartibda tasdiqlasin.

5. Belgilab qoʻyilsinki, tasdiqlangan normativ-texnik hujjatlar doirasida texnologik jarayonlarni ratsionalizatsiyalash va moddiy-xomashyo va energiya resurslari sarfi meʼyorlarini maqbullashtirish hisobiga mahsulot tannarxini pasaytirish, xarid qilinadigan xomashyo, materiallar va butlovchi buyumlar qiymatini pasaytirish, foydalanish xarajatlarini va qoʻshimcha xarajatlarni qisqartirish, bir yil uchun xodimlar sonini maqbullashtirish natijasida mahalliylashtirish darajasining 2013-yilda pasayishi Vazirlar Mahkamasining 2010-yil 21-iyuldagi 154-son qarori bilan tasdiqlangan Sanoat kooperatsiyasi asosida tayyor mahsulotlar, butlovchi buyumlar va materiallar ishlab chiqarishni mahalliylashtirish Dasturini shakllantirish tartibi toʻgʻrisidagi Nizomning 2013-yilda buzilishi deb hisoblanmaydi.

6. Mazkur qarorning bajarilishini nazorat qilish Oʻzbekiston Respublikasining Bosh vaziri Sh.M.Mirziyoyev zimmasiga yuklansin.