Oʻzbekiston Respublikasi Hukumati va Birlashgan Arab Amirliklari Hukumati, bundan keyin Tomonlar deb ataluvchilar,

xalqaro jinoyatchilik, ayniqsa uning uyushgan shakllari davlatlar rivoji va xavfsizligiga jiddiy tahdid solishini eʼtirof etgan holda,

fuqarolar, jamiyat va davlatning jinoiy tajovuzlardan ishonchli himoyasini taʼminlashga intilib,

Tomonlar davlatlarining jinoyatchilikning oldini olish boʻyicha va Birlashgan Millatlar Tashkilotining jinoyatchilikning oldini olish va jinoyatchilikka nisbatan odil sudlovni amalga oshirish sohasidagi xalqaro shartnomalariga amal qilib,

mustaqillik va oʻzaro yordam prinsiplariga muvofiq jinoyatchilikka qarshi kurash sohasida hamkorlikni rivojlantirishni istab,

quyidagilar toʻgʻrisida kelishib oldilar:

1. Tomonlar ushbu Bitim qoidalari va Tomonlar davlatlarining milliy qonunchiligiga muvofiq oʻzlarining vakolatli organlari orqali uyushgan jinoyatchilik, terrorizm va jinoyatchilikning boshqa xavfli turlariga qarshi kurashda hamkorlik qiladilar.

Ushbu Bitim qoidalarini amalga oshirish maqsadida vakolatli organlar quyidagilar hisoblanadi:

Oʻzbekiston Respublikasidan:

Bosh prokuratura;

Ichki ishlar vazirligi;

Milliy xavfsizlik xizmati;

Davlat bojxona qoʻmitasi.

Birlashgan Arab Amirliklaridan:

Jinoiy xavfsizlik bosh direksiyasi, Ichki ishlar vazirligi;

Davlat xavfsizligi boshqarmasi terrorizmga qarshi kurash masalalari, jumladan, terroristik tashkilotlar, guruhlar, unsurlar va ularning texnikaviy harakatlari, fitnalar va moliyalanishi, uyushgan jinoyatchilik, qurol-yarogʻ bilan gʻayriqonuniy savdo-sotiq qilish, portlovchi va radioaktiv moddalar va ommaviy qirgʻin qurollari va ularni ishlab chiqarish texnologiyasi masalalari boʻyicha.

2. Tomonlar ushbu Bitim kuchga kirganidan soʻng bir oy muddat ichida oʻz vakolatli organlarining manzillari va boshqa zarur maʼlumotlari bilan almashinadilar.

3. Tomonlarning vakolatli organlari bir-birlari bilan diplomatik kanallar orqali aloqa qiladilar va ushbu Bitimni amalga oshirish maqsadida ular bir-birlarini oʻz vakolatli organlarida yuz bergan har qanday oʻzgarishlar toʻgʻrisida xabardor qilib turishlari kerak.

1. Tomonlar jinoyatlarning oldini olish, aniqlash, barham berish va tergov qilish, quyidagi jinoyatlarga qarshi kurashda hamkorlik qiladilar:

a) terrorizm va uni moliyalashtirish;

b) inson hayoti va salomatligiga qarshi jinoyatlar;

v) narkotik vositalar, psixotrop moddalar va prekursorlarning noqonuniy ishlab chiqarilishi va aylanishi;

g) qurol-yarogʻlar, oʻq-dorilar, radioaktiv va yadroviy materiallarining noqonuniy aylanishi;

d) iqtisodiyot sohasidagi jinoyatlar, shuningdek noqonuniy topilgan pullarni qonuniy daromadlarga aylantirish;

e) pul, qimmatli qogʻozlar, toʻlov vositalari va rasmiy hujjatlarni qalbakilashtirish;

j) odamlar, ayniqsa ayollar va bolalar savdosi hamda oʻgʻirlanishi;

z) noqonuniy immigratsiya bilan bogʻliq jinoyatlar;

i) ekologik jinoyatlar;

k) obyekti koʻchar madaniy va tarixiy boyliklar hisoblangan jinoyatlar;

l) transport vositalari sohasidagi jinoyatlar;

m) jinoiy faoliyatdan olingan daromadlarni legallashtirish;

n) kiber jinoyatlar.

2. Tomonlar oʻzaro kelishuvga koʻra jinoyatchilikning boshqa turlariga qarshi kurashda hamkorlik qiladilar.

Ushbu Bitim maqsadlari uchun Tomonlar quyidagi shakllarda hamkorlik qiladilar:

1. Jinoiy yoki terroristik guruhlar va ularning qismlari, tashkilotlari, faoliyati va ularning jinoyatlarni sodir etish hamda moliyalashtirish usullari, ularning jinoiy munosabatlari, foydalangan qurollari va asbob-uskunalari, ular tomonidan amalga oshirilgan yoki tayyorlangan terroristik operatsiyalar, va shuningdek uyushgan jinoyatchilik, terrorizm va boshqa xavfli jinoyatlarga jalb qilingan shaxslar haqida axborot almashish.

2. Noqonuniy topilgan pullarni qonuniy daromadlarga aylantirish bilan bogʻliq operatsiyalar va ularni fosh etish usullari, bunday xatti-harakatlarda ishtirokchilikda shubha qilinayotgan subyektlar, tashkilotlar, idoralar va kompaniyalar haqida axborot almashish.

3. Narkotik vositalari, psixotrop moddalar va prekursorlarning noqonuniy ishlab chiqarilishi va savdosiga jalb qilingan shaxslar, ularning xalqaro chegaralar orqali oʻtish usullari va yoʻllari haqida axborot almashish.

4. Narkotik vositalari, psixotrop moddalar va prekursorlarning yangi turlari haqida axborot almashish.

5. Ushbu Bitimning 2-moddasida nazarda tutilgan jinoyatlarni fosh etish va kurash usullari hamda Tomonlarning vakolatli organlari xodimlari uchun amaliy tadqiqotlar bajarish, maslahatlashuv, maʼruzalar va kurslar oʻtkazish boʻyicha amaliy tajriba haqida axborot almashish.

6. Tomonlarning fuqaro aviatsiyasi parvozlari va xalqaro aeroportlari faoliyatining xavfsizligini taʼminlash boʻyicha tajriba almashish.

7. Jinoyatchilik bilan kurash boʻyicha qonunchilik hujjatlari, konferensiyalar, oʻquv va metodologik seminarlar, jinoyatchilikka qarshi kurash boʻyicha birgalikdagi ilmiy tadqiqotlar, nashavandlarning salomatligini tiklash dasturlari haqida axborot almashish hamda ushbu sohalarda tashriflar almashish.

8. Ijtimoiy salomatlikni tiklash markazlari va narkotik moddalarga tobe boʻlgan shaxslar uchun maxsus markazlar ochish yoʻli bilan jinoyatchilikning oldini olish boʻyicha tadbirlarda qatnashish.

9. Tomonlardan biridan ushbu Bitimda koʻrsatilgan jinoyatlar bilan bogʻliq axborot olingan taqdirda va uni boshqa Tomonga berish zarurati tugʻilgan taqdirda birinchi Tomon ushbu axborotni boshqa Tomonga hech qanday soʻrovnoma olmasdan yuborishi mumkin.

1. Koʻmaklashish toʻgʻrisida soʻrov olinganda ushbu Bitim qoidalariga muvofiq soʻralayotgan Tomon davlatining qonunchiligi qoʻllaniladi.

2. Koʻmaklashish toʻgʻrisida soʻrov yozma shaklda yuboriladi. Shoshilinch hollarda soʻrovlar, agar soʻralayotgan Tomon vakolatli organi qabul qilsa, ogʻzaki yuborilishi mumkin, biroq soʻrovlar 48 soatdan kechiktirilmasdan yozma ravishda tasdiqlanishi lozim. Soʻrovlar Xalqaro jinoyat politsiyasi (Interpol) tashkiloti orqali ham yuborilishi mumkin.

3. Koʻmaklashish toʻgʻrisida soʻrov vakolatli shaxs tomonidan imzolanadi hamda quyidagi maʼlumotni oʻz ichiga oladi:

a) soʻrayotgan va soʻralayotgan Tomonlarning nomi;

b) soʻrov bilan bogʻliq axborot va maʼlumotlar hamda soʻrov maqsadi;

v) soʻrovni bajarishga koʻmaklashadigan har qanday axborot;

g) yozishmalarga hujjatlar, fotosuratlar, tasvirlar, yozuvlar, videomateriallar va ishga daxldor har qanday boshqa materiallar ilova qilinishi lozim.

4. Soʻrovlar imkon qadar qisqa muddatda bajariladi, vakolatli organlar zarurat tugʻilganda soʻrov bajarilishini yengillashtiradigan qoʻshimcha maʼlumotlarni soʻrashlari mumkin.

Agar soʻrovning bajarilishi soʻralayotgan Tomonning jinoiy tergov yoki boshqa ish koʻrishiga xalal berishi mumkin boʻlsa, uning bajarilishi keyinga qoldirilishi yoki soʻrayotgan Tomonning vakolatli organi bilan zarur maslahatlashuvdan soʻng bajarilishi mumkin.

1. Agar soʻralayotgan Tomon soʻrovning bajarilishi milliy qonunchilikka zid boʻlsa yoki davlat manfaatlariga yoki uning xavfsizligiga, yoki xalqaro majburiyatlariga zarar yetkazishi mumkin deb hisoblasa, soʻrovning qondirilishi butunlay yoki qisman rad qilinishi mumkin.

2. Soʻrov qondirilishini rad qilish toʻgʻrisida qaror qabul qilingan taqdirda soʻralayotgan Tomon soʻrayotgan Tomonga bu haqda rad sabablarini koʻrsatgan holda, yozma ravishda xabar qilishi kerak.

Shaxslar toʻgʻrisidagi maʼlumotlar berilayotganda ushbu Bitim qoidalariga muvofiq quyidagilar hisobga olinishi kerak:

1. Oluvchi organ Tomonlar bir-biridan oladigan axborot va shuningdek materiallar, texnika vositalari va asbob-uskunaning maxfiyligini taʼminlaydi va ularni taqdim etgan organning oldindan bergan yozma roziligisiz oshkor qilmaydi.

2. Oluvchi organga maʼlumotlardan ularni yuborgan organ buyurgan maqsadlardagina foydalanishga ruxsat beriladi.

3. Shaxslar haqidagi maʼlumotlar faqat jinoyatlarning oldini olish va tergov qilish organlariga berilishi mumkin. Maʼlumotlarning boshqa vakolatli organlarga keyinchalik berilishi faqat maʼlumotlarni yuborgan organning oldindan yuborgan yozma roziligiga koʻra amalga oshirilishi mumkin.

4. Maʼlumotlar berilishi, agar bu maʼlumotlar yuborayotgan Tomon davlatining qonunchiligini buzilishi yoki tegishli shaxslar manfaatlarining kamsitilishiga asos boʻlishi mumkin boʻlgan taqdirda, amalga oshirilmasligi mumkin.

5. Yuborilgan maʼlumotlar ulardan foydalanish zarurati qolmagandan keyin yoʻq qilinishi kerak. Maʼlumot yuboradigan va oladigan organlar oʻzlarining qonunchiligiga muvofiq yuqorida koʻrsatilgan axborotni yoʻq qilish shartlarini belgilaydi.

6. Maʼlumot yuborayotgan va olayotgan organlar axborot berilishi va qabul qilinishini belgilangan tartibda qayd etadilar.

Tijorat tashuvchilar xalqaro yoʻlovchilar va yuklar tashishda foydalanayotgan transport vositalari ushbu Bitimning 2-moddasida koʻrsatilgan jinoyatlarni sodir etish uchun ishlatilmasligini taʼminlash maqsadida Tomonlar kerakli chora-tadbirlarni koʻradilar. Bunday chora-tadbirlar tijorat tashuvchilar bilan maxsus kelishuvlarni oʻz ichiga oladi.

1. Tomonlar oʻz davlatlari qonunchiligi va oʻz imkoniyatlari doirasida ushbu Bitimda nazarda tutilgan jinoyatlarni sodir etishga jalb qilingan shaxslarni aniqlash boʻyicha oʻzaro muvofiqlashtirilgan kelishuvlar asosida predmetlar, materiallar va vositalarni nazorat ostida yetkazib berish usulini qoʻllashni nazarda tutuvchi zarur chora-tadbirlarni koʻradilar.

2. Har bir Tomonning vakolatli organi boshqa Tomonning vakolatli organiga har bir alohida holatda, yurisdiksiyaga muvofiq, ijtimoiy xavf, uning moliyaviy imkoniyati va oʻzaro toʻgʻri tushunishni hisobga olgan holda, nazorat ostida yetkazib berish usulini qoʻllash boʻyicha oʻzining qarori toʻgʻrisida xabar beradi.

3. Nazorat ostida yetkazib berishga mansub boʻlgan noqonuniy predmet va moddalar, ularning sogʻliqqa va atrof-muhitga boʻlgan taʼsirini eʼtiborga olgan holda uchinchi tomonning ishtirokida erishilgan kelishuvlarga muvofiq, toʻla-toʻkis yoki qisman boshqa Tomonga yuborilishi mumkin.

Ushbu Bitim doirasida hamkorlikni amalga oshirish maqsadida ikkala Tomon vakillaridan iborat qoʻshma komissiya tuziladi.

Komissiya zaruratga qarab, navbati bilan Tomonlar davlatlari hududida bir yilda kamida bir marta yigʻiladi.

Qoʻshma komissiya huzurida, zarurat tugʻilgan hollarda ikkala Tomonning ekspertlaridan iborat ishchi guruhlar tuzilishi mumkin, ular zaruratga qarab uchrashuvlar oʻtkazadilar.

Tomonlar ushbu Bitimni bajarish davomida paydo boʻladigan xarajatlarni, agar oʻzgacha tartib kelishilmagan boʻlsa, mustaqil ravishda qoplaydilar.

Zarurat tugʻilganda Tomonlar har bir aniq holatda, bir-biri bilan maslahatlashuvlardan soʻng hamkorlik natijalaridan kelib chiqadigan harakatlarni amalga oshirish xarajatlarini birgalikda qoplaydilar.

Tomonlar zarur holatlarda va oʻz mablagʻlari doirasida ushbu Bitimda koʻrsatilgan jinoyatlarga barham berish boʻyicha aniq masalalarni hal qilish uchun zarur materiallar hamda texnika vositalarini taqdim etish yoʻli bilan bir-biriga begʻaraz yordam koʻrsatishlari mumkin.

Ushbu Bitim doirasida soʻrovlarni bajarish va hamkorlik bilan bogʻliq barcha yozishmalar ingliz tilida amalga oshiriladi.

Ushbu Bitim Tomonlarning Bitim kuchga kirgan vaqtdan boshlab ishtirokchisi boʻlgan boshqa xalqaro shartnomalari boʻyicha huquq va majburiyatlariga daxl qilmaydi.

Ushbu Bitim jinoiy ishlar boʻyicha huquqiy yordam koʻrsatish va shaxslarni tutib topshirish (ekstraditsiya qilish) masalalariga daxl qilmaydi.

Tomonlarning oʻzaro yozma kelishuviga koʻra, ushbu Bitimga uning ajralmas qismi hisoblanadigan alohida bayonnomalar bilan rasmiylashtiriladigan oʻzgartish va qoʻshimchalar kiritilishi mumkin.

Ushbu Bitim qoidalarini talqin qilish va qoʻllash bilan bogʻliq yuzaga keladigan nizo hamda kelishmovchiliklar Tomonlar oʻrtasida maslahatlashuv va muzokaralar orqali hal etiladi.

Ushbu Bitim ratifikatsiya qilinishi va ratifikatsiya yorliqlari almashinishi lozim hamda u ratifikatsiya yorliqlari almashingan sanadan boshlab oʻttizinchi kuni kuchga kiradi.

Ushbu Bitim noaniq muddatga tuziladi. Tomonlardan har biri istagan paytda ushbu Bitim amalini bekor qilish niyati haqida diplomatik kanallar orqali boshqa Tomonni yozma ravishda xabardor etish yoʻli bilan Bitimni bekor qilishi mumkin. Bunday holatda ushbu Bitimning amali boshqa Tomon bu xabarni olgan kundan keyin olti oy oʻtgach, toʻxtatiladi.

Ushbu Bitimning amal qilishi tugatilgan taqdirda, uning qoidalari amalda boʻlgan vaqtda amalga oshirilayotgan tadbirlarga nisbatan ular toʻliq bajariladigan vaqtga qadar tatbiq qilinadi.

Uning tasdigʻi uchun quyida imzo chekuvchilar, oʻzlarining hukumatlari tomonidan buning uchun tegishlicha vakolat olganlar, ushbu Bitimni imzoladilar.

Abu Dabi shahrida 2008-yil 17-martda ikki asl nusxada, har biri oʻzbek, arab va ingliz tillarida tuzildi, bunda barcha matnlar bir xil kuchga ega.

Ushbu Bitim qoidalarini talqin qilishda kelishmovchiliklar yuzaga kelganda, ingliz tilidagi matn asos sifatida qabul qilinadi.