Aholi turar joylari, madaniy-tarixiy obidalar, strategik ahamiyatga ega boʻlgan obyektlar, ishlab chiqarish binolari, inshootlar va boshqa turdagi obyektlarni saqlash, ularga zarar yetkazayotgan termitlarning tarqalishi va ularning zararli faoliyatiga qarshi kurashishni yanada kuchaytirish maqsadida Vazirlar Mahkamasi qaror qiladi:

1. Oʻzbekiston Respublikasi Fanlar akademiyasi, Madaniyat va sport ishlari vazirligi, Qishloq va suv xoʻjaligi vazirligi hamda Davlat arxitektura va qurilish qoʻmitasining Qoraqalpogʻiston Respublikasi, viloyatlar va Toshkent shahrida termitlarga qarshi kurashish xizmatini koʻrsatuvchi Oʻzbekiston Respublikasi Fanlar akademiyasi Zoologiya instituti huzurida va uning muassisligida xoʻjalik hisobida faoliyat yurituvchi “Respublika termitlarga qarshi kurashish markazi” davlat unitar korxonasini (keyingi oʻrinlarda — Markaz deb yuritiladi) tashkil etish toʻgʻrisidagi taklifi maʼqullansin.

2. Quyidagilar Markazning asosiy vazifalari etib belgilansin:

Oʻzbekiston Respublikasi Fanlar akademiyasi Zoologiya instituti yoki boshqa tashkilotlar tomonidan yaratilgan termitlarga qarshi zaharli yem-xoʻraklar va kurashish vositalarini ishlab chiqarish;

termitlarga qarshi kurashish yuzasidan Oʻzbekiston Respublikasi Fanlar akademiyasi Zoologiya instituti bilan hamkorlikda uslubiy qoʻllanmalar, tavsiyalar va yoʻriqnomalar ishlab chiqish;

Qoraqalpogʻiston Respublikasi, viloyatlar va Toshkent shahar dezinfeksiya stansiyalari va “Oʻzagrokimyohimoya” AJning Qoraqalpogʻiston Respublikasi va viloyatlar “Agrokimyohimoya” hududiy aksiyadorlik jamiyatlari bilan birgalikda termitlar tarqalgan obyektlarni aniqlash hamda aholi oʻrtasida termitlarga qarshi kurashish boʻyicha tushuntirish ishlarini amalga oshirish;

jismoniy va yuridik shaxslar bilan shartnoma asosida termitlarga qarshi kurashish ishlarini amalga oshirish;

termitlarga qarshi zaharli yem-xoʻraklar va kurashish vositalarini shartnoma asosida Qoraqalpogʻiston Respublikasi, viloyatlar va Toshkent shahar dezinfeksiya stansiyalari va “Oʻzagrokimyohimoya” AJning Qoraqalpogʻiston Respublikasi va viloyatlar “Agrokimyohimoya” hududiy aksiyadorlik jamiyatlariga buyurtmaga asosan yetkazib berishni taʼminlash;

termitlarning tabiiy oʻchoqlari boʻlgan va qurilishi xavfli deb belgilangan hududlarning aniq roʻyxatini tuzish hamda ushbu hududlarda termitlar bartaraf etilganligi boʻyicha xulosalar berish.

3. Oʻzbekiston Respublikasi Fanlar akademiyasi Zoologiya instituti huzuridagi “Respublika termitlarga qarshi kurashish markazi” davlat unitar korxonasining tuzilmasi ilovaga muvofiq tasdiqlansin.

Markazning direktori va uning oʻrinbosari lavozimiga Oʻzbekiston Respublikasi Fanlar akademiyasi Zoologiya instituti direktorining taqdimnomasiga asosan Oʻzbekiston Respublikasi Fanlar akademiyasi tomonidan tayinlanishi belgilansin.

4. Oʻzbekiston Respublikasi Fanlar akademiyasi:

bir oy muddatda Oʻzbekiston Respublikasi Fanlar akademiyasi Zoologiya instituti bilan birgalikda markazning ustavi tasdiqlanishini, uning ustav fondi shakllantirilishini hamda Markazni belgilangan tartibda davlat roʻyxatidan oʻtkazishni taʼminlasin;

Markazni Oʻzbekiston Respublikasi Fanlar akademiyasi Zoologiya institutining Toshkent shahar, Olmazor tumani, A.Niyozov koʻchasi, 1-uy manzilidagi binoga joylashtirsin;

Markazni zarur ixtisoslikka ega boʻlgan malakali kadrlar bilan taʼminlasin.

5. Belgilab qoʻyilsinki:

Qoraqalpogʻiston Respublikasi, viloyatlar va Toshkent shahar dezinfeksiya stansiyalari va “Oʻzagrokimyohimoya” AJning Qoraqalpogʻiston Respublikasi va viloyatlar “Agrokimyohimoya” hududiy aksiyadorlik jamiyatlari termitlarga qarshi kurashish maqsadida Markaz bilan shartnoma asosida ish olib boradi;

dezinfeksiya stansiyalari aholi yashaydigan uy-joylarda, ijtimoiy soha obyektlarida, korxona va tashkilotlarda hamda madaniy-tarixiy obidalarda termitlarga qarshi kurashish va profilaktik chora-tadbirlarni amalga oshiradi;

“Oʻzagrokimyohimoya” AJning Qoraqalpogʻiston Respublikasi va viloyatlar “Agrokimyohimoya” hududiy aksiyadorlik jamiyatlari tabiiy sharoitda termitlar tarqalgan hududlarda (dalalarda, qabristonlarda, choʻl zonalarida va boshqa ochiq joylarda) ularga qarshi kurashish va profilaktik chora-tadbirlarni amalga oshiradi;

Markaz termitlarga qarshi kurashishda intellektual mulk hisoblangan vositalardan foydalanganlik uchun huquq egasi bilan qonunchilikda belgilangan tartibda shartnoma tuzadi.

6. Oʻzbekiston Respublikasi Innovatsion rivojlanish vazirligi hamda Fanlar akademiyasi Davlat ilmiy dasturlarini shakllantirish jarayonida termitlarga qarshi zaharli yem-xoʻraklar va kurashish vositalarini takomillashtirish bilan bogʻliq izlanishlar mavzularini 2012-yildan boshlab Davlat ilmiy dasturlari tarkibiga kiritilishini rejalashtirsin.

7. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:

Markaz tomonidan termitlarning tabiiy oʻchoqlari boʻlgan va qurilish uchun xavfli deb belgilangan hududlarda termitlar bartaraf etilmagunga qadar qurilish uchun yer maydonlari ajratilishini taqiqlasinlar;

tegishli hududda termitlar tarqalishining oldini olish va ularga qarshi kurashish tadbirlari tegishlicha Qoraqalpogʻiston Respublikasi budjeti, viloyatlar va Toshkent shahar hokimliklarining mahalliy budjetlari mablagʻlari doirasida moliyalashtirilishini taʼminlasinlar.

8. Oʻzbekiston Respublikasi Davlat arxitektura va qurilish qoʻmitasi dunyo amaliyotida tan olingan termitlarga qarshi chidamli bino va inshootlar qurish tajribasini oʻrganib, belgilangan tartibda qurilishga joriy qilinishini taʼminlasin.

9. Oʻzbekiston Respublikasi Oliy va oʻrta maxsus taʼlim vazirligiga respublikadagi oliy taʼlim muassasalarida biologiya, tabiatshunoslik va oʻsimliklarni himoya qilish ixtisosliklari boʻyicha tayyorlanayotgan bakalavr va magistrlar oʻquv dasturlariga “Biozararlanish asoslari”, “Hasharotlar ekologiyasi” maxsus kurslarini kiritish va tegishli darsliklar bilan taʼminlash vazifasi yuklansin.

10. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari B.I. Zokirov va A.N. Aripov zimmasiga yuklansin.