Vazirlar Mahkamasi qaror qiladi:

1. Maʼlumot uchun qabul qilinsinki, Oʻzbekiston Respublikasi Prezidentining “Angren” maxsus industrial zonasini barpo etish toʻgʻrisida” 2012-yil 13-apreldagi PF-4436-son Farmoni bilan:

“Angren” maxsus industrial zonasi (keyingi oʻrinlarda Angren” MIZ deb ataladi) hududida tashkil etiladigan korxonalar va ishlab chiqarishlarga alohida talablar belgilangan, ular yuqori texnologiyali boʻlishi hamda mintaqaning ishlab chiqarish va resurs salohiyatidan kompleks va samarali foydalanilishini, mineral-xomashyo resurslarining yanada chuqur qayta ishlanishini, yuqori qoʻshilgan qiymatga ega boʻlgan, ichki bozorlarda va jahon bozorlarida raqobatbardoshli mahsulotlar ishlab chiqarilishini, ishlab chiqariladigan mahsulotning kamida 50 foizi eksportga yetkazib berilishini taʼminlashi kerak;

“Angren” MIZ qatnashchilari boʻlgan korxonalarga belgilangan asosiy talablarni amalga oshirish uchun kiritilgan investitsiyalar hajmiga koʻra, 3 yildan 7 yilgacha boʻlgan muddat bilan soliq va bojxona imtiyozlari va preferensiyalarning keng tizimi berilgan, shuningdek mazkur korxonalarning kommunikatsiyalarga kafolatli ulanishini, kommunikatsiyalarning ishlab chiqarish maydonchalariga yetkazilishini taʼminlaydigan tartib belgilangan.

2. Oʻzbekiston Respublikasi Iqtisodiyot vazirligi, Moliya vazirligi, “Davarxitektqurilish” qoʻmitasi tomonidan “Oʻzbekenergo” DAK, “Oʻztransgaz”AK, “Oʻzavtoyoʻl” DAK, “Oʻzbekiston temir yoʻllari” kompaniyasi, “Oʻzkommunxizmat” agentligi va Toshkent viloyati hokimligi bilan birgalikda ishlab chiqilgan 2013 — 2015-yillarda “Angren” maxsus industrial zonasining transport, ishlab chiqarish va muhandislik-kommunikatsiya infratuzilmasini jadal rivojlantirish dasturi ilovaga* muvofiq maʼqullansin.

3. “Angren” MIZning Maʼmuriy kengashiga Oʻzbekiston Respublikasi Iqtisodiyot vazirligi, Moliya vazirligi hamda Tashqi iqtisodiy aloqalar, investitsiyalar va savdo vazirligi taqdimnomasi boʻyicha “Angren” MIZ hududida yangidan tashkil etiladigan quvvatlarni transport, ishlab chiqarish va muhandislik-kommunikatsiya infratuzilmasi bilan taʼminlashning ustuvor vazifalaridan kelib chiqqan holda, tasdiqlangan Dasturga oʻzgartirish va qoʻshimchalar kiritish huquqi berilsin.

4. “Angren” MIZ Maʼmuriy kengashining “ToshkentboshplanLITI” DUKni “Angren” MIZ bosh rejasining, shu jumladan uning ishlab chiqarish infratuzilmasini rivojlantirishning bosh loyihachisi etib belgilash toʻgʻrisidagi taklifiga rozilik berilsin.

5. “Angren” MIZ direksiyasi:

bir oy muddatda “ToshkentboshplanLITI” DUKga “Angren” MIZning bosh rejasini ishlab chiqish yuzasidan texnik topshiriq bersin va shartnomalar tuzilishini taʼminlasin, unda texnik va ekologik talablardan kelib chiqqan holda, birinchi navbatdagi sanoat klastyerlarining ularni soha boʻyicha taqsimlagan holda ajratilishini nazarda tutsin;

har yili 1-maygacha “Angren” MIZning Maʼmuriy kengashi koʻrib chiqishi uchun navbatdagi kalendar yilning Oʻzbekiston Respublikasi Investitsiya dasturiga kiritish uchun “Angren” MIZ hududida yangi ishlab chiqarishlarni joylashtirish, ishlab chiqarish infratuzilmasi va transport kommunikatsiyalarini jadal rivojlantirish boʻyicha takliflar kiritsin.

6. Oʻzbekiston Respublikasi Iqtisodiyot vazirligi va Moliya vazirligi joriy yilda “Angren” MIZ direksiyasiga hamda Toshkent viloyati hokimligiga, 2012-yilgi kapital qoʻyilmalar limitlarini qayta taqsimlash hisobiga, “Angren” MIZ infratuzilma obyektlarining bosh rejasi va loyiha-smeta hujjatlarini ishlab chiqish uchun zarur mablagʻlar ajratilishini taʼminlasinlar.

7. Oʻzbekiston Respublikasi Davlat geologiya qoʻmitasi Iqtisodiyot vazirligi va Moliya vazirligi bilan birgalikda 2013-yil uchun Geologiya-qidiruv ishlari dasturini shakllantirishda “Angren” MIZ korxonalari tomonidan foydalanish uchun texnik va ichimlik suvning qoʻshimcha resurslarini, shuningdek xomashyo va qurilish materiallarining sanoat zaxiralarini aniqlash chora-tadbirlarini nazarda tutsin.

8. Oʻzbekiston Respublikasi Moliya vazirligi huzuridagi Respublika yoʻl jamgʻarmasi, “Oʻzbekenergo” DAK, “Oʻzbekiston temir yoʻllari” kompaniyasi, “Oʻztransgaz”AK, “Oʻzkommunxizmat” agentligi va Toshkent viloyati hokimligi 2012-yil 1-oktabrgacha boʻlgan muddatda 2013 — 2015-yillarda “Angren” maxsus industrial zonasining transport, ishlab chiqarish va muhandislik-kommunikatsiya infratuzilmasini jadal rivojlantirish dasturiga kiritilgan loyihalar boʻyicha loyiha hujjatlarining sifatli ishlab chiqilishini taʼminlasinlar.

9. Oʻzbekiston Respublikasi Iqtisodiyot vazirligi, Moliya vazirligi, Tashqi iqtisodiy aloqalar, investitsiyalar va savdo vazirligi 2013-yil va keyingi yillar uchun Oʻzbekiston Respublikasi Investitsiya dasturlarini shakllantirishda ularga Dasturda koʻrsatilgan investitsiya loyihalari kiritilishini nazarda tutsinlar, ularda:

“Angren” MIZ ning ishlab chiqarish, muhandislik-kommunikatsiya va transport infratuzilmasi jadal rivojlantirilishini;

xorijiy investitsiyalarni jalb etish va respublika mintaqalarida sanoat zonalarini qurish uchun qulay shart-sharoitlar yaratish maqsadida infratuzilma obyektlari qurilishiga maxsus ajratiladigan davlat budjeti mablagʻlari hisobiga realizatsiya qilish uchun tavsiya etilayotgan loyihalar roʻyxati aniqlanishini hisobga olsinlar.

10. Oʻzbekiston Respublikasi “Davarxitektqurilish” qoʻmitasi, Toshkent viloyati hokimligi 2013 — 2015-yillarda “Angren” maxsus industrial zonasining transport, ishlab chiqarish va muhandislik-kommunikatsiya infratuzilmasini jadal rivojlantirish dasturiga kiritilgan loyihalar boʻyicha bajarilayotgan loyihalash va qurilish-montaj ishlarining sifati, shuningdek shartnomaviy majburiyatlarga va qurilish muddatlariga rioya etilishi yuzasidan nazoratni taʼminlasinlar.

11. Oʻzbekiston Respublikasi Iqtisodiyot vazirligi Toshkent viloyati hokimligi bilan birgalikda ushbu qaror bilan tasdiqlangan Dasturning bajarilishi yuzasidan tizimli monitoring oʻrnatsin va natijalari boʻyicha har chorakda Oʻzbekiston Respublikasi Vazirlar Mahkamasiga axborot taqdim etsin.

12. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S.Azimov zimmasiga yuklansin.