Xalqaro avtomobilda yuk tashishlar bozorini yanada rivojlantirish, xorijiy avtomobilda yuk tashuvchilarning O‘zbekiston Respublikasi hududiga kirishlari, undan chiqib ketishlari va bo‘lishlarini nazorat qilish mexanizmini takomillashtirish, O‘zbekiston Respublikasi xalqaro avtomobil magistrallarining saqlanishini va ulardan foydalanish holati saqlab turilishini ta’minlash, shuningdek yirik gabaritli va og‘ir vaznli avtotransport vositalarining o‘tishini tartibga solish maqsadida Vazirlar Mahkamasi qaror qiladi:

1. Vazirlar Mahkamasining “Avtomobilda xorijiy yuk tashuvchilarning O‘zbekiston Respublikasi hududiga kirishlari, bo‘lishlari, yuk olib o‘tishlari va undan chiqib ketishlari tartibi to‘g‘risida” 1995-yil 11-yanvardagi 11-son qaroriga ilovaga muvofiq o‘zgartirishlar kiritilsin.

2. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari B.I. Zakirov zimmasiga yuklansin.

1. 5-bandda:

a) birinchi xatboshidagi “avtotransport vositalarining O‘zbekiston Respublikasi hududiga kirganligi uchun olinadigan to‘lov” so‘zlari “xorijiy davlatlar avtotransport vositalarining O‘zbekiston Respublikasi hududiga kirganligi hamda tranzit o‘tishi uchun yig‘im” so‘zlari bilan almashtirilsin:

b) uchinchi xatboshi quyidagi tahrirda bayon qilinsin;

“Hujjatlarni rasmiylashtirish, xorijiy davlatlar avtotransport vositalarining O‘zbekiston Respublikasi hududiga kirganligi hamda tranzit o‘tishi uchun yig‘im to‘lanishi ustidan nazorat bojxona organlari tomonidan amalga oshiriladi”.

2. 6-band quyidagi tahrirda bayon qilinsin:

“6. Quyidagilar:

og‘ir yukli va yirik gabaritli transport vositalarining avtomobil yo‘llarini davlat tomonidan boshqarish vakolatli organlari tomonidan belgilangan tartibda beriladigan maxsus ruxsatnomasiz umumiy foydalaniladigan yo‘llardan yurib o‘tishi;

agar ikki tomonlama bitimlarda o‘zgacha hol nazarda tutilmagan bo‘lsa, avtomobilda xorijiy yuk tashuvchilar tomonidan yuklarning uchinchi mamlakatlarga (mamlakatlardan) tashilishi taqiqlansin”.

3. Xorijiy davlatlar og‘ir yukli va katta hajmli transport vositalarining O‘zbekiston Respublikasi hududi bo‘ylab yurishi uchun to‘lovlar to‘g‘risida Nizomda (6-ilova):

a) 2-band o‘z kuchini yo‘qotgan deb hisoblansin;

b) 6-band quyidagi tahrirda bayon qilinsin:

“Transport vositasi umumiy haqiqiy vaznining yo‘l qo‘yiladigan vaznga nisbatan ortiqchaligi uchun to‘lov miqdori 1-jadvaldagi tariflarga muvofiq belgilanadi.

Og‘ir yukli transport vositalari avtomobil yo‘llari bo‘ylab yurib o‘tganda g‘ildirak o‘qi haqiqiy yuklamasining yo‘l qo‘yiladigan miqdorga nisbatan ortiqchaligi uchun to‘lov har bir o‘qqa ortiqcha yuklama uchun 2-jadvalda keltirilgan tariflarga muvofiq undiriladi.