Oʻzbekiston Respublikasi Vazirlar Mahkamasining 2011-yil 8-sentabrdagi 252-son “Davlat pensiyalarini tayinlash va toʻlash tartibini yanada takomillashtirishga yoʻnaltirilgan normativ-huquqiy hujjatlarni tasdiqlash toʻgʻrisida”gi (Oʻzbekiston Respublikasi qonun hujjatlari toʻplami, 2011-yil, 37-son, 377-modda) qaroriga muvofiq Oʻzbekiston Respublikasi Moliya vazirligi, Ichki ishlar vazirligi, Mudofaa vazirligi, Favqulodda vaziyatlar vazirligi, Milliy xavfsizlik xizmati va Davlat bojxona qoʻmitasi qaror qiladilar:

1. Oʻzbekiston Respublikasi Moliya vazirligi, Ichki ishlar vazirligi, Mudofaa vazirligi, Favqulodda vaziyatlar vazirligi, Milliy xavfsizlik xizmati va Davlat bojxona qoʻmitasining 2011-yil 30-martdagi 27, 26, 2, 84, 126, 01-02/5-31-son qarori (roʻyxat raqami 2222, 2011-yil 30-aprel) (Oʻzbekiston Respublikasi qonun hujjatlari toʻplami, 2011-yil, 18-son, 183-modda) bilan tasdiqlangan Ishlovchi pensionerlarga pensiya toʻlash tartibi toʻgʻrisidagi nizomga ilovaga muvofiq oʻzgartirish va qoʻshimchalar kiritilsin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

1. 2-bandning “a” kichik bandi quyidagi tahrirda bayon qilinsin:

“a) urush nogironlari va qatnashchilariga, shuningdek ularga tenglashtirilgan shaxslarga. Urush nogironlari va qatnashchilariga tenglashtirilgan shaxslar roʻyxati Oʻzbekiston Respublikasi Vazirlar Mahkamasining 2011-yil 8-sentabrdagi 252-son (Oʻzbekiston Respublikasi qonun hujjatlari toʻplami, 2011-y., 37-son, 377-modda) qarori bilan tasdiqlangan Davlat pensiyalarini tayinlash va toʻlash tartibi toʻgʻrisidagi nizomning 1 va 2-ilovalarida belgilab berilgan;”.

2. 6-bandning birinchi xatboshisi “qabul qilinganda” degan soʻzlardan keyin “yoki predmeti ishlarni bajarish va xizmatlar koʻrsatish boʻlgan fuqarolik-huquqiy tusdagi shartnomalar (bundan buyon matnda fuqarolik-huquqiy shartnomalar deb yuritiladi) tuzilganda” degan soʻzlar bilan toʻldirilsin.

3. 8-band quyidagi tahrirda bayon etilsin:

“8. Ishga qabul qilinganda fuqarolik-huquqiy shartnomalar tuzilganda, mehnat shartnomasi yoki fuqarolik-huquqiy shartnomaning muddati va shartlaridan qatʼi nazar, pensiya toʻlovlari quyidagi hollarda toʻliq toʻxtatiladi:

a) Oʻzbekiston Respublikasi “Fuqarolarning davlat pensiya taʼminoti toʻgʻrisida”gi Qonunining 14-moddasiga asosan, texnologiyadagi, ishlab chiqarish va mehnatni tashkil etishdagi oʻzgarishlar, xodimlar soni (shtati) yoki ish xususiyatining oʻzgarishiga olib kelgan ishlar hajmining qisqarganligi yoxud tashkilotning tugatilishi munosabati bilan mehnat shartnomasi bekor qilinganidan keyin muddatidan oldin pensiya tayinlangan ishsizlar umumiy belgilangan yoshga (erkaklar — 60 yosh, ayollar — 55 yosh) yetkunga qadar ishga qabul qilinganda (fuqarolik-huquqiy shartnomalar tuzilganda);

b) 1994-yil 1-iyulgacha (yaʼni, Oʻzbekiston Respublikasi “Fuqarolarning davlat pensiya taʼminoti toʻgʻrisida”gi Qonunining kuchga kirguniga qadar) belgilangan muddat xizmat qilgani uchun pensiyalar tayinlangan shaxslar, yoshga doir imtiyozli yoxud umumiy tartibda pensiya olish huquqiga egalik qilishdan oldin ishga qabul qilinganda (fuqarolik-huquqiy shartnomalar tuzilganda).”.

4. 14-band quyidagi tahrirda bayon etilsin:

“14. Pensioner bilan mehnat shartnomasini yoki fuqarolik-huquqiy shartnomasini bekor qilishda tashkilot pensiya toʻlovini toʻxtatadi va Pensiya jamgʻarmasining tuman (shahar) boʻlimiga qaysi davrga pensiya toʻlovi amalga oshirilganligini koʻrsatgan holda topshiriqnomaga xabarnoma yoʻllaydi. Pensioner qaytadan ishga qabul qilinganda yoxud fuqarolik-huquqiy shartnoma tuzilganda yangi topshiriqnoma taqdim qilinadi.”.

5. 16-band “ishga qabul qilinganligi” degan soʻzlardan keyin “(fuqarolik-huquqiy shartnoma tuzganligi)” degan soʻzlar bilan toʻldirilsin.

6. 17—19-bandlar quyidagi tahrirda bayon etilsin:

“17. Mehnat shartnomasi (fuqarolik-huquqiy tusdagi shartnomasi) bekor qilinganda, pensioner, yashash joyidagi Pensiya jamgʻarmasining tuman (shahar) boʻlimiga ishdan boʻshaganlik toʻgʻrisidagi buyruq tartib raqami va sanasini (fuqarolik-huquqiy shartnomani bekor boʻlishining sababi) koʻrsatgan holda topshiriqnomaga xabarnomani hamda mehnat shartnomasining bekor boʻlganligi toʻgʻrisidagi buyruq koʻchirmasini (fuqarolik-huquqiy shartnomaning nusxasi) taqdim etadi.

Pensiya jamgʻarmasining tuman (shahar) boʻlimlari tegishli hujjatlarni qabul qiladi va kiruvchi xatlar uchun oʻrnatilgan tartibda roʻyxatdan oʻtkazadi. Topshiriqnomaga xabarnoma va mehnat shartnomasining bekor boʻlganligi toʻgʻrisidagi buyruq koʻchirmasi (fuqarolik-huquqiy shartnomaning nusxasi) pensiya ishiga tikiladi.

18. Ishlovchi pensionerlarning pensiya toʻlov xarajatlari Yagona ijtimoiy toʻlovni taqsimlash, shuningdek xarajatlarni qoplash boʻyicha summalarni toʻlanishining va yuridik shaxslarning davlat ijtimoiy sugʻurtasi xarajatlari boʻyicha toʻlovlarni amalga oshirish tartibi toʻgʻrisidagi nizomga (roʻyxat raqami 2262, 2011-yil 9-sentabr) (Oʻzbekiston Respublikasi qonun hujjatlari toʻplami, 2011-yil, 37-son, 383-modda) 5-ilovasiga muvofiq hisobotida aks ettiriladi.

19. Ishlovchi pensionerlarga pensiya toʻlovining oʻz vaqtida va toʻgʻri amalga oshirilishi hamda pensionerning ishga qabul qilinganligi (fuqarolik-huquqiy shartnoma tuzilganligi) yoki mehnat shartnomasi (fuqarolik-huquqiy shartnomasi) bekor qilinganligi toʻgʻrisidagi maʼlumotni Pensiya jamgʻarmasining tuman (shahar) boʻlimlariga oʻz vaqtida va ishonarli taqdim etilishi boʻyicha javobgarlik qonunchilikda oʻrnatilgan tartibda tashkilot rahbarlari zimmasiga yuklanadi.”.

7. 23-band quyidagi tahrirda bayon etilsin:

“23. Yakka tartibdagi tadbirkor boʻlgan hamda dehqon xoʻjaliklarida yoki fuqarolik-huquqiy tusdagi shartnoma boʻyicha ishlovchi pensionerlar oʻzining mehnat faoliyati toʻgʻrisida ularga pensiya tayinlagan idoralarga maʼlum qilishlari shart.”.

8. 26 — 28 bandlar quyidagi tahrirda bayon etilsin:

“26. Ishlovchi pensionerlarga ularga tayinlangan pensiyaning 50 foiz miqdorida pensiyalar faqat pensioner shartnoma boʻyicha ishlagan kunlar uchun toʻlanadi. Pensioner shartnoma tuzmagan qolgan kunlarda pensiyalar qonunchilikda oʻrnatilgan tartibda toʻliq miqdorda toʻlanadi.

Toʻliqsiz oy uchun pensiyani toʻlashda (ishga qabul qilingan (fuqarolik-huquqiy shartnoma tuzilgan) yoki mehnat shartnomasi (fuqarolik-huquqiy shartnoma) bekor qilingan boʻlsa) toʻlanadigan pensiya miqdori quyidagicha aniqlanadi:

27. Tashkilot rahbarlari pensioner ishga qabul qilinganligini (fuqarolik-huquqiy shartnoma tuzilganligini), pensionerning yashash joyidagi Pensiya jamgʻarmasining tuman (shahar) boʻlimiga hamda pensiya tayinlagan Oʻzbekiston Respublikasi Mudofaa, Ichki ishlar, Favqulodda vaziyatlar vazirliklariga, Milliy xavfsizlik xizmati va Davlat bojxona qoʻmitasiga 5 kunlik muddatda xabar berishlari va ishga qabul qilinganlik toʻgʻrisida buyruq koʻchirmasini (fuqarolik-huquqiy shartnomaning nusxasini) taqdim etishlari shart.

28. Pensioner (oilaning boshqa aʼzolari uchun boquvchisini yoʻqotganlik pensiyasini oluvchidan tashqari) ishga qabul qilinganda (fuqarolik-huquqiy shartnoma tuzilganda) tegishli pensiya tayinlagan idoraga (oʻzining yashash joyidan) xabar berishi shart.”.