Oʻzbekiston Respublikasi Prezidentining 2011-yil 30-maydagi PQ-1542-son “2011 — 2015-yillarda yolgʻiz keksalar, pensioner va nogironlarni ijtimoiy himoya qilishni yanada kuchaytirish boʻyicha qoʻshimcha chora-tadbirlar toʻgʻrisida”gi qarori (Oʻzbekiston Respublikasi qonun hujjatlari toʻplami, 2011-y., 22-23-son, 229-modda) va Oʻzbekiston Respublikasi Vazirlar Mahkamasining 2011-yil 23-avgustdagi 240-son “Oʻzbekiston Respublikasi Mehnat va aholini ijtimoiy muhofaza qilish vazirligining tibbiy-ijtimoiy muassasalari toʻgʻrisidagi nizomlarni tasdiqlash haqida”gi qaroriga (Oʻzbekiston Respublikasi qonun hujjatlari toʻplami, 2011-y., 34-35-son, 348-modda) muvofiq Oʻzbekiston Respublikasi Mehnat va aholini ijtimoiy muhofaza qilish vazirligi va Moliya vazirligi qaror qiladi:

1. Nogironlar va keksalarni bepul sanatoriya-kurort yoʻllanmalari bilan taʼminlash tartibi toʻgʻrisidagi yoʻriqnoma ilovaga muvofiq tasdiqlansin.

2. Quyidagilar oʻz kuchini yoʻqotgan deb hisoblansin:

Oʻzbekiston Respublikasi Mehnat va aholini ijtimoiy muhofaza qilish vazirligi va Moliya vazirligining 2005-yil 24-maydagi 99, 44-son “Nogironlar va pensionerlarni sanatoriya-kurort yoʻllanmalari bilan bepul taʼminlash tartibi toʻgʻrisida yoʻriqnomani tasdiqlash haqida”gi qarori (roʻyxat raqami 1489, 2005-yil 6-iyul) (Oʻzbekiston Respublikasi qonun hujjatlari toʻplami, 2005-y., 27-son, 196-modda);

Oʻzbekiston Respublikasi Mehnat va aholini ijtimoiy muhofaza qilish vazirligi va Moliya vazirligining 2010-yil 23-sentabrdagi 169, 79-son “Nogironlar va pensionerlarni sanatoriya-kurort yoʻllanmalari bilan bepul taʼminlash tartibi toʻgʻrisidagi yoʻriqnomaga oʻzgartirishlar va qoʻshimcha kiritish haqida”gi qarori (roʻyxat raqami 1489-1, 2010-yil 21-oktabr) (Oʻzbekiston Respublikasi qonun hujjatlari toʻplami, 2010-y., 42-43-son, 370-modda).

3. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

Mazkur Yoʻriqnoma Oʻzbekiston Respublikasining “Oʻzbekiston Respublikasida nogironlarni ijtimoiy himoya qilish toʻgʻrisida”gi Qonuni (Oʻzbekiston Respublikasi qonun hujjatlari toʻplami, 2008-y., 29-30-son, 277-modda) hamda Oʻzbekiston Respublikasi Vazirlar Mahkamasining 2011-yil 23-avgustdagi 240-son “Oʻzbekiston Respublikasi Mehnat va aholini ijtimoiy muhofaza qilish vazirligining tibbiy-ijtimoiy muassasalari toʻgʻrisidagi nizomlarni tasdiqlash haqida”gi qaroriga (Oʻzbekiston Respublikasi qonun hujjatlari toʻplami, 2011-y., 34-35-son, 348-modda) muvofiq sanatoriya-kurortda davolanishga muhtoj ishlamaydigan nogironlar, pensionerlar va yolgʻiz keksalarni (bundan buyon matnda nogironlar va keksalar deb yuritiladi) bepul sanatoriya-kurort yoʻllanmalari (bundan buyon matnda yoʻllanmalar deb yuritiladi) bilan taʼminlash tartibini belgilaydi.

1. Mazkur Yoʻriqnomaga muvofiq yoʻllanmalar keksalar va nogironlar, urush va mehnat faxriylari uchun sanatoriylarga (bundan buyon matnda sanatoriylar deb yuritiladi) beriladi.

2. Nogironlar va keksalar tuman (shahar) bandlikka koʻmaklashish va aholini ijtimoiy muhofaza qilish markazlari (bundan buyon matnda markaz deb yuritiladi) orqali yoʻllanmalar bilan mazkur Yoʻriqnomada belgilangan tartibda taʼminlanadi.

3. Yoʻllanmalardan foydalanuvchi nogironlar va keksalar toifasiga quyidagi shaxslar kiradi:

Ikkinchi jahon urushi nogironlari va qatnashchilari hamda ularga tenglashtirilgan shaxslar, shuningdek 1-guruh urush nogironini kuzatib boruvchi shaxs;

front ortidagi fidokorona mehnati va benuqson harbiy xizmatlari uchun sobiq SSR Ittifoqining orden va medallari bilan taqdirlangan, Ikkinchi jahon urushi yillaridagi mehnat fronti qatnashchilari;

halok boʻlgan harbiy xizmatchilarning oilalari;

respublika ahamiyatiga molik shaxsiy pensiya oluvchi shaxslar;

Chernobil AES halokati oqibatida nurlanish kasalligiga chalingan va uni boshidan kechirgan shaxslar, shuningdek Chernobil halokati sababli nogiron boʻlib qolgan shaxslar;

yadro poligonlari va boshqa radiatsiya-yadro obyektlarida harbiy xizmatni oʻtagan shaxslar;

I va II-guruh nogironlari, koʻzi ojiz I-guruh nogironini kuzatib boruvchi shaxs;

ishlamaydigan yolgʻiz keksalar;

ishlamaydigan yoshga doir pensionerlar.

4. Yoʻllanmalarni berish davriyligi:

a) har yili (navbat asosida):

Ikkinchi jahon urushi nogironlari hamda ularga tenglashtirilgan shaxslar, shuningdek I -guruh urush nogironini kuzatib boruvchi shaxsga;

respublika ahamiyatiga molik shaxsiy pensiya oluvchi shaxslarga;

Chernobil AES halokati oqibatida nurlanish kasalligiga chalingan va uni boshidan kechirgan shaxslar, shuningdek Chernobil halokati sababli nogiron boʻlib qolgan shaxslarga;

yadro poligonlari va boshqa radiatsiya-yadro obyektlarida harbiy xizmatni oʻtagan shaxslarga;

ishlamaydigan yolgʻiz keksalarga;

b) ikki yilda bir marotaba (navbat asosida):

Ikkinchi jahon urushi qatnashchilari hamda ularga tenglashtirilgan shaxslarga;

front ortidagi fidokorona mehnati va benuqson harbiy xizmatlari uchun sobiq SSR Ittifoqining orden va medallari bilan taqdirlangan, Ikkinchi jahon urushi yillaridagi mehnat fronti qatnashchilariga;

halok boʻlgan harbiy xizmatchilarning oilalariga;

I va II-guruh nogironlari, koʻzi ojiz I-guruh nogironini kuzatib boruvchi shaxsga;

v) sanatoriylarda boʻsh oʻrin mavjud boʻlgan taqdirda, navbat asosida, ammo 3 yilda 1 marotaba — ishlamaydigan yoshga doir pensionerlarga.

5. Oʻzbekiston Respublikasi Mehnat va aholini ijtimoiy muhofaza qilish vazirligi (bundan buyon matnda vazirlik deb yuritiladi) Qoraqalpogʻiston Respublikasi Mehnat va aholini ijtimoiy muhofaza qilish vazirligi hamda viloyatlar va Toshkent shahar Mehnat va aholini ijtimoiy muhofaza qilish bosh boshqarmalarining (bundan buyon matnda hududiy boshqarmalar deb yuritiladi) talabnomalariga asosan nogironlar va keksalarning umumiy soniga muvofiq respublika sanatoriylarga yoʻllanmalarni taqsimlash rejasini har chorakda tasdiqlaydi.

Ushbu talabnomalar har chorakda, navbatdagi chorak boshlanishidan bir oy oldin vazirlikka taqdim etiladi.

6. Tasarrufida sanatoriylar boʻlgan hududiy boshqarmalar markazlarning talabnomalariga asosan nogironlar va keksalarning umumiy soniga muvofiq hududiy sanatoriylarga yoʻllanmalarni taqsimlash rejasini har oyda tasdiqlaydilar. Zarur boʻlganda, hududiy sanatoriylarga respublikaning boshqa hududlarida yashovchi nogironlar va keksalar uchun ham yoʻllanmalar vazirlikning talabnomasiga asosan ajratilishi mumkin.

Ushbu talabnomalar navbatdagi oy boshlanishidan oldingi oyning 15-sanasigacha tegishli hududiy boshqarmalarga taqdim etiladi.

7. Foydalanilgan yoʻllanmalar toʻgʻrisidagi maʼlumotlar, har chorakdan keyingi oyning 5-sanasiga qadar hududiy boshqarmalar tomonidan vazirlikka taqdim etiladi.

8. Nogironlar va keksalar yoʻllanmalarni olish uchun quyidagi hujjatlarni taqdim etishlari shart:

markaz rahbari nomiga ariza;

pasport nusxasi;

imtiyozdan foydalanish huquqini beruvchi hujjat;

tibbiy xulosa.

Arizalar mazkur Yoʻriqnomaning ilovasiga muvofiq maxsus roʻyxatga olish kitobida qayd etiladi.

9. Ikkinchi jahon urushi nogironlari va qatnashchilari hamda ularga tenglashtirilgan shaxslar uchun sanatoriylarga yoʻllanmalar birinchi navbatda beriladi.

10. Yoʻllanmalar, ularni amal qilish muddati boshlanishidan kamida 10 kun oldin nogironlar va keksalarga tibbiy xulosaga muvofiq beriladi.

11. Yoʻllanmalar tibbiy xulosada quyidagi kasalliklar koʻrsatilganda berilmaydi:

bemorning oʻzi va atrofdagilar uchun xavfli boʻlgan qoʻpol va xulqiy buzilishlar sabab boʻladigan ruhiy kasalliklar, xususan tez-tez (har oyda 5-martadan koʻp) tutqanoq sodir boʻladigan epilepsiya, muntazam tutqanoqlarga, epileptik maqomga, kun oxiriga borib boʻshashuvchanlikka, disforiyalarga moyillik kasalliklar;

jarayonning faol bosqichidagi sil kasalligi;

yuqumli teri va soch kasalliklari;

oʻtkir yuqumli kasalliklar;

salbiy jarayondagi, yomon holatda oʻtadigan shish kasalliklari va retsidivlari;

tanosil kasalliklari, OIV yuqqanlar.

12. Tibbiy xulosalarda nogironlar va keksalarni tegishli kasalliklar boʻyicha ixtisoslashtirilgan sanatoriylarga yoʻllanma berish yuzasidan maʼlumotlar kiritilishi mumkin.

13. Yoʻllanmani berishda, yoʻllanma varaqasining barcha ustunlari toʻliq toʻldirilishi lozim, shu jumladan nogironlar va keksalarning F.I.O., toifasi, yoʻllanma bilan taʼminlagan markazning nomi koʻrsatilishi kerak.

Yoʻllanmalar, ularni berishga masʼul boʻlgan shaxsning imzosi va tashkilotning muhri bilan tasdiqlanadi.

14. Yoʻllanmalar faqat ularda koʻrsatilgan muddatlarda haqiqiydir. Kechikib kelingan kunlar tiklanmaydi.

15. Yoʻllanmadan faqat unda koʻrsatilgan shaxsgina foydalanishi mumkin. Sanatoriyga bitta yoʻllanma bilan bittadan ortiq kishi qabul qilinmaydi.

16. Sanatoriyga tashrif buyurgan nogironlar va keksalar oʻzi bilan birga yoʻllanmadan tashqari pasport va sanatoriya-kurort kartasini olib kelishi lozim.

17. Sanatoriylarga qabul qilish chogʻida yuqori harorat yoki noaniq etiologiyali toshma aniqlangan shaxslar sogʻliqni saqlash muassasalariga yuboriladi.

18. Nogironlar va keksalar sanatoriyga bora olmagan taqdirda zudlik bilan markazga axborot berishi lozim hamda kelish muddatlarini koʻchirish toʻgʻrisida murojaat qilishi mumkin.

19. Vazirlik yoʻllanmalarni joylarda oʻz vaqtida va maqsadli berilishi, nogironlar va keksalar yoʻllanmalarni olishlarida navbatga rioya qilinishini taʼminlaydi va nazoratini amalga oshiradi.

20. Yoʻllanmalarning blankalarini ishlab chiqarish boʻyicha buyurtmalar respublika sanatoriylari boʻyicha vazirlik tomonidan, hududiy sanatoriylar boʻyicha esa hududiy boshqarmalar tomonidan amalga oshiriladi.

21. Sanatoriy rahbarlari sogʻlomlashtirilgan nogironlar va keksalarga sanatoriyda haqiqatda boʻlgan vaqtini, muddatidan oldin ketgan boʻlsa, uning sabablari koʻrsatilgan “bepul sanatoriya-kurort yoʻllanmasiga qaytarma talon”ni beradi.

22. Nogironlar va keksalar sanatoriydan qaytib kelgandan soʻng yashash joyi boʻyicha markazga “bepul sanatoriya-kurort yoʻllanmasiga qaytarma talon”ni topshirishi shart.

“Bepul sanatoriya-kurort yoʻllanmasiga qaytarma talon” yoʻllanmaning ishlatilganini tasdiqlovchi hujjat boʻlib hisoblanadi.

23. Mazkur Yoʻriqnoma Oʻzbekiston Respublikasi Sogʻliqni saqlash vazirligi, Oʻzbekiston Nogironlar jamiyati, Oʻzbekiston Koʻzi ojizlar jamiyati, Oʻzbekiston Karlar jamiyati va “Oʻzbekiston Chernobilchilari” Respublika Assotsiatsiyasi bilan kelishilgan.