Turizm va turistik infratuzilmani rivojlantirishni yanada qo‘llab-quvvatlash, milliy turistik xizmatlarni xalqaro turistik bozorlarga faol kiritib borish maqsadida Vazirlar Mahkamasi qaror qiladi:

1. Vazirlar Mahkamasining “O‘zbekturizm” milliy kompaniyasi faoliyatini yanada takomillashtirish to‘g‘risida” 2004-yil 28-iyuldagi 360-son qarori bilan “O‘zbekturizm” milliy kompaniyasi huzurida budjetdan tashqari Turizmni rivojlantirish jamg‘armasi tashkil etilganligi, uni shakllantirish manbai etib sayyohlarga xizmat ko‘rsatilganligi uchun turistik firmalar va mehmonxona xo‘jaliklaridan undiriladigan turistik yig‘im tushumlari belgilanganligi ma’lumot uchun qabul qilinsin.

2. 2012-yil 15-oktabrdan boshlab quyidagicha tartib joriy etilsin, unga muvofiq:

turistik yig‘im faqat sayyohlarni joylashtirish xizmatlari ko‘rsatuvchi va turistik faoliyatni amalga oshirish huquqi uchun litsenziyaga ega bo‘lgan turistik faoliyat subyektlaridan yashalgan har bir kun uchun 2 AQSh dollariga teng miqdorda undiriladi;

turistik faoliyatning boshqa subyektlaridan turistik yig‘im undirish bekor qilinadi.

Turistik yig‘imdan tushadigan mablag‘lar “O‘zbekturizm” milliy kompaniyasi huzuridagi budjetdan tashqari Turizmni rivojlantirish jamg‘armasiga yo‘naltiriladigan tartib saqlab qolinsin.

3. Quyidagilar:

“O‘zbekturizm” milliy kompaniyasi huzuridagi budjetdan tashqari Turizmni rivojlantirish jamg‘armasi mablag‘larini shakllantirish va ulardan foydalanish tartibi to‘g‘risidagi Nizom 1-ilovaga muvofiq;

O‘zbekiston Respublikasi hududida turistik yig‘imni undirish tartibi to‘g‘risidagi Nizom 2-ilovaga muvofiq tasdiqlansin.

4. O‘zbekiston Respublikasi Hukumatining 3-ilovaga muvofiq ayrim qarorlariga o‘zgartirish va qo‘shimchalar kiritilsin.

5. O‘zbekiston Respublikasi Moliya vazirligi “O‘zbekturizm” milliy kompaniyasi bilan birgalikda idoraviy normativ-huquqiy hujjatlarni ushbu qarorga muvofiqlashtirsin.

6. “O‘zbekturizm” milliy kompaniyasi ushbu qaror talablarini hisobga olgan holda turistik faoliyat subyektlari bilan tuzilgan litsenziya bitimlariga o‘zgartirish va qo‘shimchalar kiritsin.

7. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari R. S. Azimov zimmasiga yuklansin.

1. Ushbu Nizom “O‘zbekturizm” milliy kompaniyasi huzuridagi budjetdan tashqari Turizmni rivojlantirish jamg‘armasi (keyingi o‘rinlarda Jamg‘arma deb ataladi) mablag‘larini shakllantirish va ulardan foydalanish tartibini belgilaydi.

2. Jamg‘arma turizm sohasini rivojlantirish uchun mablag‘larni jamlash maqsadida tashkil etiladi.

3. Jamg‘arma “O‘zbekturizm” milliy kompaniyasi huzurida yuridik shaxs maqomisiz tashkil etiladi.

4. Jamg‘arma daromadlari quyidagi manbalar hisobiga shakllantiriladi:

turistik yig‘im to‘lovchilardan undiriladigan turistik yig‘im;

xalqaro moliya institutlari va boshqa xorijiy donorlarning grantlari;

xayr-ehson qiluvchi yuridik va jismoniy shaxslarning, shu jumladan O‘zbekiston Respublikasi norezidentlarining mablag‘lari;

Jamg‘armaning vaqtincha bo‘sh mablag‘larini joylashtirishdan tushadigan daromadlar va qonun hujjatlarida taqiqlanmagan boshqa tushumlar;

turistik yig‘im o‘z vaqtida to‘lanmaganligi uchun turistik yig‘im to‘lovchilardan undirilgan penya.

5. Xalqaro moliya institutlari va boshqa xorijiy donorlarning grantlari, xayr-ehson qiluvchilar, shu jumladan O‘zbekiston Respublikasi norezidentlarining mablag‘lari Jamg‘armaga qonun hujjatlarida belgilangan tartibda jalb etiladi.

6. Jamg‘armaga yo‘naltiriladigan turistik yig‘im miqdori Vazirlar Mahkamasi tomonidan belgilanadi.

7. Jamg‘armaga tushadigan mablag‘lar “O‘zbekturizm” milliy kompaniyasi tomonidan ochiladigan jamg‘arib boriladigan maxsus hisob raqamida jamlanadi.

8. Jamg‘arma mablag‘laridan har yili “O‘zbekturizm” milliy kompaniyasi tomonidan tasdiqlanadigan, O‘zbekiston Respublikasi Moliya vazirligi bilan kelishilgan smetaga qat’iy muvofiq ravishda foydalaniladi.

9. Jamg‘arma mablag‘laridan quyidagi maqsadlarda foydalaniladi:

turizm sohasidagi maqsadli dasturlarni moliyalashtirish;

turizm infratuzilmasi obyektlarini tashkil etish va rivojlantirish bo‘yicha investitsiya loyihalarining loyihaoldi hujjatlarini tayyorlash;

turizm sohasida kadrlarni tayyorlash va qayta tayyorlash, shuningdek ularning malakasini oshirish, shu jumladan tegishli xorijiy o‘quv markazlarida va ta’lim muassasalarida stajirovkalardan o‘tish;

O‘zbekistonning turistik salohiyati chet el turistik bozorlariga kirib borishi bo‘yicha tashkiliy va reklama-axborot tadbirlarini amalga oshirish, shu jumladan mahalliy va xorijiy bosma va elektron ommaviy axborot vositalarida reklamalar, maqolalar va boshqa materiallarni joylashtirish;

xorijiy turistik yarmarkalarda, loyihalar va dasturlarda qatnashish;

Birlashgan Millatlar Jahon Turistik Tashkiloti (YuNVTO)ga a’zolik badallari to‘lash;

“O‘zbekturizm” milliy kompaniyasi markaziy apparati va mintaqaviy bo‘limlarining ta’minoti va ularni moddiy-texnik ta’minlash;

O‘zbekiston Respublikasi Hukumati kafolati ostida turizm tarmog‘ini rivojlantirish uchun jalb etilgan kreditlarni va ular bo‘yicha foizlarni qaytarish.

10. “O‘zbekturizm” milliy kompaniyasi raisi Jamg‘arma mablag‘larini tasarruf etuvchi hisoblanadi.

11. Jamg‘arma mablag‘laridan oqilona va maqsadli foydalanilishini nazorat qilish belgilangan tartibda Moliya vazirligi tomonidan amalga oshiriladi.

12. “O‘zbekturizm” milliy kompaniyasi raisi va bosh buxgalteri buxgalteriya hisobi to‘g‘ri yuritilishi, Jamg‘armaga mablag‘lar tushishi va ulardan foydalanilishi to‘g‘risidagi hisobotlarni tuzish va taqdim etish yuzasidan belgilangan tartibda javob beradi.

13. “O‘zbekturizm” milliy kompaniyasi Jamg‘armaga mablag‘lar tushishi va ulardan foydalanilishi to‘g‘risida har chorakda hisobot choragidan keyingi oyning 20-kunigacha O‘zbekiston Respublikasi Moliya vazirligiga hisobot taqdim etadi.

14. Jamg‘armaning hisobot yilida foydalanilmagan mablag‘lari olib qo‘yilmaydi va keyinchalik ushbu Nizomda nazarda tutilgan tartibda foydalanish uchun “O‘zbekturizm” milliy kompaniyasining jamg‘arib boriladigan maxsus hisob raqamida qoladi.

15. “O‘zbekturizm” milliy kompaniyasi raisi Jamg‘arma mablag‘laridan maqsadli foydalanilishi yuzasidan shaxsan javob beradi.

16. Ushbu Nizom buzilishida aybdor bo‘lgan shaxslar qonun hujjatlarida belgilangan tartibda javob beradilar.

1. Ushbu Nizom O‘zbekiston Respublikasi hududida turistik yig‘imni undirish tartibini belgilaydi.

2. Ushbu Nizomda quyidagi asosiy tushunchalardan foydalaniladi:

turizm — jismoniy shaxsning bo‘lish joyida (mamlakatda) haqi to‘lanmaydigan faoliyat bilan shug‘ullanmasdan, bir yildan ortiq bo‘lmagan muddatda sog‘lomlashtirish, tanishish, professional-amaliy yoki boshqa maqsadlarda doimiy yashash joyidan chiqib ketishi (sayohat qilishi);

sayyoh — O‘zbekiston Respublikasi hududi bo‘ylab yoki boshqa mamlakatga sayohat qiluvchi (turizm) jismoniy shaxs;

turistik yig‘im to‘lovchilar — joylashtirish joylarida joylashtirish bo‘yicha xizmatlar ko‘rsatuvchi va turistik faoliyatini amalga oshirish huquqi uchun litsenziyaga ega bo‘lgan turistik faoliyat subyektlari;

joylashtirish joylari — sayyohlarni kamida bir kecha tunab qolish muddati bilan joylashtiruvchi mehmonxona xo‘jaliklari, turistik komplekslar, turistik bazalar, dam olish zonalari, pansionatlar, kempinglar, motellar, o‘tovlar, mehmon kutiladigan milliy uylar va boshqa obyektlar.

3. O‘zbekiston Respublikasi fuqarolariga, shuningdek O‘zbekiston Respublikasi hududida doimiy yashaydigan fuqaroligi bo‘lmagan shaxslarga xizmat ko‘rsatishda turistik yig‘im undirilmaydi.

4. Turistik yig‘imni undirishdan tushadigan mablag‘lar turistik yig‘im to‘lovchilar tomonidan “O‘zbekturizm” milliy kompaniyasi huzuridagi budjetdan tashqari Turizmni rivojlantirish jamg‘armasiga (keyingi o‘rinlarda Jamg‘arma deb ataladi) yo‘naltiriladi, ularga soliq solinmaydi va ulardan belgilangan tartibda foydalaniladi.

5. Turistik yig‘im turistik yig‘imni to‘lovchilardan yashalgan har bir kun uchun O‘zbekiston Respublikasi hududida joylashadigan xorijiy davlatning har bir fuqarosi va fuqaroligi bo‘lmagan shaxs uchun O‘zbekiston Respublikasi Markaziy bankining to‘lov kunidagi kursi bo‘yicha 2 AQSh dollariga teng miqdorda undiriladi.

Turistik yig‘imni undirishda xizmatlar ko‘rsatilganligini tasdiqlaydigan hujjatlarda (invoys, schyot-faktura, kvitansiya va shu kabilarda) turistik yig‘im to‘langanligi to‘g‘risida belgi qo‘yiladi.

6. Turistik yig‘imni to‘lovchilar turistik yig‘imning to‘liq summasini har oyda hisobot oyidan keyingi oyning 5-kunidan kechikmay to‘laydilar. To‘lov tamom bo‘lgan har bir oy uchun to‘lanadi.

7. Turistik yig‘im O‘zbekiston Respublikasi Markaziy bankining to‘lov kunidagi kursi bo‘yicha milliy valyuta – so‘mda to‘lanadi.

8. Turistik yig‘im summasi “O‘zbekturizm” milliy kompaniyasining jamg‘arib boriladigan maxsus hisob raqamiga o‘tkaziladi.

9. Turistik yig‘im summalarini hisoblab chiqish va hisobga olish uchun turistik yig‘imni to‘lovchilar ular uchun turistik yig‘im to‘lanishi shart bo‘lgan xorijiy davlatlarning barcha joylashtirilgan fuqarolari va fuqaroligi bo‘lmagan shaxslar soni hisobini yuritishi kerak.

10. Turistik yig‘imni to‘lovchilar turistik yig‘im summalari hisob-kitobi to‘g‘risidagi ma’lumotlarni “O‘zbekturizm” milliy kompaniyasiga har chorakda hisobot oyidan keyingi oyning 10-kunigacha ushbu Nizomga ilovaga muvofiq shakl bo‘yicha taqdim etadilar.

11. Turistik yig‘imni to‘lovchilarning rahbarlari va bosh buxgalterlari ushbu Nizomga muvofiq turistik yig‘im summalari Jamg‘armaga o‘z vaqtida va to‘liq o‘tkazilishi yuzasidan shaxsan javob beradilar.

12. Turistik yig‘im summalari o‘z vaqtida yoki to‘liq o‘tkazilmagan taqdirda turistik yig‘imni to‘lovchilar kechiktirilgan har bir kun uchun turistik yig‘im o‘tkazilmagan summasining 0,15 foizi, biroq qarzdorlik umumiy summasining 50 foizidan ko‘p bo‘lmagan miqdorda penya to‘laydilar.

“O‘zbekturizm” milliy kompaniyasi turistik yig‘imni to‘lovchilardan qarzdorlikni undirish to‘g‘risida xo‘jalik sudlariga da’vo arizasi bilan murojaat qilishga haqlidir.

13. “O‘zbekturizm” milliy kompaniyasi turistik yig‘imni to‘lovchilar tomonidan taqdim etiladigan ma’lumotlar asosida turistik yig‘im summalari o‘z vaqtida o‘tkazilishi ustidan doimiy monitoring olib boradi.

14. Turistik yig‘im summalari o‘z vaqtida o‘tkazilishini nazorat qilish belgilangan tartibda vakolatli davlat organlari tomonidan amalga oshiriladi.

1. Vazirlar Mahkamasining 2003-yil 11-noyabrdagi 497-son qarori (O‘zbekiston Respublikasi QT, 2003-y., 11-son, 113-modda) bilan tasdiqlangan Turizm faoliyatini litsenziyalash to‘g‘risidagi Nizomning 7-bandiga quyidagi mazmundagi xatboshi qo‘shilsin:

“qonun hujjatlarida belgilangan hollarda, muddatlarda va miqdorlarda turistik yig‘imni to‘lash”.

2. Vazirlar Mahkamasining “O‘zbekturizm” milliy kompaniyasi faoliyatini yanada takomillashtirish to‘g‘risida” 2004-yil 28-iyuldagi 360-son qarorida (O‘zbekiston Respublikasi QT, 2004-y., 7-son, 75-modda):

a) 4-band quyidagi tahrirda bayon qilinsin:

“4. Belgilansinki, “O‘zbekturizm” milliy kompaniyasining markaziy apparati, mintaqaviy bo‘limlari ta’minoti xarajatlarini moliyalashtirish litsenziyalar berish to‘g‘risidagi arizalarning ko‘rib chiqilganligi, litsenziyalarning qayta rasmiylashtirilganligi va litsenziyalar dublikatlari berilganligi uchun yig‘imdan, o‘z xo‘jalik faoliyatidan tushumlar, budjetdan tashqari Turizmni rivojlantirish jamg‘armasi mablag‘larining bir qismi hamda qonun hujjatlarida taqiqlanmagan boshqa manbalar hisobiga amalga oshiriladi”;

b) 6-bandning birinchi xatboshidagi “sayyohlarga xizmat ko‘rsatilganligi uchun turistik firmalar va mehmonxona xo‘jaliklaridan undiriladigan turistik yig‘imni jamg‘armani shakllantirish manbalari etib belgilash” so‘zlari chiqarib tashlansin;

g) 3-ilovaning 5-bandi quyidagi tahrirda bayon qilinsin:

“5. Markaziy apparat, mintaqaviy bo‘limlar ta’minoti xarajatlarini moliyalashtirish litsenziyalar berish to‘g‘risidagi arizalarning ko‘rib chiqilganligi, litsenziyalarning qayta rasmiylashtirilganligi va litsenziyalar dublikatlari berilganligi uchun yig‘imdan, o‘z xo‘jalik faoliyatidan tushumlar, budjetdan tashqari Turizmni rivojlantirish jamg‘armasi mablag‘larining bir qismi hamda qonun hujjatlarida taqiqlanmagan boshqa manbalar hisobiga amalga oshiriladi”.

3. Vazirlar Mahkamasining “Vazirliklar va idoralarning budjetdan tashqari jamg‘armalariga mablag‘lar ajratishni tartibga solish chora-tadbirlari to‘g‘risida” 2010-yil 2-apreldagi 62-son qaroriga (O‘zbekiston Respublikasi QT, 2010-y., 4-son, 14-modda) 1-ilovaga quyidagi mazmundagi 30-band qo‘shilsin: