Oʻzbekiston Respublikasining alohida muhim va toifalangan obyektlarida qoʻriqlashning texnik vositalarini loyihalashtirish, montaj qilish, sozlash, taʼmirlash va texnik xizmat koʻrsatish ishlarini tashkil etishni tartibga solish maqsadida Vazirlar Mahkamasi qaror qiladi:

1. Oʻzbekiston Respublikasining alohida muhim va toifalangan obyektlarida qoʻriqlashning texnik vositalarini loyihalashtirish, montaj qilish, sozlash, taʼmirlash va texnik xizmat koʻrsatish ishlarini bajarishga ruxsatnoma berish tartibi toʻgʻrisidagi nizom ilovaga muvofiq tasdiqlansin.

2. Vazirliklar, davlat qoʻmitalari, idoralar va boshqa tashkilotlar rahbarlari Oʻzbekiston Respublikasining alohida muhim va toifalangan obyektlarida qoʻriqlashning texnik vositalarini loyihalashtirish, montaj qilish, sozlash, taʼmirlash va texnik xizmat koʻrsatish ishlarini bajarish yuzasidan shartnomalar tuzishda ushbu qaror bilan tasdiqlangan Nizom talablariga qatʼiy amal qilsinlar, shuningdek idoraviy mansub tashkilotlar tomonidan nizomga ogʻishmay rioya etilishini taʼminlasinlar.

3. Vazirliklar, davlat qoʻmitalari va idoralar bir oy muddatda oʻz normativ-huquqiy hujjatlarini ushbu qarorga muvofiqlashtirsinlar.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.A. Xoʻjayev zimmasiga yuklansin.

1. Mazkur Nizom yuridik shaxslarga Oʻzbekiston Respublikasining alohida muhim va toifalangan obyektlarida qoʻriqlashning texnik vositalarini loyihalashtirish, montaj qilish, sozlash, taʼmirlash va texnik xizmat koʻrsatish ishlarini bajarishga ruxsatnoma berish tartibi va asoslarini (keyingi oʻrinlarda ruxsatnoma deb ataladi) belgilaydi.

2. Aniqlash vositalari, obyektga kirishni nazorat qilish va boshqarish vositalari, aniqlash vositalari hamda obyektga kirishni nazorat qilish va boshqarish vositalaridan olingan axborotni toʻplash, qayta ishlash va aks ettirish vositalari, aloqa va xavfni bildirish-chaqirish signalizatsiyasi vositalari, telekuzatish vositalari, kabel tarmoqlari va boshqa kommunikatsiyalar, nostandartlashtirilgan asbob-uskunalar, yordamchi vositalar (qoʻriqlashning texnik vositalari elektr taʼminoti tizimi, qoʻriqlovchi yoritish) qoʻriqlashning texnik vositalari hisoblanadi.

3. Ushbu Nizomda belgilangan tartibda Oʻzbekiston Respublikasi Milliy xavfsizlik xizmati (keyingi oʻrinlarda maxsus vakolatli organ deb ataladi) tomonidan rasmiylashtirilgan ruxsatnomaga ega boʻlmagan yuridik shaxslarni Oʻzbekiston Respublikasining alohida muhim va toifalangan obyektlarida qoʻriqlashning texnik vositalarini loyihalashtirish, montaj qilish, sozlash, taʼmirlash va texnik xizmat koʻrsatish ishlarini bajarish uchun jalb etishga yoʻl qoʻyilmaydi.

4. Ruxsatnoma Oʻzbekiston Respublikasi Ichki ishlar vazirligi tomonidan berilgan yongʻinga qarshi avtomatika vositalarini, qoʻriqlash signalizatsiyalarini, yongʻindan darak beruvchi va yongʻindan saqlovchi signalizatsiyalarni loyihalashtirish, montaj qilish, sozlash, taʼmirlash va texnik xizmat koʻrsatish boʻyicha faoliyatni amalga oshirish huquqiga litsenziyaga (keyingi oʻrinlarda litsenziya deb ataladi) ega boʻlgan yuridik shaxslarga rasmiylashtirilishi mumkin.

5. Ruxsatnoma olish uchun yuridik shaxs maxsus vakolatli organga:

yuridik shaxsning nomi va tashkiliy-huquqiy shakli, u joylashgan joy (pochta manzili), yuridik shaxs amalga oshirishni moʻljallayotgan qoʻriqlash, loyihalashtirish, montaj qilish, sozlash, taʼmirlash va texnik xizmat koʻrsatishning texnik vositalari turlari koʻrsatilgan ruxsatnoma berish toʻgʻrisidagi arizani;

yuridik shaxsning davlat roʻyxatidan oʻtkazilganligi toʻgʻrisidagi guvohnoma nusxasi;

tegishli hujjatlarni (oliy yoki oʻrta maxsus, kasb-hunar maʼlumoti toʻgʻrisidagi diplomlar, sertifikatlar va malaka toifasi berilganligi, oxirgi uch yilda malaka oshirish va maxsus tayyorgarlik kurslaridan oʻtganlik toʻgʻrisidagi boshqa hujjatlar) ilova qilgan holda har bir xodimning familiyasi, ismi, otasining ismi, tugʻilgan sanasi va joyi, pasportining seriyasi va raqami, yashash joyi va maʼlumoti, yuridik shaxsning shtatida egallab turgan lavozimi va mutaxassislik boʻyicha ish stajini koʻrsatgan holda xodimlarning malaka tarkibi toʻgʻrisidagi maʼlumotlarni;

oxirgi uch yilda yongʻinga qarshi avtomatika vositalarini, qoʻriqlash signalizatsiyalarini, yongʻindan darak beruvchi va yongʻindan saqlovchi signalizatsiyalarni va texnik qoʻriqlashning boshqa vositalarini loyihalashtirish, montaj qilish, sozlash, taʼmirlash va texnik xizmat koʻrsatish boʻyicha bajarilgan ishlar toʻgʻrisidagi maʼlumotlarni;

shtatda:

psixik kasalliklar, giyohvandlik, toksikomaniya yoki alkogolizm bilan bogʻliq holda dispanser hisobida turgan;

ularga nisbatan jinoiy ish qoʻzgʻatilgan;

qasddan jinoyat sodir etganligi uchun sudlangan xodimlar yoʻqligi toʻgʻrisidagi maʼlumotlarni (tegishli tibbiyot muassasalari va hududiy ichki ishlar organlaridan berilgan maʼlumotnomalar ilova qilingan holda) taqdim etadi.

Maxsus vakolatli organ ruxsatnoma berish uchun boshqa vakolatli organlarda mavjud boʻlgan zarur hujjatlar va axborotlarni belgilangan tartibda oʻzaro axborot hamkorligi yoʻli bilan, shu jumladan elektron tarzda mustaqil ravishda oladi, ushbu bandda nazarda tutilgan hujjatlar va axborotlar bundan mustasno.

6. Oʻzbekiston Respublikasining alohida muhim va toifalangan obyektlarida qoʻriqlashning texnik vositalarini loyihalashtirish, montaj qilish, sozlash, taʼmirlash va texnik xizmat koʻrsatish ishlarini bajarishga ruxsatnoma berish maxsus vakolatli organ tomonidan amalga oshiriladi.

7. Maxsus vakolatli organ 30 ish kunidan ortiq boʻlmagan muddatda yuridik shaxs tomonidan taqdim etilgan hujjatlarni koʻrib chiqadi, ular asosida ruxsatnoma berish yoxud ruxsatnoma berishni rad etish toʻgʻrisida qaror qabul qiladi.

8. Ruxsatnoma olish uchun yuridik shaxslarga quyidagi talablar qoʻyiladi:

yuridik shaxsda kamida uchta sanoat (ishlab chiqarish) obyektida yongʻinga qarshi avtomatika vositalarini, qoʻriqlash signalizatsiyalarini, yongʻindan darak beruvchi va yongʻindan saqlovchi signalizatsiyalarni va texnik qoʻriqlashning boshqa vositalarini loyihalashtirish, montaj qilish, sozlash, taʼmirlash va texnik xizmat koʻrsatish sohasida kamida uch yillik ish tajribasi mavjudligi;

yuridik shaxsning shtatida tegishli ixtisoslashuv boʻyicha (yongʻinga qarshi avtomatika vositalarini, qoʻriqlash signalizatsiyalarini, yongʻindan darak beruvchi va yongʻindan saqlovchi signalizatsiyalarni va texnik qoʻriqlashning boshqa vositalarini loyihalashtirish, montaj qilish, sozlash, taʼmirlash va texnik xizmat koʻrsatish) ixtisosli tayyorgarlikka va kamida uch yil ish stajiga ega boʻlgan kamida uch nafar xodim mavjudligi.

9. Oʻzbekiston Respublikasining alohida muhim va toifalangan obyektlarida qoʻriqlashning texnik vositalarini loyihalashtirish, montaj qilish, sozlash, taʼmirlash va texnik xizmat koʻrsatish ishlarini bajarish boʻyicha faoliyatni amalga oshirishda shaxslarning quyidagi toifalarini:

doimiy yashash joyiga ega boʻlmagan shaxslarni;

xorijiy shaxslarni yoki fuqaroligi boʻlmagan shaxslarni;

psixik kasalliklar, giyohvandlik, toksikomaniya yoki alkogolizm bilan bogʻliq holda dispanser hisobida turgan shaxslarni;

ularga nisbatan jinoiy ish qoʻzgʻatilgan shaxslarni;

qasddan jinoyat sodir etganligi uchun sudlangan shaxslarni yollashga yoki ishga jalb etishga yoʻl qoʻyilmaydi.

10. Ruxsatnomaning amal qilish muddati yuridik shaxsning arizasiga muvofiq belgilanadi, biroq litsenziyaning amal qilish muddatidan ortiq boʻlishi mumkin emas.

11. Ruxsatnoma berilgandan keyin maxsus vakolatli organ yuridik shaxsni berilgan ruxsatnomalar reyestriga kiritadi.

12. Quyidagi hollarda:

zarur tarzda rasmiylashtirilmagan hujjatlar taqdim etilgan yoki hujjatlar toʻliq boʻlmagan hajmda taqdim etilganda;

taqdim etilgan hujjatlarda ishonchsiz yoki notoʻgʻri maʼlumotlar mavjud boʻlganda;

yuridik shaxs va uning xodimlari ushbu Nizomning 4, 8 va 9-bandlarida nazarda tutilgan talablarga muvofiq boʻlmaganda ruxsatnoma berish rad etilishi mumkin.

13. Yuridik shaxsga ruxsatnoma berishni rad etish asoslanishi va yozma shaklda rasmiylashtirilishi kerak.

14. Ruxsatnoma berish rad etilgan taqdirda yuridik shaxs aniqlangan kamchiliklar bartaraf etilgandan keyin ruxsatnoma olish uchun takroran murojaat qilish huquqiga ega.

15. Maxsus vakolatli organ quyidagi asoslar boʻyicha:

yuridik shaxs tomonidan Oʻzbekiston Respublikasining alohida muhim va toifalangan obyektlarida qoʻriqlashning texnik vositalarini loyihalashtirish, montaj qilish, sozlash, taʼmirlash va texnik xizmat koʻrsatish ishlari sifatsiz bajarilganda;

Oʻzbekiston Respublikasining alohida muhim va toifalangan obyektlarida qoʻriqlashning texnik vositalarini loyihalashtirish, montaj qilish, sozlash, taʼmirlash va texnik xizmat koʻrsatish boʻyicha shartnoma majburiyatlari bir necha marta buzilganda yoki ularga rioya qilinmaganda;

litsenziya muddati tamom boʻlganda;

yuridik shaxs ruxsatnomaning amal qilishini muddatidan oldin toʻxtatish toʻgʻrisida ariza bilan murojaat qilganda;

yuridik shaxs tugatilganda — tugatilgan paytdan yoki qayta tashkil etish natijasida uning faoliyati toʻxtatilganda — qayta tashkil etilgan paytdan boshlab, uni oʻzgartirish bundan mustasno;

ruxsatnoma amal qilish davrida ruxsatnoma berish rad etilishiga olib kelishi mumkin boʻlgan holatlar aniqlanganda berilgan ruxsatnomaning amal qilishini toʻxtatish huquqiga ega.

16. Ruxsatnomaning amal qilishi toʻxtatilishi toʻgʻrisidagi yozma shaklda zarur tarzda rasmiylashtirilgan qaror qabul qilingan kundan boshlab uch kun mobaynida yuridik shaxsga yuboriladi.

17. Ruxsatnoma olgan yuridik shaxslar har yili 1-fevralgacha maxsus vakolatli organga obyektlarni, ularning idoraviy mansubligini, oʻrnatilgan qoʻriqlashning texnik vositalari turlari va sonini koʻrsatgan holda alohida muhim va toifalangan obyektlarda qoʻriqlashning texnik vositalarini loyihalashtirish, montaj qilish, sozlash, taʼmirlash va texnik xizmat koʻrsatish boʻyicha ular tomonidan amalga oshirilgan ishlar toʻgʻrisidagi maʼlumotlarni taqdim etishlari shart.

18. Berilgan ruxsatnomalar reyestridagi maʼlumotlar manfaatdor shaxslarning ular bilan tanishishi uchun ochiq hisoblanadi va yozma soʻrov boʻyicha ulardan koʻchirma sifatida taqdim etiladi.

19. Yuridik shaxs qayta oʻzgartirilgan, uning nomi yoki joylashgan joyi (pochta manzili) oʻzgargan taqdirda yuridik shaxs yoki uning huquqiy vorisi qayta roʻyxatdan oʻtkazilgandan keyin bir hafta muddatda maxsus vakolatli organga koʻrsatib oʻtilgan maʼlumotlarni tasdiqlaydigan tegishli hujjatlarni ilova qilgan holda ruxsatnomani qayta rasmiylashtirish toʻgʻrisida ariza berishi shart.

20. Ruxsatnoma qayta rasmiylashtirilgunga qadar yuridik shaxs unda koʻrsatilgan faoliyat turini oldin berilgan ruxsatnoma asosida amalga oshiradi.

21. Ruxsatnomani qayta rasmiylashtirishda maxsus vakolatli organ berilgan ruxsatnomalar reyestriga tegishli oʻzgartirishlar kiritadi. Ruxsatnomani qayta rasmiylashtirish ruxsatnomani qayta rasmiylashtirish toʻgʻrisida ariza olingan kundan boshlab besh ish kuni mobaynida amalga oshiriladi.

22. Ruxsatnomani qayta rasmiylashtirishda yoki uning amal qilish muddatini uzaytirishda yuridik shaxs oldin berilgan ruxsatnomani maxsus vakolatli organga qaytaradi.

23. Yoʻqotilgan yoki amal qilish muddati tamom boʻlmagan, biroq yaroqsiz holga kelgan ruxsatnoma oʻrniga yuridik shaxsning arizasiga koʻra dublikat berilishi mumkin.

24. Dublikat berishda yangi ruxsatnomada “Dublikat” belgisi qoʻyiladi, shuningdek oldingi ruxsatnomada belgilangan amal qilish muddati koʻrsatiladi.

25. Ishlarning bajarilishini nazorat qilish qonun hujjatlarida belgilangan tartibda amalga oshiriladi.

26. Ushbu Nizomni buzganlik uchun aybdor shaxslar qonun hujjatlarida belgilangan tartibda javob beradilar.