Oʻzbekiston Respublikasi Hukumati va Vengriya Respublikasi Hukumati, bundan keyin “Tomonlar” deb ataluvchilar,

tomonlar davlatlari oʻrtasida doʻstona aloqalarni mustahkamlashni va iqtisodiy va boshqa munosabatlarni rivojlantirishni istab,

anʼanaviy iqtisodiy munosabatlarni davom ettirishga va yaxshilashga intilib, shuningdek oʻzaro manfaatli iqtisodiy, industrial, sanoat va ilmiy-texnikaviy hamkorlikni jadallashtirish va rivojlantirishni niyat qilib,

kelishuv shartlari kengayishi kelajakdagi hamkorlik uchun zarur va maqbul asoslarni taʼminlashiga ishonib,

quyidagilar toʻgʻrisida kelishib oldilar:

Tomonlar oʻz davlatlari milliy qonunchiligiga va davlatlari ishtirokchisi boʻlgan xalqaro shartnomalar qoidalariga muvofiq iqtisodiy va ijtimoiy rivojlantirish sohasida hamkorlikni kengaytirish va diversifikatsiya qilishga koʻmaklashadilar.

Tomonlar iqtisodiy munosabatlarning rivojlanish istiqbollarini va holatini hisobga olib, quyidagi sohalarda, ammo bu bilan cheklanib qolmasdan, uzoq muddatli hamkorlik uchun mavjud maqbul sharoitlarni kelishib oldilar:

a) energetika tarmogʻi;

b) mineral xom-ashyo resurslarini va togʻ-kon sanoati mahsulotlarini razvedka qilish, qazib olish va qayta ishlash, shuningdek sotish;

v) qishloq xoʻjaligi, oziq-ovqat va qayta ishlash sanoati;

g) qurilish va qurilish materiallari va uskunalarini ishlab chiqarish;

d) kimyo sanoati;

e) toʻqimachilik sanoati;

yo) upakovka qiladigan texnologiya;

j) atrof muhitni muhofaza qilish, suv resurslaridan oqilona foydalanish va muhofaza qilish;

z) yogʻochga ishlov berish sanoati;

i) taʼlim;

y) inson resurslarini rivojlantirish;

k) sogʻliqni saqlash sohasida xizmatlar taqdim etish, tibbiyot texnologiyalari, farmatsevtika sanoati;

l) turizm, sport va kurort ishi;

m) kichik va oʻrta biznes sohasida hamkorlik;

n) kommunikatsiya;

o) kompyuter va axborot texnologiyalari;

p) transport va logistika;

r) ilmiy-texnikaviy sohada hamkorlik.

Tomonlar quyidagi yoʻllar orqali hamkorlikni kengaytirish va jadallashtirishni qoʻllab-quvvatlaydilar:

a) tijorat tarmogʻi vakillari oʻrtasida oʻzaro manfaatlarni aks ettiruvchi iqtisodiy masalalar boʻyicha ommabop maʼlumotlarni almashishni oʻz ichiga oluvchi aloqalarni mustahkamlash;

b) hukumat tashkilotlari, professional assotsiatsiyalar va ishbilarmon doiralar, savdo-sanoat palatalari vakillari, shuningdek mazkur Bitimning 2-moddasida belgilangan masalalarni nazorat qiluvchi hududiy organlar vakillarining tashriflari bilan almashish;

v) jismoniy shaxslar va tadbirkorlar tashriflari va uchrashuvlarni qoʻllab-quvvatlash orqali ikki mamlakat ishbilarmon doiralari oʻrtasidagi aloqalarni oʻrnatish va yaxshilashga koʻmaklashish;

g) maʼlumotlar almashinuvi, yarmarkalar va koʻrgazmalar oʻtkazishda, seminarlar, simpoziumlar, konferensiyalar va boshqa uchrashuvlarni tashkil etishda koʻmaklashish;

d) ikki tomonlama iqtisodiy aloqalarda xususiy sektorning kichik va oʻrta korxonalari ishtirokini ragʻbatlantirish;

e) konsalting, marketing va ekspert xizmatlari koʻrsatish sohalarida hamkorlikka koʻmaklashish;

j) moliya institutlari va bank sektorlarining yaqin aloqalar oʻrnatishda va hamkorlikni mustahkamlashdagi faoliyatlarini ragʻbatlantirish;

z) tomonlar mamlakatlaridagi investitsion faoliyatni qoʻllab- quvvatlash, qoʻshma korxonalar, vakolatxonalar va kompaniyalarning filiallarini tashkil etish;

i) oʻzaro manfaatlarni aks ettiruvchi hududlararo va xalqaro hamkorlikni rivojlantirish.

Mazkur Bitimni amalga oshirish maqsadida, Tomonlar oʻz davlatlarining tegishli organlari va kompaniyalari vakillaridan tashkil topgan Oʻzbekiston Respublikasi va Vengriya Respublikasi oʻrtasida iqtisodiy hamkorlik boʻyicha Hukumatlararo komissiyani tashkil etishlari mumkin. Hukumatlararo komissiya yigʻilishlari Tomonlarning kelishuvi bilan navbatma-navbat Oʻzbekiston Respublikasida va Vengriya Respublikasida oʻtkaziladi.

Komissiyaning vazifalari quyidagilardan iborat:

ikki tomonlama iqtisodiy aloqalarni rivojlantirishni muhokama qilish;

iqtisodiy hamkorlikni yanada rivojlantirish uchun yangi imkoniyatlarni aniqlash;

ikki mamlakat korxonalari oʻrtasidan iqtisodiy hamkorlik shartlarini yaxshilashga qaratilgan takliflarni ishlab chiqish:

ikki tomonlama iqtisodiy aloqalarning holatini baholash va tahlil qilish;

mazkur Bitimni bajarish bilan bogʻliq masalalar boʻyicha takliflar tayyorlash.

Komissiya zarur hollarda hamkorlikning maʼlum bir masalalari bilan shugʻullanuvchi ishchi guruhlarini tashkil qiladi.

Komissiya ishining tartibi uning birinchi yigʻilishi davomida aniqlanadi. Tomonlar oʻz davlatlari milliy qonunchiligiga muvofiq Komissiya faoliyati bilan bogʻlik xarajatlarni mustaqil ravishda qoplaydilar.

Mazkur Bitim Vengriya Respublikasining Yevropa Ittifoqidagi aʼzoligidan kelib chiqadigan majburiyatlariga hech qanday koʻrinishda zarar yetkazmasligi kerak. Mazkur Bitimning qoidalari bilan Vengriya Respublikasining Yevropa Ittifoqiga asos solgan Shartnomalaridan, shuningdek Yevropa Ittifoqining asosiy va ikkinchi darajali qonunlaridan kelib chiqadigan majburiyatlarini butunligicha yoki umuman bekor qiluvchi kuch yoki boshqa koʻrinishda tatbiq qilinishi yoxud izohlanishi mumkin emas.

Mazkur Bitimning qoidalari Oʻzbekiston Respublikasining u ishtirokchi boʻlgan xalqaro shartnomalardan, shuningdek xalqaro tashkilotlarga aʼzoligidan kelib chiqadigan huquq va majburiyatlariga taʼsir etmaydi.

Tomonlarning oʻzaro kelishuviga koʻra ushbu Bitimga uning ajralmas qismi hisoblanadigan, alohida bayonnomalar bilan rasmiylashtiriladigan oʻzgartirish va qoʻshimchalar kiritilishi mumkin.

Mazkur Bitimni talqin qilish va tatbiq qilish bilan bogʻliq har qanday nizolar Tomonlar oʻrtasida muzokaralar yoʻli bilan hal qilinadi.

Mazkur Bitim Tomonlar tarafidan u kuchga kirishi uchun zarur boʻlgan ichki davlat tartibotlar bajarilganligi toʻgʻrisidagi soʻnggi yozma xabarnomani olingan kundan oʻttiz kundan soʻng kuchga kiradi.

Mazkur Bitim nomuayyan muddatga tuziladi. Tomonlardan biri mazkur Bitimni bekor qilish niyati toʻgʻrisida yozma xabarnomani boshqa Tomonga yuborish bilan bekor qilish mumkin. Bunday holda Tomonlardan biri bunday xabarnomani olgan sanadan boshlab olti oy oʻtgandan soʻng mazkur Bitim oʻz kuchini yoʻqotadi.

2011-yil 7-noyabrda Toshkent shahrida ikki nusxada, har biri oʻzbek, venger va rus tillarida imzolandi, bunda barcha matnlar bir xil kuchga ega. Mazkur Bitim qoidalarini talqin qilishda Tomonlar oʻrtasida tafovutlar yuzaga kelgan taqdirda, Tomonlar rus tilidagi matnga murojaat qiladilar.